1. Tuneluki ñahi netu tunakushakama “mumafuku akukuminina”?

NEYI mwasemukili hanyima ya 1914, dikwila nawu munakushakama “mumafuku akukuminina” anshakaminu yamakonu. (2 Tim. 3:1) Wejima wetu tunatiyi yuma yahosheliyi Yesu kutalisha kumafuku akukuminina. Yumiyi munabombeli njita, nzala yakapwelendendi, nyitentanshi, yipupu, kushilahu kuluwalala nikukabisha antu jaYehova. (Mat. 24:3, 7-9, 12; Luka 21:10-12) Tunamoni cheñi antu anakumwekesha yilwilu yashimwiniyi kapostolu Pawulu (Talenu chikasha chinakwila nawu “ Antu Chidiwu Makonu.”) Etu aYinsahu jaYehova tuneluki chikupu netu tunakushakama “[mumafuku] akukuminina.”—Mika 4:1.

2. Malwihwinyi itukwakula?

² Chineli hanahiti mpinji yeneni kufuma mu 1914, dikwila nawu tunakushakama kumakumishilu ‘amafuku akukuminina.’ Chineli kukuma kudi kwakwihi, tunakukeña kwiluka ñakwilu yamalwihu alema: Yumanyi yikamwekana hanyima ‘yamafuku akukuminina’? Nawa yumanyi yinakukeñayi Yehova nindi twileña henohu yumiyi kanda yimwekani?

3. Kwesekeja nawuprofwetu wekala ha 1 Atesalonika 5:1-3, mbilanyi yakabidika nyunza?

³ Tañenu 1 Atesalonika 5:1-3. Pawulu washimwini “Ifuku daYehova.” Neyi chinadizatishiwu muniyi nsona, dinatalishi kumpinji yakatachika kulukuka “Babiloni Muneni,” wanta  wakaayi wansakililu yakutwamba nikukuma nanjita yaAmagedoni. (Chim. 16:14, 16; 17:5) Henohu idi ifuku kanda ditachiki, nyunza yakabidika nawu “Kuwunda nikukiñewa!” (kubalumuna kukwawu kwahosha nawu: “Kuwunda nikubula wubanji.”) Anlomboli amukaayi mpinji yikwawu azatishaña mazu wowamu neyi anakuhosha hakutiyañana kwanyuza. * Hela chochu, mbila yakwila nawu “kuwunda nikukiñewa” kwashimunaña Bayibolu kwakambukaku. Muloñadi? Neyi chumichi chinamwekani, antu akatoñojoka nawu anlomboli analeti kuwunda mukaayi nawa nawu mwosi wubanji. Ilaña, dihakatachika “lukadi lwasweja” nawa “kujilumuka kwakayishikena.”—Mat. 24:21.

4. (a) Yumanyi yitwatalilaña kumona kutalisha kumbila yakwila nawu “kuwunda nikukiñewa”? (b) Yumanyi yitweluka dehi kutalisha kuniyi mbila?

⁴ Kudi yuma yitweluka kutalisha kumbila ‘yakuwunda nikukiñewa.’ Hela chochu, yuma yikwawu hitwayilukaku. Tweluka wanyi chuma chikaletesha akabidiki hela chakabidikawu. Nawa tuneluki wanyi neyi akayibidika kamu hohu hela kapampa kakavulu. Hichidi namuloña nayuma yidi yejima yakamwekanaku, tweluka netu: Kwosi muntu wunateli kuleta kuwunda mukaayiku, dichi hitwatela kutoñojoka netu anlomboli amukaayi anateli kuleta kuwundaku. Ilaña iku dikubidika kwatuleja Bayibolu nawu twikali asoñama. Hichinjikijilu chikamwekesha nawu “ifuku daYehova” hidikutachika.

5. 1 Atesalonika 5:4-6 yatukwashaña ñahi kwikala adiloñesha ‘nefuku daYehova’?

⁵ Tañenu 1 Atesalonika 5:4-6. Pawulu watuleja chitwatela kudiloñesha ‘nefuku daYehova.’ Hitwatela kukaama “mutulu neyi chelañawu antu amakwawuku.” Twatela kwikala ‘atona’ nawa asoñama. Chakutalilahu, twatela kwikala asoñama kulonda tubuli kudibomba munsañu jamatuña nachiyuulu. Neyi tudiñija muyumiyi, tukwikala antu “amukaayi.” (Yow. 15:19) Tuneluki netu Wanta waNzambi hohu diwukaleta kuwunda mukaayi.

6. Tunakufwila kukwasha antu amakwawu kwiladi, nawa muloñadi?

⁶ Kubombela hakwikala atona, twatela cheñi kukwasha antu amakwawu kwiluka chashimwineñahu dehi Bayibolu kutalisha hayuma yikamwekana mukaayi. Twatela kwanuka netu neyi lukadi lwasweja lunatachiki, mpinji yakudifukula kudi Yehova yikekala yinamani dehi. Dimuloña waweni wutwatela kuzatila nañovu mumudimu wakushimwina. *

7. Chumanyi chinakukeñayi Yehova nindi twileña?

⁷ Mukanu kampinji kantesha kanashaliku henohu “ifuku” dindi kanda ditachiki, Yehova  nakukeña nindi tushi muchima hamudimu wakushimwina. Twatela kwikala “nayuma yayivulu yakuzata mumudimu waMwanta.” (1 Kor. 15:58) Yesu washimwini yuma yitwatela kwila. Chahosheliyi hayuma yejima yikamwekana mumafuku akukuminina, wabombelelihu cheñi nindi: “Nsañu yayiwahi atela kusambila kuyishimwina kunyuza yejima.” (Maku 13:4, 8, 10; Mat. 24:14) Toñojokenu: Mpinji yejima yimwayaña nakushimwina, mwashikijaña iwu wuprofwetu wamuBayibolu.

8. Mudimu wakushimwina waWanta wunakuyilaku ñahi hambidi?

⁸ Tukuhoshahu netudi chinakwenda mudimu wakushimwina waWanta? Chaaka nichaaka, iwu mudimu wunakuyilaku hambidi. Chakutalilahu, toñojokenu chinakuvulawu akwakushimwina mwahita kaayi kejima munanu mafuku akukuminina. Mu 1914 akwakushimwina adiña 5,155 mumatuña 43. Chayinu mpinji, akwakushimwina anashiki ku 8.5 miliyoni mumatuña 240. Hela chochu, mudimu wetu kanda wumani. Twatela kutwalekahu kuleja antu netu Wanta waNzambi hohu diwu wukamanisha kukala kwawantu.—Mas. 145:11-13.

9. Muloñadi chitwatela kutwalekelahu kushimwina nsañu yaWanta?

⁹ Mudimu wetu wakushimwina waWanta wakamana wanyi sampu Yehova nahoshi nindi kumishenu. Mpinji yamuchidinyi yinashaliku hakwila antu amwiluki Yehova niYesu Kristu? (Yow. 17:3) Hitunelukiku. Tuneluki hohu netu sampu lukadi lwasweja lunatachiki, “antu ejima [adi] nanyichima yashinshika yakukeña kwikala nawumi wahaya nyaaka” anateli kwiteja nsañu yayiwahi. (Yilw. 13:48) Tunateli kukwasha ñahi antu henohu mpinji kanda yimani?

10. Yumanyi yatwinkañayi Yehova kuzatisha hakudizisha antu chalala?

¹⁰ Yehova watwinkaña yuma yakuzatisha hakudizisha antu chalala kuhitila mukuloñesha kwindi. Chakutalilahu, twatambwilaña kufumba kukupompa kwamukachi kamulungu. Iku kupompa kwatukwashaña kwiluka chakuhosha halwendu lwatachi nihakufuntila. Kwatukwashaña cheñi chakulombola atudizi aBayibolu. Kuloñesha kwaYehova kunaloñeshi cheñi yuma yidi muChikasha Chetu chaYozelu Yakuzatisha Hakudizisha. Iyi yuma yatukwashaña . . .

•   kutachika kuhanjeka,

• kusañumuna antu,

• kukwasha antu kulonda adizi Bayibolu,

• kudizisha chalala hakulombola atudizi aBayibolu,

• nikutambika antu akweti mpwila kuya hawebu sayiti yetu nikwinza nakupompa.

Hela chochu, bayi neyi twatela kwikala hohu naniyi yozeluku, ilaña twatela nikuyizatishaña. * Chakutalilahu, hanyima yakuhanjeka namuntu wunamwekeshi mpwila, mwinkenu trakiti hela magazini kulonda yatañeñamu kushika nimpinji yimwakafuntaku. Dichi twatela kusha muchima hakushimwina nsañu yaWanta kakweji nikakweji.

11. Muloñadi chiyashililiku Progilamu yaKudiza Bayibolu haIntaneti?

¹¹ Progilamu yaKudiza Bayibolu yahaIntaneti yidi ha jw.org^® hinjila yimu mwakwashilañayi Yehova antu jindi kudiza chalala. (Yenu hanasonekiwu nawu BIBLE TEACHINGS > ONLINE LESSONS.) Muloñadi chaloñesheleliwu iyi ntanjikilu? Kakweji nikakweji, antu amavulu mwahita kaayi kejima anakuya haintaneti nakudiza Bayibolu. Iku kudiza kudi hawebusayiti yetu kunateli kuyikwasha awa antu kwiluka chalala chaMwizu daNzambi. Antu amakwawu imwahoshaña nawu anateli kushintajala hakwila eteji kudiza Bayibolu. Neyi anakushintajala yilejenu kudiza kudi hawebusayiti muEnglish hela yitemeshelenu linki yikuyilombola hakudiza. *

12. Yumanyi yinateli kudizayi muntu haProgilamu yaKudizila Bayibolu haIntaneti?

¹² Progilamu yaKudizila Bayibolu haIntaneti yinakuhosha haniyi nyitu: “Bayibolu niNsoneki Yachu,” “Antu Ashimunawu muBayibolu,” ‘niNsañu yamuBayibolu yaKuchiñeja.’ Muniyi Nyitu Atañishañamu:

• Bayibolu chiyinateli kukwasha muntu

• Chekalayi Yehova, Yesu niañelu

• Muloña waweni Nzambi chaleñeleliyi antu

• Muloña waweni chikwekalila kukabakana niyuma yatama

Iku kudiza kwashimuna cheñi Yehova . . .

• chakamanishayi makabi nikufwa,

• chakasañulayi afu

• nichakasinsishahu nfulumendi yawantu naWanta waNzambi.

13. Komana ntanjikilu yakudizila haintaneti yinasinsi hantanjikilu yakudizisha antu Bayibolu yitwazatishaña? Lumbululenu.

¹³ Iyi ntanjikilu yakudizila haIntaneti yinasinsi wanyi hantanjikilu yakudizisha antu Bayibolu. Yesu watwinka mudimu kwakwilisha atumbanji. Tunakuhweleli netu adi nampwila akuyaña nakudizila haintaneti, akukeña yuma yikudizañawu nikufwila kudizilahu yuma yikwawu. Neyi ela mwenimu, hadaha akwiteja kuyidizisha Bayibolu. Hanyima yakudiza kwejima, ntañi anamuleji kulomba muntu kulonda yakamudizishi Bayibolu. Ifuku nifuku kuloñesha kwetu kwatambwilaña antu akushika ku 230 akeñaña kudiza Bayibolu mwahita kaayi kejima kuzatisha webusayiti yetu. Chalema kuhanjeka mesu namesu namuntu.

14. Kwesekeja nanshimbi jaYesu jekala haMatewu 28:19, 20, twatela kuzata nañovu kulonda twilidi, nawa muloñadi?

¹⁴ Tañenu Matewu 28:19, 20. Hampinji yitunakulombola atudizi aBayibolu, twatela kuzata nañovu kulonda ‘twilisheña  atumbanji  . . . , kuyidizisha ahembeña yuma yejima yatulejayi Yesu.’ Twatela kukwasha antu kulonda eluki chichalemena kutondahu kumukalakela Yehova nikuhakwilaku Wanta windi. Chumichi chinatalishi mukwila nawu twatela kuyikwasha kulonda azatisheña yuma yinakudizawu nikudihana kudi Yehova nakupapatishewa. Dichuma chikayikwasha kupuluka hefuku daYehova.—1 Pet. 3:21.

15. Chumanyi chitukubula kutwesha kwila, nawa muloñadi?

¹⁵ Neyi chitwashimuna dehi hakusambila, kunashali hohu kampinji kantesha hakachi kananu mafuku nakukuma kwanshakaminu yamakonu. Muloña wachumichi, hitukutwesha kutwalekahu kudiza Bayibolu nawantu abulaña kumwekesha mpwila yakwikala atumbanji twaKristuku. (1 Kor. 9:26) Mudimu wunakukeñeka kuwuzata swayi-swayi. Kudi antu amavulu anakukeñeka kutiya nsañu yaWanta henohu mpinji kanda yimani.

16. Kwesekeja naChimwekeshu 18:2, 4, 5, 8, chumanyi chitwatela kwila? (Talenu cheñi tumazu twaheshina.)

¹⁶ Tañenu Chimwekeshu 18:2, 4, 5, 8. Awa mavasi amwekeshaña yuma yakeñañayi Yehova nindi akwakudifukula indi eleña. AkwaKristu alala ejima hiyatela kudibomba naBabiloni Muneniku. Henohu kadizi waBayibolu kanda yadizi chalala, hadaha wadiña wakundama kunsakililu yakutwamba. Hadaha wadiña nakutaña muniyi nsakililu nikuzataku nyidimu yawu. Hela hekwawu wahaniniku nimali kuniyi nsakililu. Henohu kadizi waBayibolu kanda amwiteji kwikala mukwakushimwina wabula kupapatishewa, watela kufuma munsakililu yakutwamba. Watela kusonekela chechi yayileñayi mukanda hela nsakililu yidi yejima yayileñayi yinakundami kuBabiloni Muneni nakuyileja nindi nafumimu. *

17. Nyidimwinyi yatela kutondolwelayi mukwaKristu, nawa muloñadi?

¹⁷ MukwaKristu walala hatela kuzata mudimu munadibombeli Babiloni Muneniku. (2 Kor. 6:14-17) Chakutalilahu, hatela kwiñila mudimu kuchechiku. Kubombelahu, mukwaKristu eñijawu kudi akwanyidimu amakwawu hatela kuzatila heluña hadifukwilaña kwitiya kwakutwambaku. Nawa neyi wadizatilaña yomweni, hatela kwiteja mudimu munadibombeli Babiloni Muneniku. Muloñadi chitunakuhoshela nankashi haniyi nsañu? Muloña tunakukeña wanyi kudibomba munyidimu nimunshidi  jakuloñesha kukweti majilu kumesu aNzambi.—Isa. 52:11. *

18. Manakwetu wumu wovwahilili ñahi yishina yamuBayibolu kutalisha kumudimu windi?

¹⁸ Yaaka yinahitihu, mukulumpi mukwakusoña amulejeli kudi iyala wukweti kampani yindi yakutuñatuña nindi amuzatiliku mudimu wakusoña hachechi yimu yadiña mutawuni mwashakamineña manakwetu. Iwu muntu welukili nindi ona manakwetu wakaanineña kuzatila hamachechi. Ilaña haniyi mpinji chamukalilili kuwana muntu watela kuzata iwu mudimu. Hela chochu, manakwetu wovwahilili yishina yamuBayibolu nawa wakaanini. Mulungu wahiñilihu, muchipapilu chansañu amwekeshelimu mwevulu wamukwakusoña mukwawu nakusha kulusu muchechi. Neyi manakwetu wetejeli kuzata iwu mudimu, chiña mwevulu windi diwadi kwikala muchina chipapilu. Toñojokenu chadi kutama ijina dindi kudi akwawu akwaKristu. Fwikijenu cheñi chadi kutiyayi Yehova.

19-20. (a) Yumanyi yitunadizi? (b) Yumanyi yitukadiza cheñi?

¹⁹ Kwesekeja nawuprofwetu wamuBayibolu, chuma chikwawu chikamwekana mukaayi himbila yakabidika nyuza yakwila nawu “kuwunda nikukiñewa.” Muloña wakwila Yehova natudizishi, tweluka netu nyuza hiyikatwesha kuleta kuwunda kwalala kwahaya nyaakaku. Yumanyi yitwatela kwila henohu chumichi kanda chimwekani nikujilumuka kwakalondelahu? Yehova nakukeña nindi tushi nankashi muchima hamudimu wakushimwina nsañu yaWanta nikwilisha atumbanji. Hampinji yoyimu, twatela kudambula chikupu kukwitiya kwakutwamba. Munabombeli kubula kwikala membala wawu nikutondolwela kuzata hela kwiñila nyidimu yinakundami kuBabiloni Muneni.

²⁰ Kudi yuma yikwawu yikalondelahu hampinji yakukumishaku ‘yamafuku akukuminina.’ Kudi cheñi yuma yikwawu yinakukeña Yehova nindi twili. Hiyumanyi yeniyi, nawa tunateli kudiloñesha ñahi nayuma yejima yinakwinza hambidi? Tukadiza yumiyi muchibaaba chinalondelihu.