1-2. (a) Anlomboli amukaayi keña abidiki nawudi? (b) Malwihwinyi itwatela kwakula?

FWIKIJENU nyuza dihu hiyinabidiki mbila iyashimwineñahu dehi yakwila nawu “kuwunda nikukiñewa.” Akadisamba nawu mukaayi munekali dehi kuwunda. Nyuza yikakeñaña tukatoñojoki netu anamanishi dehi kukala mukaayi. Ilaña hiyakatwesha kukañesha yuma yikalondelahuku. Muloñadi? Kwesekeja nawuprofwetu wamuBayibolu, “kujilumuka kwakayishikena, . . . nawa hiyakapulukaku.”—1 Tes. 5:3.

² Kudi malwihu alema itwatela kwakula: Yumanyi yikamwekana hampinji ‘yalukadi lwasweja’? Yumanyi yakeñañayi Yehova nindi twakeli hayina mpinji? Nawa tunateli kudiloñesha ñahi chayinu mpinji kulonda tukekali ashinshika halukadi lwasweja?—Mat. 24:21.

3. Kwesekeja na Chimwekeshu 17:5, 15-18, Nzambi wakamujilumuna ñahi “Babiloni Muneni”?

³ Tañenu Chimwekeshu 17:5, 15-18. “Babiloni Muneni” akamujilumuna. Neyi chitwahosha dehi, nyuza hiyikatwesha kukañesha yuma yikamwekana haniyi mpinjiku. Muloñadi? Muloña “Nzambi [wukasha] munyichima yawu kulonda akakoñi mwaya nkeñelu yindi.” Nkeñelwinyi yeniyi? Yakujilumuna kwitiya kwakutwamba kwejima, kushilahu niKristendomu. * Nzambi wakasha nkeñelu yindi  munyichima ‘yanseñu 10’ ‘yakanyama wamwisaña chisumi wuchinana nge-e.’ Nseñu 10 yinakwimenaku jinfulumendi jejima jikweti ñovu jakwashaña “kanyama wamwisaña,” dikwila nawu United Nations. (Chim. 17:3, 11-13; 18:8) Neyi awa matuña akweti ñovu anabalumukili dehi kwitiya kwakutwamba dichinjikijilu chikamwekesha nawu lukadi lwasweja lunatachiki. Yikekala himpinji yakutiyisha antu woma hamaseki.

4. (a) Mazwinyi akahosha nyuza akaletesha akalukuki nsakililu yakutwamba? (b) Chumanyi chakelawu antu adiña muniji nsakililu?

⁴ Hituneluki mazu akahosha nyuza akaletesha akamulukuki Babiloni Muneniku. Hadaha akahosha nawu kwitiya dikunakuletesha nyuza yibuleña kwikala mukuwunda nawa diwu aluwañeshaña yuma yelaña nfulumendi. Hela anateli kuhosha nawu ana makuloñesha amunsakililu anatambuli maheta niyiteli yayivulu. (Chim. 18:3, 7) Nyuza chiyikalukuka nsakililu yakutwamba hiyikajilumuna antu ejima ekalamuku. Ilaña, chinamwekani neyi nyuza yikakisañana kuloñesha kwansakililu yakutwamba. Hanyima yakwila iyi nyitayi anayikisañani dehi, antu adiñamu akeluka nawu anlomboli amunsakililu anakañanyi kwila mwakaniniwu nawa akadambula kuniji nsakililu.

5. Chumanyi chatukanayi Yehova kutalisha kulukadi lwasweja, nawa muloñadi?

⁵ Bayibolu yashimuna wanyi kuleha kwampinji yakamujilumunawu Babiloni muneni, ilaña tweluka netu hakashimbula wanyi. (Chim. 18:10, 21) Yehova watukana nindi “wakayihihisha owu mafuku” alukadi lwasweja kulonda indi “atondewa” ninsakililu yalala yikamwinewi. (Maku 13:19, 20) Hanu dinu chumanyi chikakeñañayi Yehova nindi twili hakachi kakutachika kwalukadi lwasweja nanjita yaAmagedoni?

6. Chumanyi chikwawu chitwatela kwila neyi tuleka kudibomba munsakililu yakutwamba?

⁶ Neyi chitwashimuna dehi muchibaaba chinafumihu, Yehova wakeñaña  akwakudifukula indi kwambukaku naBabiloni Muneni. Hela chochu, bayi neyi twatela kuleka kuya munsakililu hohuku. Ilaña twatela cheñi kufuukulahu kudifukula kudi Yehova. Talenu njila jiyedi mutwatela kwila mwenimu.

7. (a) Tunateli kutwalekahu ñahi kwovwahila nshimbi jaYehova jaloña? (b) Muloñadi Aheberu 10:24, 25 chiyahoshela nawu twatela kudifukwilaña hamu, nawa chumichi chalemenadi?

⁷ Chatachi, twatela kutwalekahu kwovwahila nshimbi jaYehova jaloña. Hitwatela kwiteja yilwilu yatama yamukaayiku. Chakutalilahu, hitwetejaña nyichidi yejima yawuvumbi, munadibombeli kudisumbula iyala neyala hela mumbanda namumbanda niyilwilu yikwawu yawutumwaku. (Mat. 19:4, 5; Rom. 1:26, 27) Chamuchiyedi, twatela kutwalekahu kudifukwila hamu nawakwetu akwaKristu. Twelaña mwenimu kala mpinji, chili Mwitala daWanta hela neyi chinatwesheki mumatala awamanakwetu hela tuhu mukuswamujoka. Hela chakwila kukamwekani chuma chamuchidinyi, hitwamba kaleka kupompaku. Hela chochu, twatela kupompelaña hamu “sweje-e dinu nanochu [chitunakumona netu] ifuku odu dinakuswina kwakwihi.”—Tañenu Aheberu 10:24, 25.

8. Nsañu yitwashimwinaña yikahimpika ñahi kumbidi?

⁸ Hampinji yalukadi lwasweja, nsañu yitwashimwinaña yikahimpika. Chayinu mpinji twashimwinaña nsañu yayiwahi yaWanta nikwilisha atumbanji. Ilaña haniyi mpinji, twakashimwinaña nsañu yidi neyi nvula yamalola yeneni chakadi woma. (Chim. 16:21) Twakashimwinaña netu kaayi kaSatana keña akajilumuni. Twakeluka chakekala nsañu yitwakashimwinaña nichakuyishimwina. Komana tukazatishaña njila yoyimu yitunazatishi yaaka yejimiyi hakushimwina nikutañisha? Tahindi twakazatishaña njila yikwawu? Tuneluki wanyi. Hichidi namuloña nachitwakashimwinañaku, ilaña twakekala nakukoleka kwakushimwina nsañu yaYehova yawunsompeshi nakuhamuka!—Ezek. 2:3-5.

9. Nyuza yikela ñahi nansañu yetu, nawa tunateli kukuhweleladi?

⁹ Chakadi nikujina, nsañu yitwakashimwinaña yikaleñela nyuza kufwila kutulekesha kushimwina. Neyi chitwamushindamenaña Yehova chayinu mpinji, dichi twakamushindamena nihaniyi mpinji. Twatela kukuhwelela chikupu netu Nzambi yetu wakatwinka ñovu yakumanisha mudimu windi.—Mika 3:8.

10. Neyi chashimunawu haLuka 21:25-28, antu akela ñahi hampinji yalukadi lwasweja?

¹⁰ Tañenu Luka 21:25-28. Hampinji yalukadi lwasweja antu akahayama hakumona yuma yejima yakuhweleleliwu nawu yikashimbula hiyikujiya. ‘Akakabakana’ nikwakamena nawu hadaha akuyijaha muloña wakukala kwabulahu dehi kumwekana muchihandilu chawantu. (Zef. 1:14, 15) Haniyi mpinji chihandilu chawantu chikakala kushilahu nichawantu jaYehova. Chineli hitudi ampata yamunu mwishinaku, twakahita mukukala kwasweja. Hadaha hitwakekala nayuma yakeñekañaku.

11. (a) Muloñadi antu chakahoshelañawu hadi aYinsahu jaYehova? (b) Muloñadi chitwatela kubulila kuchiina lukadi lwasweja?

¹¹ Antu akajilumwinawu jinsakililu jawu akahila muloña akamona aYinsahu jaYehova anatwalekihu nakudifukula. Akamwekesha  kuzuwa kwawu kuhitila mukutandisha nsañu yatama haintaneti. Akwanyuza ninlomboli yawu Satana, akatuhela muloña kuloñesha kwetu hohu dikukashalahu. Hiyakashikija yikonkwanyi yawu yakukisañana nsakililu jejima hanu hesekiku. Dichi akahoshaña nankashi hadi etu. Haniyi mpinji nyuza yikekala Gogi wakuMagogi. * Akadibomba hamu nakulukuka antu jaYehova. (Ezek. 38:2, 14-16) Tunateli kutachika kudakamena hayuma yakamwekana hampinji yalukadi lwasweja, sweje-e muloña wakwila tuneluki wanyi yuma yejima. Hela chochu, tuneluki chikupu netu: Hitwatela kuchiina lukadi lwaswejaku. Yehova wakatwinka nshimbi yakutupulwisha nachu. (Mas. 34:19) “[Twakemana] zululu-u nakubandula nyitu [yetu] kwiwulu” muloña twakeluka netu “wamwinu [wetu] wunakuswina kwakwihi.” *

12. “Nduñu wamaana nikashinshi” watudizishañadi kutalisha kulukadi lwasweja ludi kumbidi?

¹² “Nduñu wamaana nikashinshi” watudizishaña chitwatela kwikala ashinshika hampinji yalukadi lwasweja. (Mat. 24:45) Natudizishi munjila jamboka-mboka, chakutalilahu, mumaprogiramu akupompa kwetu kweluña amu 2016-2018. Munawa maprogiramu, atukwashileña kwikala nayilwilu yakeñekaña yitwatela kwikala nayu chitunakuswina kwakwihi nefuku daYehova. Tuhanjekenu chantesha haniyi yilwilu.

13. Tunateli kukolesha ñahi kashinshi ketu kudi Yehova, nawa muloñadi chitwatela kwilila mwenimu chayinu mpinji?

¹³ Kashinshi: Mutu wakupompa kwamu 2016 wahosheleña nawu “Ikalenu Ashinshika Kudi Yehova!” Iyi progiramu yatukwashili nawu neyi tukolesha wubwambu wetu naYehova, tukwikala ashinshika kudi yena. Atwanukishili nawu tunateli kuswina kwakwihi naYehova kuhitila mukulomba chakufuma hamuchima nikudiza Izu dindi chikupu. Kwila mwenimu kwatwinkaña ñovu yakushinda kukala kwasweja. Chitunakuswina kwakwihi nakukuma kwakaayi kaSatana, twatela kwiluka netu tukumonaña kukala kwasweja kunateli kweseka kashinshi ketu kudi Nzambi niWanta windi. Antu akutusehaña. (2 Pet. 3:3, 4) Chumichi chikatumwekena muloña wakubula kudiñija munsañu jamatuña nachiyuulu. Twatela kukolesha kashinshi ketu chayinu mpinji kulonda tukekali ashinshika hampinji yalukadi lwasweja.

14. (a) Kuhimpikanyi kukekalaku kutalisha hadi amanakwetu hamaseki? (b) Muloñadi chitwakakeñekelaña kwikala ashinshika hayina mpinji?

¹⁴ Hampinji yalukadi lwasweja, hakekala kuhimpika hadi amanakwetu alombolaña hanu hamaseki. Mpinji yimu, awayishewa ejima achidi heseki akayipompeshela mwiwulu kulonda akazatiku mudimu wakulwa njita haAmagedoni. (Mat. 24:31; Chim. 2:26, 27) Ichi chinayi mukwila nawu Izanvu Dalombolaña twakekala nadu hamaseki wanyi. Hela chochu, izaza deneni dikashala dadiloñeshela chadimu. Amanakwetu ashikahu amudi anyikoku acheñi akalombolaña. Twakafwilaña kumwekesha netu twashinshika kudi Yehova kuhitila mukuzatila hamu  nawu nikulondela nshimbi jayinkañawu kudi Nzambi. Hakwila tukapuluki chiña tukayovwahilaña.

15. Tunateli kwikala ñahi omika, nawa muloñadi chitwatela kwilila mwenimu chayinu mpinji?

¹⁵ Kuumika: Mutu wakupompa kwamu 2017 wahosheleña nawu “Bayi Muzeyaku!” Iyi progiramu yatukwashili kwikala omika. Twadizili netu kuumika hikwashindamenaña hayuma neyi yidi chiwahiku. Tunateli kuumika neyi tushindamena hadi Yehova. (Rom. 12:12) Bayi tuvulamena mwatukaniniyi Yesuku. Watukanini nindi: “Muntu wakomika kushika nikunsa, diyi akamwinawu.” (Mat. 24:13; tth.) Ichi chikaninu chinatalishi mukwila nawu twatela kwikala ashinshika hela chakwila tunakumona kukala kwamuchidinyi. Neyi tuumikaña kukala chayinu mpinji, tukwikala akola chikupu henohu lukadi lwasweja kanda lutachiki.

16. Chumanyi chamwekeshaña nawu twahamuka nawa tunateli kwikala ñahi ahamuka chayinu mpinji?

¹⁶ Kuhamuka: Mutu wakupompa kwamu 2018 wahosheleña nawu “Ikalenu Ahamuka!” Iku kupompa kwatwanukishili nawu hitwekalaña ahamuka muloña wañovu jetuku. Neyi chitwashindamenaña hadi Yehova hakwila nawu tuumikeña, twatela cheñi kumushindamena Yehova hakwila twikali ahamuka. Tunateli kusweja ñahi kushindamena hadi Yehova? Kuhitila mukutaña Izu dindi mafuku ejima nikutoñojoka chikupu Yehova chapulwishiliyi antu jindi kunyima. (Mas. 68:20; 2 Pet. 2:9) Neyi nyuza yinatulukuki halukadi lwasweja, twakakeñekaña kwikala ahamuka nikumukuhwelela Yehova kubadika kunyima. (Mas. 112:7, 8; Heb. 13:6) Neyi tumukuhwelela Yehova chayinu mpinji, twakekala ahamuka neyi anatulukuki kudi Gogi. *

17. Muloñadi chitwatela kubulila kuchiina Amagedoni? (Talenu mwevulu wudi hakava.)

¹⁷ Neyi chashimwini chibaaba chinafumihu, etu amavulu tunashakami chihandilu chetu chejima mumafuku akukuminina. Ilaña tunakutalila cheñi kupuluka halukadi lwasweja. Njita yaAmagedoni diyi yakakumisha nshakaminu yamakonu. Hela chochu,  hitwatela kutiya womaku. Muloñadi? Muloña iyi yikekala hinjita yaNzambi. (Yish. 1:33; Ezek. 38:18-20; Zek. 14:3) Neyi Yehova nahani dehi nshimbi, Yesu Kristu diyi wakalombola mashidika aNzambi kunjita. Wakekala hamu nawawayishewa akasañulawu nimazaza awañelu. Wejima wawu akazuña njita naSatana hamu niandemoni jindi nimashidika indi ahamaseki.—Dan. 12:1; Chim. 6:2; 17:14.

18. (a) Yehova watukana nindidi? (b) Chimwekeshu 7:9, 13-17, yayileñelaña kukuhweleladi hayuma yakamwekana kumbidi?

¹⁸ Yehova watukana nindi: “Hikwakekala chitwa, chakachilawu nawu akukatishi nachu, chakakolaku.” (Isa. 54:17) “Izaza deneni” dawantu jaYehova ashinshika dakapuluka “mulukadi lwasweja.” Kuhiñahu dakatwalekahu kudifukula kudi yena. (Tañenu Chimwekeshu 7:9, 13-17.) Bayibolu yatuleñelaña kukuhwelela chikupu netu twakapuluka kumbidi. Tweluka netu “Yehova wahembaña ashinshika.” (Mas. 31:23) Antu ejima amukeña nawa amushimekaña Yehova akazañalala hakumona chakajilikayi ijina dindi dajila.—Ezek. 38:23.

19. Nshakaminu yamuchidinyi yitunakuchiñilila kumbidi?

¹⁹ Toñojokenu chadi kusonekawu mazu ekala ha 2 Timotewu 3:2-5 neyi adiña nakulumbulula antu akekala mwituña dadiha mwakadi Satana. (Talenu chikasha chinakwila nawu “ Antu Chakekalawu Kumbidi.”) Manakwetu George Gangas, wadiña Mwizanvu Dalombolaña, wahosheli nindi: “Ituña dikawaha hampinji yikela antu ejima anakudifukula kudi Yehova. Katataka mushakameña mwituña dadiha. Mwakashakama haya nyaaka. Twakashakamaña haya nyaaka.” Iku hikuchiñeja kwakuwahi chikupu.