MUKWAKUTALA JANCHILU washinshikaña chikunachi hela chinakwenda mpepela. Welukaña nindi kunakwinza nvula yeneni yampepela yinakwinza mwiluña mudi antu amavulu. Hamuloña wakwakamena antu, wazataña nañovu kulonda yayisoñamishi henohu kuchidi mpinji.

Munjila yoyimu, Yehova nakusoñamisha antu ejima ashakama heseki “kumpepela” yafwana kubadika chuma chejima chinateli kutiyawu kunyijimbu yashimunaña akwakutala hajanchilu. Nakwila ñahi mwenimu? Nawa tuneluki ñahi netu nakuyinka antu mpinji yeneni kulonda ahimpi? Hakwila twakuli awa malwihu, tuhanjekenu ntahi Yehova chayisoñamishiliyi antu kunyima.

Mumpinji yakunyima, Yehova wasoñamishili antu kutalisha ‘kumpepela yeneni’ hela wunsompeshi waleteleñayi hadi antu adikañileña nanshimbi jindi. (Yish. 10:25; Yere. 30:23) Mpinji yidi yejima, wasoñamishileña ejima akwakudikaña henohu kuchidi mpinji nawa wayilejeleña chateleli kwilawu hakwila amwovwahileña. (2 Anya. 17:12-15; Nehe. 9:29, 30) Hakwila yakwashi antu kulonda ahimpi, kakavulu wazatishaña ambuña indi ashinshika hamaseki kushimwina wunsompeshi windi nikuyikwasha antu kwiluka nawu atela kuzatilahu swayi-swayi.—Amosa 3:7.

Nowa amuzatishili kudi Nzambi kushimuna nsañu yawunsompeshi. Hadi yaaka yayivulu, wasoñamishili antu atama kutalisha kuDibaji deneni. (Kutach. 6:9-13, 17) Wayilejeli cheñi chateleleli kwilawu kulonda akapuluki, chakwila enjili nakumutena nawu “mukwakushimwina kuloña.”—2 Pet. 2:5.

Hela chakwila Nowa wayilejeli, antu amudina Dibaji adiwili nsañu yamulejeliwu kudi Nzambi. Amwekesheli nawu adiña adana chikuhwelelu. Chafuminimu, afwili “chenjili Dibaji nakuyijilumuna wejima wawu.” (Mat. 24:39; Heb. 11:7) Chashikili kukuma kwawu, hiyatwesheli kuhosha nawu Nzambi hayisoñamishiliku.

Mpinji yakunyima, Yehova wasoñamishileña antu henohu “chinjimbi” chindi chawunsompeshi kanda chitachiki. Hela chochu, wayinkeleña antu mpinji yeneni yakuhimpa. Chakutalilahu, henohu kanda yaleti yipupu 10 muEjipitu wasambilili kuyisoñamisha. Yehova watemesheli Mosi niAroni kuya nakumusoñamisha Fwaro niambuña indi hadi chipupu chamu 7 chanvula yamalola yeneni yakukisañana. Chineli nvula yamalola yeneni yatachikeleña ifuku dalondelelihu, komana Nzambi wayinkeli mpinji yeneni yakukeñelamu hakubatama kuniyi nvula? Bayibolu yashimuna nawu: “Ahadi [ambuña aFwaro] atiyili woma wezu daYehova atemwishili niañamba jawu niyimuna yawu nakuyiñija mumatala; abulili kwakama izu daYehova ashiyili niañamba jawu niyimuna yawu mumpata.” (Kwid. 9:18-21) Chakadi nikujina, Yehova wayisoñamishili, chakwila ana atiyilili akabakeni wanyi neyi akwawu.

Fwaro niambuña indi niwena ayisoñamishili kuchipupu chamu 10. Ilaña hamuloña wawusupi wawu adiwili kusoñamisha. (Kwid. 4:22, 23) Chafuminimu, anyanawu awedi afwili. Chatamini nankashi! (Kwid. 11:4-10; 12:29) Komana atiyilili kusoñamisha henohu kuchidi mpinji? Eña! Mosi wayisoñamishili aIsarela kutalisha kuyipupu 10 yenjileña nawa wayilejeli chatela kupulwishawu yisaka yawu. (Kwid. 12:21-28) Antu añahi ovwahilili? Antu akushika ku 3 miliyoni kushilahu  niaisarela, “adibomba niacheñi niacheñi” abula kwikala aIsarela niaEjipitu, apulukili kuwunsompeshi waNzambi nawa afumini muEjipitu.—Kwid. 12:38.

Neyi chinamwekeshiwu muniyi yakutalilahu, mpinji yejima Yehova wayinkeleña antu mpinji kulonda atiyilili kusoñamisha kwindi. (Kuhit. 32:4) Yehova welililidi mwenimu? Kapostolu Petulu walumbulwili nindi Yehova “hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.” (2 Pet. 3:9) Nzambi wadiña nakuyakamena antu. Wakeñeleña nindi abalumuki munyichima nikuhimpa yitoñojoka yawu henohu wunsompeshi windi kanda wushiki.—Isa. 48:17, 18; Rom. 2:4.

Nimakonu, antu ejima atela kwovwahila kusoñamisha kwalema kunakubidikawu mwahita iseki dejima. Yesu hadiñayi hamaseki, wasoñamishili nindi nshakaminu yamakonu akayijilumuna hampinji yikwakekala “lukadi lwasweja.” (Mat. 24:21) Kutalisha kunowu wunsompeshi, wahosheli hawuprofwetu washimwineña yuma yadi kukuhwelelawu kumona akwakumulonda nimwadi kuhitawu neyi mpinji hiyikushika kwakwihi. Yesu walumbulwili yuma yamaneni yitunakumona makonu.—Mat. 24:3-12; Luka 21:10-13.

Kwesekeja nawuna wuprofwetu, Yehova nakuleja antu ejima kulonda atondihu kumukalakela nikumwovwahila. Wakeñaña nindi antu ovwahila ejima adiluñisheña chayinu mpinji kushilahu ninkisu yakatambwilawu kumbidi mwituña dindi dadiha. (2 Pet. 3:13) Yehova wakeñaña kukwasha antu kukuhwelela muyikaninu yindi. Wayinka “nsañu yayiwahi yaWanta” yashimwiniyi Yesu nindi “akayishimwina mwahita iseki dejima mwashakamawu antu kulonda yikekali wunsahu kudi akwanyuza yejima.” (Mat. 24:14) Nzambi wazatishaña akwakudifukula indi alala kutiyakesha “wunsahu” hela kushimwina iyi nsañu yaWanta mumatuña 240. Yehova nakukeña antu amavulu atiyilili kusoñamisha kwindi kulonda akapuluki hefuku “dakukisañana” kwawunsompeshi windi.—Zef. 1:14, 15; 2:2, 3.

Lwihu lwalema ludi nawu, komana Yehova wayinkaña antu mpinji yeneni kulonda ahimpi? Wunsahu wamwekeshaña nawu mpinji yejima wahanaña mpinji. Lwihu lukwawu ludi lwakwila nawu: Komana antu akutiya kusoñamisha kwaNzambi henohu kuchidi mpinji? Dichi wejima wetu tutwalekihu nakukwasha antu kulonda akapuluki kukukuma kwanshakaminu yamakonu.