1. Yehova nateli kwila ñahi hakwila yashikiji nkeñelu yindi?

YEHOVA nateli kwikala chuma chejima hakwila nawu yashikiji nkeñelu yindi. Chakutalilahu, Yehova wekala Ntañishi, Nkundeji, Mukwakushimwina. Iyi hiyakutalilahu yantesha hohu. (Isa. 48:17; 2 Kor. 7:6; Ñal. 3:8) Hela chochu, kakavulu wazatishaña antu kulonda yashikiji nkeñelu yindi. (Mat. 24:14; 28:19, 20; 2 Kor. 1:3, 4) Yehova nateli cheñi kutwinka wejima wetu maana niñovu yitwakeñaña hakwila twikali chuma chidi chejima kulonda tushikiji nkeñelu yindi. Imu dimwatalisha chinateli kwikalayi Yehova hela kutwilisha kwikala chuma chejima kulonda tushikiji nkeñelu yindi.

2. (a) Muloñadi mpinji yikwawu chitwajinokelaña neyi chakwila Yehova nakutuzatisha? (b) Tukuhanjekadi muchinu chibaaba?

² Wejima wetu twakeñaña kutuzatisha kudi Yehova, ilaña amakwawu anateli kujinoka neyi chakwila Yehova nakuyizatisha. Muloñadi? Muloña wakukula, yuma chiyinakuyendela niwuswa wukwetiwu, yumiyi yinateli kuyileñela kutoñojoka nawu akutwesha wanyi. Munjila yikwawu, amakwawu anateli kutoñojoka nawu nyidimu yinakuzatawu yinashikili nawa kwila akeñelahu nyidimu yikwawu nehi. Muchinu chibaaba, tukuhanjeka chinateli kuzatishayi Yehova muntu wudi wejima kulonda yashikiji nkeñelu yindi. Kuhiñahu, tukushinshika nsañu yamuBayibolu yinakumwekesha Yehova chayinkeliyi amayala niambanda muchima wakufwila kukoña yuma niñovu yakwilamu. Nkumininaku, tukuhanjeka chitunateli kumwiteja Yehova kutuzatisha.

3. Kwesekeja nachinashimuni Afwilipi 2:13, Yehova nateli kutwinka ñahi muchima wakufwila kwilamu?

³ Tañenu Afwilipi 2:13. * Yehova nateli kutwinka muchima wakufwila kwilamu. Nateli kwila ñahi mwenimu? Chakutalilahu, tunateli kumona muntu wunakukeñeka wukwashu hela mudimu wunakukeñeka kuzatilahu muchipompelu. Indi kwiji akulumpi ataña mukanda wunafumi kukasanji wunakuhosha hakukankila kudi muyipompelu yikwawu. Hadaha tunateli kudihula netu, ‘Natela kwila ñahi hakwila nikazatiku?’ Indi kwiji anatwinki mudimu wakola, ilaña tunakujinoka neyi chakwila tukutwesha kuwuzata chiwahi. Hela hanyima yakutaña Izu daNzambi, tunateli kudihula netu, ‘Nateli kuzatisha ñahi iyi vasi kulonda nikwashiku amakwawu?’ Yehova hanateli kutukanjikija kwila chuma chidi chejimaku. Ilaña neyi Yehova yamona nindi tunakutoñojoka yuma yitwatela kwila, nateli kutukwasha kwikala namuchima wakufwila kukoña yuma nikwilamu.

4. Yehova nateli kutwinka ñahi ñovu yakwilamu?

⁴ Yehova nateli cheñi kutwinka ñovu yakwilamu. (Isa. 40:29) Munjilanyi? Nateli kutwinka spiritu yindi yajila kulonda twikali nañovu yabadika. (Kwid. 35:30-35) Yehova nateli kuzatisha kuloñesha kwindi kulonda yatudizishi chakuzata nyidimu yimu. Neyi chakwila muneluki wanyi chakuzata mudimu, lombenu wukwashu. Nawa mpinji yejima mulombenuña Tata yetu wekala mwiwulu kulonda yayinki “ñovu yabadika hañovu jawantu.” (2 Kor. 4:7; Luka 11:13) MuBayibolu mwekala yakutalilahu yayivulu yawamayala niambanda enkeliyi Yehova muchima wakufwila kukoña yuma niñovu yakwilamu. Chitukuhanjekaña haniyi yakutalilahu, toñojokenu Yehova chinateli kuyizatishayi munjila yoyimu.

5. Yumanyi yitunadiziliku hampinji yamuzatishiliwu Mosi kudi Yehova hakwamwina antu Jindi?

⁵ Yehova wamwilishili Mosi kwikala mukwakuyamwina aIsarela. Mpinjinyi yamuzatishiliwu kudi Yehova? Komana yadiña mpinji yelili Mosi anamudizishi dehi “maana ejima awaEjipitu”? (Yil. 7:22-25) Inehi, Yehova wamuzatishili Mosi hanyima yakwila namukwashi dehi kwikala wadizoza nawa muntu wawunda. (Yil. 7:30, 34-36) Yehova wamukwashili Mosi kwikala wahamuka kulonda yahoshi nanyuli wamuEjipitu wadiña nañovu. (Kwid. 9:13-19) Yumanyi yitwatela kudizila kuchamuzatishiliwu Mosi nimpinji yamuzatishiliwu kudi Yehova? Yehova wazatishaña antu embujolaña yilwilu yindi nawa ashindamenaña hañovu yindi.—Fwi. 4:13.

6. Yumanyi yitunadiziliku chamuzatishiliwu Bazilayi kudi Yehova kukwasha Mwanta Davidi?

⁶ Chimwahitili yaaka yayivulu, Yehova wazatishili Bazilayi kumukwasha Mwanta Davidi. Davidi niantu adiña ‘nanzala, azeyeli nawa afwili mpwila’ hatemukileñawu mwana kaDavidi, Abisalomi. Bazilayi, wadiña kashinakaji haniyi mpinji, washili wumi windi hakatoña hamu niantu amakwawu kulonda amukwashi Davidi niantu adiñayi nawu. Bazilayi watoñojokeli wanyi nindi Yehova nateli kumuzatisha wanyi muloña wakukula. Ilaña, wazatishili yuma yadiñayi nayu kulonda yakwashi ambuña aNzambi adiña mukukankila. (2 Sam. 17:27-29) Chumanyi chitunadiziliku? Hichikweti muloña nayaaka yitukwetiku, Yehova nateli kutuzatisha  kulonda tukwashi akwetu akwakwitiya, chili amanakwetu niahela mutwashikaminaña hela adi kwiluña dacheñi anakankili. (Yish. 3:27, 28; 19:17) Hela chakwila hitukutwesha kuyikwashaku, tunateli kuhana yawaana kumudimu wamukaayi kejima kulonda ana mali ayizatishi kukukwasha adi mukunkaakila.—2 Kor. 8:14, 15; 9:11.

7. Yehova wamuzatishili ñahi Simeyona, nawa chumichi chatukoleshaña ñahi?

⁷ Yehova wamukanini Simeyona, iyala wadiña wakula muYerusalema nindi wakafwa wanyi sampu namoni Mesiya. Ichi chikaninu chatela chamukundejeli Simeyona chineli wamuchiñililili Mesiya hadi yaaka yayivulu. Yehova wamukiswilili Simeyona muloña wachikuhwelelu nikuumika kwindi. Ifuku dimu, “chamulombweliwu kudi spiritu” weñilili mutembeli. Mwenimu wamweni nkemba Yesu nawa Yehova wamuzatishili Simeyona kuprofweta hadi mwana nindi diyi Kristu. (Luka 2:25-35) Hela chakwila Simeyona wafwili henohu Yesu kanda yatachiki mudimu windi hanu hamaseki, wazañaleli hakumuzatisha kudi Yehova muyina njila, nawa wakatambwila yuma yayiwahi kumbidi. Mwituña dadiha, ona iyala washinshika wakamona chiyuulu chaYesu chichakaleta nkisu kuyisaka yejima yahamaseki. (Kutach. 22:18) Ninetu tunateli kwikala namuzañalu munjila yidi yejima mukutuzatishilañayi Yehova mumudimu windi.

8. Yehova nateli kutuzatisha ñahi neyi chamuzatishiliyi Baranaba?

⁸ Mumafuku awapostolu, iyala wadiña nachisambu Yosefu, wadihanini kulonda amuzatishi kudi Yehova. (Yil 4:36, 37) Chineli Yosefu wadiña nakukundeja antu, apostolu amuteneneña nawu Baranaba, chaya mukwila nawu “Mwana kaNkundeji.” Chakutalilahu, chelili Sawulu yekali mukwaKristu, amanakwetu amavulu amuchinineña muloña wakabishileña yipompelu kunyima. Hela chochu, Baranaba wamukundejeli nikumukwasha Sawulu, chumichi chamuzañalesheli Sawulu. (Yil 9:21, 26-28) Nkumininaku, akulumpi muYerusalema akeñeleña kukolesha amanakwetu ashakamineña kwakulehi chidi neyi muAntiyoki yamuSiriya. Hinyi atemesheliwu? Baranaba! Atondeli chiwahi. Bayibolu yatulejaña nawu Baranaba watachikili “kuyikolesha wejima wawu nindi atwalekihu kwikala mudi Mwanta namuchima wejima.” (Yil. 11:22-24) Nimakonu, Yehova nateli kutukwasha kwikala “Mwana kaNkundeji” hadi akwetu akwaKristu. Chakutalilahu, nateli kutuzatisha kulonda tukundeji ana anafwishi antaña jawu. Hela nateli kutusañumuna kuya nakuhempula hela kutemeshela nshiña muntu wakata hela wunaneñi kulonda tumukundeji. Munateli kumwiteja Yehova kuyizatisha neyi chamuzatishiliyi Baranaba?—1 Tes. 5:14.

9. Yumanyi yitunadizili kudi Yehova chamukwashiliyi manakwetu Vasily kwikala kabiña watelela?

⁹ Yehova wamukwashili Manakwetu Vasily kwikala kabiña watelela. Chamutondeliwu Vasily kwikala mukulumpi hadiñayi nayaaka 26, watiyileña woma nindi nashikihu wanyi kukwasha chipompelu, sweje-e ana ahitileña mukukala. Hela chochu, amudizishili kudi akulumpi anashimbuli nikuhitila muShikola yaMudimu waWanta. Vasily wazatili nañovu. Chakutalilahu, wasonekeli yuma yantesha yateleli kwilayi. Chatachikiliyi kuzatila hayuma yasonekeliyi, walekeli kutiya woma. Chayinu mpinji wahoshaña nindi: “Chuma chantiyishileña woma hayina mpinji, chinakunletela muzañalu. Neyi Yehova yankwasha kuwana nsona yatelela yakukundeja nachu manakwetu hela muhela muchipompelu,  chanzañaleshaña chikupu.” Enu amanakwetu, neyi mudihana kudi Yehova kulonda yayizatishi neyi cheliliyi naVasily, nateli kuyinka ñovu yakuzata nyidimu yayivulu muchipompelu.

10. Abigayili welilidi, nawa yumanyi yimunadizi kuyuma yeliliyi?

¹⁰ Davidi niantu jindi ayikupishileña kudi Mwanta Sawulu nawa akeñeleña wukwashu. Antu jaDavidi alombeli yakuda kudi kaIsarela waheta wejina daNabali. Amulombeli muloña elukili nawu adiña nakumuhembela Nabali nyikoku yindi muchinkalampata. Ilaña Nabali, wayuminini. Davidi wahilili chakwila wakeñeleña kumujaha Nabali niamayala ejima amwitala dindi. (1 Sam. 25:3-13, 22) Hela chochu, ñoda Nabali, Abigayili wadiña walubanji nawa welukili. Wamwekesheli kuhamuka, dichi wayili nakudinata kunyendu yaDavidi nakumulembelela kulonda yabuli kwikala namuloña wamashi kuhitila mukufuntisha katama nakatama. Wamukwashili kulonda yashiyi yuma yejima mumakasa aYehova. Kashinshi nimazu akudizoza amwekesheliyi Abigayili amushikili Davidi hamuchima. Wenjili nakwiluka nindi Yehova diyi wamutemesheli. (1 Sam. 25:23-28, 32-34) Abigayili wekalili nayilwilu yaletesheli Yehova yamuzatishi. Munjila yoyimu, ahela akwaKristu ekalaña ababala nawa nakashinshi anateli kuyizatisha kudi Yehova kukolesha yisaka yawu niakwawu muchipompelu.—Yish. 24:3; Tit. 2:3-5.

11. Anyana kaShalumi awambanda elilidi, nawa anyi ayimbujolaña makonu?

¹¹ Chimwahitili yaaka yayivulu, anyana kaShalumi awambanda adiña hakachi kawantu azatishiliwu kudi Yehova kutuñulula mpwembu jaYerusalema. (Nehe. 2:20; 3:12) Hela chakwila tata yawu wadiña kalamba, anyana kaShalumi awambanda adihanini kuzata mudimu wakola nawa wafwana. (Nehe. 4:15-18) Ambukiliku chikupu nawatulamba akuTekowa, abulili ‘kusha yifwiji yawu’ kumudimu. (Nehe. 3:5) Fwikijenu muzañalu watiyiliwu awa anyana kaShalumi awambanda chelili mpwembu yimani mumafuku 52! (Nehe. 6:15) Munanu mafuku etu, ahela adihana atiyaña muzañalu kukalakala nyidimu yajila yaNzambi chidi neyi kuzataku nyidimu yakutuña nikuwahisha matala aYehova. Hakwila nawu iwu mudimu wuzatiki, chakeñekaña awa ahela ashinshika, eluka nyidimu nawa akweti iyena.

12. Yehova nateli kutuzatisha ñahi neyi chamuzatishiliyi Tabita?

¹² Yehova wamusañumwini Tabita “[nanyidimu] yayiwahi yayivulu nawa wahanineña yawaana yaluwi,” sweje-e kudi antuluwa. (Yil. 9:36) Chafwiliyi antu amavulu amudilili nankashi muloña wakwila wadiña nachisambu niluwi. Ilaña azañaleli chikupu chelili kapostolu Petulu yamusañuli. (Yil. 9:39-41) Yumanyi yitwadizilaña kudi Tabita? Hela tudi atwansi, akulumpi, ambanda niamayala, tunateli kukwasha amanakwetu niahela.—Heb. 13:16.

13. Muhela Ruth wadiña nansonyi amuzatishili ñahi kudi Yehova nawa wakunkulwili nindidi?

¹³ Muhela Ruth wadiña nansonyi wakeñeleña kwikala mishonali. Hadiñayi kansi wayileña kwitala nikwitala nakuhana matilakiti kudi antu lufuchi-lufuchi. Wahosheli nindi: “Nadiluñishileña kuzata iwu mudimu.” Hela chochu, kuhanjeka nawantu hansañu yaWanta waNzambi chamukalilileña. Hela chakwila wadiña nansonyi, Ruth wekalili payiniya wampinji yejima hadiñayi  nayaaka 18. Mu 1946, wayili kuShikola yaGileyadi nawa kufumahu wayili nakuzatila kuHawaii nikuJapan. Yehova wamuzatishili nankashi hakutandisha nsañu yayiwahi munana matuña. Chimwahitili yaaka kwakwihi na 80 yakukalakala mumudimu windi, Ruth wakunkulwili nindi: “Kufuma kunyima Yehova wankoleshaña mafuku ejima. Nankwashi kuleka kutiya nsonyi. Nakuhweleli chikupu nami Yehova nateli kuzatisha muntu wudi wejima wukumukuhwelela.”

14. Neyi chinashimuni Akolosi 1:29, chumanyi chitwatela kwila neyi tunakukeña netu Yehova yatuzatishi?

¹⁴ Kufuma tuhu kunyima Yehova nazatishi ambuñindi munjila jamboka-mboka. Nateli kuyikojeja enu kwikaladi? Chinashindameni hadi enu kwiteja kuzata nañovu. (Tañenu Akolosi 1:29.) Neyi mudi namuchima wakukeña nenu Yehova yayizatisheña nateli kuyikojeja kwikala mukwakushimwina wadikita, ntañishi wamuwahi, nkundeji washikila, mukwakukalakala wakulukila, ibwambu watelela hela chuma chejima chinakukeñayi kulonda yashikiji nkeñelu yindi.

15. Kwesekeja na 1 Timotewu 4:12, 15, chumanyi chatela kumulembelelawu Yehova amanakwetu achidi atwansi kulonda yayikwashi?

¹⁵ Indi enu amanakwetu atwansi anakukula? Kunakukeñeka amayala adi nañovu kulonda azateña nyidimu muchipompelu. Muyipompelu yayivulu akulumpi diwu amavulu kubadika ankoñi akuzatila. Kwila mwikala namuchima wakufwila kuzataku nyidimu muchipompelu nehi? Mpinji yikwawu amanakwetu ahoshaña nawu, “ami kwami chidi hohu chiwahi kwikala mukwakushimwina.” Neyi dichi mwatoñojokaña, mulombenuña Yehova kulonda yayinki muchima wakufwila kushikahu kwikala nkoñi wakuzatila nawa yayinki ñovu yakuzata nañovu nikukeña kumukalakela. (Mukwa. 12:1) Tunakukeña wukwashu wenu!—Tañenu 1 Timotewu 4:12, 15.

16. Chumanyi chitwatela kumulomba Yehova, nawa muloñadi?

¹⁶ Yehova nateli kuyikojeja kwikala chuma chidi chejima chinakukeñayi kulonda yashikiji nkeñelu yindi. Dichi, mulombenu muchima wakufwila kuzata mudimu windi nawa mulombenu yayinki ñovu yimunakukeña. Chili mudi atwansi hela akulumpi, zatishenuña mpinji yenu, ñovu yenu niyuma yenu kulonda mumulemeshi nachu Yehova. (Mukwa. 9:10) Bayi mutiya woma hela kutoñojoka nenu mukutwesha wanyi kuzata mudimu neyi anayinki kukoleka mumudimu waYehovaku. Hikukoleka chikupu kuzataku mudimu wejima kulonda tuleti kalemesha hadi Tata yetu wukweti kukeña.