1-2. (a) Muloñadi njita yaAmagedoni chiyinekalili nsañu yayiwahi kudi antu? (b) Malwihwinyi itukuhanjekahu muchinu chibaaba?

MWATIYAHU dehi antu anakutena izu dakwila nawu “Amagedoni” kutalisha kunjita yanyitenda nzumbu hela kukisika kweseki? Kwambukaku, Bayibolu yahosha haAmagedoni nawu hinsañu yayiwahi yaletaña muzañalu. (Chim. 1:3) Njita yaAmagedoni yikajilumuna wanyi antu ilaña yikayamwina. Munjilanyi?

² Bayibolu yamwekeshaña nawu njita yaAmagedoni yikamwina antu kuhitila mukujilumuna chiyuulu chawantu. Haniyi njita antu aloña akayamwina, ilaña antu atama akayijilumuna. Cheñi yakakiña iseki kulonda akabuli kudikisañana. (Chim. 11:18) Hakwila nawu tutiyishishi ichi chikuma, tuhanjekenu hamalwihu awana: Amagedoni hichumanyi? Yumanyi yikasambila kumwekana henohu Amagedoni kanda? Tunateli kwikala ñahi hakachi kawantu akamwinawu haAmagedoni? Tunateli kutwalekahu ñahi kwikala ashinshika chinakwinza kukuma?

3. (a) Izu dakwila nawu “Amagedoni” datalisha mudihi? (b) Chimwekeshu 16:14, 16 yamwekeshaña ñahi nawu Amagedoni hiluña dahamasekiku?

³ Tañenu Chimwekeshu 16:14, 16. Izu dakwila nawu “Amagedoni” damwekana kamu hohu muNsona nawa dafuma kwizu dachiHeberu datalisha mukwila nawu “Mpidi yaMegido.” (Chim. 16:16; tth.) Megido wadiña musumba muIsarela. (Yosh. 17:11) Amagedoni hiyatalisha kwiluña dahamasekiku. Ilaña yemenañaku chuma chikaleñela “anyanta ahanu hamaseki hejima” kupompa muloña wakudikaña naYehova. (Chim. 16:14) Hela chochu muchinu chibaaba, tukuzatisha cheñi izu ‘daAmagedoni’ kutalisha kunjita yikalondelahu neyi anyanta ahamaseki anapompi dehi. Tuneluki ñahi netu Amagedoni hiluña dachifwikija? Chatachi, hikwekala mpidi yaMegidoku. Chamuchiyedi  iluña daMegido danyanya chikupu chakwila “anyanta ahanu hamaseki hejima” niamashidika awu kushilahu niyozelu yawu yanjita, kwila atwesha kuzuñilaku njita nehi. Chamuchisatu, neyi chitukudiza muchinu chibaaba, njita yaAmagedoni yikatachika neyi “anyanta” amukaayi analukuki antu jaNzambi, ejima ekala hamaseki.

4. Muloñadi Yehova chesekejelayi njita yeneni yakukumishaku naAmagedoni?

⁴ Muloñadi Yehova chesekejelayi njita yeneni yakukumishaku naMegido? Iluña daMegido nichinekineki chaYezereyeli adiña nakuzuñilaku njita. Mpinji yikwawu, Yehova wadiña nakukwasha antu jindi kushindi njita. Chakutalilahu, “kumeji akuMegido,” Nzambi wamukwashili nsompeshi yawaIsarela Baraka kushinda amashidika awaKenani alombweliwu kudi Sisera. Baraka nikaprofwetu wamumbanda Debora amusakililili Yehova chashindiliwu muchihayamisha. Embili kamina nawu “kwiwulu, tutumbwa . . . twalwili naSisera. Kaloña Kishoni kayikumpwili.”—Ansomp. 5:19-21.

5. Munjilanyi njita yaAmagedoni muyinambukili nanjita yazuñiliyi Baraka?

⁵ Baraka naDebora akunkulwili kamina kawu namazu akwila nawu: “Eyi Yehova, ayilumbu jeyi ejima akafwi chochenochu; hakwinza wena akumukeña akekali neyi itañwa haselañayi nañovu jindi.” (Ansomp. 5:31) Munjila yoyimu, ayilumbu jaNzambi akajilumuka, ilaña antu amukeña Nzambi akayamwina. Ilaña hadi chaambu cheneni hakachi kaniji njita jiyedi. Hanjita yaAmagedoni antu jaNzambi hiyakalwaku. Hiyakadimanyeka yitwa yanjitaku. “Ñovu [jawu] yowu kudiwunjika zo-o nakukuhwelela” mudi Yehova niamashidika indi amwiwulu.—Isa. 30:15; Chim. 19:11-15.

6. Yumanyi yinateli kuzatishayi Yehova hakujilumuna ayilumbu jindi haAmagedoni?

⁶ Nzambi wakashinda ñahi ayilumbu jindi hanjita yaAmagedoni? Nateli kuzatisha njila jamboka-mboka. Chakutalilahu, nateli kuzatisha nyitentanshi, nvula yamalola ninzaji. (Yoba 38:22, 23; Ezek. 38:19-22) Nateli kukojeja ayilumbu jindi kudijaha mulwawu. (2 Kushi. 20:17, 22, 23) Nawa nateli kuzatisha añelu jindi kujaha antu atama. (Isa. 37:36) Hichidi namuloña nachuma chejima chakazatishayi Nzambiku, ilaña wakashinda. Ayilumbu jindi ejima akayijilumuna. Nawa antu ejima aloña akayamwina.—Yish. 3:25, 26.

7-8. (a) Kwesekeja na 1 Atesalonika 5:1-6, mbilanyi yakabidikawu anlomboli amukaayi? (b) Muloñadi iyi mbila chiyikekalila yafwana?

⁷ Mbila yakwila nawu “Kuwunda nikukiñewa” yikekalaku henonu “ifuku daYehova” kanda. (Tañenu 1 Atesalonika 5:1-6.) Kwesekeja na 1 Atesalonika 5:2, “ifuku daYehova” dinatalishi ‘kulukadi lwasweja.’ (Chim. 7:14) Tukeluka ñahi neyi ilu lukadi hilukutachika? Bayibolu yashimunaña nawu kwakekala mbila yitwabula kutiyahu dehi. Iyi mbila yikekala chinjikijilu chinakumwekesha nawu lukadi lwasweja hilukutachika.

⁸ Iyi himbila yashimwineñawu dehi ‘yakuwunda nikukiñewa.’ Muloñadi anlomboli amukaayi chikabidikilawu mwenimu? Komana anlomboli jansakililu niwena akadibombamu? Hekwawu. Hela chochu, iyi mbila yikekala himakudi akafuma kudi andemoni. Ilaña awa makudi akekala afwana muloña akaleñela antu kutoñojoka mwaluwa nawu anekali akiñewa henohu lukadi lweneni lwabulahu dehi kumwekana muchihandilu chawantu keña lutachiki. Mwalala, “kujilumuka kwakayishikena neyi nyisoñu yakuvwala chiyashikenaña mumbanda wudi nevumu.” Hanu dinu chumanyi chikayimwekena ambuña aYehova ashinshika? Akahayama chikupu chikatachika idi ifuku daYehova, ilaña dikayishintakesha wanyi.

9. Nzambi wakajilumuna ñahi kaayi kaSatana?

 ⁹ Yehova hakajilumuna kaayi kaSatana hampinji yimu neyi cheliliyi mumafuku aNowaku. Ilaña wakakijilumuna muyibalu yiyedi. Chatachi, wakajilumuna Babiloni Muneni, wanta wakaayi wansakililu yakutwamba. Kuhiñahu, hanjita yaAmagedoni wakajilumuna kaayi kejima kaSatana, kushilahu nijinfulumendi jachu, amashidika ninyitayi yajakulanda nakulandulula. Ichi dinu tuhanjekenu hayuma yiyedi yalema yikamwekana.

10. Kwesekeja na Chimwekeshu 17:1, 6 ni 18:24, Yehova wakamujilumwinadi Babiloni Muneni?

¹⁰ “Wunsompeshi wakamusompeshawu mumbanda chivumbi muneni.” (Tañenu Chimwekeshu 17:1, 6; 18:24.) Babiloni Muneni naleti kasawuntu keneni hejina daNzambi. Nashimuni nsañu yakutwamba hadi Nzambi. Neli wuvumbi wakuspiritu kuhitila mukudibomba hamu nawanyanta aheseki. Nazatishi ñovu yindi kuhitila mukukabisha antu jindi nikuyidiila mabula hanyitu. Nawa namwañi chikupu mashi amavulu, kushilahu nimashi awambuña aNzambi. (Chim. 19:2) Yehova wakamujilumuna ñahi Babiloni Muneni?

11. Indi “kanyama wamwisaña chisumi wuchinana nge-e” wemenañaku chumanyi nawa Nzambi wakamuzatisha ñahi hakujilumuna Babiloni Muneni?

¹¹ Yehova wakamujilumuna “mumbanda chivumbi muneni” kuhitila mukuzatisha “nseñu 10” “[yakanyama] wamwisaña chisumi wuchinana nge-e.” Iwu kanyama wamwisaña chisumi wachifwikija nakwimenaku United Nations. Nseñu 10 yinakwimenaku matuña añovu adiku makonu akwashaña United Nations. Hampinji yatoñolayi Nzambi, awa matuña añovu akamulukuka Babiloni Muneni. ‘Akamukisañana nikumuvuula’ kuhitila mukumutambula yuma yikwetiyi nakuleja antu kutama kwindi. (Chim. 17:3, 16) Iku kujilumuka kukamwekana mukukasumwisha, kukaneñesha antu ejima amukwashañaku. Hela chochu, waditiyaña nindi: “Ami nidi mwanta wamumbanda, hinidi mumbanda nfwilaku nawa hinamba kadishonaku.”—Chim. 18:7, 8.

12. Chumanyi chikabula kwitejayi Yehova nindi nyuza yili, nawa muloñadi?

 ¹² Nzambi haketeja nyuza kujilumuna antu jindiku. Ashimwinaña ijina dindi nawa ovwahila lushimbi lwindi lwakufuma muBabiloni Muneni. (Yil. 15:16, 17; Chim. 18:4) Anazati cheñi nañovu kukwasha antu amakwawu kufuma muBabiloni Muneni. Dichi ambuña aYehova hiyakamona “yipupu yimu yakamonayi yenaku.” Hela chochu, chikuhwelelu chawu chikekala mukweseka.

13. (a) Indi Gogi hinyi? (b) Kwesekeja na Ezekeli 38:2, 8, 9, chumanyi chikaleñela Gogi kulukuka antu jaNzambi?

¹³ Kulukuka kwaGogi. (Tañenu Ezekeli 38:2, 8, 9.) Hanyima yakwila Yehova najilumuni dehi nsakililu yejima yakutwamba, hamaseki hakashala hohu nsakililu yimu. Ambuña aYehova hohu diwu akashalahu. Satana wakahila chikupu. Wakamwekesha kuhila kwindi kuhitila mukuzatisha “mazu onenawu awaspiritu azonda,” akekala nsañu yakutwamba kufuma kudi andemoni, nakuleñela nyuza kudibomba hamu nakulukuka ambuña aYehova. (Chim. 16:13, 14 tth.) Iku kudibomba akwitenaña nawu “Gogi wamwituña daMagogi.” Nyuza chiyikalukuka antu jaYehova, dihu hakatachika ninjita yaAmagedoni.—Chim. 16:16.

14. Chumanyi chikelukayi Gogi?

¹⁴ Gogi wakakuhwelela “chikasa [chindi] chawuntu,” dikwila nawu mashidika indi añovu. (2 Kushi. 32:8) Ilaña etu tukakuhwelela mudi Yehova Nzambi yetu, chuma chikamwekana neyi hiwusupi kudi akwanyuza. Muloñadi? Muloña wakwila Babiloni Muneni wadiña nañovu chikupu, ilaña anzambi jindi amwamwinini wanyi kudi “kanyama wamwisaña chisumi” ‘ninseñu jindi 10’! (Chim. 17:16) Dichi Gogi wakatoñojoka nindi wakashikena hohu dakutujilumuna. “Neyi ivu dikubuta ituña wi-i,” dichakalukukayi niantu jaYehova. (Ezek. 38:16) Ilaña nyuza yikashikena dakwiluka nawu hiyakatwesha kutemukaku. Neyi chochamumwekeneni Fwaro hakaluñalwiji kachinana, Gogi niyena wakeluka nindi nakuzuña naYehova.—Kwid. 14:1-4; Ezek. 38:3, 4, 18, 21-23.

15. Yesu wakeladi hanjita yaAmagedoni?

 ¹⁵ Kristu hamu nimashidika indi amwiwulu akamwina antu jaNzambi nawa akajilumuna Gogi niamashidika indi. (Chim. 19:11, 14, 15) Hanu dinu, chumanyi chikamumwekena chilumbu muneni waYehova, Satana, wakadimba nyuza nakuyileñela nindi alukuki antu jaNzambi hanjita yaAmagedoni? Yesu wakamukasa nakumumbila mwikela hamu nawandemoni jindi, mwakayipatilawu hadi yaaka 1,000.—Chim. 20:1-3.

16. (a) Twamwekeshaña ñahi netu ‘twamwiluka Nzambi’? (b) Chumanyi chakayimwekena antu amwiluka Yehova hanjita yaAmagedoni?

¹⁶ Hela chakwila tunashakami muchalala yaaka yayivulu hela nehi, hakwila nawu tukapuluki hanjita yaAmagedoni, twatela “kumwiluka Nzambi” nawa twatela “kwovwahila nsañu yayiwahi yahosha hadi Mwanta wetu Yesu.” (2 Tes. 1:7-9) ‘Twamwilukaña Nzambi’ neyi twiluka yuma yakeñayi, yahelayi ninshimbi jindi. Twamwekeshaña cheñi netu twamwiluka Nzambi neyi tumukeña, tumwovwahila nikudifukula kudi yena hohu. (1 Yow. 2:3-5; 5:3) Neyi tumwiluka Nzambi, niyena ‘wukutwiluka’ nawa wakatwamwina haAmagedoni! (1 Kor. 8:3) Munjilanyi? Muloña neyi “[atwiluka] kudi yena” dikwila nawu wakatwiteja.

17. “Kwovwahila nsañu yayiwahi yahosha hadi Mwanta wetu Yesu” kwatalisha mudihi?

¹⁷ “Nsañu yayiwahi yahosha hadi Mwanta wetu Yesu” munabombeli nsañu yalala yejima yatañishiliyi Yesu yitwatañaña Mwizu daNzambi. Twovwahilaña nsañu yayiwahi neyi tuyizatishaña muchihandilu chetu. Muniku kwovwahila munabombeli kutwamijaku yuma yaWanta, kutwamijaku nyidimu yaYehova muchihandilu chetu nikushimwina nsañu yaWanta waNzambi. (Mat. 6:33; 24:14) Munabombeli cheñi kukwasha amanakwaKristu awayishewa hampinji yinakwakamenawu nyidimu yawu yalema.—Mat. 25:31-40.

18. AmanakwaKristu awayishewa akafweta ñahi nawukwashu wayikwashañawu?

 ¹⁸ Ambuña aYehova awayishewa keña afweti “anyikoku amakwawu” hawukwashu wayikwashañawu. (Yow. 10:16) Munjilanyi? Henohu njita yaAmagedoni kanda yitachiki, a 144,000 akayisañula nakuya mwiwulu nanyijimba yabulaña kufwa. Akekala hamu namashidika amwiwulu hakumujilumuna Gogi nawa akakiña “izaza deneni” dawantu jaYehova. (Chim. 2:26, 27; 7:9, 10) Mwalala, izaza deneni dikazañalala hakwiluka nawu akwashili ambuña aYehova awayishewa hampinji yadiñawu hamaseki.

19-20. Tunateli kutwalekahu ñahi kwikala ashinshika hampinji yitunakuswina kwakwihi nanjita yaAmagedoni hela chakwila tunakumona kukala?

¹⁹ Munanu mafuku akala akukuminina antu jaYehova amavulu anakumona kukala. Hela chakwila tudi mukukala, tunateli kuumika namuzañalu. (Yak. 1:2-4) Chuma chacheni chinateli kutukwasha hikutwalekahu kulomba chakufuma hamuchima. (Luka 21:36) Twatela cheñi kudiza Izu daNzambi mafuku ejima kushilahu niwuprofwetu wunakuhosha hayuma yikumwekana katataka nikutoñojokahu chikupu. (Mas. 77:12) Neyi twila yumiyi, kushilahu nikushimwina nankashi, chikatukwasha kwikala nachikuhwelelu chakola nikutwalekahu kuchiñeja!

²⁰ Toñojokenu owu muzañalu wumukatiya chikela Babiloni Muneni anamufumishihu nawa njita yaAmagedoni yinamani! Chuma chasweja kulema, fwikijenu owu muzañalu wumukatiya chikela antu ejima hiyakujilika ijina daNzambi niwuswa windi wakuyuula. (Ezek. 38:23) Amagedoni hinsañu yayiwahi kudi antu amwiluka Nzambi, ovwahilaña mwanindi nawa akomika kushika nikunsa.—Mat. 24:13.