1. Kukalanyi kwamweniyi kapostolu Yowanu kukukuma kwayaaka yawapostolu?

HAKUKUMA kwayaaka yawapostolu, kapostolu Yowanu wadiña mukukala chikupu. Diyi kashinakaji wadiña nakushakama hachitutu chaPatamosa nawa diyi kapostolu washalilihu. (Chim. 1:9) Welukili nindi akwakudimbulula adiña nakutañisha nsañu yakutwamba nikuleñela akwaKristu kudambula. Chinamwekani neyi hadi kushimbula wanyi, akwaKristu alala ayileña nakujiya.—Yuda 4; Chim. 2:15, 20; 3:1, 17.

2. Kwesekeja na Chimwekeshu 7:9-14, chimwenwinyi chamweniyi Yowanu? (Talenu mwevulu wudi hakava.)

² Haniyi mpinji yadiñayi Yowanu mukukala, Nzambi wamumwekesheleli chimwenu chayuma yikamwekana kumbidi. Munichi chimwenu, kañelu walejeli añelu awana kukwatisha mpepela yalukadi lwasweja yakujilumuna sampu analamiki dehi anduñu. (Chim. 7:1-3) Idi izanvu, hiya 144,000, akayuula naYesu mwiwulu. (Luka 12:32; Chim. 7:4) Dichi Yowanu wateneni cheñi izanvu dikwawu deneni, chakwila wahosheli nindi: “Nami nitali,” awa mazu anakumwekesha nawu wahayamini chikupu nachuma chamweniyi. Yowanu wamwenidi? Wamweni “izaza deneni dakwila kwosi muntu niwumu wadi kutwesha kudichinda, dawantu afumini kunyuza yejima, kunyichidi yejima, kudi antu ejima nikumadimi ejima, anemani kumbidi yetanda nikumesu aMwana kaMukoku.” (Tañenu Chimwekeshu 7:9-14.) Yowanu wazañaleli chikupu hakwiluka nindi kumbidi kwakekala antu amavulu akadifukulaña kudi Nzambi muwalala.

3. (a) Muloñadi chimwenu chaYowanu chichinateli kukolesha chikuhwelelu chetu? (b) Yumanyi yitukudiza muchinu chibaaba?

 ³ Chakadi nikujina ichi chimwenu chakolesheli chikuhwelelu chaYowanu. Nawa chikukolesha cheñi chikuhwelelu chetu muloña chinakundami kumafuku akukuminina itunakushakamamu. Makonu, antu amavulu anatachiki kudifukula kudi Yehova nawa akweti kuchiñeja kwakushakama hamaseki haya nyaaka. Muchinu chibaaba, tukudiza Yehova chamwekesheliyi idi izaza deneni kudi antu jindi kubadika hayaaka 8. Kuhiñahu tukuhanjeka yuma yiyedi yinakuhosha hanidi izaza: (1) deneni nankashi nawa (2) dikafuma kuyitachi yashiyashana mwahita kaayi kejima. Iyi nsañu yikukolesha chikuhwelelu chawantu ejima akweti kuchiñeja kwakwikala hakachi kanidi izanvu.

4. Chalalanyi chekala muBayibolu chabula kwilukawu aKristendomu, indi Atudizi aBayibolu ambukiliku ñahi nawena?

⁴ A Kristendomu hiyatañishaña chalala chamuBayibolu chakwila nawu antu ovwahila akashakama haya nyaaka hamasekiku. (2 Kor. 4:3, 4) Makonu, nsakililu yayivulu yakutwamba yatañishaña nawu antu amawahi ejima ayaña mwiwulu neyi anafwi. Ilaña hadiña chaambu nawaTudizi aBayibolu asonekeleña Kaposhi kakutalila kufuma mu 1879. Wena elukili nawu Nzambi wakafuntisha Paradisa hamaseki nawa antu amavulu ovwahila akashakamaña hanu heseki, bayi mwiwuluku. Hela chochu, hahitili mpinji yeneni hakwila eluki awa antu ovwahila.—Mat. 6:10.

5. Atudizi aBayibolu akuhweleleli nawudi hadi 144,000?

⁵ Atudizi aBayibolu elukili cheñi kwesekeja naNsona nawu amakwawu “[akayilanda] kufuma hamaseki” kulonda akayuuli naYesu mwiwulu. (Chim. 14:3) Elukili nawu hizanvu dawa 144,000 dadikita nawa akwaKristu adihana amukalakeleli Nzambi nakashinshi mpinji yadiñawu hamaseki. Indi izaza deneni?

6. Atudizi aBayibolu akuhweleleli nawudi hadi izaza deneni?

⁶ Muchimwenu chindi, Yowanu wamweni dina izanvu “[dinemani] kumbidi yetanda nikumesu aMwana kaMukoku.” (Chim. 7:9) Awa mazu aletesheli Atudizi aBayibolu kukunkulula nawu idi izaza deneni hamu nawa 144,000 akashakamaña mwiwulu. Neyi chakwila a 144,000 nizaza deneni akashakamaña mwiwulu, indi izanvu dimu dikwambuka ñahi nadikwawu? Atudizi aBayibolu atoñojokeleña nawu izaza deneni dikafuma kudi akwaKristu abulileña kumwovwahila Nzambi chikupu henohu achidi hamaseki. Hela chakwila alondeleleña nshimbi yamuBayibolu, hadaha amakwawu atwalekelihu kwikala munsakililu yakutwamba. Atudizi aBayibolu akunkulwili nawu awa antu adiña amukeña Nzambi ilaña hiyashikililimu kuyuula hamu naYesuku. Muloña wakwila amukeñeli Nzambi chantesha, izaza datela kuya mwiwulu nakwimana kwitanda ilaña bayi nakushakama hamatandaku.

7. Atudizi aBayibolu, akuhweleleli nawu anyi akashakama hamaseki mumpinji yaYaaka Ikombakaji, nawa akuhweleleli cheñi nawudi hadi antu ashinshika afwili henohu Yesu kanda yenzi?

⁷ Hanu dinu, anyi akashakama hamaseki? Atudizi aBayibolu akuhweleleli nawu hanyima yakwila a 144,000 niizaza deneni anayipompeshi dehi mwiwulu, mamiliyoni awantu akashakama hamaseki nakudiluñisha nkisu yikaleta Chiyuulu chaKristu Chayaaka Ikombakaji. Atudizi aBayibolu hiyakuhweleleli nawu mamiliyoni awantu akamukalakela Yehova henohu Chiyuulu chaKristu kanda chitachikiku. Ilaña, akuhweleleli nawu  awa antu akayidizisha kumwiluka Yehova mumpinji yaYaaka Ikombakaji. Neyi Ikombakaji dinamani dehi, ana akwovwahila nshimbi jaYehova akekala nawumi wahaya nyaaka hamaseki, ilaña ana akabula kwovwahila akayijilumuna. Atudizi aBayibolu atoñojokeli cheñi nawu hadaha amakwawu akekala “atulamba” hamaseki haniyi mpinji kushilahu niantu ashinshika akasañulawu afwili henohu Yesu kanda yenzi, hadaha niwena akayinka wuloku wakuya mwiwulu hanyima Yekombakaji daYaaka.—Mas. 45:16.

8. Atudizi aBayibolu akuhweleli nawu awa mazanvu asatu adiñanyi?

⁸ Atudizi aBayibolu elukili nawu kwadiña mazanvu asatu: (1) a 144,000, akayuula hamu naYesu mwiwulu; (2) akwaKristu amwizaza deneni adiña adikita chanti, akemana kwitanda daYesu mwiwulu; (3) niyihita yawantu akadizishawu kulonda akamwiluki Yehova hamaseki hampinji yaKuyuula kwaYaaka Ikombakaji daKristu. * Chimwahitili mpinji, Yehova wayikwashili kwiluka iyi yuma.—Yish. 4:18.

9. (a) Munjilanyi izaza deneni hamaseki mudakemena “kumbidi yetanda nikumesu aMwana kaMukoku”? (b) Muloñadi iyi ntiyishilu yidi mu Chimwekeshu 7:9 chiyinalumbulukili?

⁹ Mu 1935 aYinsahu jaYehova atiyishishili mwatalishili chimwenu chaYowanu chezaza deneni. A Yinsahu jaYehova enjili nakwiluka nawu izaza deneni dakaya mwiwulu wanyi nakwimana “kumbidi yetanda nikumesu aMwana kaMukoku.” Ilaña, emanaña muchifwikija. Hela chakwila akashakamaña hamaseki, izaza deneni demanaña “kumbidi yetanda” kuhitila mukwiteja nawu Yehova diyi nyuuli wakuleña kwejima nawa nikumwekesha nawu eteja wuswa windi kuhitila mukumwovwahila. (Isa. 66:1) Akemana “kumesu aMwana kaMukoku” kuhitila mukukuhwelela mumulambu wefutu danyiloña daYesu. Munjila yoyimu, haMatewu 25:31, 32, hashimuna nawu “akwanyuza yejima,” kushilahu niantu atama “akayipompesha kumesu” aYesu kwitanda dindi dakulema. Mwalala, akwanyuza yejima hiyekala mwiwuluku, ilaña ekala heseki. Iyi ntiyishilu yahimpiliwu kunyima yalala nawa yatiyakana. Yinalumbululi muloña waweni Bayibolu chiyabulila kutena nawu izaza deneni dakaya mwiwulu. Izanvu dimu hohu dawa 144,000, didu dakanawu wumi wahaya nyaaka mwiwulu nawa diwu “akayuula neyi anyanta hamaseki hejima” naYesu.—Chim. 5:10.

10. Muloñadi izaza deneni chidatela kumwilukila Yehova henohu Chiyuulu chaYaaka Ikombakaji kanda?

¹⁰ Kufuma tuhu mu 1935, aYinsahu jaYehova eluka nawu izaza deneni damuchimwenu chaYowanu hizanvu dawakwaKristu ashinshika akweti kuchiñeja kwakushakama haya nyaaka hamaseki. Hakwila nawu akapuluki halukadi lwasweja, izaza deneni datela kumwiluka Yehova nikutachika kudifukula kudi yena henohu mpinji Yekombakaji daYaaka kanda yitachiki. Atela kwikala nachikuhwelelu chakola hakwila nawu akatweshi “kupuluka kuyuma yejimiyi yakamwekana” henohu Kuyuula kwaKristu kwaYaaka Ikombakaji kanda.—Luka 21:34-36.

11. Muloñadi aTudizi aBayibolu amakwawu chatoñojokeleliwu nawu antu amakwawu akayisañula nakuya mwiwulu hanyima yaYaaka Ikombakaji?

¹¹ Indi yitoñojoka yakwila nawu antu ashinshika adiñaku akayisañula nakuya mwiwulu hanyima yaKuyuula kwaYaaka Ikombakaji? Iyi nsañu ayishimwini nawu antu amakwawu akayisañwila mwiwulu hanyima yakuyuula kwaYaaka Ikombakaji muKaposhi  Kakutalila kaFebruary 15, 1913. Antu atela adihwileña nawu, ‘Muloñadi ambuña aNzambi ashinshika akunyima akasañulawu chakashakaminawu heseki henohu akwaKristu adiña ashinshika hohu chanti akayiteji kuya mwiwulu?’ Atoñojokeleña mwenimu muloña wakwila aluwankeni nawu: (1) izaza deneni dakashakamaña mwiwulu (2) cheñi nawu izaza deneni hiyakwaKristu ashinshika hohu chantesha.

12-13. Awayishewa niizaza deneni eluka nawudi kutalisha hawuloku wawu?

¹² Neyi chitunadizi, kufuma tuhu mu 1935, aYinsahu jaYehova eluka nawu antu akapuluka halukadi lwasweja hiizaza deneni damweniyi Yowanu muchimwenu. Akafuma “mulukadi lwasweja” hanu hamaseki nawa “[akatwalekahu] nakubidika nezu datiyakana nawu: ‘Wamwinu wetu wafuma kudi Nzambi yetu washakama hetanda nikudi Mwana kaMukoku.’” (Chim. 7:10, 14) Kubombelahu, Bayibolu yatañishaña nawu antu asañulañawu nakuya mwiwulu atambwilaña “yuma yabadika kuwaha” kubadika antu ashinshika akunyima. (Heb. 11:40) Amanakwetu atachikili kudizisha antu kumukalakela Yehova nikwikala nakuchiñeja kwakushakama haya nyaaka hamaseki.

¹³ Antu amwizaza deneni atiyaña kuwaha nakuchiñeja kwawu. Eluka nawu Yehova diyi watondaña kwatela kumuzatilawu antu jindi ashinshika, chili heseki hela mwiwulu. Awayishewa niizaza deneni eluka nawu wuloku wawu wekalilaku muloña waluwi lwaYehova lwasweja lwamwekesheliyi kuhitila mwifutu danyiloña damulambu waYesu Kristu.—Rom. 3:24.

14. Hanyima ya 1935, muloñadi amavulu chajinokeleleñawu kushikijewa kwawuprofwetu wahosheleña hezaza deneni?

¹⁴ Hanyima yakwila yuma yelukiluwu antu jaYehova anayilumbululi dehi chiwahi mu 1935, amavulu atwalekelihu kujinoka antu akweti kuchiñeja kwakushakama hamaseki chakavulawu nakwikala Izaza deneni. Chakutalilahu, hampinji yelukiliwu chalumbuluka izaza deneni, Manakwetu Ronald Parkin wadiña nayaaka 12. Wanukaña nindi: “Haniyi mpinji kwadiña hohu akwakushimwina 56,000 mukaayi kejima nawa hadaha amavulu adiña awayishewa. Izaza deneni dadiña nawantu antesha hohu.”

15. Indi izaza deneni dinatwalekuhu ñahi kutohelaku?

¹⁵ Yaaka yayivulu yinahitihu, amishonali amavulu ayitumini mumatuña amavulu nawa aYinsahu jaYehova atwalekelihu kuvula. Kuhiñahu mu 1968, atachikili progilamu  yakudizisha atudizi aBayibolu nawa azatishileña mukanda waEnglish waChalala Chalombolaña Kuwumi Wahaya Nyaaka. Chawusonekeliwu munjila yapela chakwashili antu amavulu kumwiluka Yehova. Mudi yaaka yiwana, atumbanji amaha kubadika ha 5,000 apapatisheweli. Chelili chechi yaKatolika yimani ñovu hadi Latin America nimatuña amakwawu nawa eteji mudimu wetu wakaanishiliwu muEastern Europe nimumaluña amakwawu muAfrica, antu amavulu apapatisheweli. (Isa. 60:22) Hadi yaaka yayivulu yinahituhu, kuloñesha kwaYehova kunedishi nyikanda yayivulu yinakukwasha antu kwiluka chatañishaña Bayibolu. Dichi kwila tujinoka netu izaza deneni anadipompeshi nawa dinavuli chikupu kubadika ha 8 miliyoni nehi.

16. Izaza deneni dinakufuma kudihi?

¹⁶ Yowanu wasonekeli muchimwenu chindi nindi izaza deneni dikafuma “kunyuza yejima, kunyichidi yejima, kudi antu ejima nikumadimi ejima.” Kaprofwetu Zekariya niyena washimwineñahu dehi chuma chadifwana nachumichi nindi: “Yehova wamazaza nindi, Hamafuku owu ikumi dawamayala akunyuza yamadimi ejima, akakwata kwihina dakaYudeya, nawu, Tuyi nenu, muloña tunatiyi nawu Nzambi mwekala nindi.”—Zek. 8:23.

17. Chumanyi chinakwilawu aYinsahu jaYehova hakwila nawu akwashi antu akunyuza yejima nikumadimi ejima?

 ¹⁷ A Yinsahu jaYehova eluka nawu hakwila antu akunyichidi yejima ayipompeshi hamu, atela kushimwina nsañu yayiwahi mumadimi amavulu. Tunabalumuni nyikanda yashindamena haBayibolu hadi yaaka kubadika ha 130, ilaña chayinu mpinji kwosi antu amakwawu abalumunahu dehi nyikanda yayivulu mumadimi amavulu chikupu neyi chitunakubalumunaku. Chakadi nikujina, Yehova nakukoña chihayamisha makonu chakupompesha izaza deneni kufuma kunyuza yejima. Muloña wakwila akweti Bayibolu ninyikanda yashindamena haBayibolu mumadimi amavulu, idi izanvu dadifukulaña kudi Yehova mukunuñañana hela chakwila dinakufuma mukaayi kejima. Nawa aYinsahu ayiluka nawu ashimwinaña nankashi nawa adikeña wumu namukwawu. Chumichi chakoleshaña chikuhwelelu chawu.—Mat. 24:14; Yow. 13:35.

18. (a) Kwesekeja na Isaya 46:10, 11, muloñadi chitunabulili kuhayama hakumona Yehova chinakushikijayi wuprofwetu wahosha hezaza deneni? (b) Muloñadi antu akweti kuchiñeja kwakushakama hamaseki chabulilañawu kuneña?

¹⁸ Tukweti muzañalu chikupu hakwiluka wuprofwetu wahosha hezaza deneni. Hitwahayamaña kumona Yehova chinakushikijayi iwu wuprofwetu muniyi njila yakuhayamishaku. (Tañenu Isaya 46:10, 11.) Antu ejima amwizaza deneni azañalalaña hakuchiñeja kwayinkayi Yehova. Awa antu aneñaña wanyi hela chakwila Nzambi wayiwahisha wanyi naspiritu yindi yajila nindi akayuuleña hamu naYesu mwiwulu. MuBayibolu twadizañamu amayala niambanda ashinshika alombweliwu naspiritu yajila, ilaña ekala wanyi mwizanvu dawa 144,000. Chakutalilahu chimu hiYowanu Mupapatishi. (Mat. 11:11) Mukwawu hiDavidi. (Yilw. 2:34) Wena niantu amakwawu akadi kutwesha kuchinda akayisañula nakushakama muparadisa heseki. Wejima wawu kushilahu nizaza deneni akamwovwahila Yehova nichiyuulu chindi.

19. Neyi twiluka mwatalisha chimwenu chaYowanu kutalisha hezaza deneni tukwiladi?

¹⁹ Aka dikatachi mukuhanda kwawantu kananuñañeshiyi Nzambi mamiliyoni awantu kufuma kunyuza yejima. Hela chakwila tukweti kuchiñeja kwakuya mwiwulu hela hamaseki, twatela kukwasha antu amavulu kulonda ekali mwizaza deneni ‘dawanyikoku amakwawu.’ (Yow. 10:16) Katataka, Yehova yaleti lukadi lwasweja luyashimwineñahu dehi, lukajilumuna jinfulumendi nijinsakililu jinakabishi antu nankashi. Antu ejima adi mwizaza deneni akweti kukooleka kwakumukalakela Yehova haya nyaaka hamaseki.—Chim. 7:14.