1. Muloñadi chitwatela kumwovwahila Yehova?

TWATELA kumwovwahila * Yehova muloña diyi Nleñi yetu. Muloña wachumichi, wukweti wuswa wakutuleja yuma yitwatela kwila. (Chim. 4:11) Chuma chikwawu chikuletesha tumwovwahili Nzambi, himuloña wakwila wayuulaña chachiwahi. Mukuhanda kwawantu kwejima, anlomboli jawantu akweti ñovu, anayuuli antu. Neyi tuyesekeja nachayuulañayi Yehova, tukumona netu Yehova wabadika, muloña wukweti kukeña, luwi nawa hiNyuuli wukweti wushona.—Kwid. 34:6; Rom. 16:27; 1 Yow. 4:8.

2. Yumanyi yinashimuniwu haAheberu 12:9-11 yikuletesha tumwovwahileña Yehova?

² Yehova wakeñaña nindi tumwovwahileña muloña wakwila diyi Tata yetu watukeña, bayi muloña wakuchiina netu nateli kutubabeshaku. Mumukanda wayisonekeleliyi Pawulu aHeberu walumbulwili nindi “[tusweji] kwovwahila Tata yetu” muloña watudizishaña “mwamuwahi.”—Tañenu Aheberu 12:9-11.

3. (a) Twamwovwahilaña ñahi Yehova? (b) Tukwakula malwihwinyi?

³ Twamwovwahilaña Yehova kuhitila mukuzata nañovu kulonda tumwovwahili muyuma yejima nikutondolwela yilwilu yakudishindamena etu aweni. (Yish. 3:5) Chatupelelaña kumwovwahila Yehova neyi twiluka yilwilu yindi yayiwahi. Muloñadi? Muloña iyi yilwilu yamwekenaña muyuma yejima yelañayi.  (Mas. 145:9) Neyi tumwiluka Yehova chikupu, tukumukeña nankashi. Nawa neyi tumukeña Yehova, hitukukeñaña netu atusonekeli nshimbi yahosha hayuma yitwatela kwila hela kubula kwilaku. Tukutoñojokaña nikutiya neyi chatiyañayi Yehova nawa tukutondolwelaña yuma yatama. (Mas. 97:10) Hela chochu, mpinji yikwawu chinateli kutukalila kumwovwahila Yehova. Muloñadi? Nawa yumanyi yinateli kudizilaku akulumpi, atata jawantu niamama jawantu kudi Nguvulu Nehemiya, Mwanta Davidi niMariya mama yaYesu? Achinu chibaaba chikwakula ñakwilu yanawa malwihu.

4-5. Kwesekeja na Aroma 7:21-23, muloñadi chichinateli kukalila kumwovwahila Yehova?

⁴ Chuma chaleteshaña chitukalileña kumwovwahila Yehova hinshidi yitwaswana nikubula kuwanina. Dichi twekala nayilwilu yakudikaña. Chelili Adama naEva adikañi naNzambi nawa adi mukabu wayikanishiliwu, adituñilili aweni nshimbi jawu. (Kutach. 3:22) Makonu, antu amavulu amudiwulaña Yehova nawa adifuukwilaña aweni yuma yayiwahi niyatama.

⁵ Hela chakwila twamwiluka nikumukeña Yehova, chinateli kutukalila kumwovwahila chikupu. Kapostolu Pawulu niyena wamweni iku kukala. (Tañenu Aroma 7:21-23.) Kufwana Pawulu, twafwilaña kwila yuma yayiwahi kumesu aYehova. Ilaña mpinji yejima twatela kuzata nañovu kulonda tutondolweleña muchima wakufwila yuma yatama.

6-7. Muloñanyi wukwawu waleñelaña chitukalileña kumwovwahila Yehova? Shimunenu chakutalilahu.

⁶ Chuma chikwawu chaleteshaña chitukalileña kumwovwahila Yehova, himuloña wakwila twaluwankana nachisemwa ninkulilu yetu. Antu amavulu anateli kutuleja yuma yambukaku nayashimunañayi Yehova, dichi twatela kuzata nañovu hakwila nawu tuleki kutoñojoka neyi chatoñojokañawu. Shinshikenu chakutalilahu chimu.

⁷ Mumatuña amavulu, antu avula kukanjikija atwansi kwikala namali amavulu. Iku dikukala kwamweniyi muhela Mary. * Henohu kanda yamwiluki Yehova, watañili shikola yimu yatiyakana nankashi mwituña dawu. Antaña jindi amukanjikili nawu yeñili mudimu wamali amavulu kulonda amulemesheña kudi antu. Niyena dichafwilileñayi. Ilaña, chelili yamwiluki Yehova nawa yamukeñi chikupu, wahimpili yitoñojoka yindi. Hela chochu, wahosheli nindi: “Mpinji yikwawu nawanaña njila yakuwaninamu mali amavulu, ilaña neluka nami yinateli kunkañesha kumukalakela Yehova neyi chinnakwila. Chankalilaña muloña dichankulishiliwu. Dichi namulembelelaña Yehova kulonda yankwashi kushinda kweseka kunateli kunkañesha kumuzatila chiwahi Yehova mumudimu windi.”—Mat. 6:24.

8. Yumanyi yitukuhanjekahu?

⁸ Mwafumaña yuma yayiwahi neyi tunakumwovwahila Yehova. Dichi antu akweti wuswa chidi neyi akulumpi, atata jawantu niamama jawantu amwovwahilaña Nzambi, anateli kukwasha antu amakwawu. Tushinshikenu hayakutalilahu yimu yamuBayibolu yinateli kutukwasha kuzatisha wuswa chiwahi kulonda tumutiyisheña Yehova kuwaha.

9. Kukalanyi kwamweniyi Nehemiya?

⁹ Yehova wayinka akulumpi mudimu walema wakubiña antu jindi. (1 Pet. 5:2) Akulumpi anateli kudizilaku yuma yayivulu  neyi ashinshika cheliliyi Nehemiya nawantu jaYehova. Chineli Nehemiya wadiña nguvulu muYuda, wadiña nawuswa chikupu. (Nehe. 1:11; 2:7, 8; 5:14) Nehemiya wamweneña kukala. Wawanini antu anatamishi tembeli nayuma yateleli kubula kwikalamu. Cheñi alekeli kuhana yawaana yakukwasha nachu Alevi kwesekeja naNshimbi. A Yudeya afumpileña nshimbi yaSabata nawa amayala amakwawu asumbwili ambanda akwacheñi. Nguvulu Nehemiya wateleli kushinda iku kukala.—Nehe. 13:4-30.

10. Nehemiya welili ñahi nakukala kwamweniyi?

¹⁰ Nehemiya wazatishileña wanyi wuswa wadiñayi nawu kulonda yakanjikiji antu kulondela chatoñojokeleñayi. Ilaña, wamulombeli Yehova kulonda yamukwashi kuhiñahu dinu hakuleja antu nshimbi jaYehova. (Nehe. 1:4-10; 13:1-3) Nehemiya wamwekesheli cheñi muchima wakudizoza kuhitila mukuzatila hamu nawamanakwindi hakutuña mbañu yaYerusalema.—Nehe. 4:15.

11. Kwesekeja na 1 Atesalonika 2:7, 8, akulumpi anateli kuhemba ñahi antu amuchipompelu?

¹¹ Akulumpi hiyanateli kumona kukala kokumu neyi kwamweniyi Nehemiyaku, ilaña anateli kumwimbujola munjila jajivulu. Chakutalilahu, azataña nañovu kulonda akwashi amanakwawu niahela. Nawa hiyadimonaña nawu abadika kulema muloña wawuswa wukwetiwuku. Ilaña, akamenaña amanakwawu niahela muchipompelu. (Tañenu 1 Atesalonika 2:7, 8.) Muloña wakwila adizoza nawa akweti kukeña, ahanjikaña nawu munjila yayiwahi. Manakwetu Andrew, wunakalakali yaaka yayivulu hawukulumpi wahosheli nindi: “Namoni nami amanakwetu niahela atiyaña kuwaha neyi mukulumpi wukweti luwi nawa wakasunuka. Iyi yilwilu yasañumunaña chipompelu kukalakela hamu nawakulumpi.” Manakwetu Tony wunashimbuli hawukulumpi niyena wahosheli nindi: “Nesekaña kuzatisha kufumba kwekala haAfwilipi 2:3  nawa mpinji yejima nesekaña kumona antu nami ambadika. Chumichi chankwashaña kubula kukanjikija antu nami añovwahileña.”

12. Muloñadi chichalemena akulumpi kwikala adizoza?

¹² Akulumpi atela kwikala adizoza neyi chadizozayi Yehova. Hela chakwila Yehova diyi Nleñi wakuleña kwejima, “wadizozaña nakutala” nikunyamuna “kazweñi hamaseki.” (Mas. 18:35; 113:6, 7) Hela chochu, Yehova wahela antu adinka wanta nawa adivwimba.—Yish. 16:5.

13. Muloñadi mukulumpi chatela ‘kufumbilayi idimi dindi’?

¹³ Mukulumpi wamwovwahilaña Yehova watela “kufumba idimi dindi.” Neyi nehi, nateli kuhosha chatama neyi muntu namuneñeshi. (Yak. 1:26; Ñal. 5:14, 15) Manakwetu Andrew itwashimuna hakusambila wahosheli nindi: “Mpinji yikwawu nakeñeleña kwakula chatama manakwetu hela muhela inamweneña nami nakulemesha wanyi. Hela chochu, natoñojokaña hayakutalilahu yawantu ashinshika amuBayibolu, dichi chinankwashi kwikala wadizoza nawa wadikehesha.” Akulumpi amwekeshaña nawu amwovwahilaña Yehova neyi anakuhanjeka chiwahi nawamanakwetu niahela muchipompelu kushilahu niakwawu akulumpi.—Kol. 4:6.

14. Mudimwinyi wayinkayi Yehova anvwali awamayala nawa wakeñaña nindi eleñadi?

¹⁴ Yehova diyi welisha tata yawantu kwikala mutu wachisaka nawa wakeñaña nindi yadizisheña nikufumba anyanindi. (1 Kor. 11:3; Efwe. 6:4) Bayi neyi chumichi chatalisha mukwila nawu atata jawantu atela kuzatisha wuswa wawu munjila yinakeñiwuku, muloña akalumbulula kudi Yehova washiliku yisaka. (Efwe. 3:14, 15) Atata jawantu amwekeshaña nawu amwovwahilaña Yehova neyi anakuzatisha wuswa wawu munjila yakeñayi Nzambi. Anateli kwiluka yuma yayivulu neyi atañaña nsañu yachihandilu chaMwanta Davidi.

15. Muloñadi atata jawantu chatela kudizilawu kudi Mwanta Davidi?

¹⁵ Yehova wamutondeli Davidi kwikala mutu wachisaka chidi hohuku, ilaña nihadi aIsarela ejima. Chineli wadiña mwanta, Davidi wadiña nañovu chikupu. Mpinji yikwawu wazatishileña chatama ñovu yindi nawa wakoñeleña yiluwa yamaneni. (2 Sam. 11:14, 15) Wamwovwahilili Yehova kuhitila mukwiteja kufumba. Chalombeleñayi kudi Yehova, wamulejelimu chatiyileñayi. Wazatili nañovu hakwila nawu yovwahili kufumba kwaYehova. (Mas. 51:1-4) Kubombelahu, wadiña wadizoza chakwila  wetejeli kufumba kwafumini kudi amayala niambanda. (1 Sam. 19:11, 12; 25:32, 33) Davidi wadizilili kuyiluwa yindi nawa washili maana hakumukalakela Yehova.

16. Yumanyi yatela kudizilawu atata jawantu kudi Davidi?

¹⁶ Talenu yuma yatela kudizilawu atata jawantu kudi Mwanta Davidi: Bayi muzatishaña chatama wuswa wayinkawu kudi Yehovaku. Itejenuña yiluwa yenu nawa itejenuña kufumba kwashindamena haBayibolu kunakufuma kudi antu amakwawu. Neyi mwikala adizoza, chisaka chenu chikuyilemeshaña. Neyi munakulombela hamu nachisaka chenu, mulejenumu Yehova chimunakutiya nawa kwashenu chisaka chenu chiluki nawu mwamushindamena Yehova chikupu. Chuma chasweja kulema chimwatela kwila muchihandilu chenu hikumuzatila Yehova. (Kuhit. 6:6-9) Yilwilu yenu yayiwahi yinateli kukwasha chisaka chenu.

17. Mudimwinyi wayinkayi Yehova amama jawantu?

¹⁷ Yehova wayinka amama jawantu mudimu walema muchisaka nawa wayinka niwuswa hadi anyanawu. (Yish. 6:20) Dichi, yuma yelañayi mama yawantu niyahoshañayi yinateli kuyikwasha anyanindi muchihandilu chawu chejima. (Yish. 22:6) Talenu yuma yinateli kudizilawu amama jawantu kudi Mariya mama yaYesu.

18-19. Yumanyi yatela kudizilawu amama jawantu kudi Mariya?

¹⁸ Mariya welukili Nsona chikupu. Wamulemesheli chikupu Yehova nawa wadiña nawubwambu wakola naYehova. Welili yuma yejima yamulejeliwu kudi Yehova hela chakwila yumiyi yahimpili chihandilu chindi chejima.—Luka 1:35-38, 46-55.

¹⁹ Amama jawantu munateli kumwimbujola Mariya munjila jajivulu. Munjilanyi? Chatachi, mwatela kukolesha wubwambu wenu naYehova kuhitila mukudiza Bayibolu halwenu nikulomba nkawenu mafuku ejima. Chamuchiyedi, mwatela kuhimpa yilwilu yenu kulonda mumuzañalesheña Yehova. Chakutalilahu, hadaha avwali jenu adiña akalisha nawa ahosheleña nakuzuwa-zuwa nawanyanawu. Dichi ninenu munateli kutachika kutoñojoka nenu diyi njila yayiwahi yakukulishilamu anyana. Hela chakwila mwadiza dehi chakeñañayi Yehova nindi mudizisheña anyanenu, chinateli kuyikalila kwikala awunda nawa adiwunjika neyi munakuhosha nawanyanenu, sweje-e neyi anakuluwañesha hampinji yimunazeyi. (Efwe. 4:31) Mpinji yamuchidiwu, diyi mpinji yimwatela kumushindamena  Yehova mukulomba. Mama yawantu Lydia wahosheli nindi: “Mpinji yikwawu nalombeleña chakufuma hamuchima kulonda nibuli kumuhosha mwanami nakuhila neyi nabuli kuñovwahila. Neyi inakuhosha nalekeleña kulonda nilombi kudi Yehova yankwashi. Kulomba kwawundishaña muchima wami.”—Mas. 37:5.

20. Kukalanyi kwamonañawu amama jawantu amakwawu, nawa anateli kukushinda ñahi?

²⁰ Kukala kukwawu kwekalaña nawamama jawantu kudi kwakwila nawu, chayikalilaña kumwekesha kukeña kudi anyanawu. (Tit. 2:3, 4) Amakwawu, ayikulishili muyisaka yakwila anvwali adikundaña nawanyanawu wanyi. Neyi dichayikulishawu, bayi mwimbujola anvwali jenuku. Mama yawantu wamwovwahilaña Yehova watela kuyimwekeshela anyanindi kukeña. Chinateli kumukalila kuhimpa yitoñojoka yindi, chatiyañayi nichelañayi. Ilaña nateli kuhimpa nawa yena nichisaka chindi anateli kwikala namuzañalu.

21-22. Kwesekeja na Isaya 65:13, 14, yumanyi yayiwahi yafumaña mukumwovwahila Yehova?

²¹ Mwanta Davidi welukili chichawahila kumwovwahila Yehova. Wasonekeli nindi: “Yafumbañayi Yehova yaloña, yaluñishaña muchima wamuntu; yalejañayi Yehova yayiwahi chikupu, yatoneshaña mesu amuntu; Wenowu diwu wakwatilañayi kambuñeyi maana, hakuhembamu hadi wuloku weneni.” (Mas. 19:8, 11) Makonu, tunakumona chaambu chidi hakachi kawantu amwovwahilaña Yehova niadiwulaña kufumba kwindi. Antu amwovwahilaña Yehova “[embaña] tumina twachiseki mumuchima.”—Tañenu Isaya 65:13, 14.

²² Neyi akulumpi, atata jawantu niamama jawantu amwovwahila Yehova, chihandilu chawu chahimpikaña, chisaka chawu chekalaña namuzañalu nawa chipompelu chejima chanuñañanaña. Chuma chasweja kulema, amuzañaleshaña Yehova. (Yish. 27:11) Iwu diwu muzañalu wabadika chikupu!