1. Yehova wayimonaña ñahi antu adizoza? Lumbululenu.

YEHOVA wakeña antu adizoza. Dichi, antu adizoza hohu diwu anateli kwikala amabwambu jindi. Kwambukaku, “wadinka wanta wamwilukilaña kwakulehi.” (Mas. 138:6) Wejima wetu twakeñaña kumutiyisha Yehova kuwaha nawa twakeñaña kuswina kwakwihi nayena. Dimuloña waweni wutwatela kwikalila adizoza.

2. Yumanyi yitukuhanjeka muchinu chibaaba?

² Muchinu chibaaba, tukuhanjeka ñakwilu yanawa malwihu asatu: (1) Kudizoza hichumanyi? (2) Muloñadi chitwatela kwikalila adizoza? (3) Yumanyi yinateli kutuleñela kubula kwikala adizoza? Neyi chitukudiza, neyi twikala adizoza, tukumutiyisha Yehova kuwaha nawa munateli kufuma yuma yayiwahi.—Yish. 27:11; Isa. 48:17.

3. Kudizoza hichumanyi?

³ Muntu wadizoza wekala wadikehesha mumuchima nawa hadinkaña wanta hela kudivwimbaku. Bayibolu yamwekeshaña nawu muntu wadizoza weluka nindi Yehova wabadika nawa weluka wuswa wukweti akwawu. Muntu wadizoza weluka nindi muntu wejima wamubadika munjila yimu nayikwawu.—Fwi. 2:3, 4.

4-5. Muloñadi chitukuhoshela netu kwikala wadizoza hikwatalisha mukuhosha-hosha hela mukumwenaku?

⁴ Antu amakwawu amwekanaña neyi adizoza. Anateli kumwekana neyi akweti nsonyi nawa anateli kumwekesha  kalemesha kwesekeja nachayikulishawu kudi anvwali jawu. Ilaña kwinza mukachi kamuchima, adivwimba. Hashimbulaña wanyi enzaña nakumwekesha chekalawu mumuchima wawu.—Luka 6:45.

⁵ Kwambukaku, antu amwekanaña neyi adivwimba nikubabala hiyekala adivwimbaku. (Yow. 1:46, 47) Hela chochu, antu abula nsonyi atela kwikala asoñama kulonda abuli kudishindamena. Hela chakwila twahosha-hosha hela twamwena, wejima wetu twatela kwikala adizoza.

6. Yumanyi yitunateli kudizila kudi kapostolu Pawulu kwesekeja nachinamwekeshiwu ha 1 Akorinda 15:10?

⁶ Talenu chakutalilahu chakapostolu Pawulu. Amuzatishili kudi Yehova kutuña yipompelu munyisumba yamboka-mboka. Nawa hadaha wazatili chikupu mudimu wakushimwina kubadika niapostolu aKristu. Hela chochu, Pawulu hatoñojokeli nindi wadiña wabadika akwawuku. Wadizozeli nakuhosha nindi: “Ami yami nakehelamu hakachi kawapostolu, nawa ami nateleli wanyi kuntena nawu kapostolu, muloña nakabishili chipompelu chaNzambi.” (1 Kor. 15:9) Nkumininaku, wahosheli nindi bayi neyi wubwambu windi naYehova wenjili hamuloña wakwila wadiña nayilwilu yayiwahi hela wadikitili nankashiku, ilaña hamuloña waluwi lwaNzambi lwasweja. (Tañenu 1 Akorinda 15:10.) Pawulu wadiña wadizoza. Hayisonekeleliyi akwaKristu amuKorinda mukanda, wadisambili wanyi hela chakwila antu amakwawu muchipompelu amwilileña nawu wadivwimba.—2 Kor. 10:10.

7. Manakwetu wumu elukiliwu nankashi wamwekesheli ñahi nindi wadiña wadizoza? Shimunenu chakutalilahu.

⁷ Nsañu yachihandilu chamanakwetu Karl F. Klein, wadiña Mwizanvu Dalombolaña  yinakoleshi antu jaYehova amavulu. Munsañu yindi yachihandilu, Manakwetu Klein washimwini nakudizoza kukala kwamweniyi hadi yaaka yayivulu. Chakutalilahu, mu 1922, chamukalilileña kushimwina kwitala nikwitala, chakwila walekeli kuya nakushimwina hadi yaaka yiyedi. Kuhiñahu, hampinji yadiñayi haBeteli amufumbili kudi manakwetu nawa wamuhembeleli nkunyi. Cheñi, wakatili muyitoñojoka muloña wachineñi nikusweja kwakama nawa chimwahitili mpinji wakoleli. Hela chochu, wadiña nanyidimu yalema yayivulu. Neyi chinamwekeshiwu, Manakwetu Klein wadiña wadizoza chikupu, muloña washimwini hatooka kuzeyazeya kwindi. Amanakwetu niahela amavulu amwanukaña Manakwetu Klein ninsañu yachihandilu chindi. *

8. 1 Petulu 5:6 yatukwashaña ñahi kwiluka nawu kudizoza kwamutiyishaña Yehova kuwaha?

⁸ Twatela kwikala adizoza muloña Yehova wayitiyaña kuwaha antu adizoza. Kapostolu Petulu washimwini hatooka chumichi. (Tañenu 1 Petulu 5:6.) Mukanda ‘waInzaku Wikali Mukwakunlonda’ wahosheli hamazu aPetulu nawu: “Kudinka wanta kwekala neyi wulembi. Yuma yafumaña mukudinka wanta yatama. Hichililu chaleteshaña muntu walema kwikala wamukunkulwayi kudi Nzambi. Kudizoza kwaleñelaña muntu wabula kulemeshawu kwikala walema kudi Yehova . . . [Yena] wakatiya kuwaha . . . wakayikiswila neyi mudizoza.” * Chuma chachiwahi chitwatela kwila hikumutiyisha Yehova kuwaha.—Yish. 23:15.

9. Kudizoza kwaleñelaña ñahi antu amakwawu kudikunda nanetu?

⁹ Kubombela hakumutiyisha Yehova kuwaha, mwafumaña yuma yayiwahi neyi twikala adizoza. Neyi twadizoza, akwetu akuswina kwakwihi nanetu. Munjilanyi? Toñojokenu hadi antu imwakeña kudikunda nawu. (Mat. 7:12) Etu amavulu twakeña wanyi kudikunda nawantu abulaña kwiteja yitoñojoka yawakwawu nawa akeñaña nawu akwawu eleña hohu yuma yakeñawu. Kwambukaku, twatiyaña kuwaha kwikala nawakwetu akwakwitiya ‘atwakamenaña, atukeña, atutiyililaña wushona nawa adizoza.’ (1 Pet. 3:8) Neyi tudikunda nawantu amuchidiwu,  niwena akuswina kwakwihi nanetu, chakala hohu twadizoza.

10. Kudizoza kwapeleshañaku ñahi yuma muchihandilu?

¹⁰ Kudizoza kwapeleshañaku cheñi chihandilu chetu. Mpinji yikwawu tukumonaña hela kuhita muyuma yitukutoñojokaña netu yatelela wanyi. Mwanta wamaana Solomoni wahosheli nindi: “Namoni anduñu hiyakwendela hatuwalu, hakwila atulamba hiyakwenda hamaseki neyi anduñu.” (Mukwa. 10:7) Antu eluka yuma hela nyidimu ayihamekaña wanyi. Ilaña ahamekaña nankashi antu abula kwiluka nyidimu hela yuma. Hela chochu, Solomoni welukili nindi chachiwahi kwiteja yuma chiyidi chatela muntu yahili nayuma yamwekanaña muchihandilu. (Mukwa. 6:9) Neyi twadizoza chinateli kwikala chaswayi kwiteja yuma kwesekeja nachiyidi.

11. Twatela kwila ñahi neyi anatufumbi?

¹¹ Tukweti njila jajivulu mutwatela kumwekeshela netu twadizoza. Shinshikenu haniyi yakutalilahu. Neyi anatufumbi. Twatela kwanukaña netu neyi mukwetu natufumbi dikwila nawu tunaluwañeshi hela chakwila etu aweni tuneluki wanyi. Hampinji yamuchidiwu, hadaha tunateli kushikena kukaana kufumba. Tunateli kutachika kumutoobela muntu wunatufumbi hela mazu ahoshayi. Ilaña neyi twadizoza, tukumwekesha yilwilu yayiwahi.

12. Kwesekeja na Yishimu 27:5, 6, muloñadi chitwatela kumusakilila mukwetu neyi natufumbi? Lumbululenu.

¹² Muntu wadizoza wetejaña neyi anamufumbi. Chakutalilahu: Fwikijenu mudi kukupompa kwawakwaKristu. Hanyima yakuhanjeka nawakwenu akwakwitiya, mukwenu hakuyitwala hambadi nawa hakuyila nindi mumazewu munakakeli yakuda. Chakadi nikujina munateli kutiya nsonyi. Ilaña, munateli kumusakilila hakuyilejaku. Kuhosha hohu walala, mukutoñojoka nenu chiña anleja hakusambila. Munjila yoyimu, neyi mukwetu mukwakwitiya nahamuki hakwinza nakutufumba twatela kumusakilila nikumumona netu himukwetu watukeña, bayi chilumbu chetuku.—Tañenu Yishimu 27:5, 6; Ñal. 4:16.

13. Tunateli kumwekesha ñahi kudizoza neyi akwetu anayinki kukooleka muchipompelu?

¹³ Neyi akwetu anayinki kukooleka muchipompelu. Mukulumpi Jason wahosheli nindi: “Neyi amakwawu anakuyinka kukooleka nadiña nakudihula nami muloñadi  chabulilañawu kuntonda?” Komana ninenu dichimwatiyaña? Chachiwahi kufwila kuzata nyidimu yayivulu mumudimu waYehova. (1 Tim. 3:1) Dichi, twatela kwikala asoñama nayuma yitwatoñojokaña. Neyi kubabala nehi, tunateli kutachika kudivwimba mumuchima wetu. Chakutalilahu, mukwaKristu weyala nateli kutachika kutoñojoka nindi yena hohu diyi wunashikilimu kukalakala nyidimu muchipompelu. Hela mukwaKristu wasumbuka nateli kutoñojoka nindi, ‘Nfumwami diyi wunashikihu kubadika akanaña niakanaña!’ Ilaña neyi twadizoza, hitukutoñojokaña muniyi njilaku.

14. Chumanyi chitunateli kudizila kudi Mosi chelili antu amakwawu atachiki kuzata nyidimu yikwawu yazatileñayi?

¹⁴ Tunateli kudizila kuchuma cheliliyi Mosi hampinji yatambwililiwu akwawu kukooleka. Mosi walemesheli nankashi mudimu windi wakulombola muza waIsarela. Mosi welili ñahi chelili Yehova yayinki akwawu ñovu yakuzata mudimu wukwawu wazatileñayi? Hatiyili ichimaku. (Kuch. 11:24-29) Wadiña wadizoza nawa wetejeli antu amakwawu kumukwashaku kuzata mudimu wakusompesha antu. (Kwid. 18:13-24) Chumichi chawahili chikupu muloña aIsarela ekalili nawansompeshi amavulu akusompa nyiloña chatela ahembelelaña muntu wumu. Chumichi chinakumwekesha nawu Mosi washili maana hakukwasha amakwawu bayi kwikala nanyidimu yayivuluku. Ichi hichakutalilahu chachiwahi chitwatela kwimbujola. Neyi tunakukeña netu Yehova yatuzatisheña, twatela kwikala adizoza kubadika kwiluka hohu yuma yayivulu. Twatela kwiluka netu hela chakwila, “Yehova hela wudi hewulu watalaña mesu hadi wadizoza.”—Mas. 138:6.

15. Kuhimpikanyi kwamweniwu amanakwetu niahela amavulu?

 ¹⁵ Neyi yuma yinahimpiki. Hadi yaaka yinahitihu, amanakwetu adiña mumudimu wampinji yejima amweni kuhimpika. Chakutalilahu, mu 2014, ankoñi ankambi nawañodi jawu ayilejeli kuzata mudimu wambukaku. Kutachika muchaaka chochimu, ankoñi añinza ayilejeli nawu neyi anashikiji yaaka 70 atela kuleka mudimu wawu. Nawa amanakwetu adi nayaaka 80 hela kubadikahu ayilekesha kwikala nloñeshi wezanvu dawakulumpi. Cheñi, hadi yaaka yinahitihu, mamembala amuchisaka chaBeteli amavulu ayitumini kuya nakuzata wupayiniya. Amakwawu alekeli wupayiniya wadimena muloña wayikatu, kwakamena yisaka niyuma yikwawu muchihandilu.

16. Amanakwetu niahela amwekesheli ñahi nawu adizoza hakwiteja mudimu wayinkeliwu?

¹⁶ Kuhosha hohu walala, chayikalilili nankashi awa amanakwetu niahela kuhimpa. Chakadi nikujina, amavulu akeñeli nankashi nyidimu yazatiliwu hadi yaaka yayivulu. Chelili awa amanakwetu ayihimpi, mpinji yikwawu ‘aneñeleña’ nankashi hakwila nawu enjilili nanyidimu yayinkeliwu. Chimwahitili mpinji enjilili. Muloñadi? Chuma chayikwashili hikumukeña Yehova. Elukili nawu adihana kudi Yehova bayi kumudimu wudi wejima hela kwikala nejinaku. (Kol. 3:23) Anatwalekihu kumukalakela Yehova nakudizoza mumudimu wudi wejima. ‘Amumbilaña kwakama [kwawu] kwejima,’ muloña eluka nawu wayakamenaña.—1 Pet. 5:6, 7.

17. Muloñadi chitwazañalelaña kwiluka netu Izu daNzambi datukoleshaña kwikala adizoza?

¹⁷ Tunakusakilila nankashi muloña izu daNzambi datukoleshaña kwikala adizoza. Neyi twikala adizoza akwetu akuswina kwakwihi nanetu nawa mukufuma yuma yayiwahi. Chikutupelelaña kuumika kukala muchihandilu. Chuma chabadika, tukuswina kwakwihi naTata yetu wamwiwulu. Twazañalalaña kwiluka netu hela chakwila “Wahahalehi, Wabadika hewulu,” walemesha nikukeña ambuñindi adizoza.—Isa. 57:15.