1-2. Indi Mukwakutaŋisha 11:6 yinakundami ñahi kumudimu wakushimwina nsañu yayiwahi yaWanta?

MUMATUÑA amakwawu, antu akeñaña kudiza chatiyawu nsañu yayiwahi. Atiyaña neyi dichuma chatalilañawu hohu! Ilaña mumataña amakwawu, antu hiyakeñaña kutiya nsañu yinakuhosha hadi Nzambi hela Bayiboluku. Indi antu mwiluña denu ekala ñahi? Hichikweti muloña nachekalawuku, Yehova nakukeña nindi tutwalekihu kushimwina sampu mudimu wejima wunazatiki neyi chakeñañayi.

² Hampinji yatoñolayi Yehova, mudimu wakushimwina wakamana nawa “kukuma [kwakenza].” (Mat. 24:14, 36) Indi chayinu mpinji tunateli kwovwahila ñahi mazu akwila nawu “bayi wulekesha chikasa cheyuku”? *—Tañenu Mukwakutaŋisha 11:6.

3. Yumanyi yitukuhanjekahu muchinu chibaaba?

³ Chibaaba chinafumihu chashimwini yuma yiwana yitwatela kwila kulonda twikali “ayibinda awantu” ashikahu. (Mat. 4:19) Achinu chibaaba chikushimuna njila jisatu jinateli kutukwasha kutwalekahu kushimwina, hela chakwila tudi mukukala kwamuchidinyi. Tukudiza chichalemena (1) kutwamijaku mudimu wakushimwina, (2) kudiwunjika (3) nikutwalekahu nachikuhwelelu chakola.

4. Muloñadi chitwatela kutwamijilaku mudimu wakushimwina watwinkayi Yehova kuzata?

⁴ Yesu washimwini yuma yikamwekana yikamwekesha nawu tudi mumafuku akuminina nawa yinateli kukañesha  amulondelaña kuzata mudimu wakushimwina. Wayikonkomweneni atumbanji twindi nindi “tonenuña.” (Mat. 24:42) Makonu, tunakumona yuma yatukañeshaña neyi yayikañesheli antu amumafuku aNowa kusha maana kukusoñamisha kwashimwiniyi Nowa. (Mat. 24:37-39; 2 Pet. 2:5) Dichi, twatela kutwamijaku mudimu wakushimwina watwinkayi Yehova kuzata.

5. Indi Yilwilu 1:6-8 yinamwekeshi ñahi kutoha kwamudimu wakushimwina?

⁵ Makonu, twatela kutwamijaku chikupu mudimu wakushimwina. Yesu washimwineñahu dehi nindi iwu mudimu wakatanda kwejima nawa wakatwalekahu hanyima yakufwa kwindi. (Yow. 14:12) Chelili Yesu yafwi, atumbanji twindi amakwawu afuntili nakukwata inshi. Chasañukiliyi, Yesu welili chihayamisha nakukwasha atumbanji twindi amakwawu kukwata inshi. Wazatishili iyi mpinji kuyileja nindi mudimu wawu wakwikala ayibinda awantu wadiña walema kubadika mudimu wudi wejima. (Yow. 21:15-17) Henohu Yesu kanda yayi mwiwulu, wayilejeli atumbanji twindi nindi mudimu wakushimwina watachikiliyi wakatanda kubadika ñinza jaIsarela. (Tañenu Yilwilu 1:6-8) Chimwahitili yaaka, Yesu wamumwekesheleli kapostolu Yowanu chimwenu kulonda yamuleji yuma yikamwekana “mwifuku daMwanta.” * Hayuma yamweniyi, Yowanu wamweni ninichi chuma chakuhayamisha: Nawunlomboli wakañelu, “nsañu yayiwahi yahaya nyaaka” ayishimwinineña ‘kunyuza yejima, kunyichidi yejima, kumadimi ejima nikudi antu ejima.’ (Chim. 1:10; 14:6) Mwamweni, makonu Yehova nakukeña nindi tuzatiku iwu mudimu weneni wakushimwina sampu wunamani.

6. Tunateli kutwamijaku ñahi mudimu wakushimwina?

 ⁶ Tunateli kutwamijaku mudimu wakushimwina neyi tutoñojokaña hayuma yinakutwililayi Yehova hakutukwasha. Chakutalilahu, nakutuloñeshela yakuda yayivulu yakuspiritu yakupulinta, yahayozelu, yamazu nimavidiyo akukwata dehi, nimaprogilamu aha JW Broadcasting. Toñojokenu hachumichi: Hawebusayiti yetu hadi nsañu yidi mumadimi akubadika ha 1,000! (Mat. 24:45-47) Antu amukaayi adaambula muloña wansañu jamapolitiki, nsakililu nimaheta, ilaña ambuña aNzambi akubadika ha 8 miliyoni anuñañana chikupu nawamanakwawu mukaayi kejima. Chakutalilahu, haChitanu, April 19, 2019, aYinsahu mwahita kaayi adinuñili hamu nakutalatala nsona yahefuku. Hanidi ifuku namelela, izaza dawantu akushika ku 20,919,041 apompeli hamu nakwanakana Chanukishu chakufwa kwaYesu. Tunateli kutwalekahu kutwamijaku mudimu wakushimwina nsañu yaWanta neyi tutoñojokaña hakukooleka kutukweti kwakumona nikwikala mbadi yanichi chihayamisha chamakonu.

7. Kumwimbujola Yesu kukutukwasha ñahi kutwamijaku mudimu wakushimwina?

⁷ Njila yikwawu yinateli kutukwasha kutwamijaku mudimu wakushimwina hikumwimbujola Yesu. Hetejeli chuma hela chimu kumukañesha kushimwina wunsahu wachalalaku. (Yow. 18:37) Hampinji Satana yamwinkeleñayi “mawanta ejima amukaayi nikulema kwawu”; nihakeñeleñawu kumuswanyika hawanta kudi antu, wakaanini. (Mat. 4:8, 9; Yow. 6:15) Hashili muchima kukufwila maheta hela kufwa mutentu makabisha aswejaku. (Luka 9:58; Yow. 8:59) Neyi chikuhwelelu chetu chidi mukweseka, tunateli kutwamijaku mudimu wakushimwina neyi twanuka kufumba kwakapostolu Pawulu. Wayikonkomweneni akwaKristu kumwimbujola Yesu kulonda ‘abuli kuzeya nakuleka’!—Heb. 12:3.

8. Kudiwunjika hichilwilwinyi, nawa muloñadi chitwatela kwikala adiwunjika sweje-e yinu mpinji?

⁸ Kudiwunjika hichilwilu chakuhembelela mukuwunda sampu yuma yinahimpiki. Hela tunakuhembelela kumana kwayuma yatama hela kushikijewa kwayuma yitunatalili hadi mpinji yayilehi, twatela kwikala adiwunjika. Kaprofwetu Habakuki wafwilileña kumona kukuma kwansañu yamadombu muYuda. (Hab. 1:2) Atumbanji twaYesu akuhweleleli nawu Wanta “wukumwekana hohenohu” nakuyamwina kumakabisha awaRoma. (Luka 19:11) Twatalilaña ifuku dakafumishahu Wanta waNzambi kutama nakuleta kaayi kakaha kakuloña. (2 Pet. 3:13) Hela chochu, twatela kudiwunjika nakuhembelela mpinji yatoñolayi Yehova. Tushinshikenu njila jatudizishilañamu Yehova kwikala adiwunjika.

9. Yumanyi yinakumwekesha nawu Yehova wadiwunjika?

⁹ Yehova diyi wabadika mukudiwunjika. Wamwinkeli Nowa mpinji yeneni yakutuña watu nimudimu wakwikala “mukwakushimwina kuloña.” (2 Pet. 2:5; 1 Pet. 3:20) Yehova wamutiyilili Abarahama chamwihwileñayi malwihu nakufuntisha-funtishahu hanochu chafuukwiliyi kujilumuna antu ashakamineña munyisumba yatama yaSodoma naGomora. (Kutach. 18:20-33) Hadi yaaka yayivulu, Yehova wadiwunjikili chikupu namuza waIsarela wabula kushinshika. (Nehe. 9:30, 31) Makonu tunakumona kudiwunjika kwaYehova chinakuyinkayi mpinji antu ejima anakukokayi kulonda “ekali nakukooleka kwakubalumuka munyichima.” (2 Pet. 3:9; Yow. 6:44; 1 Tim. 2: 3, 4) Kudiwunjika kwaYehova kwatukwashaña kwikala  adiwunjika hampinji yitunakutwalekahu kushimwina nikudizisha. Watudizishaña cheñi kwikala adiwunjika kuhitila muyakutalilahu yekala Mwizu dindi.

10. Kwesekeja naYakoba 5:7, 8, chumanyi chitunateli kudizila kudi ndimi?

¹⁰ Tañenu Yakoba 5:7, 8. Chakutalilahu chandimi wunakutumba mbutu chatudizishaña chitunateli kwikala adiwunjika. Mbutu jikwawu jakulaña swayi. Ilaña mbutu jikwawu, sweje-e jasoñaña nyikaabu, jashimbulaña hakwila jihi. MuIsarela hakwila mbutu jihi mwahitileña tukweji 6. Ndimi watumbileña mbutu hanyima yanvula yakusambila nawa wañwileña mbutu hanyima yanvula yakukumishaku. (Maku 4:28) Mwani twimbujoleña chikupu kudiwunjika kwandimi. Hela chochu, chumichi chaswayi wanyi.

11. Kudiwunjika kunateli kutukwasha ñahi mumudimu wakushimwina?

¹¹ Antu abula kuwanina akeñaña kushikena kumona yuma yikufuma mumudimu wunakuzatawu. Ilaña neyi tunakukeña netu iha detu disoñeña chiwahi, twatela kutwalekahu kudakamena nankashi, dikwila nawu, kudidima, kuditumba, kudisela nikuditukumwina. Mudimu wetu wakwilisha atumbanji niwena wakeñekaña kutwalekahu kuzata nañovu. Hakwila nawu tukwashi atudizi etu kuleka chaambu nakwikala nachilwilu chakukeña, hatela kuhita mpinji yeneni. Kudiwunjika kunateli kutukwasha kubula kuzeya neyi tumona ikañesha. Neyi antu amakwawu akaana kututiyilila, twatela kwikala adiwunjika. Hitunateli kukanjikija kadizi waBayibolu kwikala nachikuhweleluku. Mpinji yikwawu, atumbanji twaYesu niwena hiyashikeneneña kutiyishisha munatalishi yuma yayidizishileñawuku. (Yow. 14:9) Twanukeña netu, mudimu wetu wakutumba nikutukumwina, ilaña Nzambi Yomweni diyi wakulishaña.—1 Kor. 3:6.

12. Tunateli kudiwunjika ñahi neyi tunakushimwina antaña jetu abula kwitiya?

 ¹² Chinateli kutukalila nankashi kwikala adiwunjika neyi tunakushimwina antaña jetu abula kwitiya. Chishina chekala haMukwakutaŋisha 3:1, 7 chinateli kutukwasha. Chahosha nawu: “Yuma yejima yikweti mpinji . . . mpinji yakumwena nimpinji yakuhosha.” Yilwilu yetu yayiwahi hohu yinateli kushimuna wunsahu, ilaña mpinji yejima ninetu twatela kuwana mpinji yakuhosha hachalala. (1 Pet. 3:1, 2) Twatela kudiwunjika nawantu ejima, kushilahu niantaña jetu, hampinji yitunakushimwina nikudizisha neyena.

13-14. Anyi itwatela kwimbujola amwekesheli kudiwunjika?

¹³ Tunateli kwikala adiwunjika neyi tudizila kudi antu ashinshika ashimunawu muBayibolu niadiku makonu. Habakuki wafwilileña kumona kukuma kwayuma yatama, ilaña wahosheli nindi: “Nukwimana hami hinatalatalilaña.” (Hab. 2:1) Kapostolu Pawulu wamwekesheli iyena dadiñayi nadu dakufwila “kumanisha” mudimu windi. Ilaña, wadiwunjikili nakutwalekahu “kushimwina chikupu wunsahu wansañu yayiwahi.”—Yilw. 20:24.

¹⁴ Talenu awa adisumbula ahitili mushikola yaGileyadi nawa atemesheliwu mwituña mwekala aYinsahu antesha nawa mwekala antu amavulu abula kwikala akwaKristu. Antu amavulu akeñeleña kudiza Bayibolu wanyi. Ilaña akwawu adiñawu nawu kushikola yaGileyadi azatilileña mumatuña acheñi, ayitemesheleleña lipoti yawatudizi aBayibolu anakuyilaku hambidi. Hela chakwila mwiluña dawu antu atambwilileña chalala nankashi wanyi, awa adisumbula atwalekelihu kuzata mudimu wakushimwina. Hanyima yakushimwina yaaka 8 mwiluña mwamwekeneña neyi antu hiyatambwilaña nsañu yayiwahiku, azañaleli nankashi chelili kadizi wawu wumu waBayibolu yapapatishewi. Iyi yakutalilahu yakunyima niyamakonu yinakutudizishadi? Awa antu ashinshika hiyazeyeli hela kulekesha makasa awuku, nawa Yehova wayikiswilili hakudiwunjika kwawu. Twikalenu “akwakwimbujola antu akaswana yuma yakanawu muloña wachikuhwelelu nikudiwunjika kwawu.”—Heb. 6:10-12.

15. Njilanyi yatachi mwatukwashilaña chikuhwelelu kutwalekahu kushimwina?

¹⁵ Twakuhwelela nsañu yitwashimwinaña, dichi twafwilaña kuleja antu amavulu nankashi iyi nsañu. Twakuhwelela yikaninu yekala Mwizu daNzambi. (Mas. 119:42; Isa. 40:8) Tunakumona yikaninu yamuBayibolu chiyinakushikijewa makonu. Tunakudimwena antu chinakuhimpawu chihandilu neyi atachika kuzatisha kufumba kwamuBayibolu. Chumichi chatukojejaña tukuhweleli netu nsañu yayiwahi yaWanta diyi nsañu yatela kutiyawu antu ejima.

16. Kwesekeja naMasamu 46:1-3, kumukuhwelela Yehova niYesu kwatukwashaña ñahi kutwalekahu kushimwina?

¹⁶ Twamukuhwelela Yehova, Kaseloki kansañu yitwashimwinaña, ninowu aswanyikayi kwikala Mwanta waWanta, Yesu. (Yow. 14:1) Hela chakwila tukumona kukala kwamuchidinyi, mpinji yejima Yehova wukwikalaña chiswamu chetu nawa ñovu yetu. (Tañenu Masamu 46: 1-3) Kubombelahu, tunakuhweleli netu Yesu nakulombwela mwiwulu mudimu wakushimwina, kuzatisha ñovu niwuswa wamwinkawu kudi Yehova.—Mat. 28:18-20.

17. Shimunenu chakutalilahu chinakumwekesha chitwatela kutwalekelahu kushimwina.

¹⁷ Chikuhwelelu chatukwashaña kukuhwelela netu Yehova wukukiswila ñovu jetu, mpinji  yikwawu munjila jitunabuli kukuhwelela. (Mukwa. 11:6) Chakutalilahu, ifuku dejima antu amavulu enzaña hangolofwana jetu nihamesa yanyikanda. Komana iyi njila yinakuzatika chiwahi? Eña! Mudimu Wetu waWanta waNovember 2014 washimwini hadi kansi wumu wahayunivesiti wakeñeleña kusoneka nsañu yimu hadi aYinsahu jaYehova. Wakañenyi kuwana Itala daWanta, ilaña wawanini ngolofwana yanyikanda hayunivesiti nawa wawanini nsañu yakeñeleñayi kusoneka. Nkumininaku, wekalili Chinsahu wapapatishewa nawa ichi hipayiniya wampinji yejima. Yakutalilahu yamuchidiwu yatusañumunaña kutwalekahu kushimwina muloña yamwekeshaña nawu kuchidi antu anakukeña kuwana nikutiya nsañu yaWanta.

18. Tuneluki ñahi netu mudimu wakushimwina Wanta wakamana kwesekeja nachakeñañayi Yehova?

¹⁸ Tunateli kukuhwelela netu mudimu wakushimwina nsañu yaWanta wakamana chakadi kulaba. Talenu chuma chamwekeni mumafuku aNowa. Yehova wamwekesheli nindi hiMukwakuhemba Mpinji chikupu. Henohu kunashali yaaka 120, Yehova washimwineñahu dehi mpinji yikatachika Dibaji. Chimwahitili yaaka, Yehova wamulejeli Nowa kutuña watu. Hadaha mwahitili yaaka 40 hela 50 henohu Dibaji kanda, Nowa watwalekelihu kuzata nañovu. Hela chakwila antu amutiyilileña wanyi, watwalekelihu kushimwina nsañu yakusoñamisha kushika nimpinji Yehova yahosheliyi nindi himpinji yakwiñija atunyama muwatu. Dichi, hampinji yatoñweliyi, ‘Yehova washinkili kuchisu.’—Kutach. 6:3; 7:1, 2, 16.

19. Yumanyi yitukuchiñejaña neyi tubula kulekesha makasa etu?

¹⁹ Katataka Yehova yalekeshi mudimu wakushimwina nsañu yaWanta. Nkumininaku, wakakisañana kaayi kaSatana nakuleta kaayi kakaha kakuloña. Henohu iyi mpinji kanda, twimbujolenu Nowa, Habakuki niantu amakwawu anabuli kulekesha makasa awu. Dichi tutwamijenuku mudimu wakushimwina, tudiwunjikeña nikutwalekahu kumukuhwelela chikupu Yehova niyikaninu yindi.