1-2. Kwesekeja na 1 Timotewu 6:20, Timotewu amwinkelidi?

KAKAVULU Twenkaña antu amakwawu yuma yetu yalema wuseya kutuhembelaku. Chakutalilahu, tunateli kusha mali munyambawulu. Neyi tuneli dehi mwenimu, twakuhwelelaña netu mali etu akuyihemba chiwahi, akuyiya hela kujimbala wanyi. Dichi tweluka mwatalisha kwinka muntu yuma yetu yitwalemesha chikupu netu yatuhembeliku.

² Tañenu 1 Timotewu 6:20. Kapostolu Pawulu wamwanukishilimu Timotewu nindi watambwilili yuma yalema, dikwila nawu kwiluka kwalala kwankeñelu yaNzambi hadi antu. Timotewu amwinkeli cheñi mudimu ‘wakushimwina mazu nikukalakala mudimu wamukwakushimwina.’ (2 Tim. 4:2, 5) Pawulu wamukonkomweneni Timotewu kuhemba chuma chamukunjikiliwu. Kufwana Timotewu, atukunjika yuma yalema. Hiyumanyi yeniyi? Nawa muloñadi wutwatela kuhembela chiwahi yuma yalema yatwinkayi Yehova?

3-4. Chalala chamuBayibolu chalemenadi?

³ Yehova watwinka kwiluka kwalala kwachalala chalema chekala Mwizu dindi, Bayibolu. Ichi chalala chalema muloña chatudizishaña chakwikala nawubwambu wawuwahi naYehova nichitunateli kwikala namuzañalu waweni muchihandilu. Neyi twiteja ichi chalala nikuchizatisha muchihandilu chetu, tukusubuka kuwuduñu wantañishilu yakutwamba nikwila yuma yatama.—1 Kor. 6:9-11.

⁴ Chuma chikwawu chaletesha chalala chaMwizu daNzambi kwikala chalema himuloña wakwila Yehova wachisololaña  hohu kudi antu adizoza adi “nanyichima yashinshika.” (Yilw. 13:48) Antu amuchidiwu etejaña njila yazatishañayi makonu kuhaninamu ichi chalala. (Mat. 11:25; 24:45) Kwila twiluka ichi chalala halwetu nehi, nawa kwosi kwekwawu kutunateli kuwana ichi chalala chalemaku.—Yish. 3:13, 15

5. Kukoolekanyi kukwawu kwatwinkayi Yehova?

⁵ Yehova watwinka cheñi kukooleka kwakudizisha antu chalala kulonda amwiluki nikwiluka nkeñelu yindi. (Mat. 24:14) Nsañu yitwashimwinaña yalema chikupu muloña yakwashaña antu kwikala muchisaka chaYehova nikwikala nakukooleka kwakuheta wumi wahaya nyaaka. (1 Tim. 4:16) Chili tunakuzata nankashi mumudimu wakushimwina hela nehi, tunakuzata mudimu walema wunakuzatewa hayinu mpinji. (1 Tim. 2:3, 4) Hikukooleka chikupu kwikala akwakukalakala hamu naNzambi!—1 Kor. 3:9.

6. Chumanyi chamwekeni kudi antu amakwawu abulili kwikala asoñama?

⁶ Mumafuku aTimotewu, akwaKristu amakwawu alemesheli wanyi kukooleka kwadiñawu naku kwakwikala akwakukalakala hamu naNzambi. Chineli Demasi wakeñeli nshakaminu yamakonu, walekeli kuzatila hamu naPawulu. (2 Tim. 4:10) Chinamwekani neyi Fwigelu naHemoni alekeli mudimu wakushimwina muloña atiyili woma nawu akuyikabisha neyi chamukabishiliwu Pawulu. (2 Tim. 1:15) Himenusa, Alesanderi, niFwiletu ekalili akwakusekesha nawa alekeli kudifukula kudi Yehova. (1 Tim. 1:19, 20; 2 Tim. 2:16-18) Awa antu ejima amukeñeli Yehova, ilaña mukuhita kwampinji atachikili kumona yuma yayinkeliyi nawu hiyalemaku.

7. Tufutanyi twazatishañayi Satana hadi etu?

⁷ Tufutanyi twazatishañayi Satana hakwila nawu tudiwuli yuma yalema yatwinkayi Yehova? Talenu tufuta twantesha twazatishañayi Satana. Wazatishaña maprogilamu aha TV, mafwilimu, intaneti, yipapilu yansañu, nyikanda nimamagazini kulonda tutachiki kutoñojoka nikwila yuma munjila yikuletesha tuleki chovu-chovu kumukeña Yehova nikumwovwahila. Wafwilaña kututiyisha kutama nekakeja dawakwetu hela ikabisha kulonda tuleki kushimwina. Nawa wesekaña kutukokola kulonda tutiyilili ‘kuyuma yakutwamba yatenañawu nawu “kwiluka”’ yawakwakusekesha kulonda tushiyi chalala.—1 Tim. 6:20, 21.

8. Yumanyi yimukudizila kuchuma chamumwekeneni manakwetu wejina daDaniel?

⁸ Neyi kubabala nehi, tunateli kutachika chovu-chovu kushiya chalala. Talenu  chakutalilahu chaDaniel, * wakeñeli nankashi yisela yamavidiyo. Wahosheli nindi: “Natachikili kuhema yisela yamavidiyo hinadiña nayaaka 10. Hatachi, nahemeneña yisela yayiwahi. Ilaña chovu-chovu natachikili kuhema yisela yamadombu nawa mwadiña kupesha.” Mukuhita kwampinji, wahemeneña yisela yamavidiyo hadi maora 15 hefuku. Daniel wahosheli nindi, “Mumuchima wami, nelukili nami yisela yinahemeneña nimaora inombileña hakuhema yisela yeniyi yaluwañesheleña wubwambu wami naYehova. Hela chochu, muchima wami wachinchikili nawa namweneña nami yishina yamuBayibolu hiyankundaminiku.” Dichi, neyi kubabala nehi, yisela yinateli kuletesha tubuli kukwatisha chalala. Neyi chuma chamuchidiwu chimwekana, tukujimbesha yuma yalema yatwinkayi Yehova.

9. Kwesekeja na 1 Timotewu 1:18, 19, Pawulu wamwesekejeli Timotewu nanyi?

⁹ Tañenu 1 Timotewu 1:18, 19. Pawulu wamwesekejeli Timotewu namushidika nawa wamukolesheli ‘kutwalekahu kulwa njita yayiwahi.’ Iyi hiyadiña njita yayeniku, ilaña yadiña yakuspiritu. Munjilanyi mwekalilawu akwaKristu neyi amashidika anakuzuña? Yilwilwinyi yitwatela kwikala nayu chineli tudi amashidika aKristu? Tutalenu yikuma yitanu yitunateli kudizila kuchakutalilahu chahaniniyi Pawulu. Iyi yikuma yinateli kutukwasha kukwatisha chalala.

10. Kumwakama Nzambi dikwila nawudi, nawa muloñadi chitwatela kumwakamina?

¹⁰ Mwakamenuña Nzambi. Ishidika wamuwahi washinshika. Wazataña nañovu kukiña muntu akeñayi hela chuma chalemeshayi. Pawulu wamukolesheli Timotewu kumwakama Nzambi, dikwila nawu kwikala washinshika kudi Nzambi. (1 Tim. 4:7) Neyi tusweja kumukeña Nzambi nikumwakama, mpwila yetu yakukwatisha chalala yikuswejelaku chikupu.—1 Tim. 4:8-10; 6:6.

11. Muloñadi wutwatela kudidizishila kwila yuma yaloña?

¹¹ Didizishenu kwila yuma yaloña. Ishidika watela kuzata nañovu kulonda ekali wadiloñesha kuzuña njita. Timotewu watwelekelihu kwikala wakola kuspiritu muloña watiyilili kufumba kwaPawulu kwakwikala nayilwilu yayiwahi, kudikunda nawakwawu akwakwitiya nikutemuka kufwila kwatama. (2 Tim. 2:22) Hakwila eli mwenimu wateleleli kudidizisha kwila yuma yaloña. Twatela kudidizisha kwila yuma yaloña hakwila tushindi njita yakufwila yuma yakumujimba. (Rom. 7:21-25) Kubombelahu, twatela kudifumba kulonda tutwalekihu kusubula wuntu wawukulu nakuvwala wuntu wawuha. (Efwes. 4:22, 24) Nawa neyi tunazeyi hanyima yakuzata, twatela kudinkaku kuya nakupompa.—Heb. 10:24, 25.

12. Yumanyi yitwatela kwila hakwila twiluki chakuzatisha chiwahi Bayibolu?

¹² Ishidika watela kudiza chakuzatisha yitwa yindi. Hakwila akulukili, watela kuzatishaña yitwa yindi mpinji yejima. Munjila yoyimu, twatela kukulukila mukuzatisha Izu daNzambi. (2 Tim. 2:15) Kupompa kwetu kunateli kutukwasha kwikala akuluka yitembi. Ilaña neyi tunakukeña kushinjila antu netu chalala chamuBayibolu chalema, twatela kudizaña Bayibolu mpinji yejima. Twatela kuzatisha Izu daNzambi kukolesha chikuhwelelu chetu. Dikwila nawu hitwatela kutaña hohu Bayiboluku. Ilaña twatela nikutoñojoka chikupu hayuma yitunakutaña nikusandujola munyikanda yetu kulonda tutiyishishi Nsona nikuyizatisha.  (1 Tim. 4:13-15) Kufumahu tukutwesha kuzatisha Izu daNzambi kudizisha antu amakwawu. Cheñi, bayi neyi tukukumina dakuyitañila mavasi amuBayiboluku. Ilaña tunakukeña kukwasha antu kwiluka munatalishi nsona nichiyinayikundami. Dichi neyi tudizaña Bayibolu mpinji yejima, tukukulukila mukuzatisha Izu daNzambi donenewa hakudizisha antu.—2 Tim. 3:16, 17.

13. Kwesekeja naAheberu 5:14, muloñadi chitwatela kwikalila asoñama?

¹³ Ikalenu asoñama. Ishidika watela kumwena chadimu wubanji nikuwutondolwela. Ninetu twatela kwilukila chadimu yuma yinateli kutuletela wubanji nawa nikwilahu chuma kulonda tuwutondolweli. (Yish. 22:3; tañenu Aheberu 5:14.) Chakutalilahu, twatela kutonda chiwahi yisela. Maprogiramu Aha TV nimafwilimu kakavulu amwekeshaña yilwilu yatama. Yilwilu yamuchidiwu yamuneñeshaña Nzambi nawa chakadi nikujina yikaleta wubanji. Twatondolwelaña yisela yinateli kuletesha tuleki kumukeña Nzambi chovu-chovu.—Efwe. 5:5, 6

14. Kusoñama kwamukwashili ñahi Daniel?

¹⁴ Daniel itwatena hakusambila, watachikili kwiluka nindi kuhema yisela yamavidiyo amadombu nikupesha dikukala kwadiñayi naku. Wasandujoleli muWatchtower Library nsañu yinateli kumukwasha nakukala kwindi. Iyi nsañu yamukwashili ñahi? Walekeli kuhema yisela yamavidiyo atama. Walekeli kuhema yisela nawakwawu haintaneti. Daniel wahosheli nindi, “Chatela nihemeña yisela yamavidiyo, natachikili kudikunda nawamabwambu amuchipompelu.” Chayinu mpinji Daniel nakuzata wupayiniya nawa himukulumpi.

15. Muloñadi nsañu yakutwamba chiyatamina?

¹⁵ Kufwana Timotewu, ninetu twatela kwiluka wubanji wekala munsañu yakutwamba yatandishañawu akwakusekesha. (1 Tim. 4:1, 7; 2 Tim. 2:16) Chakutalilahu, anateli kutandisha nsañu jakutwamba hadi amanakwetu hela kutuletesha tutachiki kujinoka kuloñesha kwaYehova. Nsañu yamuchidiwu yinateli kuzeyesha chikuhwelelu chetu. Hitwatela kukuhwelela iyi nsañu yakutwambaku. Muloñadi? Muloña iyi nsañu ayitandishaña kudi ‘antu aluwankana muyitoñojoka nawa adiwulaña chalala.’ Wena afwilaña hohu ‘ntaadi nikutaadeka.’ (1 Tim. 6:4, 5) Akeñaña  tukuhweleli makudi awu nawa tutachiki kujinoka amanakwetu.

16. Yumanyi yinateli kutuluwañesha yitwatela kutondolwela?

¹⁶ Tondolwelenu yuma yinateli kuyiluwañesha. Hakwikala “ishidika wamuwahi waKristu Yesu,” Timotewu washili maana hamudimu wakushimwina chatela yaluwankani nayuma yakumujimba hela kufwila maheta. (2 Tim. 2:3, 4) Kufwana Timotewu, hitwatela kufwila yuma yakumujimbaku. “Ñovu yakudimbana kwamaheta” yikuletesha tuleki kumukeña Yehova, tumoneña Izu daNzambi netu hidalemaku, nawa tukwikala nampwila yakushimwina wanyi. (Mat. 13:22) Twatela kupeleshaku chihandilu chetu nikuzatisha mpinji niñovu yetu kulonda ‘tusambileña kukeña Wanta.’—Mat. 6:22-25, 33.

17-18. Yumanyi yitwatela kwila hakukiña wubwambu wetu naYehova?

¹⁷ Diloñeshenu kuzatilahu hohenohu. Ishidika watela kudiloñeshela chadimu chakudikiña yomweni. Neyi tunakukeña kukiña yuma yatwinkayi Yehova, twatela kuzatilahu swayi-swayi neyi tumona wubanji. Chumanyi chinateli kutukwasha kuzatilahu swayi-swayi? Twatela kufuukula chadimu chitukwila neyi tumona wubanji.

¹⁸ Chakutalilahu, antu neyi anapompi hachidika, ayilejaña nawu atela kwilukila chadimu kudi chiisu chidi mukamwihi kwakwidikila henohu chidika kanda chitachiki. Muloñadi? Kulonda antu atweshi kwidika swayi-swayi neyi kunamwekani wubanji. Munjila yoyimu, twatela kudiloñeshela chadimu chitukwila neyi tumona nyevulu yinakumwekesha yilwilu yawuvumbi, nyevulu yamadombu indi kwiji nsañu yawakwakusekesha hampinji yitunakusandujola haIntaneti, hitunakutala fwilimu hela progilamu yaha TV. Neyi tudiloñeshela chadimu hayuma yinateli kumwekana, tukuzatilahu swayi-swayi hakukiña wubwambu wetu naYehova nikwikala akadi ihuji kumesu indi.—Mas. 101:3; 1 Tim. 4:12.

19. Nkiswinyi yitukutambwila neyi tukiña yuma yalema yatwinkayi Yehova?

¹⁹ Twatela kukiña yuma yalema yatwinkayi Yehova, dikwila nawu, chalala chamuBayibolu nikukooleka kwakudizisha antu. Neyi twila mwenimu, tukwikala nachinleji chitooka, namuzañalu muchihandilu chetu, nimuzañalu wafumaña mukukwasha antu kumwiluka Yehova. Nzambi wukutukwasha kukiña yuma yatwinkayi.—1 Tim. 6:12, 19.