1. Mutambinyi wayilejeliyi Yesu ayibinda awana awanshi, nawa wena elili ñahi?

KAMBANJI Petulu, Anderi, Yakoba niYowanu adiña ayibinda anshi. Ahayamini hakutiya Yesu nakuyila nindi: “Nlondelenuña, nukuyibalumuna mwiikali ayibinda awantu.” * Wena elili ñahi? Bayibolu yahoshaña nawu: “Hohenohu ashiyili tuleñi twawu nakumulondela.” (Mat. 4:18-22) Chuma chafuukwiliwu chahimpili chihandilu chawu. Chatela akwateña inshi, ‘ekalili ayibinda awantu.’ (Luka 5:10) Makonu Yesu nakutambika antu akweti nyichima yashinshika akeña chalala. (Mat. 28:19, 20) Komana mweteja mutambi waYesu wakwikala ayibinda awantu?

2. Muloñadi chitwatela kulemeshela mutambi wakwikala ayibinda awantu, nawa yumanyi yinateli kutukwasha kufuukulahu?

² Hadaha munadizi Bayibolu hadi mpinji yayilehi nawa munakukeña kufuukulahu neyi chakwila munateli kwikala mukwakushimwina wansañu yayiwahi. Neyi munakushintajala kwiteja mutambi waYesu, bayi muneñaku. Neyi munakushintajala dikwila nawu muneluki chalemena chuma chimunakufuukula. Bayibolu yahosha nawu Petulu niamabwambu jindi ashiyili tuleñi twawu “hohenohu.” Hela chochu, Petulu nimanakwindi asambilili kutoñojokahu henohu kanda afuukulihu. Hadiña hahita dehi tukweji 6 kufuma hamwilukiliwu nikwiteja nawu Yesu diyi Mesiya. (Yow. 1:35-42) Munjila yoyimu, hadaha ninenu munadizi yuma yayivulu hadi Yehova niYesu nawa munakukeña kutwalekahu kupaminaku kuspiritu. Ilaña mwatela kusambila kutoñojokahu  henohu kanda mufuukuluhu. Chumanyi chakwashili Petulu, Anderi niantu amakwawu kufuukulahu?

3. Yilwilwinyi yikuyikwasha kwiteja mutambi waYesu?

³ Atumbanji twaYesu akusambila adiña neyena dakuzata, elukili chakuzata mudimu wawu, adiña ahamuka nawa adiña nakudifumba. Iyi yilwilu yayikwashili kwikala ayibinda awantu amawahi. Achinu chibaaba chikushimuna chimunateli kwikala naniyi yilwilu kulonda mwikali kambanji kaKristu wamuwahi.

4. Chumanyi chamukwashili Petulu kwikala chibinda wanshi?

⁴ Petulu wadiña nakukwata inshi kulonda yakwashi chisaka chindi, ilaña dimu mwahandilileñayi. Chinamwekani neyi Petulu wakeñeli nankashi kukwata inshi. (Yow. 21:3, 9-15) Wakeñeli cheñi mudimu wakwikala chibinda wawantu. Nawukwashu waYehova Petulu welukili chakuzata iwu mudimu.—Yilw. 2:14, 41.

5. Kwesekeja naLuka 5:8-11, Petulu watiyililidi woma, nawa chumanyi chinateli kutukwasha kubula kutiya woma?

⁵ Twashimwinaña muloña twamukeña Yehova, ichi dichuma chaletesha tuzateña iwu mudimu. Kukeña kutwamukeña Yehova kunateli kutukwasha kuleka kutoñojoka netu tukutwesha wanyi iwu mudimu. Yesu chamutambikiliyi Petulu nindi yekali chibinda chawantu, wamulejeli nindi: “Lekaku kutiya woma.” (Tañenu Luka 5:8-11.) Petulu hatiyileña woma nayuma yadi kufumamu neyi yekala kambanjiku. Ilaña wahayamini chelili Yesu yayikwashi kukwata inshi nawa chumichi chamuletesheli kutoñojoka nindi  washikililimu wanyi kuzata hamu naYesu. Kufwana Petulu, hadaha ninenu munateli kuchiina neyi mwiluka yuma yimwatela kwila hakwila mwikali kambanji kakristu. Neyi mutiya woma, mukeñenu Yehova, Yesu niakwenu, chumichi chikuyisañumuna kwiteja mutambi waYesu wakwikala chibinda chawantu.—Mat. 22:37, 39; Yow. 14:15.

6. Yumanyi yikwawu yaleteshaña tushimwineña?

⁶ Talenu yuma yikwawu yaleteshaña tushimwineña. Tunakufwila kwovwahila lushimbi lwaYesu lwakwila nawu: “Yenu mwakelishi . . . atumbanji.” (Mat. 28:19, 20) Cheñi twashimwinaña muloña antu “[ayikabishaña] nikuyidiwula” nawa anakukeña chikupu kudiza chalala haWanta. (Mat. 9:36) Yehova nakukeña nindi antu ejima eluki chalala nawa akahandi.—1 Tim. 2:4.

7. Aroma 10:13-15 yamwekeshaña ñahi nawu mudimu wakushimwina walema?

⁷ Neyi twiluka mudimu wetu wakushimwina chiwunateli kwamwina mawumi awantu, chikutukojeja kufwila kuwuzata. Kwambukaku nachibinda wanshi wakwataña inshi kulonda yalandishi hela kuda, etu ‘twakwataña’ antu kulonda twamwini mawumi awu.—Tañenu Aroma 10:13-15; 1 Tim. 4:16.

8-9. Chumanyi chatela kwilukayi chibinda wanshi, nawa muloñadi?

⁸ Mumafuku aYesu, chibinda wanshi muIsarela welukileña muchidi wanshi wunateli kukwatayi. (Lev. 11:9-12) Welukileña cheñi kunateli kuwanika inshi. Inshi yavula kushakama kumaluña kuyakeña nawa kudi yakuda yayivulu. Komana chibinda wanshi nateli kuya nakujaha inshi mpinji yidi yejima yinakeñiyi? Talenu chashimwiniyi chinsahu wumu washakamaña haChitutu chaPacific kutalisha hampinji yatelela yakukwatilamu inshi chatambikiliyi mishonali wumu nindi ayi nakukwata inshi. Iwu mishonali wamulejeli nindi, “Nakakuwana kumadiki nampinji ya 9 koloku yabudidi.” Manakwetu wamwakwili nindi, “Twayaña hampinji yayiwahi yakukwatilamu inshi bayi mpinji yidi yejima yitunakeñiku.”

⁹ Munjila yoyimu, ayibinda anshi amumafuku awapostolu ayileña kumaluña kwatela kuwanawu inshi nawa hampinji yatelela. Chakutalilahu, atumbanji twaYesu ashimwinineña mutembeli, mumasinagogi, kwitala nikwitala nimumaluña akulandishila. (Yilw. 5:42; 17:17; 18:4) Ninetu twatela kwiluka mpinji yekalañawu antu adi mwiluña mutwashimwinaña hamatala. Twatela kuhimpa njila yakushimwinamu kulonda tushimwineña kutunateli kuwana antu hampinji yatelela.—1 Kor. 9:19-23.

10. Yozelwinyi yatwinkawu kudi kuloñesha kwaYehova?

¹⁰ Chibinda wanshi watela kwikala nayitwa yatelela nawa watela kwiluka chakuyizatisha. Ninetu twatela kwikala nayitwa yatelela yakuzatisha mumudimu wetu. Nawa twatela kwiluka chakuyizatisha. Yesu wayilejeli atumbanji twindi chakuyishimwina antu nsañu yayiwahi. Wayilejeli yuma yatela kusendawu, kwakushimwina nichakuhosha. (Mat. 10:5-7; Luka 10:1-11) Makonu kuloñesha kwaYehova kwatwinka Chikasha chaYozelu Yakuzatisha Hakudizisha chikweti yozelu yatukwashaña. * Nawa atudizishaña chakuzatisha iyi yozelu. Chatudizishañawu chatukwashaña kubula kwikala nawoma neyi tunakushimwina nawa twadizaña chakwikala antañishi amawahi.—2 Tim. 2:15.

11. Muloñadi ayibinda awantu chatela kwikalilawu ahamuka?

¹¹ Ayibinda anshi atela kwikala ahamuka. Mpinji yikwawu amonaña kukala kwabulañawu kukuhwelela hakaluñalwiji. Kakavulu azataña nawufuku hakaluñalwiji nawa hanateli kwinza mpepela yasweja. Ayibinda awantu niwena atela kwikala ahamuka. Neyi tutachika kushimwina nawa tudilumbulula netu tudi aYinsahu jaYehova tunateli kumona kukala kudi neyi “mpepela yasweja,” chidi neyi ikañesha dafumaña muchisaka, kutuseha kudi akwetu niantu kukaana kutiyilila kunsañu yitwashimwinaña. Ilaña hitwahayamañaku. Yesu wayisoñamishili akwakumulondela nindi inakuyitemesha mudi akwakudimbulula.—Mat. 10:16.

12. Kwesekeja naYoshuwa 1:7-9, chumanyi chinateli kutukwasha kwikala ahamuka?

¹² Munateli kwikala ñahi ahamuka? Chatachi, mwatela kukuhwelela nenu Yesu natwalekihu kulombola mudimu wakushimwina iku wudi mwiwulu. (Yow. 16:33; Chim. 14:14-16) Chamuchiyedi, kuhwelelenu chikupu muchikaninu chaYehova chakwila nawu wukuyakamenaña. (Mat. 6:32-34) Neyi mwikala nachikuhwelelu chakola, mukwikala ahamuka. Petulu niamabwambu jindi amwekesheli chikuhwelelu chakola chashiyiliwu mudimu wahandilileñawu nakumulondela Yesu. Munjila  yoyimu, ninenu mwamwekesheli chikuhwelelu chakola chimwalejeli amabwambu jenu niantaña jenu nenu munatachiki kudiza Bayibolu nawaYinsahu jaYehova nikupompa nawu. Chakadi nikujina munahimpi yilwilu nichihandilu chenu kulonda mulondeleña nshimbi jaYehova. Mwelili mwenimu muloña wachikuhwelelu nikuhamuka. Neyi mutwalekahu kwikala ahamuka, mukukuhwelela chikupu nenu ‘Yehova Nzambi yenu wudi nanenu mwejima mumukuya.’—Tañenu Yoshuwa 1:7-9.

13. Kutoñojokahu chikupu nikulomba kunateli kuyikwasha ñahi kwikala ahamuka?

¹³ Chumanyi chikwawu chinateli kuyikwasha kwikala ahamuka? Lombenu kulonda mwikali ahamuka nawa akadi woma. (Yilw. 4:29, 31) Yehova wukwakula kulomba kwenu nawa hakayishiyaku. Wukuyikwashaña mpinji yejima. Mwatela cheñi kutoñojokañahu chikupu Yehova chamwininiyi antu amakwawu kunyima. Toñojokenu cheñi Yehova chayikwashayi kushinda kukala nikuyinka ñovu hakwila muhimpi chihandilu chenu. Chakadi nikujina, Yena walombweli antu jindi kuhita haKaluñalwiji Kachinana wukuyikwasha kwikala kambanji kaKristu. (Kwid. 14:13) Ikalenu nachikuhwelelu mudi Yehova neyi chadiña nañimbi yamasamu wahosheli nindi: “Yehova wadikuma nanami; hinukutiya womaku; chumanyi chakañilawu antu?”—Mas. 118:6.

14. Yumanyi yimunadizili kudi muhela Masae nimuhela Tomoyo?

¹⁴ Njila yikwawu yakwikalilamu ahamuka hikwiluka Yehova chinakwashiyi antu akweti nsonyi kwikala ahamuka. Talenu chuma chamumwekeneni muhela Masae. Wadiña nansonyi nawa watoñojokeleña nindi wukutwesha wanyi kushimwina. Watoñojokeleña nindi kuhosha nawantu abula kwilukayi chinateli kumukalila, dichi hanateli kuyishimwinaku. Dichi wazatili nañovu hakwila nawu yamukeñi Nzambi chikupu niakwawu antu. Watoñojokeli chikupu hampinji yitunakushakamamu nawa walombeli kulonda amukwashi kwikala neyena dakushimwina. Walekeli kutiya woma nawa wazatiliku payiniya wampinji yejima. Yehova nateli cheñi kukwasha akwakushimwina amaha kwikala ‘ahamuka.’ Talenu chakutalilahu chamuhela Tomoyo. Chatachikiliyi kushimwina kwitala nikwitala, hetala datachi dashikiliyi amulejeli nawu: “Inakukeña wanyi kuhosha nawaYinsahu jaYehova!” nawa washinkili kuchisu. Muhela Tomoyo watiyili woma wanyi, dichi walejeli akwawu nindi: “Munatiyi chinahoshiyi? Kwosi izu dinahosha, ilaña wañiluka nindi nidi Chinsahu chaYehova. Natiyi kuwaha.” Chayinu mpinji muhela Tomoyo hipayiniya wampinji yejima.

15. Kudifumba hichumanyi, nawa kwalemenadi?

¹⁵ Ayibinda anshi akuluka yitembi adifumbaña. Kudifumba “hiwuswa wakudilisha eyi aweni kuzata mudimu watela kuzatewa.” Ayibinda anshi atela kudifumba awenawu kuhinduka budidi nankashi, kushakama sampu mudimu wunamani nikuumika kukala kwejima. Ninetu twatela kudifumba hakwila nawu tuumiki nikumanisha mudimu wetu.—Mat. 10:22.

16. Tunateli kwikala ñahi nachilwilu chakudifumba?

¹⁶ Hitwaswanaña chilwilu chakudifumbaku. Kakavulu twelaña yuma yitwamonaña netu yapela. Ilaña mpinji yikwawu yuma yalema yitwatela kwila, yapela wanyi kuyila. Dichi twatela kudiyuula hakwila nawu  tudifumbi. Yehova watukwashaña naspiritu yindi yajila.—Ñal. 5:22, 23.

17. Kwesekeja na 1 Akorinda 9:25-27, kapostolu Pawulu wahosheli nindi welilidi hakwila nawu yadifumbeña?

¹⁷ Kapostolu Pawulu wadiña nakudifumba. Ilaña washimwini nindi wadiña ‘nakufumba’ mujimba windi kulonda yeleña yuma yaloña. (Tañenu 1 Akorinda 9:25-27.) Wayikonkomweneni akwawu nindi adifumbeña nawa eleña yuma yejima “mukutelela nawa mukuloña.” (1 Kor. 14:40) Twatela kuzata nañovu hakwila tutwalekihu kudifukula kudi Yehova, munabombeli kushimwina nikutañisha nsañu yayiwahi.—Yilw. 2:46.

18. Chumanyi chikuletesha Yehova yamoneña nindi tunakudikita?

¹⁸ Chibinda wanshi wamonaña nindi nazati nankashi kwesekeja nanshi jinakwatiyi. Ilaña etu hitwamonaña netu tunadikiti nankashi muloña wakuvula kwawantu itunaleti mukuloñesha kwaNzambiku. (Luka 8:11-15) Neyi tutwalekahu kushimwina nsañu yayiwahi nikudizisha antu, Yehova wukutumonaña nindi tunakudikita. Muloñadi? Muloña tunakumwovwahila yena niMwanindi.—Maku 13:10; Yilw. 5:28, 29.

19-20. Chumanyi chalema chikuletesha tushimwineña nankashi?

¹⁹ Mumatuña amakwawu akaanishaña kukwata inshi mutukweji tukwawu. Haniyi mpinji, ayibinda anshi azataña nañovu muloña elukaña nawu mpinji yakulekesha kukwata inshi yinashiki. Chineli tudi ayibinda awantu, kudi chuma chikwawu chinateli kutuletesha kushimwina swayi-swayi: Kukuma kwanshakaminu yamakonu kunakuswina kwakwihi. Mpinji yakuzata mudimu wakwamwina mawumi awantu yinakehi. Bayi mushintajala nakutoñojoka nenu mwakekala nampinji yayiwahi yakuzata iwu mudimu walemaku.—Mukwa. 11:4.

²⁰ Ikalenu neyena dakuzata, dizenuña Bayibolu, ikalenu ahamuka nawa difumbenuña. Dibombenu hakachi kawantu akubadika ha 8 miliyoni anakushimwina nsañu yayiwahi nawa mukumona muzañalu wafumaña kudi Yehova. (Nehe. 8:10) Fwilenuña kushimwina hakumina ñovu jenu nikutwalekahu kuzata sampu iwu mudimu wunamani. Chibaaba chinalondelihu chikashimuna yuma yisatu yinateli kutukwasha kwikala neyena dakutwalekahu kushimwina nsañu yayiwahi yaWanta.