Iyi vasi yahosha nawu: “Neyi wukumona muwuloñu adi nakukabisha atuzweñi, niakwandombu adi nakufwota nyiloña yawakwawu nakufumisha wuñaji, bayi wuhayama chumochuku; muloña yomweni wabadika alema wudi nakutalaku, adi kwoku nawa ayibadika wena.”—Mukwa. 5:8.

Kwesekeja nayitoñojoka yawantu, iyi vasi yinakutena antu akweti wuswa munfulumendi. Ilaña neyi tutoñojokahu chikupu, yinakuhosha cheñi hadi Yehova, chuma chinateli kutukundeja nikutukolesha.

Mukwakutaŋisha 5:8 yatalisha kudi nyuuli wakabishaña atuzweñi nikuyiheñeshela wuñaji. Nyuuli watela kwanukaña nindi kudi muntu wamubadika hela wukweti wuswa munfulumendi wunakumumona. Kafwampi kudi cheñi amakwawu akweti yifulu kumubadika. Chawushona anyuuli ejima amunfulumendi jawantu akweti majika kanwa nawa antu amavulu akabakanaña muloña wamajika kanwa.

Hela chakwila yuma yinakumwekana neyi hiyakawahaku, tunateli kukundejewa hakwiluka netu Yehova ‘wayimonaña nianyuuli ejima abadika’ adi munfulumendi yawantu. Tunateli kumulomba Nzambi nikumbila yisenda yetu hadi yena. (Mas. 55:22; Fwi. 4:6, 7) Tweluka netu “mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.”—2 Kushi. 16:9.

Dichi, Mukwakutaŋisha 5:8 yatulejaña chidi yuma munfulumendi yawantu mukaayi; mpinji yejima kwekala muntu wukweti wuswa wabadika. Chuma chasweja kulema, iyi vasi yinateli kutukwasha kwiluka netu Yehova diyi wabadika, Muntu Wukweti Wuswa Wabadika wakuuyula. Nakuyuula kuhitila mudi Mwanindi, Yesu Kristu Mwanta waWanta. Wañovu Jejima, wamonaña yuma yejima, wukweti wuñanji nawa wekala chiwahi niMwanindi dichekalayi.