1. Mpinjinyi yakala nankashi kumukalakela Yehova?

MUNAKUTOÑOJOKA nenu mpinjinyi yakala nankashi kumukalakela Yehova, mpinji yimunakumona kukala tahindi yimudi mukuwunda? Neyi tumona kukala twamushindamenaña Yehova chikupu. Hanu dinu twelaña ñahi neyi tudi mukuwunda? Komana twalekaña kumukalakela Nzambi? Yehova wayisoñamishili aIsarela hachumichi.—Kuhit. 6:10-12.

2. Chumanyi cheliliyi Mwanta Asa chitwatela kwimbujola?

² Mwanta Asa himuntu wamushindameneni chikupu Yehova wutwatela kwimbujola. Wamukalakeleli Yehova mumpinji jakala nimumpinji jakuwunda. Kufuma tuhu hakusambila, “muchima waAsa wayili chikupu kudi Yehova.” (1 Anya. 15:14) Njila yimu mwamwekesheleliyi Asa nindi wadihanini kudi Yehova hikufumisha kudifukula kwakutwamba muYuda. Bayibolu yahosha nawu “wafumishiluku tumeña twawantu acheñi, niyinañanaña, wahumwini nituposhi twakupeshela, watemeni ninyiyombu.” (2 Kushi. 14:3, 5) Wamufumishili ninkaaka yindi Mayaka hachifulu chalema muwanta. Muloñadi? Muloña walejeleña antu kudifukula kudi mukishi.—1 Anya. 15:11-13.

3. Yumanyi yitukuhanjekahu muchinu chibaaba?

³ Asa hakuminini dakafumishahu kudifukula kwakutwambaku. Watiyakesheleña kudifukula kwalala, nikukwasha antu amuYuda kufunta kudi Yehova. Yehova wamukiswilili Asa niaIsarela kuhitila mukuyinka mpinji yakuwunda. * Hadi yaaka 10 muchiyuulu chaAsa, “ituña damweneni zo-o.” (2 Kushi. 14:1, 4, 6) Muchinu chibaaba tukuhanjeka Asa  chazatishiliyi ayina mpinji yakuwunda. Kuhiñahu, tukuhanjeka hadi akwaKristu akusambila azatishili mpinji yakuwunda chiwahi neyi Asa. Nkumininaku, tukwakula ilu lwihu: Neyi mwashakamaña mwituña mwayitejawu kudifukula, munateli kuzatisha ñahi chiwahi mpinji yakuwunda?

4. Kwesekeja na 2 Kushindulula 14:2, 6, 7, Asa wazatishili ñahi mpinji yakuwunda?

⁴ Tañenu 2 Kushindulula 14:2, 6, 7. Asa walejeli antu nindi Yehova diyi ‘wunayinookeshi dehi mbadi jejima.’ Asa wamweneña wanyi nindi iyi mpinji yakuwunda himpinji yakunooka. Ilaña watachikili kutuña nyisumba, jimpwembu, tuposhi niyenzelu. Walejeli antu amuYuda nindi: “Tuchidi netuña.” Asa watalishili mudihi? Watalishili mukwila nawu antu endeleña mukukasunuka mwituña dayinkeliwu kudi Nzambi nawa atuñileña chakadi kuyikañesha kudi ayilumbu. Walejeli antu kuzatisha chiwahi iyi mpinji yakuwunda.

5. Muloñadi Asa chakolesheleliyi njita yindi?

⁵ Asa wazatishili cheñi mpinji yakuwunda kukoleshelamu njita yindi. (2 Kushi. 14:8) Komana chumichi chinayi mukwila nawu hamukuhweleleli Yehovaku? Inehi. Ilaña, Asa welukili nindi chineli wadiña mwanta diyi wadiña namudimu wakukolesha antu hakukala kunateli kumonawu kumbidi. Asa welukili nindi mpinji yadiñawu antu amuYuda mukuwunda yikatwalekahu wanyi, nawa dichuma chamwekeni.

6. AkwaKristu akusambila azatishili ñahi mpinji yakuwunda?

⁶ Hela chakwila akwaKristu akusambila ayikabishileña kakavulu, ilaña adiña ninampinji  jakuwunda. Indi atumbanji azatishileña ñahi iji mpinji? Ana amayala niambanda ashinshika ashimwinini nsañu yayiwahi chakadi kuleka. Nsañu yashimunawu mumukanda waYilwilu yahosha nawu atwalekahu “nakumutiya Yehova woma.” Atwalekelihu nakushimwina nsañu yayiwahi, nawa chuma chafuminimu chipompelu “chakulilileñaku.” Chakadi nikujina, Yehova wakiswilili mudimu wawu wakushimwina wazatileñawu neyena mumpinji jakuwunda.—Yilw. 9:26-31.

7-8. Pawulu niakwawu azatishili ñahi mpinji yadiñawu nayu? Lumbululenu.

⁷ Atumbanji amuyaaka nkulakaji yakusambila azatishili mpinji yejima yadiñawu nayu kutandisha nsañu yayiwahi. Chakutalilahu, kapostolu Pawulu chelukiliyi nindi anamwenzunwini chenzelu cheneni hadiñayi muEfwesesa, wazatishili iyi mpinji kushimwina nikwilisha atumbanji muniwu musumba.—1 Kor. 16:8, 9.

⁸ Mpinji yikwawu yadiñayi nayu Pawulu niakwaKristu amakwawu yadiña mpinji yamanishiliwu kukala kwakwaalama mu 49 C.E. (Yilw. 15:23-29) Chelili yipompelu anayileji dehi mwafuukwiliwu, atumbanji azatili nañovu yayeni kushimwina “nsañu yayiwahi yamazu aYehova.” (Yilw. 15:30-35) Yumanyi yafuminimu? Bayibolu yahosha nawu “yipompelu yatwalekelihu kwikala nachikuhwelelu chakola nawa antu avulilileñaku hefuku-hefuku.”—Yilw. 16:4, 5.

9. Yuma yidi ñahi mumatuña amavulu makonu, nawa tunateli kudihula netudi?

⁹ Mumatuña amavulu makonu, twashimwinaña chakadi kutukañesha. Mwashakamaña mwituña mwayitejawu kudifukula? Neyi ayiteja, dihulenu nenu, ‘Inakuzatisha ñahi iku kusubuka?’ Munanu mafuku akukuminina, kuloñesha kwaYehova kunakulombola mudimu weneni wakushimwina nikudizisha wabulahu dehi kuzatika mukaayi. (Maku 13:10) Kudi nyidimu yayivulu yatela kuzatawu antu jaYehova.

10. Indi 2 Timotewu 4:2 yatukoleshaña kwiladi?

¹⁰ Munateli kuzatisha ñahi chiwahi mpinji yakuwunda? (Tañenu 2 Timotewu 4:2.) Munateli kushinshika chidi yuma kulonda mumoni neyi chakwila enu hela wumu muchisaka chenu nateli kuzataku chikupu mumudimu wakushimwina, hadaha kuzataku wupayiniya. Ayinu himpinji yakudivulishila maheta niyuma wanyi, yuma yitwakabula kupuluka nayu halukadi lwasweja.—Yish. 11:4; Mat. 6:31-33; 1 Yow. 2:15-17.

11. Chumanyi chineliwu akwakushimwina amakwawu hakwila ashimwineña kudi antu amavulu nsañu yayiwahi?

¹¹ Akwakushimwina amavulu anadizi madimi acheñi kulonda ashimwineña nikudizisha munawa madimi. Kuloñesha kwaNzambi kunakuyikwasha kuhitila mukwidisha nyikanda yashindamena haBayibolu mumadimi amavulu. Chakutalilahu, mu 2010, nyikanda yetu yadiña mumadimi akubadika ha 500. Ichi yidi mumadimi akubadika ha 1,000.

12. Yumanyi yafumañamu neyi antu atiya nsañu yaWanta mwidimi dawu? Hanenu chakutalilahu.

¹² Yumanyi yafumañamu neyi antu atiya chalala chamuBayibolu mwidimi dawu? Talenu chakutalilahu chamuhela wadiluñishili kupompa kweluña muMemphis, Tennessee, U.S.A. Iku kupompa kwadiña muKinyarwanda, idimi dahoshañawu muRwanda, muCongo (Kinshasa) nimuUganda. Chamanini kupompa, iwu muhela wahoshaña idimi daKinyarwanda wahosheli nindi: “Aha dinu dihinadiluñishi progiramu yakupompa kweluña kufuma tuhu hinabuukilili kunu kuUnited States yaaka 17 yinahitihu.” Mwamweni,  iwu muhela wadiluñishili chikupu chatiyiliyi iyi progiramu mwidimi dindi. Neyi mukutwesha, munateli kudiza idimi dacheñi kulonda mukwashiku antu amu mwiluña denu. Chumichi chinateli kuzatika chiwahi, sweje-e neyi mwiluña dachipompelu chenu mudi antu amu akeñaña hohu kuhosha idimi dawu. Chimwela mwenimu, mwakafuma yuma yayiwahi.

13. Indi amanakwetu muRussia azatishili ñahi mpinji yakuwunda?

¹³ Bayi neyi amanakwetu ejima ashimwinaña hatookaku. Mpinji yikwawu, nfulumendi yakañeshaña chikupu mudimu wetu wakushimwina. Toñojokenu hadi amanakwetu muRussia. Hanyima yakuyikabisha hayaaka yayivulu, muMarch 1991, ayinkeli lusesa lwakutachika kudifukula. Hayina mpinji, muRussia mwadiña akwakushimwina aWanta kwakwihi na 16,000. Chimwahitili yaaka 20, naamba yawakwakushimwina yabadikili ha 160,000. Chakadi nikujina, amanakwetu azatili nañovu hampinji yashimwinineñawu mukukasunuka. Ayina mpinji yakuwunda yatwalekelihu wanyi. Ilaña kuhimpika kwayuma hikunamanishi iyena dawu dakutandisha kudifukula kwalalaku. Anatwalekihu kumukalakela Yehova, kuzatisha njila yidi yejima.

14-15. Yehova wazatishili ñahi ñovu jindi kumukwasha Asa?

¹⁴ Mumafuku aAsa, mpinji yakuwunda yamanini. Njita yeneni yamashidika akola 1 miliyoni, yenjili kufuma kuEtiyopiya. Mukulumpi wawu Zera, wakuhweleleli nindi yena nimashidika indi akumwimika Yuda mushindu. Ilaña Mwanta Asa hakuhweleleli mukuvula kwamashidikaku, ilaña wakuhweleleli Nzambi yindi, Yehova. Asa walombeli nindi: “Tukwashuku eyi Yehova Nzambi yetu, muloña tunashindameni hadeyi, chitunenzi  nakulwa naluntu ilu, tunenzi mwijina deyi.”—2 Kushi. 14:11.

¹⁵ Hela chakwila mashidika awaEtiyopiya avulili chakwila mashidika aAsa akwiñilamu kwakwihi nakapampa kayedi, yena wakuhweleleli muñovu jaYehova niwuswa wakwamwina antu Jindi. Yehova wamukwashili nawa mashidika awaEtiyopiya ayimikili mushindu.—2 Kushi. 14:8-13.

16. Tuneluki ñahi netu mpinji yakuwunda yakamana?

¹⁶ Hela chakwila tweluka wanyi yuma yejima yikatumwekena kumbidi hamuntu-hamuntu, ilaña tweluka netu mpinji yakuwunda yikwetiwu antu jaNzambi yakatwalekahu wanyi. Kafwampi, Yesu washimwineñahu dehi nindi mumafuku akukuminina, atumbanji twindi “akayihela kudi akwanyuza yejima.” (Mat. 24:9) Kapostolu Pawulu niyena wahosheli nindi “antu ejima afwilaña kuhanda kwesekeja namwaya kumwakama Nzambi muloña wakudikunda naKristu Yesu, niwena akayikabisha.” (2 Tim. 3:12) Satana “nahili chikupu” nawa tukudidimba etu aweni neyi tutoñojokaña netu tunateli kutondolwela kuzuwa kwindi.—Chim. 12:12.

17. Chikuhwelelu chetu anateli kucheseka ñahi?

¹⁷ Katataka, wejima wetu chikuhwelelu chetu chiikali mukweseka. Kaayi keña kamoni “lukadi lwasweja lwakwila kanda lwikaleñaku dehi kufuma hatachikiliyi Nzambi kuleña yuma kushika nikulelu.” (Mat. 24:21) Haniyi mpinji, antaña jetu akatubalumukilamu nawa mudimu wetu akawulekesha. (Mat. 10:35, 36) Kufwana Asa, komana hamuntu-hamuntu twakamukuhwelela Yehova netu wakatukwasha nikutukiña?

18. Kwesekeja naAheberu 10:38, 39, yumanyi yinateli kutukwasha kudiloñeshela chadimu henohu kuwunda kanda kumani?

¹⁸ Yehova nakutwinka yakuda yakuspiritu kulonda yatuloñesheli chadimu hayuma yakamwekana kumbidi. Nakulombola “nduñu wamaana nikashinshi” kulonda yatwinkeña yakuda yakuspiritu “hampinji yatelela” yikutukwasha kutwalekahu nakudifukula kwetu. (Mat. 24:45) Ilaña etu twatela kuzata nañovu  nakukolesha chikupu chikuhwelelu chetu mudi Yehova.—Tañenu Aheberu 10:38, 39.

19-20. Kwesekeja na 1 Kushindulula 28:9, malwihwinyi itwatela kudihula etu aweni, nawa muloñadi?

¹⁹ Kufwana Mwanta Asa, twatela “kukeñakeña Yehova.” (2 Kushi. 14:4; 15:1, 2) Twatachikaña kukeñakeña neyi tumwiluki Yehova nawa tupapatishewa. Twazataña hakumina ñovu jetu kulonda tumukeñi Yehova chikupu. Hakwila twiluki neyi tunakwila mwenimu, twatela kudihula etu aweni netu, ‘Komana napompaña mpinji yejima?’ Neyi tuyaña kukupompa kwatuloñeshelañawu kudi kuloñesha kwaYehova, twakolelañaku kuspiritu chikupu nawa atukoleshaña kudi anakwetu. (Mat. 11:28) Twatela kudihula cheñi netu, ‘Komana nikweti chaaku chakudiza nkawami?’ Neyi mwashakamaña nachisaka chenu, komana mwekala nampinji yakudifukula kwachisaka mulungu-himulungu? Hela neyi mwashakamaña nkawenu, komana mwekala nampinji yakudifukula neyi kwiji mudi hamu nachisaka? Cheñi, komana mwadikitaña chikupu mumudimu wakushimwina niwakwilisha atumbanji?

²⁰ Muloñadi wutwatela kudihwila awa malwihu? Bayibolu yatulejaña nawu Yehova washinshikaña chidi yitoñojoka yetu niyuma yidi munyichima yetu, dichi ninetu dichitwatela kwila. (Tañenu 1 Kushindulula 28:9.) Neyi tumona netu twatela kuhimpa yuma yitunakufwila kwila, yilwilu hela yitoñojoka yetu, twatela kumulomba Yehova kulonda yatukwashi mutunakukeña kuhimpa. Ayinu diyi mpinji yakudiloñeshela chadimu muloña wakweseka kudi kumbidi. Bayi mwiteja chuma hela chimu chiyikañeshi kuzatisha chiwahi mpinji yimudi mukuwundaku!