CHIBAABA CHAKUDIZA 44
KAMINA 33 Umbilaku Chiteli Cheyi Hadi Yehova
Chakuumika Neyi Anatwili Chatama.
“Bayi mwiteja kutama kuyimiki mushinduku, ilaña imikenuña kutama mushindu nayuma yayiwahi.”—ROM. 12:21.
TUKUDIZA
Chitwatela kuumika neyi anatwili chatama kulonda tutondolweli yuma kusweja kutaminaku.
1-2. Twatiyaña ñahi neyi anatwili chatama kudi muntu?
YESU wahosheli hachakutalilahu chantuluwa watwalekelihu kumuleja nsompeshi nindi amuhakwiliku mwawuñanji. Chakadi nikujina, iyi nsañu yashikili atumbanji twaYesu amavulu hamuchima muloña hayina mpinji antu abula kulema avulileña kuyila chatama. (Luka 18:1-5) Iyi nsañu yinatukundami ninetu makonu muloña wejima wetu atwilahu dehi chatama.
2 Antu amavulu mukaayi makonu adi nachaambu, adana luwi nawa akweti lwisu, dichi twahayamaña wanyi neyi antu atwila chatama. (Mukwa. 5:8) Hela chochu, chuma chitunateli kubula kukuhwelela, hikutwila chatama kudi manakwetu hela muhela, ilaña chuma chamuchidiwu chinateli kumwekana. Amanakwetu niahela hiyadikañaña nachalalaku. Hiyantu hohu abula kuwanina. Tunateli kudizila yuma yayivulu kudi Yesu cheliliyi nayuma yatama yamwililiwu kudi akakudikaña atama. Neyi tunateli kudiwunjika nawakakudiña atwilaña yuma yatama, dikwila nawu twatela kudiwunjika chikupu nawakwetu akakwitiya! Yehova watiyaña ñahi neyi anatwili chatama kudi antu amuchipompelu hela ana abula kwikala muchipompelu? Komana washañaku muchima?
3. Komana Yehova wakamenaña neyi anakutwila chatama, nawa muloñadi?
3 Yehova wakeñaña nindi antu atwileña chiwahi, nawa watiyaña kutama neyi atwila chatama. “Yehova wakeña wuñanji.” (Mas. 37:28) Yesu watuleja nindi Yehova “wakanyakala kuyiñisha namuloña” neyi mpinji yatelela yinashiki. (Luka 18:7, 8) Katataka akafumishihu yuma yejima yatama yatukabishaña nawa wakafumishahu wuñanji wejima waheña.—Mas. 72:1, 2.
4. Wukwashwinyi watwinkañayi Yehova makonu?
4 Hampinji yitunakuhembelela mpinji yikwakekala kuloña, Yehova watukwashaña kuumika neyi anatwili chatama. (2 Pet. 3:13) Watudizishaña chitwatela kutondolwela kwila yuma yabula kutelela neyi anatwili chatama. Kuhitila mudi Mwanindi, Yehova watuleja njila yayiwahi mutwatela kuumikila neyi anatwili chatama. Nawa watwinkaña kufumba kutwatela kuzatisha neyi anatwili chatama.
IKALENU ASOÑAMA NACHIMWELAÑA NEYI ANAYILI CHATAMA
5. Muloñadi chitwatela kwikalila asoñama nachitwelaña neyi anatwili chatama?
5 Chinateli kutukata nankashi nawa tunateli kutiya kutama neyi anatwili chatama. (Mukwa. 7:7) Ambuña ashinshika adi neyi Yoba niHabakuki, niwena dichatiyiliwu. (Yoba 6:2, 3; Hab. 1:1-3) Hela chakwila chidi hohu chiwahi kutiya muniyi njila, twatela kwikala asoñama nachitwatela kwila kulonda tubuli kukoña mwawusupi.
6. Yuma yelili Abisalomi yatudizishañadi? (Talenu cheñi mwevulu.)
6 Neyi muntu atwila katama, hadaha ninetu tukukeña kumwila katama. Hela chochu, kwila yuma muniyi njila kukuletesha hohu yuma kutaminaku. Talenu chuma chamwekeni kudi mwana kaMwanta Davidi, Abisalomi. Wazuwili nankashi chelili muhelindi Tamari amukaami chakumukanjikija kudi manakwindi wakuwanamu, Aminoni. Kwesekeja naNshimbi jaMosi, Aminoni ateleleli kumujaha nachuma cheliliyi. (Lev. 20:17) Hela chakwila chadiña hohu chiwahi Abisalomi kuzuwa, ilaña hiyamwitejeli kwila yuma kwesekeja nachakeñeleñayiku.—2 Sam. 13:20-23, 28, 29.
Abisalomi wakoñeli chuma chatama muloña wakuzuwa hachuma chatama chamwililiwu muhelindi Tamari (Talenu paragilafu 6)
7. Ñimbi yaMasamu welili ñahi hakusambila chamweniyi yuma yatama yamwekeneña?
7 Neyi antu elaña yuma yatama anayibabeshi wanyi, tunateli kutachika kujinoka neyi chakwila chidi hohu chiwahi kwila yuma yaloña. Talenu ñimbi yaMasamu wamweni nindi antu atama anakudiluñisha henohu antu aloña anakukabakana. Wahosheli nindi: “Awa diwu antu atama, ashakamaña chiwahi.” (Mas. 73:12) Waneñeli cheñi nayuma yatama yamweneñayi chakwila kwashalili hohu hanti nakuleka kumukalakela Yehova, wahosheli nindi: “Chinesekeli nami niiluki muyatalisha, yankabishileña muyitoñojoka.” (Mas. 73:14, 16) Kafwampi, wasolweli jadiña kumuchima windi, nindi: “Hakwila ami kwami, nyendu yami yadiña kwakwihi nakusenuka; nyendu yami yasheli hanti nakuselumuka.” (Mas. 73:2) Chuma chadifwanaku dichamumwekeneni nimanakwetu itukutena netu Alberto.
8. Chuma chatama chamwililiwu manakwetu wumu chaletesheli eli ñahi?
8 Alberto amwinkeli muloña wachuma chabulili kwilayi, nawu neyi mali achipompelu. Chafuminimu, amutambwili kukooleka nawa antu amavulu muchipompelu elukili iyi nsañu alekeli kumulemesha. Wahosheli nindi, “Natiyili kutama kumuchima, nazuwili nawa naneñeli.” Wetejeli chineñi chimuzeyeshi kuspiritu, nawa wekalili wazeya hadi yaaka 5. Ichi chuma chamwekeni chinakumwekesha chinateli kutumwekena neyi tusweja kuzuwa nachuma chatama chinatwiliwu.
MWIMBUJOLENU YESU CHELILIYI NAYUMA YATAMA YAMWILILIWU
9. Yumanyi yatama yomikiliyi Yesu? (Talenu cheñi mwevulu.)
9 Yesu welili chuma chachiwahi chitwatela kwila neyi anatwili chatama. Talenu yuma yatama yamwililiwu kudi antaña jindi nikudi antu amakwawu. Antaña jindi abula kwitiya amwilili nawu wazaluka, akulumpi jakudifukula amutwambilili nawu wadikundaña nawandemoni, amashidika awaRoma amusupishili, kumweta, nawa nkumininaku amujahili. (Maku 3:21, 22; 14:55; 15:16-20, 35-37) Ilaña, Yesu womikili kutama kwejima nikutama kukwawu chakadi kufuntisha katama. Yumanyi yitunateli kudizila kudi yena?
Yesu welili chuma chachiwahi chitwatela kwimbujola hakwila tuumiki neyi anatwili chatama (Talenu maparagilafu 9-10)
10. Yesu womikili ñahi yuma yatama yamweniyi? (1 Petulu 2:21-23)
10 Tañenu 1 Petulu 2:21-23. a Yesu welili chuma chachiwahi chitwatela kwila neyi anatwili chatama. Welukili mpinji yakumwena nimpinji yakuhosha. (Mat. 26:62-64) Wakwileña wanyi kunsañu yejima yamutwambilileñawu. (Mat. 11:19) Neyi ahosha, Yesu hayihosheleña kasawuntu antu amukabishileña hela kuyichiinishaku. Wadiyuulileña muloña “wadikunjikili yomweni kudi Owu wasompeshaña mwaloña.” Yesu welukili nindi chuma chasweja kulema hichamonañayi Yehova yuma. Wakuhweleleli nindi Yehova wakwolola yuma yaheña yejima hampinji yatelela.
11. Njilanyi jimu mutunateli kuyuulila nhoshelu yetu? (Talenu cheñi nyevulu.)
11 Tunateli kumwimbujola Yesu kuhitila mukuyuula nhoshelu yetu neyi anatwili chatama. Yuma yikwawu yatama yinateli kutwilawu antu yanyanya chakwila tunateli kudiwulaku hohu. Hela tunateli kudimwenenahu kulonda yuma yibuli kusweja kutaminaku. (Mukwa. 3:7; Yak. 1:19, 20) Mpinji jikwawu tunateli kuhosha neyi tumona netu anatwili chatama, hela neyi tunakukeña kuhakwilaku chalala. (Yilw. 6:1, 2) Neyi tuhosha, twatela kuzata nañovu kulonda tuhoshi munjila yakuwunda nawa yakalemesha.—1 Pet. 3:15. b
Neyi anatwili chatama, tunateli kumwimbujola Yesu kuhitila mukufuukula chiwahi mpinji yitwatela kuhosha nichakuhosha (Talenu maparagilafu 11-12)
12. Twadihanaña ñahi etu aweni kudi “Owu wasompeshaña mwaloña”?
12 Tunateli cheñi kumwimbujola Yesu kuhitila mukudihana etu aweni “kudi Owu wasompeshaña mwaloña.” Neyi antu atutwambila hela atwila chatama, twakuhwelelaña netu Yehova diyi wuneluki chalala. Kukuhwelela muniyi njila, kukutukwasha kuumika neyi anatwili chatama muloña tuneluki netu Yehova wakwolola yuma. Neyi tumushilaña Yehova kukala, tukuzuwaña wanyi hela kuhemba nkunyi kumuchima. Kuzuwa nikuhemba nkunyi, jinateli kutuletesha kubula kwikala namuzañalu nawa jinateli kuluwañesha wubwambu wetu naYehova.—Mas. 37:8.
13. Yumanyi yinateli kutukwasha kutwalekahu kuumika neyi anatwili chatama?
13 Hela chochu, kwila tutwesha kumwimbujola Yesu chiwahi muyuma yejima nehi. Mpinji yikwawu, tunateli kwila hela kuhosha yuma yitunateli kwinza nakuditoñesha kumbidi. (Yak. 3:2) Nawa mpinji jikwawu, yuma yatama yinateli kutwilawu antu yinateli kutwalekahu kutukata kumuchima nikutuneñesha muchihandilu chetu chejima. Neyi dichuma chinakuyimwekena, kuhwelelenu nenu Yehova neluki yuma yimunakuhitamu. Nawa Yesu, akoñeliwu yuma yatama neyi yimunakumona, weluka chimunakutiya. (Heb. 4:15, 16) Kubombela hakutwinka Yesu welili yuma yayiwahi yitwatela kwimbujola, Yehova watwinkaña kufumba kwakuwahi kwatukwashaña kwiluka chakwila neyi anatwili yuma yatama. Tuhanjekenu hamavasi ayedi amumukanda waARoma anateli kutukwasha.
“MULEKELENU NZAMBI AMWEKESHI KUZUWA KWINDI”
14. “[Kumulekela] Nzambi amwekeshi kuzuwa kwindi” kwatalisha mudihi? (ARoma 12:19)
14 Tañenu ARoma 12:19. Kapostolu Pawulu wakonkomweneni akaKristu “[kumulekela] Nzambi amwekeshi kuzuwa kwindi.” Twamulekelaña Yehova kulonda amwekeshi kuzuwa kwindi neyi tumwiteja netu aleti wuñanji hampinji yindi yayiwahi nawa munjila yinakeñiyi. Chelili manakwetu wejina daJohn amwili chatama, wahosheli nindi: “Nazatili nañovu hakwila nitweshi kukañesha chilwilu chakufwila kwolola yuma kwesekeja nachinnakukeña ami aweni. ARoma 12:19 yankwashili kumuhembelela Yehova.”
15. Chawahiladi kumuhembelela Yehova kulonda ololi yuma?
15 Mwafumaña yuma yayiwahi neyi tumuhembelela Yehova kulonda ololi yuma. Neyi twila mwenimu, tukutondolwela kwikala namudimu nichineñi chafumaña mukufwila kumanisha kukala etu aweni. Yehova wadihana kutukwasha. Chidi tuhu neyi wahoshaña nindi: ‘Nlekelenu oyu yuma yatama yinayiliwu; nikwiluka chinikwila.’ Neyi twiteja chikaninu chaYehova chakwila nawu “Nakayifweta,” tukudiwula kuchuma chinatukoñiwu, nakukuhwelela netu wakakuzatilahu munjila yayiwahi. Ichi dichamukwashili John, itwashimuna hakusambila. Wahosheli nindi, “Neyi nimuhembelela hohu Yehova, wakakumanisha iku kukala munjila yayiwahi kubadika ami.”
“IMIKENUÑA KUTAMA MUSHINDU NAYUMA YAYIWAHI”
16-17. Kulomba kunateli kutukwasha ñahi kutwalekahu “[kwimika] kutama mushindu nayuma yayiwahi”? (ARoma 12:21)
16 Tañenu ARoma 12:21. Pawulu cheñi wayikonkomweneni akaKristu kutwalekahu “[kwimika] kutama mushindu nayuma yayiwahi.” MuMpanji yaYesu yahaMpidi, wahosheli nindi: “Twalekenuhu kukeña ayilumbu jenu nawa yilombelenuñaku antu ayikabishaña.” (Mat. 5:44) Dichuma cheliliyi. Hadaha twatoñojokahu dehi hekabisha domikiliyi Yesu hampinji yamupopeleliwu hamutondu kudi amashidika awaRoma. Tunateli kufwikija kuyeña kwatiyiliyi kushilahu kasawuntu niyuma yatama yomikiliyi.
17 Yuma yatama yahitilimu Yesu hiyamwimikili mushinduku. Chatela ayishiñi ana amashidika, walombeli nindi: “Tata, yanakeni, muloña hiyaneluki chuma chinakwilawuku.” (Luka 23:34) Neyi tuyilombelañaku antu anakutwila chatama, tukukeheshaku ndulu nikuzuwa nawa tukuhimpa chitwayimonaña antu atuneñeshaña.
18. Kulomba kwakwashili ñahi Alberto niJohn kuumika yuma yatama yamweniwu?
18 Kulomba kwayikwashili amanakwetu ayedi itwashimuna hakusambila muchinu chibaaba kuumika yuma yatama yamweniwu. Alberto wahosheli nindi: “Nayilombeleleñaku amanakwetu añilili chatama. Namulombeli Yehova kakavulu nami ankwashi kulonda nivulameni iku kukala.” Chuma chasweja kuwaha, nakumukalakela cheñi Yehova nakashinshi. John wahosheli nindi: “Kakavulu, namulombeleleñaku manakwetu wanneñesheli. Iku kulomba kwankwashili kutachika kumumona munjila yayiwahi chakadi kumwinka nyiloña. Nawa iku kulomba kwankwashili cheñi kwikala nakuwunda kwamuyitoñojoka.”
19. Yumanyi yitwatela kwila sampu kukuma kwakanu kaayi katama? (1 Petulu 3:8, 9)
19 Chakala hohu tunakushakama mukanu kaayi katama, anateli kutwila chatama. Hichikweti muloña nachuma chidi chejima chinateli kutumwekenaku, twatela wanyi kuleka kulomba kudi Yehova netu atukwashi. Cheñi, tumwimbujoleña Yesu chelileñayi neyi anamwili chatama nawa tutwalekeñahu kuzatisha yishina yamuBayibolu. Neyi twila mwenimu, tukukuhwelela netu twakaswana nkisu kufuma kudi Yehova.—Tañenu 1 Petulu 3:8, 9.
KAMINA 38 Wakayinka Ñovu
a Mukapetulu 2 ni 3 twamukanda watachi wasonekeliyi kapostolu Petulu, walumbulwili kukala kwayimwekeneni akaKristu akusambila amavulu kwayikabishiliwu kudi ankaaka jawu nianfumu jawu abula kwitiya.—1 Pet. 2:18-20; 3:1-6, 8, 9.
b Talenu ha jw.org vidiyo yinakwila nawu Ifyo Ukutemwa Kulenga Twaba no Mutende wa Cine Cine.
