1-2. “Mudimu wawuwahi” wazatañayi mukulumpi mwabombela yumanyi?

 NEYI munakalakali neyi nkoñi wakuzatila hadi mpinji yayilehi, dikwila nawu mudi kwakwihi kwikala mukulumpi. Kwila mufwila kushikahu kukalakala iwu “mudimu wawuwahi” nehi?​—1 Tim. 3:⁠1.

² Nyidimwinyi yazatañayi mukulumpi? Walombolaña mudimu wakushimwina, wazataña nañovu mumudimu wakubiña nikutañisha nawa wakoleshaña chipompelu nayuma yahoshañayi niyelañayi. Dihafuma Bayibolu yiteneña akulumpi adikita nawu ‘amayala ekala yawaana.’​—Efwe. 4:⁠8.

3. Yumanyi yatela kwilayi manakwetu hakwila ashikihu kwikala mukulumpi? (1 Timotewu 3:​1-7; Titusa 1:​5-9)

³ Yumanyi yimwatela kwila hakwila mushikihu kwikala mukulumpi? Yuma yakeñekaña hakwila muntu ashikihu kwikala mukulumpi yinambuki nayuma yakeñekaña neyi muntu nakukeña kwiñila mudimu wakumujimba. Kakavulu kutalisha kunyidimu yakumujimba, neyi kudi yuma yiwadiza nawa yiweluka yinakukeñayi muntu wunakwiñija nyidimu, wunateli kwiñila. Kwambukaku, neyi munakukeña nenu ayitondi kwikala mukulumpi, mwatela kwila yuma yikwawu kubombela hamudimu wakushimwina nikutañisha. Mwatela kushikija yuma yamuNsona yakeñekaña hakwila muntu ashikihu kwikala mukulumpi yashimunawu ha 1 Timotewu 3:​1-7 niTitusa 1:​5-9. (Tañenu.) Achinu chibaaba chikulumbulula yuma yakeñekaña mudi akulumpi munjila jisatu jalema: kwikala nejina dadiwahi muchipompelu nikudi antu abula  kwikala muchipompelu, kwikala mutu wachisaka wamuwahi nimuchima wakufwila ­kukalakela chipompelu.

KWIKALA NEJINA DADIWAHI

4. Kwikala “wakadi [hakuyinkela] muloña” kwatalisha mudihi?

⁴ Hakwila mushikihu kwikala mukulumpi, mwatela kwikala “wakadi [hakuyinkela] muloña,” dikwila nawu, kwikala nejina dadiwahi muchipompelu muloña wayilwilu yenu yayiwahi. Kubombelahu, mwatela kwikala muntu “ashimunañawu chachiwahi kudi antu abula kwikala muchipompelu.” Antu abula kwitiya anateli kuyiseha muloña wayuma yimwakuhwelela hakwikala mukaKristu, ilaña hiyatela kwikala nawunsahu walala wunateli kuletesha ajinokeña kashinshi kenu hela yilwilu yenuku. (Dan. 6:​4, 5) Dihulenu nenu, ‘Komana nikweti ijina dadiwahi muchipompelu nikudi antu abula kwikala muchipompelu?’

5. Munateli kumwekesha ñahi nenu “[mwakeña] yuma yayiwahi”?

⁵ Neyi mudi muntu “wakeña yuma yayiwahi,” mukumonaña yuma yayiwahi mudi akwenu nawa mukuyihamekaña muloña wayilwilu yawu yayiwahi. Mukwikala cheñi namuzañalu wakwilila antu yuma yayiwahi niyuma yinabuli kukuhwelelawu. (1 Tes. 2:⁠8) Muloñadi akulumpi chatela kumwekeshelawu ichi chilwilu? Muloña azatishaña mpinji yawu yalema kubiña chipompelu nikwakamena nyidimu yikwawu. (1 Pet. 5:​1-3) Hela chochu, muzañalu wekalañawu nawu muloña wakukwasha amakwawu wabadika kudihana kwawu.​—Yilw. 20:⁠35.

6. Kwikala “nachisambu” kwatalisha mudihi? (AHeberu 13:​2, 16; Talenu cheñi mwevulu.)

⁶ Mukumwekeshaña nenu mudi “nachisambu” neyi mwililaña antu yuma yayiwahi, kushilahu ninowu imwabula kudikunda nawu nankashi. (1 Pet. 4:⁠9) Dikishonali yimu yahosha hansañu yamuBayibolu hadi muntu wukweti chisambu nawu: “Wamwekeshaña luwi nikudi antu abula kwilukayi nawa watiyaña kuwaha kuyitambika kwitala dindi.” Dihulenu enu aweni nenu, ‘Antu añiluka ñahi kutalisha hakutambwila enyi?’ (Tañenu AHeberu 13:​2, 16.) Muntu wukweti chisambu wazataña nañovu kwinkahu enyi yuma yikwetiyi, kushilahu niantu akehelamu abula yuma yayivulu niambuña aNzambi adikita, chidi neyi ankoñi añinza nianhoshi enyi.​—Kutach. 18:​2-8; Yish. 3:​27; Luka 14:​13, 14; Yilw. 16:15; Rom. 12:⁠13.

7. Mukulumpi wamwekeshaña ñahi nindi ‘hakeña maliku’?

 ⁷ “Bayi wakeña maliku.” Awa mazu anatalishi mukwila nawu himwatela kusweja kusha muchima kuyuma yakumujimbaku. Chili mwahita hela mudi kazweñi, mwatela kusambila kutwamijaku yuma yaWanta muyuma yejima yimwelaña muchihandilu chenu. (Mat. 6:​33) Mwatela kuzatisha mpinji yenu, ñovu yenu nimaheta enu kudifukwilamu kudi Yehova, kwakamena chisaka chenu nikukalakela chipompelu. (Mat. 6:​24; 1 Yow. 2:​15-​17) Dihulenu enu aweni nenu: ‘Namonaña ñahi mali? Komana nazañalalaña nayuma yinikweti? Tahindi nasha muchima hakusweja kwikala namali niyuma yayivulu yakumujimba?’​—1 Tim. 6:​6, 17-​19.

8. Muyumanyi yikwawu mumwatela kumwekeshela nenu ‘mwadiyuulaña muyilwilu’ nawa ‘mwadiyuulaña’?

⁸ Neyi ‘mwadiyuulaña muyilwilu’ nawa ‘mwadiyuulaña,’ dikwila nawu mweluka hakukumina nayuma yejima yimwelaña muchihandilu chenu. Chumichi munabombeli kutondolwela kusweja kuda, kunwa, nvwalilu nimmwekenu yabula kutelela kushilahu niyisela yatama. Himwatela kwikala nduñu wakwimbujola yuma yatama yamukaayiku. (Luka 21:34; Yak. 4:⁠4) Mwatela kudiwunjika, dikwila nawu, mwatela kwikala awunda neyi anayivuloki. Himwatela kwikala “mukakushetaku”; hela kuyiluka kudi antu nawu mwanwaña walwa wawuvulu. Dihulenu enu aweni nenu, ‘Komana chihandilu chami chamwekeshaña nawu nadiyuulaña muyilwilu nikudiyuula?’

9. Yumanyi yabombela ‘mukutoñojoka mwamaana nimukuloñesha yuma chiwahi’?

⁹ Neyi ‘mwatoñojokaña mwamaana,’ dikwila nawu mwatoñojokaña hayuma nakanañachima kushindamena hayishina yamuBayibolu. Mwatoñojokaña chikupu haniyi yishina nawa chumichi chinayikwashi kwikala nakashinshi nikutiyishisha yuma. Himwashikenaña dakufuukula chakadi kutoñojokahuku. Ilaña mwasambilaña kwiluka wunsahu wejima wunakundami kunoyu nsañu. (Yish. 18:13) Chafumañamu, mwafuukulaña chiwahi kwesekeja nachatoñojokañayi Yehova. Neyi ‘mwaloñeshaña yuma chiwahi,’ dikwila nawu mwekala adiloñesha nawa mwalabaña wanyi. Ayiluka nawu mwashindamenewa nawa mwalondelaña wunlomboli. Iyi yilwilu diyinateli kuyikwasha kwikala nejina dadiwahi. Ichi tuhanjekenu hayuma yamuNsona yatela kushikijayi manakwetu hakwila ekali wakutalilahu wamuwahi hamu neyi muntu wachisaka.

KWIKALA WAKUTALILAHU WAMUWAHI HAMU NEYI MUTU WACHISAKA

10. Iyala ‘walombolaña ñahi amwitala dindi munjila yayiwahi’?

¹⁰ Neyi mwasumbula nawa munakukeña kushikahu kwikala mukulumpi, yuma yelaña chisaka chenu yinateli kuyiletesha kushikahu hela nehi. Dichi, mwatela ‘kulombolaña amwitala denu munjila yayiwahi.’ Antu atela kuyiluka nawu mudi mutu wachisaka wakeña chisaka chindi nawa wachakamenaña. Chumichi munabombeli kulombola muyuma yejima yinakundami kukudifukula kwetu. Chumichi chalemenadi? Kapostolu Pawulu wahosheli nindi: “Neyi iyala heluka chakulombola amwitala dindi yomweniku, wukutwesha ñahi kwakamena chipompelu chaNzambi?”​—1 Tim. 3:⁠5.

11-12. Yilwilu yachisaka chamuntu wasumbula yinateli kumuletesha ñahi kushikahu kwikala mukulumpi hela nehi? (Talenu cheñi mwevulu.)

¹¹ Neyi mudi tata yawantu, anyanenu anyanya atela kwikala anyana “ovwahilaña nawa akweti yilwilu yayiwahi.” Mwatela kuyidizisha munjila yakukeña. Hela chochu, mukukeñaña ekaleña namuzañalu nikuhema neyi chekala anyana amakwawu. Nawa kwesekeja nanochu chimunakuyidizisha chiwahi, anateli kwikala ovwahila, akavumbi nawa akweti yilwilu yayiwahi. Mwatela cheñi kuzata nañovu, kuyikwasha anyanenu kwikala nawubwambu wawuwahi naYehova, kulondela yishina yamuBayibolu nikupama kulonda apapatishewi.

 ¹² Kwikala nawanyana “etiya abula mpuhu yakwikala nachihandilu chakadi kudiyuula nawa abulaña kudikaña.” Neyi mwana wetiya wuchidi mwitala ekala namuloña wakukoña nshidi yahamesu bwi-i, chumanyi chikumumwekena tata yindi? Neyi tata yawu washañaku maana wanyi kukudizisha nikufumba chisaka chindi, hanateli kushikahu kwikala mukulumpiku.​—Talenu Kaposhi Kakutalila kaOctober 15, 1996, ifu 21, mapara. 6-7.

KUKALAKELA CHIPOMPELU

13. Munateli kumwekesha ñahi nenu mudi “wamwovu muchima” bayi welaña “kwesekeja nachinakeñi muchima windiku”?

¹³ Amanakwetu amwekeshaña yilwilu yayiwahi yawakaKristu akwashaña nankashi chipompelu. Iyala “wamwovu muchima” waletaña kuwunda. Neyi munakukeña nenu ayiluki nawu mwekala amwovu muchima, tiyililenuña chinakuhoshawu akwenu nawa itejenuña yitoñojoka yawu. Fwikijenu munekali dehi mukulumpi, nawa munabulakani, komana kwila mwiteja munafuukuliwu akulumpi amavulu neyi chakwila hosi lushimbi hela chishina chamuBayibolu chinafumpiwu nehi? “Wabulaña kwila kwesekeja nachinakeñi muchima windi,” awa mazu anatalishi mukwila nawu himwatela kukanjikija akwenu kwila yuma kwesekeja nachimunakukeñaku. Mwatela kwiluka nenu chalema nankashi kutiyilila kuyitoñojoka yawakwenu. (Kutach. 13:​8, 9; Yish. 15:22) Bayi mwikala “mukakubobola [nawakwenu]” hela “wahilaña swayiku.” Chatela mwiikali akalisha hela akaanaña yitoñojoka yawakwenu, mwatela kwikala amwovu nawa elaña yuma mukubabala. Hakwikala muntu wawunda, mwatela kutachikilahu kuleta kuwunda, hela yuma yinakali ñahi. (Yak. 3:​17, 18) Mazu enu amawahi anateli kufwomona yilwilu yawantu amakwawu, kushilahu niyawakakuyidimbulula.​—Anso. 8:​1-3; Yish. 20:3; 25:15; Mat. 5:​23, 24.

14. Mazu akwila nawu “bayi. . . wunetiyi katatakaku,” nawa “washinshika,” atalisha mudihi?

¹⁴ Manakwetu wunateli kushikahu kwikala mukulumpi hatela kwikala “muntu wunetiyi katatakaku.” Hela chakwila hatela kuhita wanyi yaaka yayivulu nankashi kufuma himwapapatisheweli,  hatela kuhita mpinji hakwila mwiikali mukaKristu wapama. Henohu kanda ayitondi kwikala mukulumpi, neyi chamwekesheliyi Yesu, mwatela kumwekesha nenu mwadizoza nawa munakumutalila Yehova namuzañalu kuyinka mudimu wudi wejima. (Mat. 20:23; Fwili. 2:​5-8) Munateli kumwekesha nenu ‘mwashinshika’ kuhitila mukukakela kudi Yehova ninshimbi jindi jaloña nimukulondela wunlomboli wahanañayi kuhitila mukuloñesha kwindi.​—1 Tim. 4:​15.

15. Komana mukulumpi chiña ekala nhoshi wakulukila? Lumbululenu.

¹⁵ Nsona yashimuna hatooka nawu mukulumpi watela kwikala “washikahu kutañisha.” Komana chumichi chinatalishi mukwila nawu chiña mwikala nhoshi wakulukila? Inehi. Akulumpi amavulu ashikahu, hela chakwila hiyanhoshi akulukilaku, adizishaña chiwahi mumudimu wakushimwina niwakubiña. (1 Tim. 3:2; esekejenu 1 AKorinda 12:​28, 29 niAEfwesesa 4:11.) Hela chakwila himudi nhoshi wakulukilaku, mwatela kuzata nañovu kulonda mwiikali ntañishi wamuwahi. Yumanyi yimwatela kwila hakwila mwiikali ntañishi wamuwahi?

16. Yumanyi yimwatela kwila hakwila mwiikali ntañishi wamuwahi? (Talenu cheñi mwevulu.)

¹⁶ “Wakwatisha kwizu dalala.” Hakwila mwiikali ntañishi wamuwahi, yuma yimunakutañisha kudi antu amavulu nikufumba kumwafumbaña antu kumbadi kwatela kushindamena Hezu daNzambi. Ikalenu kadizi waBayibolu niwanyikanda yetu. (Yish. 15:28; 16:23) Hampinji yimunakudiza nkawenu, ilukenu chakuzatisha chiwahi oju Nsona. Nawa neyi munakutañisha, zatenu nañovu kulonda mushiki hanyichima yawantiyilili jenu. Munateli kuwahishaku ntañishilu yenu neyi mulombaña wukwashu nawa muzatishaña yuma yinayilejiwu kudi akulumpi akulukila. (1 Tim. 5:​17) Akulumpi atela kwikala ‘akoleshaña’ amanakwawu niahela; hela chochu, mpinji yikwawu atela kuyifumba hela ‘kuyizuwila.’ Hampinji yinakwilawu mwenimu, akulumpi atela kumwekesha luwi. Neyi mwikala amwovu. mumwekesha kukeña nawa ntañishilu yenu yishindamenaña Hezu daNzambi, mukwikala ntañishi wamuwahi muloña mukwimbujolaña Ntañishi Muneni, Yesu.​—Mat. 11:​28-​30; 2 Tim. 2:​24.

 TWALEKENUHU KUFWILA KUSHIKAHU

17. (a) Yumanyi yinateli kuyikwasha ankoñi akuzatila kulonda atwalekihu kufwila kushikahu? (b) Yumanyi yatela kwanukañawu akulumpi neyi anakuhanjeka hadi amanakwetu anakukeñawu nawu akayitondi kwikala akulumpi? (Talenu chikasha chinakwila nawu “ Ikalenu Amwovu haMpinji Yimunakuhanjeka Hadi Amanakwetu.”)

¹⁷ Hanyima yakuhituluka muyuma yakeñekaña hakwila muntu ashikihu kwikala mukulumpi, ankoñi akuzatila amakwawu anateli kutoñojoka nawu kwila atwesha kushikahu nehi. Ilaña anukenuña nenu Yehova nikuloñesha kwindi hiyakuhwelelaña nawu chiña mushikija iyi yuma yejima hakwila dinu mushikihuku. (1 Pet. 2:​21) Nawa spiritu yaYehova yañovu diyinateli kuyikwasha kulonda mushikiji iyi yuma yakeñekaña hakwikala mukulumpi. (Fwili. 2:13) Kudihu chilwilu chimukukeña kuzatilahu? Mulombenu Yehova kulonda ayikwashi. Sandujolenu hansañu yakundama kunochu chilwilu nawa lejenu mukulumpi wudi wejima kulonda ayileji chimwatela kuzatilahu.

18. Ankoñi akuzatila ejima anayikoleshi kwila chumanyi?

¹⁸ Wejima wetu kushilahu niamanakwetu ekala dehi akulumpi, tutwalekihu kwikala naniyi yilwilu yinashimuniwu muchinu chibaaba. (Fwili. 3:​16) Komana mudi nkoñi wakuzatila? Fwilenuña kushikahu! Mulombenu Yehova kulonda ayidizishi nikuyiwumba munjila yakwila ayizatisheña nankashi kudi yena nimuchipompelu. (Isa. 64:⁠8) Yehova ayikiswili chikupu chimunakuzata nañovu kufwila kushikahu kwikala mukulumpi.