1. Kapostolu Pawulu wayimweneña ñahi ankoñi akuzatila?

 ANKOÑI akuzatila akalakalaña nyidimu yalema muchipompelu. Chakadi nikujina kapostolu Pawulu wayilemesheli awa amayala ashinshika. Chakutalilahu, chayisonekeleliyi akaKristu amuFwilipi, wemushili ankoñi akuzatila kushilahu niakulumpi.​—Fwili. 1:⁠1.

2. Manakwetu wejina daLuis watiyaña ñahi hamuloña wakwikala nkoñi wakuzatila?

² Chili hiyatwansi hela akulumpi, amanakwetu amavulu apapatishewa ekalaña namuzañalu neyi ekala ankoñi akuzatila. Chakutalilahu, Devan wadiña nayaaka 18 hamutondeliwu. Ilaña manakwetu wejina daLuis amutondeli chashikijiliyi yaaka kubadika ha 50. Watiyili neyi chatiyañawu amavulu chahosheliyi nindi, “Natiyaña nami hikukooleka nankashi hakwikala nkoñi wakuzatila, sweje-e neyi nitoñojoka hakukeña kwejima kwammwekeshelaña chipompelu!”

3. Malwihwinyi itukuhanjekahu?

³ Neyi mudi manakwetu wapapatishewa nawa kanda mwiikali nkoñi wakuzatila, kwila muzata nañovu kulonda mushikihu nehi? Yumanyi yinateli kuyisañumuna kwimika ichi chikonkwanyi? Nawa yumanyi yamuNsona yimwatela kushikija hakwila ayitondi? Muchinu chibaaba, tukuhanjeka hañakwilu yanawa malwihu. Tusambilenu kuhanjeka hanyidimu yazataña ankoñi akuzatila.

 NYIDIMWINYI YAZATAÑA ANKOÑI AKUZATILA?

4. Nyidimwinyi yazataña ankoñi akuzatila? (Talenu cheñi mwevulu.)

⁴ Nkoñi wakuzatila himanakwetu wapapatishewa atondañawu naspiritu yajila kulonda akwasheña akulumpi kwakamena nyidimu yayivulu yalema yamuchipompelu. Ankoñi akuzatila amakwawu akwashaña akakushimwina kwikala namaluña akushimwinamu ninyikanda yakuzatisha mumudimu wakushimwina. Amakwawu azataña mudimu wakuwahisha nikuloñesha yuma Hetala daWanta. Ankoñi akuzatila cheñi azataña neyi atulama nawa azatilaña kuyihoshelu hampinji yakupompa kwachipompelu. Nyidimu yayivulu yazatañawu ankoñi akuzatila yalema chikupu. Hela chochu, ankoñi akuzatila chatachi hiyamayala apama kuspiritu; amukeña Yehova nawa azatishaña nshimbi jindi jaloña muchihandilu chawu. Nawa ayikeña nankashi amanakwawu niahela akaKristu. (Mat. 22:​37-​39) Manakwetu wapapatishewa natela kushikahu ñahi kwikala nkoñi wakuzatila?

5. Yumanyi yatela kwilayi manakwetu hakwila ashikihu?

⁵ Bayibolu yashimu yuma yatela kushikija ana anateli kutondawu nakwikala ankoñi akuzatila. (1 Tim. 3:​8-​10, 12, 13) Munateli kushikahu kwikala nkoñi wakuzatila kuhitila mukudiza iyi yuma yamuNsona yakeñekaña nikuzata nañovu kulonda mwileña yumiyi. Ilaña, mwatela ntahi kushinshika chuma chinakuletesha mukeñeña kushikahu.

CHUMANYI CHINAKULETESHA MUFWILEÑA KUSHIKAHU?

6. Chumanyi chinateli kuyisañumuna kulonda mukalakeleña amanakwenu niahela nyidimu yidi yejima? (Matewu 20:28; talenu cheñi mwevulu wudi ha.)

⁶ Muntu itwatela kwimbujola chikupu, Yesu Kristu, chuma chamusañumwini hikukeña​—kukeña kwakumukeña Tata yindi niantu. Kukeña kwamusañumwini kuzata nañovu nikukalakela antu nyidimu yamweneñawu nawu yalema wanyi. (Tañenu Matewu 20:28; Yow. 13:​5, 14, 15) Neyi mukweti kukeña, Yehova nateli kuyikiswila nawa wukuyikwasha kushikija chikonkwanyi chenu chakushikahu kwikala nkoñi wakuzatila.​—1 Kor. 16:14; 1 Pet. 5:⁠5.

7. Muloñadi manakwetu chatela kutondolwelayi kwila yuma yakukeña hohu kuditiyisha yomwenindi kuwaha?

⁷ Mukaayi, antu adituumbakeshaña kakavulu ayikomokaña. Ichi dichichekala wanyi mukuloñesha kwaYehova. Manakwetu  ­anasañumuniwu kudi kukeña, neyi chamusañumwiniwu Yesu, hafwilaña ñovu, wuswa wakuyuula amakwawu hela chifuluku. Neyi muntu wamuchidiwu amutonda muchipompelu, wukukaanaña kuzata nyidimu yamonañawu antu nawu yalema wanyi yakeñekaña hakwakamena nyikoku yaYehova yalema. Hadaha wukumonaña iyi nyidimu nindi yinamuteleli wanyi. (Yow. 10:12) Yehova nateli wanyi kukiswila nyidimu yamuntu wadivwimba hela welaña yuma yakukeña hohu kuditiyisha yomweni kuwaha.​—1 Kor. 10:​24, 33; 13:​4, 5.

8. Kufumbanyi kwayifumbiliyi Yesu apostolu indi?

⁸ Mpinji jikwawu, niamabwambu jaYesu adikundiliyi nawu chikupu afwilileña kutambwila nyidimu yikwawu munjila yaheña. Talenu chuma chamwekeni kudi apostolu aYesu ayedi​—aYakoba naYowanu. Amulombeli Yesu nawu ayinki chifulu chalema muWanta windi. Yesu wayihamekeli wanyi hanichi chuma chakeñeleñawu. Ilaña, wayilumbulwilili apostolu ejima 12 nindi: “Muntu wejima wunakukeña kwikala mukulumpi hakachi kenu, watela kwikala mukakuyikalakela, nawa muntu wejima wunakukeña kwikala watachi hakachi kenu, watela kwikala nduñu yawantu ejima.” (Maku 10:​35-​37, 43, 44) Amanakwetu afwilaña kushikahu munjila yayiwahi, dikwila nawu namuchima wakukalakela akwawu, akwashaña chipompelu munjila jajivulu.​—1 Tes. 2:⁠8.

YUMANYI YINATELI KUYISAÑUMUNA KULONDA MUFWILEÑA KUSHIKAHU?

9. Munateli kwikala ñahi namuchima wakufwila kushikahu?

⁹ Chakadi nikujina, mwamukeña Yehova nawa munakukeña kukalakela amakwawu. Hela chochu, munateli wanyi kwikala namuchima wakufwila kuzata nyidimu yikwawu yazataña nkoñi wakuzatila. Munateli kwikala ñahi naniwu muchima wakufwila kukalakala? Kwila mutoñojoka hamuzañalu wafumaña mukukalakela amanakwenu niahela nehi? Yesu wahosheli nindi: “Mukuhana mwekala muzañalu chikupu kubadika wekala mukutambwila.” (Yilw. 20:35) Dichuma chelileñayi. Wekalileña namuzañalu chikupu muloña wakukalakela antu, ninenu dichuma chinateli kuyimwekena.

10. Yesu wamwekesheli ñahi nindi watiyileña kuwaha kukalakela antu? (Maku 6:​31-​34)

¹⁰ Talenu chuma cheliliyi Yesu chamwekesheli nawu watiyileña kuwaha kukalakela antu. (Tañenu Maku 6:​31-​34.) Mpinji yimu, Yesu niapostolu indi azeyeli. Ayileña kwiluña dakankawawu kulonda anookeliku. Ilaña izaza dawantu dashikileñahu dehi kudina iluña, nakukuhwelela nawu akuyitañisha kudi Yesu. Neyi wakeñeleña wadi kukaana. Kafwampi, yena niamabwambu jindi “hiyadiña nampinji yakunooka hela kudaku.” Indi kwiji Yesu wadi kuyileja antu nindi ayeña, hanyima yakuyitañisha chuma chimu hela yiyedi. Ilaña muloña wakukeña, “watachikili kuyitañisha yuma yayivulu.” Nawa watwalekelihu kuyitañisha sampu ‘nichikwelili melela.’ (Maku 6:​35) Welili chumichi, bayi neyi muloña dichuma chateleleli kwilayiku, ilaña muloña “wayitiyilili wushona.” Wakeñeleña kuyitañisha muloña wayikeñeli. Kukalakela antu kwamuzañalesheleña Yesu chikupu.

11. Yesu wayikalakeleleli ñahi antiyilili jindi munjila yalema? (Talenu cheñi mwevulu.)

¹¹ Yesu chatañishileñayi izaza dawantu, hakuminini dakuyitañishaku, ilaña welili cheñi yuma yikwawu. Wayakameneni kumujimba. Welishili yakuda muchihayamisha nawa wayilejeli atumbanji twindi nindi enki antu yakuda. (Maku 6:​41) Cheliliyi mwenimu, wayidizishili atumbanji twindi chakukalakela antu. Wamwekesheli cheñi kudi wena nindi, kukalakala nyidimu chidi neyi yazataña ankoñi akuzatila, yalema nankashi. Fwikijenu owu muzañalu watiyiliwu apostolu kuzatila hamu naYesu hakuhana yakuda yeliliyi muchihayamisha sampu ‘wejima wawu adiili nawa ekutili’! (Maku 6:​42) Hela chochu,  aka dikadiña katachi wanyi helili Yesu atwamijiku yuma yakeñeleña antu amakwawu kubadika yakeñeleñayi yomweni. Wazatishili chihandilu chindi chejima chahamaseki kukalakela antu. (Mat. 4:​23; 8:​16) Yesu wazañaleleña nikutiya kuwaha kutañisha antu nikwakamena mukudizoza yuma yakeñeleñawu. Chakadi nikujina, ninenu mwakekalaña namuzañalu chikupu neyi mudihana chakufuma hamuchima kufwila kushikahu kwikala nkoñi wakuzatila.

12. Muloñadi hakachi ketu chihatela kubulila muntu hela wumu wunateli kutoñojoka nindi hakweti wuswa wakukalakala muchipompeluku?

¹² Neyi mutiya nenu mudana wuswa wakwila yuma, bayi muzeyaku. Chakadi nikujina, mukweti yilwilu yikuletesha ayizatishi muchipompelu. Munateli kudizilaku yuma yayivulu neyi mulombelahu hansañu yimunakutaña yasonekeliyi Pawulu yekala ha 1 AKorinda 12:​12-​30. Mazu aPawulu amwekeshaña hatooka nawu enu, kufwana ambuña aYehova amakwawu, mukweti mudimu walema wumwatela kuzata muchipompelu. Neyi chayinu mpinji munashikihu wanyi kwikala nkoñi wakuzatila, bayi muzeyaku. Hela chochu, kwila muzata kwesekeja nahanakumini ñovu jenu kulonda muyikalakeleña amanakwenu niahela nehi? Kuhwelelenu nenu akulumpi akamona chidi wuswa wenu nawa akeluka mudimu watela kuyinkawu wumwatela kuzata.​—Rom. 12:​4-8.

13. Yuma yayivulu yakeñekaña kudi amayala atondewa yakundama nianyi amakwawu?

¹³ Talenu chuma chikwawu chinateli kuyiletesha mufwili kushikahu kwikala nkoñi wakuzatila: Yuma yayivulu yakeñekaña hakwila muntu ashikihu yakundama akaKristu ejima. Kafwampi, akaKristu ejima atela kuswina kwakwihi naYehova, kudiluñisha muzañalu wafumaña mukuhana nikwikala nayilwilu yayiwahi yakeñekaña kudi mukaKristu. Hanu dinu yumanyi yatela kwilayi manakwetu hakwila ashikihu?

CHIMWATELA KUSHIKAHU

14. “Kusha maana kuyuma” kwatalisha mudihi? (1 Timotewu 3:​8-​10, 12)

¹⁴ Tuhanjekenu hayuma yimu yimwatela kwila hakwila mushikihu yashimunawu ha 1 Timotewu 3:​8-​10, 12. (Tañenu.) Nkoñi wakuzatila watela “kusha maana kuyuma.” Awa mazu anateli kuyibalumuna cheñi nawu “muntu atela kulemeshawu.” Ichi hichinayi mukwila nawu mwatela kwikala muntu wabulaña kuseha hela wakasikaku. (Mukwa. 3:​1, 4) Hela chochu, mwatela kusha maana kunyidimu yejima yinayinkiwu. Neyi ayiluka nawu mwashindamenewa, chipompelu chikuyilemeshaña.

15. Mazu akwila nawu “bayi akweti madimi ayediku” niakwila nawu “bayi akweti lwisu lwakukeña kuheta munjila yawupwapokiku,” atalisha mudihi?

 ¹⁵ “Bayi akweti madimi ayediku,” awa mazu atalisha mukwila nawu mwatela kwikala ashinshika nawa akuhwelelawu. Mwelaña mumunahoshi nawa himwadimbaña antuku. (Yish. 3:​32) “Bayi akweti lwisu lwakukeña kuheta munjila yawupwapokiku,” awa mazu atalisha mukwila nawu mwatela kwikala ashinshika neyi munakwila bizinisi nawakwenu ninjila yimwazatishilañamu mali. Bayi muzatishaña wubwambu wawuwahi wumukweti nawakwenu akaKristu kulonda yiikali njila yakwikalilamu namaliku.

16. (a) Mazu akwila nawu “bayi aswejaña kunwa vinyuku,” atalisha mudihi? (b) Mazu akwila nawu kwikala “nachinleji chamuchima chitooka,” atalisha mudihi?

¹⁶ “Bayi aswejaña kunwa vinyuku,” awa mazu atalisha mukwila nawu himwatela kwiñija mutu mukunwa walwa hela kuyiluka nawu mwashetañaku. Mwatela kwikala “nachinleji chamuchima chitooka,” awa mazu atalisha mukwila nawu mwatela kuhanda kwesekeja nachahosha nshimbi jaYehova. Hela chakwila mwawanina wanyi, mwadiluñishaña kuwunda kwenzaña muloña wakwikala nawubwambu wawuwahi naNzambi.

17. Manakwetu nateli kumwekesha ñahi nindi anateli kumukuhwelela hampinji ‘yinakumwesekawu kulonda amoni neyi nashikilimu’? (1 Timotewu 3:​10; talenu cheñi mwevulu.)

¹⁷ “Kuyeseka kulonda amoni neyi anashikilimu,” awa mazu atalisha mukwila nawu munamwekeshi hatooka nenu munashikilimu kuyinka mudimu. Dichi, neyi akulumpi anayinki mudimu, londelenu munayilejiwu ninshimbi yahanaña kuloñesha. Ilukenu chiwahi yuma yinabombeli munowu mudimu nimpinji yimwatela kuwuzata. Chimukuzataña mudimu wenu chiwahi, antu muchipompelu akumonaña nawa akusakililaña chimunakupaminaku. Enu akulumpi, ikalenuña nampinji yakudizisha amanakwetu apapatishewa. (Tañenu 1 Timotewu 3:​10.) Komana muchipompelu chenu mudihu amanakwetu apapatishewa akweti yaaka 14 hela kufunta mwishina? Amwekeshaña nawu adizaña nkawawu mpinji yejima? Komana akulañahu hakupompa mpinji yejima nikuya nakushimwina? Neyi adi mwomu, yinkenu nyidimu yinesekani nayaaka yikwetiwu nikwesekeja nachidi yuma. Chimwela mwenimu, awa amanakwetu atwansi ‘mukuyeseka kulonda mumoni neyi anashikilimu.’ Kuhiñahu neyi anashikiji yaaka kutachikila ha 17 kushika ha 19, anateli kushikahu kwikala ankoñi akuzatila.

18. Kwikala chakadi “hakuyinkela muloña” kwatalisha mudihi?

 ¹⁸ Kwikala chakadi “hakuyinkela muloña,” awa mazu atalisha mukwila nawu hikwatela kwikala muloña weneni wunateli kuyinkawuku. Hela chochu, akaKristu mpinji jikwawu anateli kuyitwambila. Yesu amwinkeleña nyiloña hayuma yabulileña kukoñayi, nawa washimwineñahu dehi nindi akakumulondela niwena akayilaña chochimu. (Yow. 15:20) Ilaña, neyi mutwalekahu kwikala nayilwilu yayiwahi neyi yadiña naYesu, chipompelu chakayilemeshaña.​—Mat. 11:⁠19.

19. Mazu akwila nawu amanakwetu atela “kwikala amayala asumbula mumbanda wumu” atalisha mudihi?

¹⁹ “Kwikala amayala asumbula mumbanda wumu.” Neyi mwasumbula, mwatela kukakela kulushimbi lwaYehova lwatachi lwahosha hawulu, lwakwila nawu iyala wumu mumbanda wumu. (Mat. 19:​3-9) Iyala mukaKristu hatela kwila wuvumbiku. (Heb. 13:⁠4) Ilaña kudi yuma yikwawu yimwatela kwila. Mwatela kwikala ashinshika kudi ñodenu, bayi kutiyila mpwila yawuvumbi ambanda amakwawuku.​—Yoba 31:⁠1.

20. Iyala walombolaña añahi amwitala dindi “munjila yayiwahi”?

²⁰ “Alombolaña anyanawu niamwitala dawu munjila yayiwahi.” Neyi mudi mutu wachisaka, mwatela kusha muchima kumudimu wumukweti wawumutu. Kulombola kudifukula kwachisaka mpinji yejima. Kuzata mumudimu wakushimwina namuntu wejima wamuchisaka chenu mpinji yejima kwesekeja nachimukutwesha. Kwashenu anyanenu kulonda ekali nawubwambu wakola naYehova. (Efwe. 6:⁠4) Iyala wakamenaña chiwahi chisaka chindi wamwekeshaña nindi nateli kwakamena nichipompelu.​—Esekejenu 1 Timotewu 3:⁠5.

21. Neyi kanda mwiikali nkoñi wakuzatila, yumanyi yimwatela kwila?

²¹ Enu amanakwetu, neyi kanda mwiikali nkoñi wakuzatila, mwani tañenu nakanañachima nsañu yidi muchinu chibaaba nawa lombelenuhu. Dizenu yuma yakeñekaña hakwila muntu ashikihu kwikala nkoñi wakuzatila nawa zatenu nañovu kulonda mwileña iyi yuma. Toñojokenu hachimwamukeña Yehova niamanakwetu niahela. Ikalenu namuchima wakufwila chikupu kuyikalakela. (1 Pet. 4:​8, 10) Ikalenu namuzañalu wenzaña muloña wakukalakela chisaka chenu chakuspiritu. Dichi Yehova ayikiswili chimunakuzata nañovu kufwila kushikahu kwikala nkoñi wakuzatila!​—Fwili. 2:​13.