Paul: Twazañaleli nankashi! Mwadiña muNovember 1985, nawa twayileña kumudimu wetu watachi wawumishonali—kuLiberia, West Africa. Ndeki yitwayileña nayu yemeni muSenegal. Anne wahosheli nindi: “Mukuhita ora yimu hohu tukushika muLiberia!” Kuhiñahu twatiyili mbila nawu: “Ejima anakuya kuLiberia atela kusuluka mundeki. Kudi antu anakukeña kuhukula chiyuulu chamunidi ituña, dimuloña waweni wutukubulila kuya kunidi iluña.” Hadi mafuku 10, twashakamini nawakwetu amishonali muSenegal, nakutiyilila kunyuzi yakuLiberia yahosheleña hanyotoka yamaneni yasendeleña nyijimba yawantu anafwi niyahosheleña nawu nfulumendi yinakaanishi antu kwenda namelela, abulileña kulondela iyi nshimbi ayilozeleña.

Anne: Etu kwetu hitwakeña kuya nakwendujokaku. Kafwampi, kufuma tuhu kuwukeki añiluka nawu Nyawoma. Natiyaña niwoma kukiluka mukwakwa! Ilaña twafwilileña kuya nakuzata mudimu watutemesheleliwu.

Paul: Ami naAnne twavwalikilili mwiluña dodimu kukabeta kamujika waEngland. Wejima wetu twatachikili wupayiniya hanyima yakumanisha shikola yasekondali, atukolesheleña chikupu kudi anvwali jami niamama yaAnne. Atukwashili nankashi chelukiliwu nawu tunakufwila kwiñila mumudimu wampinji yejima. Chinashikijili yaaka 19, nekalili nakukooleka kwakuya nakuzatila haBeteli, nawa Anne niyena watachikili kuzatila haBeteli chitwadisumbwili mu 1982.

Anne: Twatiyileña kuwaha kuzatila haBeteli, ilaña mpinji yejima twakeñeleña kuya nakuzatila kwadiña kukaankila kweneni. Kuzatila hamu nawamanakwetu haBeteli adiña amishonali kunyima, kwatukwashili kwikala namuchima wakufwila kuzatila kudi kukaankila. Twalombeleleña hanichi chuma ifuku dejima nawufuku hadi yaaka yisatu, dichi twazañaleli nankashi chelili mu 1985 tutambwili mutambi wakuya kushikola yaGiliyadi yamunaamba 79! Atutemesheli kuya nakuzatila kuLiberia, West Africa.

Paul: Twakandamini ndeki yatachi yetejeliwu kufunta kuLiberia. Yuma yachidiña chiwahi wanyi nawa nfulumendi yachidiña yashaku nshimbi jakulondela. Antu atiyili woma chelili motoka yishikeni kuvuma nankashi mukukasumwisha! Wejima wawu akalokeli nawa atemokeli! Hakwila tuleki kutiya woma, twatañileña nsañu yamuMasamu mafuku ejima nawufuku.  Ilaña twakeñeli nankashi mudimu wetu. Anne wazatileña wumishonali, ilaña ami nazatilileña haBeteli, hamu namanakwetu Charuk. Yuma yamweniyi niyelukiliyi kutalisha hachihandilu chawamanakwetu niahela yankwashili kudiza yuma yayivulu.

Anne: Yumanyi yaletesheli tushikeni kukeña ituña daLiberia? Muloña wawamanakwetu niahela. Adiña namuzañalu, aseha nawa ashinshika. Twadikundili nawu nawa ekalili chisaka chetu chachiha. Mazu awu akukolesha atukolesheleña kuspiritu. Mudimu wakushimwina wawahileña. Antu itwashimwinineña ahilileña neyi mufumahu swayi! Antu ahanjekeleña hamalwihu amuNsona munyikwakwa. Wukuya hohu nakuyiwana wutachika nikuhanjeka nawu. Twadiña nawatudizi aBayibolu amavulu nankashi chakwila chatukalilileña kudiza nawu ejima. Dadiña iluña dadiwahi nankashi kushimwinamu!

Paul: Mu 1989 hanyima yakudiluñisha kuwunda hadi yaaka yiwana, kwamwekeni chuma chakuhayamisha—kwashikeneni kwikala njita. Atupondu alukukili iluña dadiña kwakwihi naBeteli haJuly 2, 1990. Hadi tukweji tusatu hitwatwesheleña kuhanjeka nawantu adi ejimaku, kushilahu antaña jetu nikasanji keneni mukaayi. Kwadiña ilundu, kukeha kwayakuda nikukaama antu chakuyikanjikija. Iku kukala kwatwalekelihu hadi yaaka 14 nawa kwaletesheli yuma yadiña chiwahi wanyi mwituña dejima.

Anne: Antu amunyichidi yimu azuñileña nakujaha antu anyichidi yikwawu. Munyikwakwa yejima mwadiña akakuzuña njita adimanyekeli yitwa yanjita, nawa eñilileña mumatala ejima nakusenda yuma yawanineñawu. Hakachi kawu, kujaha antu amakwawu akumweneña neyi “kujaha tusumbi.” Yibimbi ayilumbikileña hanyikoleku hemanañawu atupokola, yikwawu kwakwihi nakasanji kamutayi. AYinsahu ashinshika ayijahili, kushilahu niakwetu amishonali ayedi.

AYinsahu ashili mawumi awu muwubanji kuhitila mukusweka amanakwawu akunyichidi yakeñakeñeleñawu nawu ayijahi. Amishonali niakaBeteli niwena dicheliliwu. HaBeteli, aYinsahu amakwawu atemukileña akaamineña mumatala aheshina nawa amakwawu twakaamineña nawu mutupeka twetala dahewulu. Mukapeka ketu twakaamineñamu nawantu 7.

Paul: Ifuku niifuku, awa akakuzuña njita afwilileña kwiñila kulonda amoni neyi kudi antu itunasweki. Twekalileña nawanhembi awana: ayedi adiña nakutalila hawindu nawa amakwawu ayedi ayileña kuchiisu chahanji. Neyi ana ayedi adi kuchiisu chahanji asha makasa awu kumbidi, dikwila nawu yuma yidi hohu chiwahi. Ilaña neyi asha makasa awu kunyima, twelukileña netu akakuzuña njita anazuwi nankashi, dichi ana atalilileña hawindu anyakeleña kuya nakusweka akwetu.

 Anne: Chimwahitili nyilungu yayivulu, izanvu dimu dawakakuzuña njita deñilili mukachi. Ami namuhela wumu twadikiyilili mukapeka kakuwelela mwadiña kadiluña kanyanya mutwaswamini mukachi kakabati. Muhela weñilili mwomwenomu. Akakuzuña njita alondeleli hetala dahewulu, iku adi namata awu. Adondomweneni kuchiisu iku anazuwi. Paul wayilembeleli nindi, “Kwiñilamu nehi ñodami nakudikwasha.” Chinashinkileña kukapeka kwaswamini muhela kwafumini ipumba, kuhiñahu, natachikili kufuntisha yuma yejima hamashewufu nawa hahitili mpinji. Namweni nami awa akakuzuña njita akwiluka chuma chinelileña, dichi mujimba wami wejima watachikili kuzaala. Chumanyi chikumwekana neyi nishinkula kuchiisu? Nalombeli mumuchima, nakulemba kudi Yehova nami ankwashi. Kuhiñahu nashinkwili kuchiisu nawa nayimushili mumesu awunda. Wumu hakachi kawu wanshinjikili nakushikena kwiñila, wayili nakushinkula mukabati nawa wasandujoleli mumashewufu. Wahayamini hakuwana mwosi chuma chidimu. Yena niizanvu dadiñayi nadu ayili nakusandujola mutupeka tukwawu nimusiliñi bodi. Ilaña hohamu, kwosi jawaniniwu.

Paul: Hadi tukweji, twadiña hohu nayakuda yantesha. Ilaña yakuda yakuspiritu diyitwahandilileña nankashi. Kudifukula kwantetemena kwahaBeteli diyi “yakuda yantetemena” yitwadiileña, nawa wejima wetu twasakilileña chatukolesheleña iyi ntanjikilu.

Neyi etu nawakwetu amakwawu twafumini hakasanji muloña wakukeha kwayakuda nimenji, dikwila nawu ana enjili nakuswama haBeteli adi kuyijaha. Mpinji jikwawu, njila nimpinji mwatukwashilileñayi Yehova yamwekeneña neyi hichihayamisha! Yehova watwinkeleña yuma yejima yitwakeñeleña nawa watukwashili kuleka kutiya woma.

Mukaayi mwadiña mwidima, ilaña chalala chatoñekeleña. Kakavulu, amanakwetu niahela atemukileña kulonda ahandishi mawumi awu, ilaña atwalekelihu kwikala nachikuhwelelu chakola nikwikala awunda. Amakwawu ahosheleña nawu chomikileñawu njita “adiloñesheleña nalukadi lwasweja.” Akulumpi niamanakwetu atwansi ahamukili nakutachika kuzata hakumina ñovu jawu kukwasha amanakwawu niahela. Chapalañeniwu, amanakwetu niahela adinuñili hamu, atachikili kushimwina mumaluña amaha nawa adiña Netala daWanta wanyi, ilaña apompeleleña hadi hejima hakuwanawu mumasaña. Kupompa hamu kwayikolesheleña hampinji yamweneñawu kukala, nawa kushimwina kwayikwashileña aYinsahu kuumika. Chahanineñawu yuma yakukwasha antu adi mukukaankila, twazañaleli hakutambwila yola yakuzatisha mumudimu wakushimwina chatela tutambwili yakuvwala. Antu aneñeli nawa akabakeni muyitoñojoka muloña wayuma yayimwekeneni, atiyilili kunsañu yayiwahi. Ahayamini hakumona aYinsahu chadiñawu namuzañalu nichamweneñawu yuma munjila yaambukaku. Atoñekeleña neyi chejeji munona mwidima wejima. (Mat. 5:​14-16) Iyena dadiña nawanakwetu daletesheli  amu hadi ana akakuzuña njita azuwa ekalili amanakwetu.

Paul: Mpinji jikwawu twafumini mwituña, kapampa kasatu hadi kapinji kantesha nawa kayedi hadi chaaka chamukuma. Muhela wumu mishonali walumbulwili chiwahi chitwatiyileña nindi: “Kushikola yaGiliyadi, atudizishili nawu twatela kusambila kusha muchima kumudimu wetu, nawa dichitwelileña. Dichi kushiya amanakwetu adiña mukukala kwamuchidiwu, chadiña tuhu neyi muchima wetu nakubaluka!” Chasweja kuwaha, twadiña nakukwasha amanakwetu muLiberia hitwazatilileña mumatuña adikumashanini nanidi ituña.

Anne: MuMay 1996, etu awana twasendeli motoka yamutayi mwadiña yipapilu yansañu yalema yakasanji kamutayi. Twakeñeleña kuya lwendu lwamakilomita 16 kwiluña dakiñewa dadiña kwakulehi natawuni. Hohenohu iluña ditwashakamineña adilukukili. Akakuzuña njita azuwa alozeli mata mwiwulu, atwimikili, atufumishilimu etu asatu mumotoka, nawa asendeli motoka nakuya iku Paul wudi mukachi. Twashalili hohu tunahayami. Hashimbwili wanyi, twamweni Paul nakwinza kudi etu iku mashi anakuvwa kumutu windi. Twaluwankeni, twamweni netu anamulozi, ilaña twatoñojokeli netu neyi amuloza, hadi kutwesha kwendaku! Mukakuzuña njita wumu diyi wamukatishili hamushinjikileñayi kufuma mumotoka. Kuwaha kwadiña kwakwila nawu, amukatishili hohu hantesha.

Kukamwihi, emikiliku motoka yawamashidika yenzeli nawantu atiyili woma. Twakulamini kumotoka. Ñendeshi watemwishili motoka chakwila twakeñeleña kuholoka. Twamulembeleli netu yemani, ilaña wakaanini kututiyilila muloña watiyili woma. Dichi twakwatishili kumotoka ninochu chitwashikili kutwayileña nawa nyijimba yetu yazaalileña muloña wawoma.

Paul: Iku yakuvwala yetu yinatami nawa yinataboki munyima, twaditalili nawa twahayamini chitwashikili amomi. Twakaamini hesaña kwakwihi nandeki yanyanya yasoleliwu nayidaña yayivulu, yatusendeli nakuya kuSierra Leone hefuku dalondelelihu. Twazañaleli chitwashikili amomi ilaña twakameneni chikupu hadi amanakwetu akaKristu.

Anne: Chitwashikili haBeteli muFreetown, kuSierra Leone, twashakamineña chiwahi nawa atwakameneneña. Ilaña natachikili kwanuka yuma yatama yatumwekeneni. Mpinji yejima namwaana, nekalileña wasoñama nawa natiyileña woma nami hadaha kudi yuma yatama yikumwekana. Yuma yejima nayimweneña neyi yidi chiwahi wanyi nawa yaluwankana. Nawufuku, nahindukilieña nasulwili nawa inakuzaala, muloña wakusweja kwakama. Nakañenyeña kwoona chiwahi. Paul wankumbatili nawa walombeli hamu nanami. Twembili tumina twaWanta ninochu chinalekeli kuzaala. Natoñojokeleña nami hinukuzaluka nawa hinukutwalekahu kuzata wumishonaliku.

Nakavulamena wanyi chuma chalondelelihu. Muwowuna mulungu twatambwilili magazini ayedi. Magazini yimu yadiña Awake! yaJune 8, 1996. Mwadiña chibaaba chahosheleña nawu “Coping With Panic Attacks [Yuma Yimunateli Kwila Neyi Munasweji Kwakama].” Kufuma hayina mpinji, nelukili chaletesheli nitiyeña muniyi njila. Magazini yamuchiyedi yadiña Kaposhi Kakutalila kaMay 15, 1996, kadiña nachibaaba chahosheleña nawu “Where Do They Get Their Strength? [Kudihi Kwawanañawu Ñovu?]” Munaka Kaposhi Kakutalila mwadiña mwevulu wamwekesheleña ipupula dinadikatishi. Ichi chibaaba chalumbulwili nawu neyi ipupula chidatwalekañahu kuda nikutuuka hela chakwila mpuula jadu jinakisiki nankashi, nawukwashu waspiritu yaYehova ninetu tunateli kutwalekahu kukwasha akwetu hela chakwila kunyichima kunakati. Iyi yadiña yakuda yakukolesha yafumineña kudi Yehova hampinji yatelela. (Mat. 24:45) Kusandujola mutu wansañu nikuhemba yibaaba yahosha haniyi nsañu kwankwashili. Natachikili kuleka kwakama chovu-chovu hayuma yatama yammwekeneni kunyima.

Paul: Mpinji yejima yitwafuntileña kumukala wetu kuLiberia, twazañaleleña nankashi. Kwakwihi nakukuma kwa 2004, twachindileña netu tunashikiji dehi yaaka kwakwihi na 20 mumudimu wetu. Njita yamanini. Kwadiña yitoñojoka yakutuña hakasanji kamutayi. Ilaña hohenohu atulejeli kuya nakuzatila kwacheñi.

Iku kwadiña kweseka kweneni. Twadikundili nankashi nachisaka chetu chakuspiritu, hanu dinu  twadi kuchishiya ñahi? Chitwashiyili yisaka yetu yitwakeña nakuya kuGiliyadi, twamweni yuma yayiwahi yafuminimu muloña wakumwiteja Yehova kutulombola, dichi twetejeli. Haniyi mpinji atutemesheli kuya nakuzatila mwituña damukamwihi daGhana.

Anne: Twadilili nankashi hitwafumineña kuLiberia. Twahayamini helili Frank, manakwetu wamaana nawa wakula dehi, atuleji nindi: “Etu tujimbalenuku hohu!” Kuhiñahu walumbulwili nindi: “Tuneluki netu mwakatuvulamena wanyi, ilaña mwatela kusha muchima wenu wejima kumudimu wenu kunayitemeshiwu. Wunafumi kudi Yehova, dichi musheña muchima kudi amanakwetu niahela kumunakuya.” Chumichi chatukwashili kudiloñesha kwikala nawamabwambu amaha mwituña mwabulili kutwilukawu kudi antu amavulu nawa mwakwila yuma yejima yadiña yayiha.

Paul: Hela chochu, hashimbwili wanyi twakeñeli chisaka chetu chachiha chakuspiritu muGhana. Mwadiña aYinsahu amavulu nankashi! Twadizili yuma yayivulu kutalisha hakashinshi nichikuhwelelu chakola chadiña nawamabwambu jetu amaha. Dichi hanyima yakukalakela muGhana hadi yaaka 13, twatambwilili mudimu wukwawu wutwabulili kukuhwelela. Atulejeli kuya nakukalakela kukasanji kamutayi kakuEast Africa, muKenya. Hela chakwila twayanukileña chikupu amabwambu itwadiña nawu kumaluña kutwakalakeleleli, hashimbwili wanyi twatachikili kudikunda nankashi nawamanakwetu niahela ashinshika muKenya. Nawa tunatwalekihu kukalakela mwiluña deneni mudi kukaankila kweneni.

Anne: Hadi yaaka yayivulu, kudi yuma yanzaalishileña nikuntiyisha woma. Wubanji hela yuma yakwakamisha yinateli kutukatisha kumujimba nimuyitoñojoka. Hiyatukiñaña muchihayamisha kuniyi yumaku. Nichayinu mpinji, neyi nitiya yivumina yamata, natiyaña woma nankashi nawa makasa ami azeyaña kwazubulu-u. Ilaña nadizi kushindamena hawukwashu wejima watwinkañayi Yehova hakwila atukoleshi, kushilahu niwukwashu wafumaña kudi amanakwetu niahela. Nawa namoni nami neyi tutwalekahu kwila yuma yakuspiritu mpinji yejima, Yehova nateli kutukwasha kutwalekahu mumudimu wetu.

Paul: Amakwawu ehulaña nawu, “Mwakeña mudimu wumwazataña?” Matuña anateli kwikala amawahi, ilaña mpinji jikwawu yuma yinateli kutama nawa munateli kwikala wubanji. Hanu dinu, yumanyi yitwakeña nankashi kubadika ituña? Hichisaka chetu, chawamanakwetu niahela alema. Hela chakwila tukweti nkulilu jashiyashana, twatoñojokaña hayuma yoyimu. Twatoñojokeli netu anatutemeshi kuya nakuyikolesha, ilaña walala wudi wakwila nawu wena diwu atukoleshaña.

Mpinji yejima yitukufuma kwiluña dimu nakuya kudikwawu, twamonaña chihayamisha chamakonu: amanakwetu. Chakala hohu tudi mbadi yachipompelu, tukweti chisaka niiluña mutwatiyaña kwikala akasunuka. Tunakuhweleli chikupu netu neyi tutwalekahu kumushindamena Yehova, wakatukoleshaña kwesekeja nakukala kutukweti.—Fwili. 4:13.