Atata aJohn Mills, apapatishewili mu 1913 muNew York City hadiñawu nayaaka 25. Manakwetu Russell diyi wahanini mpanji yachipapatishu. Hashimbwili wanyi atata ayili kuTrinidad kwadisumbwililiwu nawamama aConstance Farmer, adiña nampwila yakudiza Bayibolu. Atata adiña nakuzatila hamu nebwambu dawu William R. Brown hakutalisha “Photo-Drama of Creation.” Atwalekelihu kuzata iwu mudimu kushika nimu 1923 hamutuminiwu manakwetu nimuhela Brown kuWest Africa. Atata niamama adiña nakuchiñeja kwakushakama mwiwulu, atwalekelihu kushakama muTrinidad.

Twadiña anyana 9 nawa wedi wetu amutumbili nawu Rutherford ijina damanakwetu wadiña Presidenti waWatch Tower Bible and Tract Society haniyi mpinji. Chinasemukili haDecember 30, 1922, antumbili ijina damanakwetu Clayton J. Woodworth wadiña nakuloñesha yibaaba yamuThe Golden Age (makonu Awake!). Anvwali jetu atutañishili shikola yakumujimba, ilaña adiña nakutukolesha nankashi kuzata nyidimu yakuspiritu. Amama adiña eluka nankashi kulumbulula Nsona. Atata akeñeli nankashi kutuleja nsañu yamuBayibolu. Hakulumbulula azatishileña yiidi yamujimba hakwila nawu tutiyishi nsañu yinakuhoshawu.

Nyidimu yazatiliwu mwafumini yuma yayiwahi. Hadi anyana awamayala atanu, etu asatu twayili kuShikola yaGileyadi. Aheletu asatu azatili wupayiniya hadi yaaka yayivulu muTrinidad nimuTobago. Muloña wayuma yatudizishiliwu niyuma yayiwahi yelileñawu anvwali jetu, atwitumbili “mwitala daYehova.” Chatukolesheleñawu, chatukwashili kushakama nikukulila “muyipañu yaNzambi yetu.”—Mas. 92:13.

Amanakwetu adiña nakubulakena hetala detu hakuya nakushimwina. Apayiniya adiña nakwinza hetala nawa kakavulu adiña nakuhosha hadi Manakwetu George Young, mishonali wakuCanada wenjili nakuhempula iluña daTrinidad. Anvwali jetu adiña nakuhosha hadi antu iyazatileñawu nawu, manakwetu  nimuhela Brown adiña kuWest Africa haniyi mpinji. Nsañu yahosheleñawu yanleñeleli kutachika mudimu wakushimwina hinadiña nayaaka 10.

Munana mafuku, magazini etu adiña nakushimuna makudi amunsakililu yakutwamba, akwakulanda nakulandulula adiilaña antu nimapolitiki. Mu 1936, mukulumpi wachechi wamulejeli wadiña nakwimenaku nguvulu wamuTrinidad nawu yalekeshi nyikanda yawaWatch Tower yejima. Twaswekeli nyikanda nawa twayizatishili ninochu chiyamanini. Twayileña munyikwakwa hamaseki ninamakinga, twashimwinineña kuzatisha mahandibilu nimakaadi akuvwala. Twayileña cheñi nakushimwina namotoka wayihoshelu hamu nezanvu damumusumba waTunapuna, twashimwinineña nimumaluña amunyikala yamuTrinidad. Kushimwina kwawahileña nankashi! Kudikunda nawamanakwetu nikuzataku iwu mudimu kwanleñeleli kupapatishewa hinadiña nayaaka 16.

Yuma yandizishili anvwali ninyidimu yinazatili hinadiña kansi yanleñeleli kukeña nankashi mudimu wawumishonali. Natwalekelihu kutoñojoka haniwu mudimu hinayili kuAruba mu 1944 nawa natachikili kuzatila hamu naManakwetu Edmund W. Cummings. Twatiyili kuwaha chitwapompeli antu 10 kuChanukishu mu 1945. Chaaka chalondelelihu, atachikili chipompelu hachitutu.

Chihaleheli chantesha, nashimwinini wunsahu wamumpanji kudi mukwetu mutwazatilileña Oris Williams. Oris wadiña nakutaadika chikupu kulonda yahakwiliku tushidikilu twamudizishiliwu. Hela chochu, hanyima yakudiza Bayibolu welukili chahosha Izu daNzambi nawa wapapatisheweli haJanuary 5, 1947. Chimwahitili mpinji, twadikeñeli naOris nawa twadisumbwili. Watachikili wupayiniya muNovember 1950. Chihandilu chami chawahili chikupu chitwadisumbwili naOris.

Mu 1955 atutambikili kuShikola yaGileyadi. Hitwadiloñesheleña kuya kuShikola, ami niOris twalekeli nyidimu yitwazatileña, twalandishili itala niyuma yikwawu nawa twafumini kuAruba. HaJuly 29, 1956, twamanishili shikola yaGileyadi yanaamba 27 nawa atutumini kuNigeria.

Oris neyi yanuka wahosheleña nindi: “Spiritu yaYehova yinateli kukwasha muntu kuumika makabi ekala mumudimu wawumishonali. Nfumwami wakeñeli mudimu wawumishonali ilaña ami nakeñeleña kwikala mishonali wanyi. Nakeñeleña hohu kwikala netala nikuvwala anyana. Nahimpili yitoñojoka yami chinelukili nami kunashali hohu mpinji yantesha yakuzatilamu mudimu wakushimwina. Chitwamanishili Shikola yaGileyadi, nadiloñesheli chikupu kuzata mudimu wawumishonali. Chitwakandamineña mbopolu yaQueen Mary, manakwetu Worth Thornton wazatilileña mukasanji kaManakwetu Knorr wenjili nakutuleja nindi, ‘Mwendihu chiwahi.’ Watulejeli nindi tukuzatilaña haBeteli. Naneñeli chanlejeliwu awa mazu muloña nakeñeleña wumishonali. Ilaña hashimbwili wanyi nenjililili, nakeñeli chihandilu chahaBeteli nawa anyikeli nyidimu yashiyashana. Nakeñeli nankashi kuzata mudimu wakutambwila enyi nijinshiña. Nakeñeli nankashi antu nawa iwu mudimu waleñeleli kudiluka nikuhanjeka chiwahi nawamanakwetu akuNigeria. Amavulu enjileña iku anatookoloki, anazeyi, anafwi mpwila ninzala. Natiyileña kuwaha kuyakamena nikuyikundeja, muloña nadiña nakumuzatila Yehova mudimu wajila.” Nyidimu yejima yitwazatileña yadiña nakutukolesha.

Hitwadiña nakudiila hamu neyi chisaka muTrinidad mu 1961, Manakwetu Brown washimwini yuma yamutiyishili kuwaha hadiñayi muAfrica. Kuhiñahu ninami nashimwini chitwadiña nakuvulilaku muNigeria. Manakwetu Brown wankumbatili nakuyileja aTata nindi: “Johnny, kanda wuyeñahu dehi kuAfrica ilaña Woodworth washikaku dehi!” Dichi aTata anlejeli nawu: “Worth, Twalekakuhu!” Mazu akukolesha anlejeliwu kudi awa antu anashimbuli muchalala ankwashili kutwalekahu kuzata mudimu wami wakushimwina.

Mu 1962, nadiña cheñi nakukooleka kwakuya kuShikola yaGileyadi yadiña yatukweji 10. Manakwetu Wilfred Gooch, wadiña nkoñi wamutayi muNigeria haniyi mpinji, niyena wayili  kuShikola yaGileyadi yanaamba 38 nawa amutumini kuya nakuzatila kuEngland. Dichi nekalili nkoñi wamutayi muNigeria. Nelili neyi chelileñayi Manakwetu Brown, nendeli chikupu mumaluña ashiyashana kulonda niyiluki nikuyikeña chikupu amanakwetu amuNigeria. Hela chakwila adiña wanyi nayuma yayivulu yakumujimba neyi chekalawu akwawu mumatuña aheta, muzañalu wuyadiñawu nawu wamwekesheli nawu tunateli kwikala namuzañalu hela chakwila tudana mali amavulu niyuma yakumujimba. Natiyileña kuwaha chiyamwekeneña wunyonji nimuzañalu hakupompa hela chakwila hiyadiña nayuma yayivuluku. Amavulu ayileña kukupompa kwamaneni nanyotoka yatenañawu nawu malorrie nimabolekaja * (mabasi akubula kujika mumbadi). Kakavulu awa mabasi adiña akusoneka. Yimu yadiña yakusoneka nawu: “Twavulila nkuñujola.”

Awa mazu mwalala ashikijeweli! Mudimu wejima wazatileña muntu twawuchindileña nawa twadiña nakumubombela owu muntu kunaamba yetu. Mu 1974 ituña daNigeria dekalili nawakwakushimwina 100,000. Didalondeleli hadi United States. Mudimu wayili hambidi!

Hampinji yavulileñawu akwakushimwina, muNigeria mwavulumukili njita yamwituña, yatachikili mu 1967 kushika mu 1970. Amanakwetu muBiafran kwishinadi daKaloña Niger akañenyeña kwinza kukasanji kamutayi. Dichi yetu hohu twateleleli kuyitwalila nyikanda. Neyi chitwashimuna hakusambila, kulomba nikumukuhwelela Yehova diyuma yatukwashili kwawuka kaloña kapampa kakavulu.

Kakavulu nanukaña chitwashileña wumi wetu hakatoña mpinji yitwawukileña kaloña Niger, kudi amashidika ajahileña antu chakadi muloña, yikatu niyuma yikwawu yaletaña wubanji. Chadiña chakala hakwila nawu tuhiti hamaluña hejima hemeneñawu amashidika, ilaña kwishinadi daBiafran dikwaswejeli kutama nankashi. Mpinji yimu nawukili Kaloña Niger nawufuku hinafumineña kuAsaba nakuya kuOnitsha, nemeni nakuyikolesha amanakwetu adiña nakulombola kuEnugu. Hinayiliku cheñi nayikolesheli akulumpi adiña kuAba kwakaanishiliwu kwambula manoñu akumatala namelela kuchiina ayilumbu. Hitwadiña nakupompa mumusumba waPort Harcourt amashidika amu ayili nakulukuka mashidika hanji yamusumba waBiafran, dichi twanyakeli kukunkulula kupompa nakulomba.

Iku kupompa kwadiña nakuyikolesha amanakwetu kwiluka nawu Yehova wayikeña nawa wayakamenaña. Kwayikwashileña cheñi kwikala anuñañana nikubula kudiñija munsañu jamatuña nachiyuulu. Amanakwetu akuNigeria ashindili iku kukala. Amwekesheli kukeña kwakubula chaambu chanyichidi nawa atwalekelihu kwikala anuñañana. Kwadiña hikukooleka chikupu hakwikala kukabadi kawu muniyi mpinji yakala!

Mu 1969, Manakwetu Milton G. Henschel diyi wadiña cheyamani haKupompa kwaNyunza kuYankee Stadium, New York, kwadiña namutu nawu “Peace on Earth” (Kuwunda Hamaseki). Chineli yami nadiña nakumukwashaku, nadizili yuma yayivulu. Iyi yadiña mpinji yayiwahi muloña mu 1970 twadiña nakupompa kwanyuza muLagos, Nigeria, kwadiña namutu nawu “Men of Goodwill” (Kuwunda Hakachi Kawantu Atiyañayi Kuwaha). Yehova diyi watukwashili hakwila tupompi, muloña hashimbwili wanyi nahamanini njita. Kwadiña madimi ashiyashana 17 nawa antu apompeli adiña 121,128. Manakwetu Knorr, Manakwetu Henschel niamanakwetu amakwawu afumini kuUnited States nikuEngland nandeki atiyili kuwaha hakumona atumbanji amaha akushika ku 3,775 apapatisheweli. Ichi chipapatishu dichadiña nawantu amavulu kufuma tuhu haPentekosta. Nadiña namudimu weneni chikupu wakuloñesha yuma yakeñekeleña. Akwakushimwina avulili chikupu!

Hadi yaaka 30 nakubadikahu yinashakamini muNigeria, mpinji yikwawu nakalakeleña neyi nkoñi wendaña ninkoñi wendelaña nyitayi, muWest Africa. Amishonali atiyili kuwaha chinayikwashileña nikuyikolesha hamuntu-hamuntu. Natiyili kuwaha chinayikolesheli nami ayivulamena wanyi! Iwu mudimu wankwashili kwiluka nami neyi tukeña amakwetu anateli kushimata, kutwalekahu kwikala akola nikuhemba kunuñañana mukuloñesha kwaYehova.

 Yehova diyi watwikwashili kushinda kukala kutwamweni kwayikatu ninjita. Twamweni Yehova chatukwashileñayi. Oris washimwini nindi:

“Twakatili mashika kapampa kakavulu. Ifuku dimu twamutwalileña Worth kuchipatela kuLagos iku nahwidili. Anlejeli nawu wukuhanda wanyi, ilaña wakoleli! Chapapukiliyi, watachikili kumushimwina nasi wadiña nakumuuka, wamulejeli haWanta waNzambi. Chimwahitili mafuku, ami niWorth twayili nakumutala nasi, Nwambiwe, netu tutachiki kudiza nindi Bayibolu. Wetejeli kumudizisha chalala nawa mukuhita kwampinji wekalili mukulumpi muchipompelu chamuAba. Ninami nakwashili antu amavulu kutachika kumukalakela Yehova kushilahu tuhu niaMuzilemu. Twatiyili kuwaha muloña twayilukili nikuyikeña antu amuNigeria, kwiluka chisemwa chawu nidimi dawu.”

Ichi dichuma chikwawu chitwadizili: Hakwila tuzati chiwahi mwituña dacheñi, twateleleli kuyikeña amanakwetu niahela hela chakwila adiña akuyisemwa yambukaku nachisemwa chetu.

Hanyima yakuzatila haBeteli muNigeria, mu 1987 atwitumini kuya nakukalakela wumishonali kuchitutu chaSt. Lucia muCaribbean. Twatiyili kuwaha kuzata iwu mudimu, ilaña twatachikili kumona kukala kukwawu. Kwambukaku namuAfrica mwasubwileñawu ambanda amavulu, kuSt. Lucia kwaswejeli muloña adiña nakudisumbula chakubula kudisonekesha. Izu daNzambi dayikwashili antu amavulu itwadizishileña Bayibolu kutachika kuhimpa.

Chitwashinakajili, mu 2005, Izanvu Dalombolaña datwitumini kukasanji keneni kakuBrooklyn, New York, U.S.A. Namusakililaña Yehova chanyinkeliyi Oris. Wafwili mu 2015, nawa kufwa kwindi kwaneñeshaña nankashi. Wadiña ibwambu wamuwahi nawa mumbanda wukweti kukeña. Namukeñeli chikupu hadi yaaka 68 yitwashakamini muwulu. Twelukili netu hakwila nawu twikali namuzañalu muwulu nimuchipompelu, twatela kulemesha wumutu, kudanakena wumu namukwawu, kudizoza nikwikala nanyikabu yaspiritu.

Neyi tumona kukala hela neyi tunaneñi, twadiña nakumulomba Yehova kulonda yatukwashi kutwalekahu kumukalakela. Chitwatwalekelihu kuhimpa, twamweni yuma yadiña nakuwahilaku mpinji yejima nawa yuma yikwawu yayiwahi yichidi kumbidi!—Isa. 60:17; 2 Kor. 13:11.

Yehova wakiswilili mudimu wazatileñawu anvwali jami niantu amakwawu muTrinidad nimuTobago, nawa yileji yakatataka yinakumwekesha nawu, antu 9,892 anenzi mukudifukula kwalala. Antu amavulu muAruba akwashili nankashi chipompelu munadiña. Chayinu mpinji, ichi chitutu chidi nayipompelu 14. Ichi naamba yawakwakushimwina muNigeria yinashiki ku 381,398. Nawa hachitutu chaSt. Lucia hadi antu 783 anakuzata mudimu wakuhakwilaku Wanta waYehova.

Ichi nashikiji dehi yaaka kubadika 90. Masamu 92:14 yashimuna hadi antu atumbawu mwitala daYehova nawu: “Chakashikawu muwushinakaji saña asoñelawu nyikabu; akenzala nameji to-o, akatuuta ke-kee.” Natiyaña kuwaha chinnamukalakeli Yehova muchihandilu chami. Yuma yandizishiliwu kuwansi yinankwashi kutwalekahu kumukalakela Yehova muchihandilu chami chejima. Muloña wakukeña kwaYehova, nañiteji ‘kukulila muyipañu yaNzambi yami.’—Mas. 92:13.