1-2. (a) Mosi amulumbulula nawu wadiña muntu wamuchidinyi, nawa yumanyi yeliliyi? (b) Chumanyi chatuleñelaña kwikala adizoza?

BAYIBOLU yamutena Mosi nawu “wadiñi mwovu nankashi, kubadika amayala ejima ekala heseki dejima.” (Kuch. 12:3) Komana chinayi mukwila nawu wadiña wazeya, watiyileña woma hakufuukula nawa wadiña wahamuka wanyi neyi antu anakumudimbulula? Antu amakwawu dichinateli kumulumbululawu muntu wadizoza. Ilaña dimu wanyi. Mosi wadiña kambuña aNzambi wakola, wahamuka nawa wadiña nakufuukula chakadi woma. Yehova wamukwashili kuya nakudimona namwanta wañovu wakuEjipitu, hadaha walombweli antu akushika ku 3,000,000 muchinkalampata nawa wakwashili muza waIsarela kushinda ayilumbu jawu.

² Hitwamonaña kukala neyi kwamweniyi Mosiku, ilaña mafuku ejima twawanikaña nawantu hela twamonaña yuma yatuleñelaña kubula kudizoza. Ilaña kudi chuma chacheni chatuleñelaña kwikala nanichi chilwilu. Yehova wakana nindi “akwakudizoza akaswana ituña.” (Mas. 37:11) Komana mwadimonaña nenu mwadizoza? Komana antu amakwawu anateli kuhosha nawu mwadizoza? Henohu kanda twakuli awa malwihu, twatela kwiluka mwatalisha kudizoza.

3-4. ( a) Kudizoza tunateli kukwesekeja nachumanyi? (b) Yilwilwinyi yiwana yitwatela kwikala nayu neyi tunakukeña kwikala adizoza, nawa muloñadi?

³ Kudizoza * kudi neyi mwevulu wunakumwekana lubanji.  Munjilanyi? Neyi chazatishañayi mukwakuleña nyevulu wulombu washiyashana hakwila mwevulu wumwekani lubanji, ninetu twatela kwikala nayilwilu yayiwahi yayivulu hakwila nawu twikali adizoza. Iyi yilwilu munadibombeli kudikehesha, kwovwaha, kuwunda nikuhamuka. Muloñadi chitwatela kwikalila naniyi yilwilu neyi tunakukeña kumutiyisha Yehova kuwaha?

⁴ Antu adikehesha hohu diwu ovwahilaña mwayilejañayi Nzambi. Chuma chimu chakeñañayi Nzambi, hikwikala amwovu. (Mat. 5:5; Ñal. 5:23) Satana wahilaña neyi twila yuma yakeñañayi Nzambi. Hela chakwila twekala adizoza nawa awunda, antu amavulu mukanu kaayi kaSatana atuhela. (Yow. 15:18, 19) Dichi, twatela kwikala ahamuka hakwila nawu tudikañi naSatana.

5-6. (a) Muloñadi Satana chahelelayi antu adizoza? (b) Malwihwinyi itukwakula?

⁵ Muntu wabula kudizoza himuntu wadivwimba, wazuwa nawa wabulaña kumwovwahila Yehova. Satana niyena dichekalayi. Dichaletesha yaheli antu adizoza muloña asawulaña yilwilu yindi yatama. Sweje-e dinu, amusololaña nawu hisakutwamba. Muloñadi? Hakutwesha kuyilekesha antu adizoza kumukalakela Yehovaku hela chakwila wukuzata nañovu yamuchidinyi muyuma yahoshañayi niyelañayi!—Yoba 2:3-5.

⁶ Mpinjinyi yinateli kwikala yakala kudizoza? Muloñadi chitwatela kutwalekahu kufwila kwikala adizoza? Hakwila nawu twakuli awa malwihu, tukushinshika hachuma cheliliyi Mosi, aHeberu asatu adiña muwunkoli muBabiloni niYesu.

7-8. Mosi welili ñahi chabulili kumulemeshawu?

⁷ Neyi anayinki wuswa wakulombola: Chinateli kwikala chakala kudizoza sweje-e neyi muntu imwatalaña nakwovwahila wanyi mumunakumuleja hela nakudiwula mumunafuukuli. Komana chuma chamuchidiwu chayimwekenahu dehi? Indi neyi muntu wamuchisaka yela chuma chamuchidiwu? Munateli kwila ñahi? Shinshikenu cheliliyi Mosi.

⁸ Yehova wamutondeli Mosi kwikala nlomboli wawaIsarela nawa wamulejeli kusoneka nshimbi jakulombola nachu iwu muza. Chakadi nikujina, Yehova wadiña  nakumukwasha Mosi. Hela chochu, Miriyami muhela aMosi nimanakwindi Aroni atachikili kuhosha mazu atama hadi Mosi nawa adiña nakumuhoshola hansañu yamumbanda wasumbwiliyi. Neyi antu amakwawu diwu adiña neyi Mosi adi kuhila nikufuntisha katama nakatama, ilaña Mosi dicheliliyi wanyi. Wahilileña swayi wanyi. Wamulembeleleli Yehova kulonda yamuuki Miriyami. (Kuch. 12:1-13) Chumanyi chaletesheli Mosi yeli mwenimu?

9-10. (a) Chumanyi chamudizishiliwu Mosi kudi Yehova? (b) Nyitu yayisaka niakulumpi anateli kudizilaku chumanyi kudi Mosi?

⁹ Mosi wetejeli kumudizisha kudi Yehova. Hadi yaaka 40 yahitilihu, hampinji yadiñayi nakushakama muchipañu muEjipitu, Mosi wadiña wadizoza wanyi. Wadiña nakuhila swayi chakwila wajahili iyala wumu wamweniyi nindi waluwañesheli. Mosi watoñojokeli nindi Yehova watiyili kuwaha nachuma chakoñeliyi. Hadi yaaka 40, Yehova wamudizishili Mosi kwikala wahamuka nawa wadizoza hakwila nawu yalomboli aIsarela. Nawa hakwila nawu yekali wadizoza, wateleleli kwikala wawunda, wamwovu nawa wadikehesha. Wadizili kwikala naniyi yilwilu nawa wekalili nlomboli wamuwahi.—Kwid. 2:11, 12; Yil. 7:21-30, 36.

¹⁰ Nyitu yayisaka niakulumpi atela kumwimbujola Mosi. Neyi anakuyilemesha wanyi, bayi mutiya kutamaku. Dizozenu nawa itejenu yiluwa yenu. (Mukwa. 7:9, 20) Londelenuña wulomboli waYehova hakumanisha kukala. Mpinji yejima akulenuña mukuwunda. (Yish. 15:1) Nyitu yayisaka niakulumpi neyi akulaña mukuwunda akumutiyishaña Yehova kuwaha, akuleta kuwunda nawa akuletesha antu amakwawu kwikala adizoza.

11-13. Chumanyi cheliliwu aHeberu asatu chitwatela kwimbujola?

¹¹ Neyi anakuyikabisha: Kufuma tuhu kunyima, anyuuli jawantu anatwalekihu kukabisha antu jaYehova. Anateli kututwambila nawu tunakoñi ‘yuma yatama,’ ilaña muloña waweni wudi wakwila nawu ‘twovwahilaña Nzambi, bayi antuku.’ (Yil. 5:29) Anateli kutusawula, kutukasa hela kutuyandisha. Yehova wukutukwasha kubula kufuntisha katama nakatama hela chakwila anakutuvuloka nawa tukutwalekahu kwikala awunda.

¹² Shinshikenu chuma cheliliwu aHeberu asatu adiña muwunkoli, Hananiya, Mishayeli niAzariya. * Mwanta wakuBabiloni wayilejeli nindi atela kufukamina mukishi weneni wawuru. Amulumbulwililili mwanta mumesu awunda chuma chaletesha abuli kufukamina  mukishi. Atwalekelihu kumwovwahila Nzambi hela chakwila mwanta wayichiinishili nindi wukuyocha muluteñi lwakesi. Yehova wayipulwishili awa amayala ilaña hiyelukili nawu Nzambi wukuyipulwisha muniyi njilaku. Dichi, etejeli chuma chidi chejima chadi kwitejayi Yehova kumwekana. (Dan. 3:1, 8-28) Amwekesheli nawu antu adizoza ekala ahamuka, kwosi mwanta, kuchiinisha nikubabesha kunateli kutukañesha kumwinka Yehova kalemesha.—Kwid. 20:4, 5.

¹³ Tunateli kuyimbujola ñahi aHeberu asatu, neyi anatweseki nawu tufumpi kashinshi ketu kudi Nzambi? Twekala adizoza nawa twakuhwelela netu Yehova wukutukiña. (Mas. 118:6, 7) Antu atwinkaña nyiloña twayakulaña mumesu awunda nawa nakalemesha. (1 Pet. 3:15) Nawa twakaanaña kwila chuma chidi chejima chinateli kuluwañesha wubwambu wetu naTata yetu.

14-15. (a) Chumanyi chinateli kumwekana neyi tunaneñi? (b) Kwesekeja na Isaya 53:7, 10, tukuhosheladi netu Yesu himuntu wumu itwatela kwimbujola wamwekesheli kudizoza hampinji yaneñeliyi?

¹⁴ Neyi tunaneñi: Kudi yuma yayivulu yatuneñeshaña wejima wetu. Hadaha twakamahu dehi hampinji yitwadiña kanda tusoneki kweseka kushikola hela hampinji yitwazatileña mudimu watwinkeliwu kumudimu. Indi kwiji tunateli kwakama muloña wakutoñojoka hanjila munateli kutuukilawu neyi tunakati. Chekalaña chakala kwikala adizoza neyi kudi yuma yinakutwakamisha. Mpinji yikwawu niyuma yabulaña kutuneñesha yinateli kutachika kutuneñesha. Tunateli kuyihosha akwetu mazu atama hela kuyila chatama. Neyi mwaneñahu dehi, shinshikenu chuma cheliliyi Yesu.

¹⁵ Chikwashalili tukweji twantesha nakufwa, Yesu wadineñeli chikupu. Welukili nindi wukukabakana nankashi nawa akumujaha. (Yow. 3:14, 15; Ñal. 3:13) Tukweji twahitilihu henohu kanda yafwi, wahosheli nindi waneñeli nankashi. (Luka 12:50) Nawa chikwashalili mafuku antesha nakufwa, Yesu wahosheli nindi: “Innakudishona.” Yesu walombeli nindi: “Tata, ñamwini kuyinu mpinji. Hela chochu, iyi diyi mpinji yinenjililili. Tata, lemeshaku ijina deyi.” Awa mazu anakumwekesha nawu wadiña wadizoza nawa wamwovwahilili Nzambi. (Yow. 12:27, 28) Chashikili mpinji yindi, Yesu wahamukili nakudihana yomweni kudi ayilumbu jaNzambi, amujahili munjila yatama nawa yakasawuntu. Hela chakwila waneñeli nikukabakana, Yesu wadizozeli nakwila nkeñelu yaNzambi. Chakadi nikujina, tunateli kuhosha netu Yesu wadizozeli hampinji yaneñeliyi, dichi twatela kumwimbujola.—Tañenu Isaya 53:7, 10.

16-17. (a) Chumanyi cheliliwu amabwambu jaYesu chadi kuleñela yabuli kudizoza? (b) Tunateli kumwimbujola ñahi Yesu?

¹⁶ Hawufuku wakukumishaku ahanu heseki, amabwambu jaYesu elili chuma chadi kumuleñela yabuli kudizoza. Fwikijenu chaneñeliyi Yesu hawuna wufuku. Komana wadi kutwalekahu kwikala washinshika kushika nikukufwa? Neyi wabulili kwikala washinshika, chiña kwosi muntu niwumu wadi kwikala nakuchiñeja kwakwikala nawumi. (Rom. 5:18, 19) Chuma chasweja kulema, yilwilu yindi yadi kulemesha hela kusawula ijina daTata yindi. (Yoba 2:4) Hampinji yadiileñayi kuda kwakukumishaku nawapostolu indi, nsañu yahanjekeleñawu yaleñeleli atachiki ‘kuditadikisha’ “mulwawu kulonda eluki wadiña muneni chikupu hakachi kawu.” Yesu wayikwashili amabwambu jindi kapampa kakavulu haniyi nsañu, kushilahu nihadina ifuku namelela. Yesu wahilili wanyi  ilaña wadiwunjikili. Wayikwashili mumesu awunda nakuyilumbulwila yilwilu yateleleliwu kwikala nayu. Kuhiñahu, wayilumbulwilili cheñi chilwilu chateleliwu kwikala nachu.—Luka 22:24-28; Yow. 13:1-5, 12-15.

¹⁷ Mwadi kwila ñahi neyi chuma chamuchidiwu chayimwekeneni? Twatela kumwimbujola Yesu nikutwalekahu kwikala awunda hela chakwila tunaneñi. Ovwahilenuña lushimbi lwaYehova lwakwila nawu “ditiyililenuña wumu namukwawu.” (Kol. 3:13) Tukwovwahila ilu lushimbi neyi twiluka netu wejima wetu twahoshaña nikwila yuma yaneñeshaña akwetu. (Yish. 12:18; Yak. 3:2, 5) Nawa mpinji yejima yihamekenuña akwenu hayilwilu yawu yayiwahi.—Efwes. 4:29.

18. Yehova wakwashaña ñahi antu adizoza kufuukulahu chiwahi, hanu dinu chumanyi chatela kwilawu?

¹⁸ Tukufuukulañahu chiwahi. Neyi twikala adizoza, Yehova nateli kutukwasha kufuukulahu chiwahi hayuma yitunakukeña kwila muchihandilu. Wakana nindi wukutiyaña “mwakeñawu antu adizoza.” (Mas. 10:17) Nawa hakukumina hohu dakutiya mutwamulombañaku. Bayibolu yakana nawu: “Antu adizoza wukuyilombola muwuñaji; antu adizoza wukuyileja chachiwahi njila yindi.” (Mas. 25:9) Yehova watulombolaña kuzatisha Bayibolu, nyikanda * nimaprogilamu aloñeshañawu kudi “nduñu wamaana nikashinshi.” (Mat. 24:45-47) Twatela kudizoza nikutambwila wukwashu kudi Yehova kuhitila mukudiza yuma yatuloñeshelañayi nikuzatisha yuma yitunakutaña.

19-21. Chiluwanyi chakoñeliyi Mosi kuKadeshi, nawa chumanyi chitunateli kudizilaku?

¹⁹ Tukutondolwelaña kukoña yiluwa. Toñojokenu cheñi hadi Mosi. Hadi yaaka yayivulu, watwalekelihu kwikala wadizoza nawa wamutiyishileña Yehova kuwaha. Dichi hakukuma kwayaaka 40 yendeliwu muchinkalampata, Mosi wakañenyi kudizoza. Hanyima yakwila muhelindi hadaha wamupulwishili muEjipitu nafwi nawa anamujiiki dehi kuKadeshi, aIsarela atachikili cheñi kutoba nawu ayihembeleña chiwahi wanyi. Haniyi mpinji ‘amutobeleli Mosi’ muloña wakubula  menji. Antu atachikili kumutobela Mosi hela chakwila Yehova wamuzatishili kukoña yihayamisha nikuyilombola hadi mpinji yayilehi. Bayi neyi adiña nakutoba muloña wakubula menji hohuku, ilaña adiña cheñi nakumutobela Mosi neyi kwiji diyi waletesheli afwi mpwila.—Kuch. 20:1-5, 9-11.

²⁰ Mosi wahilili nawa wakañenyi kutwalekahu kwikala wadizoza. Chatela yahoshi kwilola neyi chamulejeliwu kudi Yehova, Mosi watachikili kuyihoshola antu nawa wamwekesheli neyi kwiji yena diyi wukukoña chihayamisha. Kuhiñahu, weteli kwilola kayedi nawa menji atachikili kwidika. Muloña wakudivwimba nikuzuwa wakoñeli chiluwa cheneni. (Mas. 106:32, 33) Mosi amwitejeli wanyi kwiñila Mwituña daChikaninu muloña wakubula kudizoza.—Kuch. 20:12.

²¹ Ichi chakutalilahu chinatudizishi yuma yalema. Chatachi, twatela kutwalekahu kwikala adizoza. Neyi tukañanya kutwalekahu kwikala adizoza, tunateli kutachika kudivwimba nawa tunateli kukoña chuma chatama hela kwikala nanhoshelu yatama. Chamuchiyedi, chineñi chinateli kutuzeyesha, dichi twatela kwikala adizoza hela chakwila yuma yinakali ñahi.

22-23. (a) Muloñadi chitwatela kutwalekelahu kwikala adizoza? (b) Mazu ekala haZefwaniya 2:3 amwekeshañadi?

²² Tukwikala akiñewa. Katataka Yehova yafumishi antu atama ahanu heseki nawa antu adizoza hohu diwu akashalahu. Kuhiñahu, ahanu heseki hakekala kuwunda. (Mas. 37:10, 11) Komana mwakekala hakachi kanawa antu adizoza? Munateli kwikala hakachi kawu neyi mwiteja mutambi waYehova wasonekeliyi kaprofwetu Zefwaniya.—Tañenu Zefwaniya 2:3.

²³ Muloñadi Zefwaniya 2:3 chiyahoshela nawu: “Wamba kela akayibatamisha”? Awa mazu atalisha wanyi mukwila nawu Yehova wakakañanya kukiña antu amutiyishaña kuwaha nawa akeñayi. Ilaña anakumwekesha nawu twatela kwilahu chuma chimu hakwila akatukiñi. Neyi tuzata nañovu nawa twikala adizoza nikumutiyisha Yehova kuwaha, tukapuluka “mwifuku dakazuwayi Yehova.”