1. Indi aYinsahu jaYehova asatu anashimuniwu muyinu paragilafu atwalekelihu ñahi kwikala ashinshika kudi Yehova?

FWIKIJENU yuma yayimwekeneni awa aYinsahu jaYehova asatu. (1) Kansi wamumbanda wudi kushikola, dichi ifuku dimu ntañishi yayileja ejima wawu kuya nakwanakana ifuku dakunooka. Iwu kansi wamumbanda neluki nindi munidi ifuku dakunooka mwosi yuma yayiwahi yinateli kumuzañalesha Nzambi, dichi nakaani. (2) Kansi weyala wekala nansonyi nakushimwina kwitala nikwitala. Dichi hakwanuka nindi mukwawu mwatañilañawu kushikola washakamaña hetala hanakukeña kuyayi nawa iwu mukwawu wayisehaña aYinsahu jaYehova. Ilaña iwu kansi weyala nayi hanidi itala nakushimwina. (3) Iyala wazataña nañovu kukeñela chisaka chindi yuma yakeñekaña, ilaña ifuku dimu mukulumpi wamudimu hakumuleja kwila yuma yakaanishawu yikumuleñela kufumpa kashinshi kindi. Hela chakwila mudimu wunateli kumana, ilaña namuleji mukulumpi wamudimu nindi yena watela kwikala washinshika nawa nakufwila kwovwahila nshimbi muloña dichuma chakeñañayi Nzambi.—Rom. 13:1-4; Heb. 13:18.

2. Malwihwinyi itukuhanjekahu, nawa muloñadi?

² Chilwilwinyi chimunamoni mudi awa antu asatu? Wejima wawu amwekesheli kuhamuka nikashinshi. Chilwilu chabadika chamwekesheliwu, hikashinshi. Wejima wawu asatu amwekesheli kashinshi kudi Yehova. Akaanini kufumpa nshimbi jaNzambi. Kashinshi dikaletesheli abuli kufumpa nshimbi. Yehova watiyili kuwaha muloña wejima wawu amwekesheli ichi chilwilu. Ninetu twatela kumuzañaleshaña Tata yetu wamwiwulu. Dichi tuhanjekenu hanawa malwihu: Kashinshi hichumanyi? Muloñadi chitwatela kwikalila nakashinshi? Nawa tunateli kutwalekahu ñahi kuhemba kashinshi ketu muyinu mpinji yakala?

3. (a) Kashinshi hichumanyi? (b) Yakutalilahwinyi yinateli kutukwasha kwiluka mwatalisha kashinshi?

³ Ambuña aNzambi amwekeshaña ñahi kashinshi? Amwekeshaña kashinshi hakumukeña Yehova namuchima wawu wejima nawa chafumañamu, mpinji yejima elaña yuma yamutiyishaña Yehova kuwaha. Shinshikenu izu dakashinshi chadizatishawu muBayibolu. MuBayibolu, Izu dachiHeberu dakwila nawu “kashinshi” daya mukwila nawu kukola, kuwaha hela kubula ihuji. Chakutalilahu, aIsarela alambwileña nyilambu yawanyama kudi Yehova nawa Nshimbi yahosheli nawu atunyama ateleleli kwikala amawahi. * (Lev. 22:21, 22) Antu jaNzambi hiyayitejeleña kulambula kanyama wabula mwendu, itu, disu hela wakataku. Yehova wakeñeleña nindi amulambuleña kanyama wakola, wamuwahi hela wabula wufwayi. (Mal. 1:6-9) Tunateli kwiluka muloña waweni chakeñelañayi Yehova yuma yayiwahi hela yakadi wufwayi. Neyi tunakulanda chuma chidi chejima, chidi neyi mukabu, mukanda hela chozelu, hitwalandaña mukabu wakisika, mukanda watabuka hela chozelu chafwaku. Twakeñaña chuma chachiwahi, chakola hela chakadi wufwayi. Dichuma chakeñañayi Yehova kudi etu, wakeñaña nindi tumukeñi chikupu nikwikala ashinshika.

4. (a) Muloñadi muntu wabula kuwanina chinateliyi kwikala nakashinshi? b) Kwesekeja na Masamu 103:12-14, chumanyi chakeñañayi Yehova kudi etu?

⁴ Komana twatela kukunkulula netu hakwila twikali nakashinshi chiña twikala awanina? Hela chochu tunateli kutoñojoka netu twaluwañeshaña nankashi. Shinshikenu yikuma yiyedi yinateli kutukwasha kubula kutiya woma. Chatachi, Yehova hashaña maana hayiluwa yetuku. Izu dindi datulejaña nawu: “Neyi eyi Yehova wukushinshika mwaluwañawu antu, hinyi wukwimana, eyi Mwanta.” (Mas. 130:3) Weluka nindi twawanina wanyi, tudi akwanshidi ilaña watwanakenaña chikupu. (Mas. 86:5) Chamuchiyedi, Yehova weluka kuzeyazeya kwetu nawa hakeñaña nindi twileña yuma yitukubula kutwesha kwilaku. (Tañenu Masamu 103:12-14.) Hanu dinu, tunateli kwikala ñahi akadi ihuji kumesu aNzambi?

5. Muloñadi ambuña aNzambi chatela kwikalilawu nakukeña hakwila ekali nakashinshi?

⁵ Kukeña dichuma chinateli kuyikwasha ambuña aYehova kwikala nakashinshi. Twatela kumukeña nikumwovwahila Tata yetu wamwiwulu namuchima wetu wejima. Tunateli kumwekesha netu tudi nakashinshi neyi tutwalekahu kwikala naniku kukeña hela chakwila tudi mukweseka. (1 Kushi. 28:9; Mat. 22:37) Shinshikenu cheñi hadi aYinsahu asatu itwatena hakusambila. Chumanyi chaletesheli abuli kufumpa nshimbi? Komana ona kansi wamumbanda wakeñeleña wanyi kuhema hashikola, indi kwiji ona kansi weyala wakeñeleña kuya hanidi itala kulonda amusawuli, tahindi ona iyala wakeñeleña nindi amuhañi mudimu? Inehi. Ilaña eluka nawu Yehova wukwetu nshimbi jaloña nawa asha muchima hayuma yinateli kumuzañalesha Tata yawu wamwiwulu. Muloña wakwila amukeña, neyi anakufuukula asambilaña kutoñojoka hayuma yinateli kumutiyisha Nzambi kuwaha. Muniyi njila amwekeshaña nawu adi nakashinshi.

6. (a) Muloñadi chimwatela kwikalila nakashinshi? (b) Adama naEva akañenyi ñahi kumwekesha kashinshi?

⁶ Kashinshi kalemenadi kudi wejima wetu? Mwatela kwikala nakashinshi muloña Satana wamwinkaña Yehova nyiloña nawa  ninenu wayinkaña nyiloña. Iwu kañelu wadikañili wadilishili yomweni kwikala Satana hela “Mukwakudimbulula” kunyima mwitempa daEdeni. Watamishili ijina daYehova nakumutwambila nindi Nzambi watama, wadikeña yomweni nawa nindi hiNyuuli wabula kushinshika. Chawushona, aAdama naEva ayili kukabadi kaSatana, adikañili naYehova. (Kutach. 3:1-6) Adiña nakukooleka kwakukolesha wubwambu wawu naYehova muEdeni. Ilaña chelili Satana yayiluwañeshi, kukeña kwawu kwaluwankeni nawa kwamanini. Antu atachikili kudihula nawu: Kwakekalahu muntu wukatwalekahu kwikala washinshika kudi Yehova Nzambi muloña wakumukeña? Hela nawu, komana antu anateli kwikala ashinshika? Ilu lwihu lwenjili hansañu yaYoba.

7. Neyi chinakumwekesha Yoba 1:8-11, Yehova wahosheli nindidi hakashinshi kaYoba, nawa Satana niyena wahosheli nindidi?

⁷ Yoba wadiñaku hampinji yadiña aIsarela muEjipitu. Kwosi muntu wadiña washinshika neyi yenaku. Wadiña wawanina wanyi neyi chitwekala ninetu. Waluwañesheleña. Hela chochu, Yehova wamukeñeli Yoba muloña wakashinshi kindi. Chinamwekani neyi Satana wadiña wahosha dehi mazu akasawuntu akwila nawu kwosi muntu wunateli kwikala washinshika kudi Yehova. Dichi Yehova wamulejeli Satana nindi Yoba washinshika. Yoba wamwekesheli nindi Satana watwambaña. Satana wamwilili Yehova nindi amwiteji yeseki kashinshi kaYoba. Yehova wamukuhweleleli ibwambu dindi Yoba. Wamwitejeli Satana kulonda yamweseki Yoba.—Tañenu Yoba 1:8-11.

8. Satana wamulukukili ñahi Yoba?

 ⁸ Satana himuntu watama nawa himukwakujaha antu. Wamukisilili Yoba yuma yindi yejima, wamujahilili añamba jindi nikutamisha ijina dindi. Walukukili chisaka chaYoba, wamujahilili anyanindi 10. Kuhiñahu wamukatishili Yoba namahuti akata mujimba wejima, kufuma kumadatilu kushika nikumutu. Ñoda Yoba waneñeli nawa wamulejeli nfumwindi nindi yamutuki Nzambi kulonda yadifwili kwindi. Yoba yomwenindi wakeñeleña nindi yafwi, ilaña watwalekelihu kuhemba kashinshi kindi. Dichi Satana wesekeli njila yikwawu yakumwesekelamu. Wazatishili amayala asatu adiña amabwambu jaYoba. Awa amayala amuhempwili Yoba hadi mafuku antesha, ilaña amukundejeli wanyi. Chatela amukundeji ilaña amwinkeli nyiloña. Ahosheli nawu Nzambi diyi wamuleteleleña kukala nawa hashili maana hakashinshi kindiku. Ahosheli cheñi nawu Yoba wadiña muntu watama dimuloña waletesheli amubabeshi.—Yoba 1:13-22; 2:7-11; 15:4, 5; 22:3-6; 25:4-6.

9. Yoba wakaanini kwiladi hampinji yamwesekeliwu?

⁹ Yoba welili ñahi naniyi yihuñu? Wadiña wawanina wanyi. Wayizuwilili ana akwakumukundeja akutwamba nawa wahosheli yuma yenjili nakuditoñeshayi nindi waluwañesheli. Wadiyiñishili yomweni nindi waloña kubadika Nzambi. (Yoba 6:3; 13:4, 5; 32:2; 34:5) Hela chochu, nihampinji yakatiliyi nankashi, Yoba hamufutaleleli Yehova Nzambiku. Wakaanini makudi ahosheleñawu ana amabwambu jindi akutwamba. Wahosheli nindi: “Ami kuyiyiñishenu chinjila, hinamba kafumisha kashinshi kamuku, nichinamba kafwa.” (Yoba 27:5) Awa mazu anakumwekesha nawu Yoba wafwilileña kuhemba kashinshi kindi hela kukumwekana kukala kwamuchidinyi. Yoba wakaanini kufumpa kashinshi kindi, ninetu dichitwatela kwila.

10. Nsañu yahosheliyi Satana hadi Yoba yinayikundami ñahi ninenu?

¹⁰ Nsañu yahosheliyi Satana hadi Yoba yinatukundami ñahi ninetu? Satana wahoshaña nindi mwamukeña wanyi Yehova Nzambi, munateli kuleka kumukalakela kulonda mudipulwishi nawa nindi kashinshi kenu kakutwamba. (Yoba 2:4, 5; Chim. 12:10) Awa mazu ayitiyishaña ñahi? Ayitiyishaña kutama, netu? Hela chochu, ilukenu nenu: Yehova wayikuhwelela dichayinkelayi nyidimu yayivulu. Yehova wamwitejaña Satana kweseka kashinshi kenu. Yehova wayikuhwelela chikupu nindi munateli kutwalekahu kwikala ashinshika nawa nateli kuyikwasha kumwekesha nawu Satana hisakutwamba. Wakana nindi wukuyikwashaña kwikala ashinshika. (Heb. 13:6) Hikukooleka chikupu kuyikuhwelela kudi Mwanta wakuleña kwejima! Munamoni kashinshi chikalemena? Katukwashaña kwiluka netu Satana hisakutwamba, katukwashaña kuhakwilaku ijina dadiwahi daTata yetu nichiyuulu chindi. Tunateli kutwalekahu ñahi kwikala nakashinshi?

11. Yumanyi yitunateli kudizila kudi Yoba?

¹¹ Munanu mafuku “akukuminina,” Satana nasweji kulukuka antu jaNzambi. (2 Tim. 3:1) Tunateli kutwalekahu ñahi kwikala ashinshika muyinu mpinji yakala? Tunateli cheñi kudizila yuma yayivulu kudi Yoba. Yoba wadiña dehi washinshika nihampinji yadiñayi kanda amweseki. Shinshikenu yuma yisatu yitunateli kudizila kudi Yoba yikutukwasha kutwalekahu kwikala ashinshika.

12. (a) Neyi chinashimuniwu ha Yoba 26:7, 8, 14, yumanyi yaletesheli Yoba yamutiyeña Yehova woma nikumulemesha? (b) Yumanyi yinateli kutukwasha kumutiya Nzambi woma?

¹² Yoba wamutiyileña Yehova woma nawa chumichi dichaletesheli yamukeñi  nankashi. Yoba watoñojokeleña hayileñaleña yaYehova yakuhayamisha. (Tañenu Yoba 26:7, 8, 14.) Wahayamini chatoñojokeliyi heseki, iwulu, mavu nikudidima, ilaña wetejeli nindi welukili wanyi yuma yejima. Walemesheli cheñi mazu aYehova. Yoba wahosheli nindi: “Natudekaña mazu amukanwa kindi.” (Yoba 23:12) Yoba wamulemesheli nikumutiya Yehova woma muloña wadiña wamukeña. Wamukeñeli Tata yindi nawa wakeñeleña kumutiyisha kuwaha. Chafuminimu, Yoba wadikasili mumuchima windi kutwalekahu kwikala washinshika. Twatela kwila neyi cheliliyi Yoba. Tweluka yuma yayivulu yakuhayamisha hayileñaleña kubadika antu amumafuku aYoba. Nawa tudi naBayibolu yonenawu yinateli kutukwasha kwiluka chekalayi Yehova. Yuma yitwadizaña yinateli kutukwasha kumutiya Nzambi woma. Kumutiya Yehova woma nikumulemesha kukutuleñela kumukeña, kumwovwahila nikufwila kutwalekahu kwikala ashinshika.—Yoba 28:28.

13-14. (a) Neyi chinashimuni Yoba 31:1, Yoba wamwekesheli ñahi nindi wadiña wovwahila? (b) Tunateli kumwimbujola ñahi Yoba?

¹³ Kwovwahila kwamukwashili Yoba kutwalekahu kwikala nakashinshi. Yoba welukili nindi watela kumwovwahila Yehova hakwila yekali nakashinshi. Kwovwahila kwatukwashaña kutwalekahu kwikala nakashinshi. Yoba wazatili nañovu hakwila nawu yatwalekihu kumwovwahila Nzambi mafuku ejima. Chakutalilahu, wakaanini kutala ambanda namesu akufwila. (Tañenu Yoba 31:1.) Chineli wadiña wasumbula welukili nindi chaluwa kukenkamina mumbanda wabula kwikala ñodindi. Makonu tunakushakama mukaayi munenzali yilwilu yawuvumbi. Komana tunateli kukaana kutala muntu wunabuli kwikala mwinikwetu namesu akumufwila neyi cheliliyi Yoba? Komana tunateli kutondolwela kutala nyevulu yatama hela yanzekesi? (Mat. 5:28) Neyi tudiyuulaña mafuku ejima, tukutwalekahu kuhemba kashinshi ketu.

 ¹⁴ Yoba wamwovwahilili cheñi Yehova kuhitila mukumona yuma yakumujimba munjila yatelela. Yoba welukili nindi neyi yakuhwelela mumaheta indi, wukukoña nshidi yeneni nawa anateli kumubabesha. (Yoba 31:24, 25, 28) Makonu tunakushakama mukaayi munavuli yuma yakumujimba. Neyi tumonaña mali nimaheta munjila yayiwahi neyi chatulejaña Bayibolu, tukutwalekahu kwikala nakashinshi.—Yish. 30:8, 9; Mat. 6:19-21.

15. (a) Kuchiñejanyi kwamukwashili Yoba kutwalekahu kwikala nakashinshi? (b) Kutoñojoka hankisu jahanañayi Yehova kunateli kutukwasha ñahi?

¹⁵ Kutoñojoka hankisu yakamukiswilawu kudi Nzambi kwamukwashili Yoba kutwalekahu kwikala nakashinshi. Yoba wakuhweleleli nindi Nzambi welukili nindi wadiña washinshika. (Yoba 31:6) Hela chakwila wahitileña muyihuñu, Yoba welukili chikupu nindi Yehova wakamukiswila. Ichi chikuhwelelu chamukwashili kutwalekahu kuhemba kashinshi kindi. Yehova watiyili kuwaha nakashinshi kaYoba, dichi Wamukiswilili chikupu henohu kanda yekali wawanina. (Yoba 42:12-17; Yak. 5:11) Yoba wakatambwila cheñi nkisu jabadika kumbidi. Komana munakuhweleli chikupu nenu Yehova wakayikiswila hakashinshi kenu? Nzambi yetu wahimpa wanyi. (Mal. 3:6) Neyi twiluka netu walemesha kashinshi ketu, tukutwalekahu kuchiñeja.—1 Tesa. 5:8, 9.

16. Chumanyi chitwatela kufwila kwila?

¹⁶ Dichi, dikasenu mumuchima kulonda mutwalekihu kwikala ashinshika. Mpinji yikwawu munateli kutoñojoka nenu kwosi muntu wunakutwalekahu kwikala nakashinshi, ilaña mwatela kwanukaña nenu himudi nkawenuku. Mukwikala hakachi kawantu amavulu ashinshika anatwalekihu kwikala nakashinshi mukaayi kejima. Mukekala cheñi hakachi kawamayala niambanda adi nachikuhwelelu atwalekelihu kuhemba kashinshi kawu hela chakwila ayichiniishileña nawu akuyijaha. (Heb. 11:36-38; 12:1) Wejima wetu tudikasenu mumuchima kulonda tutwalekihu kuhemba kashinshi ketu neyi chahosheliyi Yoba nindi: “Hinamba kafumisha kashinshi kamuku.” Nawa tutwalekihu kwikala ashinshika kudi Yehova haya nyaaka!