1, 2. (a) Chumanyi chatama chamwililiwu Naboti nianyanindi awamayala? (b) Tukuhanjekadi muchinu chibaaba?

FWIKIJENU Iyala anamusompeshi nawu anakumujaha. Antaña nimabwambu jindi anahayami, muloña antu amukunkulwayi anahani wunsahu wakutwamba wunaleteshi amujahi. Antu amakwawu anatiyi kutama hakumona antu akadi muloña anakukeña kuyijaha. Bayi neyi iyi nsañu yakulumbisha hohuku. Ichi chuma dichamumwekeneni kambuña aYehova washinshika Naboti, wadiñaku hampinji yayuulileñayi Mwanta Ahabi muIsarela.—1 Anya. 21:11-13; 2 Anya. 9:26.

² Muchinu chibaaba, tukuhanjeka hayuma yamumwekeneni Naboti nihadi eluda washinshika waluwañesheli wadiña muchipompelu chawakwaKristu amumafuku awapostolu. Chitukuhanjeka hadi awa antu ashimunawu muBayibolu, tukudiza netu twatela kudizoza hakwila nawu tumoneña yuma neyi chayimonañayi Yehova. Tukudiza cheñi kwikala namuchima wakwanakena neyi anatwili chatama muchipompelu chichikutukwasha kumona yuma neyi chayimonañayi Yehova.

3, 4. Naboti wadiña muntu wamuchidinyi, nawa wakaaninidi kumulandisha Mwanta Ahabi itempa danyivinyu?

³ Naboti wadiña washinshika kudi Yehova henohu aIsarela anakulondela yuma yatama yelileñayi Mwanta Ahabi niñodidi Mwadi Yezebeli watama. Ana akwakudifukula aBayali amwakamineña wanyi Yehova hela kulondela nshimbi jindi. Ilaña Naboti, yena walemesheli wubwambu windi naYehova kubadika wumi windi.

⁴ Tañenu 1 Anyanta 21:1-3. Naboti wakaanini kulandisha itempa dindi danyivinyu kudi Ahabi hela kwiteja kumwinkelamu itempa dacheñi. Muloñadi? Wahosheli mumesu awunda nindi: “Chinjila kumesu aYehova ami kukwinka wuswana wawankakulula jami.” Naboti wakaanini muloña Yehova wenkeli muza wawaIsarela lushimbi lwakaaninshileña kulandisha wuswana wamuchidi. (Lev. 25:23; Kuchi. 36:7) Iyi nsañu yinamwekeshi chikupu nawu Naboti wamweneña yuma neyi chayimonañayi Yehova.

5. Yezebeli welilidi hakwila nawu Naboti amujahi?

⁵ Chawushona, Naboti chakaaniniyi kulandisha, Mwanta Ahabi niñodidi elili yuma yatama. Hakwila yamutambwili nfumwindi itempa danyivinyu, Yezebeli wamukasilili Naboti kafuta kulonda amujahi yena nianyanindi. Yehova wadi kwiladi hanichi chuma?

6, 7. Yehova wamwekesheli ñahi nindi wakeña wuñaji, nawa antaña niamabwambu jaNaboti atiyili ñahi?

⁶ Yehova wamutemesheli Elija swayi-swayi kuya nakudimona naAhabi. Elija wamulejeli Ahabi nindi himbanji nawa ikombi. Yehova wasompeli ñahi iwu muloña? Yuma yamumwekeneni Naboti nianyanindi awamayala, diyadikumumwekena Ahabi, ñodindi nianyanawu awamayala.—1 Anya. 21:17-25.

⁷ Hela chakwila antaña niamabwambu jaNaboti aneñeli nachuma chatama chakoñeliyi Ahabi, ilaña atiyili kuwaha chelukiliwu nawu Yehova wamweneña yuma yatama yamwekeneña nichazatililihu mukunyakashana. Hela chochu, chahimpili yuma ateleli kudizoza nikumukuhwelela Yehova.

8. Ahabi welili ñahi chatiyiliyi wunsompeshi waYehova, nawa chumanyi chafuminimu?

⁸ Ahabi chatiyiliyi wusompeshi waYehova, “hakutabola mahinindi, hakuvwala chikeleyi hamujimba windi, hakushakama nanzala, hakukama hachikeleyi, hakwenda nakudiwoña.” Ahabi wadizozeli! Chumanyi chafuminimu chelili yadizozi? Yehova wamulejeli Elija nindi: “Ichi chanadizoziyi dehi kumesu ami, hinukumuletela yatama hamafuku induku; ilaña hamafuku amwanindi dihu hinakaletela mutaña windi yatama.” (1 Anya. 21:27-29; 2 Anya. 10:10, 11, 17) Yehova, ‘washinshikaña nyichima yawantu,’ wamutiyilili Ahabi luwi.—Yish. 17:3.

9. Kudizoza kwadi kuyikwasha ñahi antaña niamabwambu jaNaboti?

⁹ Antu elukili nshidi yakoñeliyi Ahabi atiyili ñahi nachamutiyililiwu luwi? Chikuhwelelu chawantaña niamabwambu jaNaboti chatela chadiña mukweseka muloña wayuma yamwekeneña neyi yinahimpiki. Neyi dimu, kudizoza kwadi kuyikwasha kutwalekahu kudifukula  kudi Yehova, nikukuhwelela nawu Nzambi yawu welaña mwaloña. (Tañenu Kuhituluka 32:3, 4.) Naboti, anyanindi awamayala niantaña jindi akatiya kuwaha kumona Yehova nasañuli antu aloña. (Yoba 14:14, 15; Yow. 5:28, 29) Cheñi, muntu wadizoza weluka nindi “Nzambi wamba kashikija nyidimu yejima kukusompesha, hamu nayuma yakujinda yejima, hela yayiwahi, hela yatama.” (Mukwa. 12:14) Neyi Yehova nakutusompesha, washinshikaña nihayuma yitunabuli kwiluka. Dichi, kudizoza kwakiñaña muntu kuspiritu.

10, 11. (a) Yumanyi yinateli kweseka kashinshi ketu? (b) Kudizoza kunateli kutukwasha ñahi?

¹⁰ Mukwila ñahi neyi aeluda ela yuma yimunabuli kwiluka hela yimunabuli kukeña? Chakutalilahu, mukwila ñahi neyi ayitambula kukooleka hela muntu imwakeña amutambula kukooleka muchipompelu? Indi neyi mwinikwenu, mwanenu hela ibwambu denu anamuhañi muchipompelu nawa munamoni nenu anafuukuli chatama? Indi neyi chakwila muntu navulumuni ilaña anamuhañi wanyi muchipompelu? Yuma yamuchidiwu yinateli kutuletesha tubuli kumukuhwelela  Yehova nintanjikilu yakuloñesha kwindi. Kudizoza kunateli kuyikwasha ñahi neyi chuma chamuchidiwu chinayimwekeni? Tushinshikenu hayikuma yiyedi.

¹¹ Chatachi, kudizoza kukutukwasha kwiluka netu tuneluki wanyi nsañu yejima. Hela chakwila tuneluki nsañu yejima, ilaña Yehova hohu diyi welukaña yuma yidi mumuchima wamuntu. (1 Sam. 16:7) Neyi twiluka chumichi, chikutukwasha kwikala adizoza, kwiluka hakukumina nikumona yuma munjila yoloka. Chamuchiyedi, kudizoza kukutukwasha cheñi kutiyilila nikudiwunjika hitunakuhembelela Yehova kwolola yuma. Muntu wamaana wasonekeli nindi: “Amwakamaña Yehova . . . , akamona kuwaha . . . , ilaña mukwakwila yatama hakamona kuwahaku, hakamona mafuku amavuluku.” (Mukwa. 8:12, 13) Dichi, kudizoza kukutukwasha kushilahu tuhu niantu amakwawu.—Tañenu 1 Petulu 5:5.

12. Tukuhanjeka hansañwinyi, nawa muloñadi?

¹² AkwaKristu amumafuku awapostolu amuAntiyoki yakuSiriya adiña mukweseka, ateleleli kudizoza nikwikala namuchima wakwanakena. Tuhanjekenu haniyi nsañu kulonda tumoni chiyinateli kutukwasha kwikala namuchima wakwanakena nawa twiluki chikupu kwanakena chikwendelaña hamu nawuñaji waYehova.

13, 14. Kapostolu Petulu wadiña nakukolekanyi, nawa wamwekesheli ñahi kuhamuka?

¹³ Kapostolu Petulu wadiña eluda elukiliwu nankashi muchipompelu chawakwaKristu. Wadiña ibwambu daYesu nawa amwinkeli mudimu weneni chikupu. (Mat. 16:19) Chakutalilahu, mu 36 C.E., Petulu wamushimwinini Konelisu niamwitala dindi nsañu yayiwahi. Iyi mpinji yadiña yalema muloña Konelisu wadiña kaJentili wabula kwalama. Chelili Konelisu niamwitala dindi atambwili spiritu yajila, Petulu wahosheli nindi: “Awa antu anatambuli spiritu yajila neyi chochitwayitambwili etu, dichi, hinyi wunateli kuyikañesha kupapatishewa mumenji?”—Yil. 10:47.

¹⁴ Mu 49 C.E., apostolu nawaeluda amuYerusalema apompeli hamu nakuhanjeka neyi chakwila aJentili abalumukileña nakwikala akwaKristu atela kuyalamisha hela nehi. Hakuna kupompa, Petulu walejeli amanakwindi hatooka nindi, aJentili abula kwalama atambwilili chawana chaspiritu yajila. Yuma yamweniyi Petulu yakwashili izanvu dalombolaña damumafuku awapostolu kufuukula chiwahi. (Yil. 15:6-11, 13, 14, 28, 29) A Yudeya niaJentili ekalili akwaKristu atiyili kuwaha chelili Petulu yashimuni wunsahu walala. Ateleleli kumukuhwelela iyala wamuchidona wapama kuspiritu!—Heb. 13:7.

15. Chiluwanyi chakoñeliyi Petulu muAntiyoki yakuSiriya? (Talenu mwevulu wakutachikilahu.)

¹⁵ Chimwahitili mpinji kufuma hapompeliwu mu 49 C.E., Petulu wayili nakuhempula kuAntiyonki yakuSiriya. Hadiñayi kuna, wadiña nakuhanjeka nawamakwindi aJentili. Chakadi nikujina, adizilili kuyuma yelukiliyi niyamweniyi Petulu. Hela chochu, atela ahayamini chikupu chelili Petulu yaleki kuda nawu. A Yudeya amakwawu muchipompelu, kushilahu niBaranaba, ayiluwañesheli kudi Petulu kwila mwomumu. Chumanyi chaletesheli eluda mukwaKristu wapama kukoña chiluwa chamuchidiwu chadi  kwambula chipompelu? Chumanyi chitunateli kudizila kuchiluwa chakoñeliyi Petulu chinateli kutukwasha neyi yuma yinahoshiyi hela yineliyi eluda yinatukatishi kumuchima?

16. Petulu amufumbili ñahi, nawa tunateli kutoñojoka netudi?

¹⁶ Tañenu Añalija 2:11-14. Petulu wafwili mumuhetu wakutiya antu woma. (Yish. 29:25) Hela chakwila Petulu welukili nindi Yehova hekala nachaambuku, watiyili woma chahosheleña aYudeya alama adiña muchipompelu chamuYerusalema. Kapostolu Pawulu wadiñaku hakuna kubulakana muYerusalema mu 49 C.E., wamulejeli hatooka Petulu muAntiyoki nindi wamwekesheli yilwilu yawunfwikiji. (Yil. 15:12; Ñal. 2:13) AkwaKristu aJentili ateneneñayi Petulu atiyili ñahi nayuma yeliliyi? Komana ateleleli kutuntuka? Komana Petulu adi kumutambula kukooleka kwindi muloña wachiluwa chakoñeliyi?

17. Petulu wadiña nakukoolekanyi chelili Yehova yamwanakeni?

¹⁷ Petulu watiyili mwamufumbiliwu kudi Pawulu. Kwosi Nsona yashimuna nawu amutambwili kukooleka kwadiñayinaku. Muloña mukuhita kwampinji amoneneni kusoneka nyikanda yiyedi nawa yekala muBayibolu. Mumukanda windi wamuchiyedi, Petulu wamuteneni Pawulu nindi “manakwetu itwakeña.” (2 Pet. 3:15) Hela chakwila chuma cheliliyi Petulu chayineñesheli ana aJentili adiña muchina chipompelu, Yesu mutu wachipompelu watwalekelihu kumuzatisha. (Efwes. 1:22) Antu amuchina chipompelu ateleli kwimbujola Yesu niTata yindi kuhitila mukumwanakena. Tunakuhweleli kwosi watuntukili nachiluwa chamuntu wabula kuwanina.

18. Mpinjinyi yitwatela kumona yuma neyi chayimonañayi Yehova?

¹⁸ Aeluda amuchipompelu chawakwaKristu makonu awanina wanyi neyi chadiñawu amumafuku awapostolu, “muloña wejima wetu twaluwañeshaña.” (Yak. 3:2, ftn.) Iyi nsañu yaswayi kwiteja, ilaña chakalaña neyi manakwetu natwili katama. Neyi chuma chamuchidiwu chimwekana, tukumona yuma neyi chayimonañayi Yehova? Chakutalilahu, mukwila ñahi neyi eluda yahosha mazu anakumwekesha chaambu? Komana munateli kutuntuka neyi eluda yahosha mazu anayitishi kutama? Chatela mushikeni kukunkulula nenu ona manakwetu nashikihu wanyi kwikala eluda, kwila muhembelela Yesu mutu wachipompelu nehi? Komana mukuleka kutoñojoka hachiluwa chindi, nakutachika kutoñojoka hachinazatiyi nakashinshi hadi yaaka yayivulu? Neyi manakwetu wunayili chatama yatwalekahu kwikala eluda hela amwinkelahu kukooleka kukwawu, mukutiya ñahi? Neyi mumwanakena chakufuma hamuchima mukumwekesha nenu mwamonaña yuma neyi chayimonañayi Yehova.—Tañenu Matewu 6:14, 15.

19. Chumanyi chitwatela kwila?

¹⁹ Antu akeña wuñanji ahembelelaña ifuku odu Yehova dakafumishahu yuma yatama yinakuletayi Satana nikaayi kindi katama. (Isa. 65:17) Dichi, tufwilenu kumona yuma neyi chayimonañayi Yehova kuhitila mukwiluka hakukumina nikwanakena chakufuma hamuchima antu atuvulumunaña.