1. Abarahama wadiña nachikuhwelelu chamuchidinyi hadi Yehova? (Talenu mwevulu wakutachikilahu.)

“MUKWAKUSOMPESHA iseki dejima abuli kwila mwaloña?” (Kutach. 18:25) Abarahama chehwiliyi ilu lwihu, wamukuhweleli chikupu Yehova nindi wukwila mwaloña hakujilumuna Sodoma naGomora. Abarahama welukili chikupu nindi Yehova kwila ‘yajahila hamu antu aloña naatama’ nehi. Abarahama welukili chikupu nindi “chinjila.” Chimwahitili yaaka 400, Yehova wamulejeli Mosi kuhosha hadi yena nindi: “Diyi Ilola, mudimu windi walala chikupu; muloña mwatwalañayi mwejima mwawuñaji hohu; hiNzambi wakashinshi wakadi ninaha haheñelayi, waloña zwa.”—Kuhit. 31:19; 32:4.

2. Muloñadi chitukuhoshela netu Yehova welaña mwawuñanji?

² Muloñadi Abarahama chakuhweleliyi nindi Yehova welaña mwaloña mpinji yejima? Muloña Yehova wasompeshaña mwawuñaji nawa mwaloña. Mazu achiHeberu abalumunawu nawu “wuñaji” ‘nikuloña’, endelaña hamu muNsona yachiHeberu. Munjila yikwawu, hekala chaambu wanyi hakachi kawuñaji nakuloña. Chineli Yehova welaña yuma yaloña, neyi  yasompa wukusompa mwawuñanji. Cheñi, Mwizu dindi asonekamu nawu, “wakeña kuloña niwuñaji.”—Mas. 33:5.

3. Shimunenu chakutalilahu chinakumwekesha nawu mukaayi mudi wuñaji waheña.

³ Amwovu munyichima akundejewaña chelukawu nawu Yehova welaña mwawuñanji, muloña mukaayi munenzali wuñanji waheña. Dichinaleteshi antu amavulu kukoña yuma yatama. Chakutalilahu, antu amakwawu anafwi nanyiloña nikuyikasa mutuleya hamuloña wawuñanji waheña. Amakwawu ayumbañaku mukaleya munashakamiwu yaaka yayivulu neyi ayipima DNA nawa awana nawu diwu wanyi akoñeli ochu chuma. Kukasa muntu muniyi njila kunaleteshi kuzuwa nikuhelañana, akwaKristu anateli kumona kukala kwasweja hamuloña wawuñanji waheña.

4. Kashinshi kamukwaKristu anateli kukeseka ñahi?

⁴ AkwaKristu eluka nawu anateli kumona kukala kudantu abula kwikala muchipompelu chawakwaKristu. Hela chochu, kashinshi ketu anateli kukesaka neyi tumona netu anatwila chatama mukachi kachipompelu. Munateli kwila ñahi neyi mumona nenu anayili chatama muchipompelu hela kudi mukwenu mukwaKristu? Komana munateli kwiteja ayituntwishi?

5. Muloñadi chitukubulila kuhayama neyi mukwaKristu anamwili chatama muchipompelu?

⁵ Chineli wejima wetu twawanina wanyi nawa twavulumunaña, tweluka chikupu netu anateli kutwila chatama hela tunateli kwila akwetu chatama muchipompelu. (1 Yow. 1:8) Hela chakwila yuma yamuchidiwu yavula kumwekana wanyi, akwaKristu ashinshika atela kuhayama wanyi hela kutuntuka neyi amona yuma yamuchidiwu. Yehova watuleja Mwizu dindi yuma yakwila yatukwashaña kutwalekahu kwikala ashinshika hela anatwili chatama kudi akwetu akwakwitiya.—Mas. 55:12-14.

6, 7. Kukalanyi kwamweniyi manakwetu wumu muchipompelu, nawa yilwilwinyi yamukwashili kumanisha iku kukala?

⁶ Talenu chuma chayimwekeneni aWilli Diehl. Kufuma mu 1931, aManakwetu Diehl azatilileña haBeteli kuBern, Switzerland. Mu 1946, ayili kuShikola yaGileyadi yanaamba 8 muNew York, U.S.A. Chamanishiliwu shikola, ayitemesheli mumudimu wawunkoñi wañinza kuSwitzerland. Munsañu yawu yachihandilu, aManakwetu Diehl asonekeli nawu: “Mu May 1949, nalejeli kasanji kamutayi kakuBern nami inakukeña kusumbula.” Kasanji kakuBern kakwili nawudi? aManakwetu Diehl alumbulwili nawu: “Kwosi kukooleka kukwawu, chiña kuya hohu nakuzata wupayiniya wampinji yejima. Añitejeli wanyi kuhana jimpanji . . . Nawa amavulu atwimushileña wanyi, atumweneña neyi antu ahañewa.”

⁷ A Manakwetu Diehl elilidi? Ahosheli nawu: “Twelukili netu kusumbula akwikaanisha wanyi muNsona, dichi twalombeleña nikumukuhwelela Yehova.” Nkumininaku, yitoñojoka yaheña yadiñawu nayu kutalisha hawulu, ayolweli nawa aManakwetu Diehl ayifuntishilili kukooleka kwejima kwadiñawu naku. Kashinshi kawu kudi Yehova mwafumini yuma yayiwahi. * Dichi twatela kudihula netu, ‘Nateli kumwekesha kashinshi kamuchidiwu neyi añila chatama? Komana nateli  kumuhembelela Yehova tahindi nukutwesha kukwimanisha nkawami?’—Yish. 11:2; tañenu Mika 7:7.

8. Chumanyi chikuletesha mukunkululi nenu anayili chatana hela nenu muntu wacheñi anamwili chatama?

⁸ Munjila yikwawu, munateli kukunkulula mwaluwa nenu anayili chatama hela nenu mukwenu wumu muchipompelu anamwili chatama. Chumichi chinateli kumwekana muloña twamonaña yuma nayitoñojoka yabula kuwanina hela neyi tuneluki wanyi nsañu yejima. Hela chakwila yitoñojoka yetu yinatudimbi hela nehi, kumushindamena Yehova mukulomba, nikumukuhwelela kukatukwasha kubula ‘kumuzuwila Yehova.’—Tañenu Yishimu 19:3.

9. Tukuhanjeka hadi anyi muchinu chibaaba nichihalondelihu?

⁹ Tuhanjekenu hayakutalilahu yisatu yamuBayibolu yahosha hawuñanji waheña yawantu jaYehova akumpinji yakunyima. Muchinu chibaaba, tukuhanjeka hadi mwijukulwaAbarahama Yosefu nichamwililiwu kudi amanakwindi. Muchibaaba chinalondelihu, tukahanjeka hadi Yehova cheliliyi naMwanta Ahabi wawaIsarela nawa nihayuma yamumwekeneni kapostolu Petulu kuAntiyoki yakuSiriya. Chitukuhanjekaña hadawa antu, shinshikenu yikuma yikuyikwasha kukolelaku kuspiritu nichimunateli kutwalekahu kwikala nawubwambu wawuwahi naYehova, sweje-e neyi monamoni nenu anayili chatama.

10, 11. (a) Kukalanyi kwamweniyi Yosefu? (b) Kukoolekanyi kwamweniyi Yosefu iku wudi mukaleya?

¹⁰ Yosefu, kambuña aYehova washinshika, amwilili chatama, bayi neyi kudi antu acheñi hohu, ilaña nikumakasa awamanakwindi akusemuka nawu. Yosefu chadiñayi nayaaka yawukampululu, amanakwindi amwiyili nakumulandisha muwuduñu. Amutwalili kuEjipitu kwabulileñayi kukeña. (Kutach. 37:23-28; 42:21) Chimwahitili yaaka, kuna kwayiliyi amutwambilili nawu wakeñeleña kukama ñodambala chakukanjikija nawa amushili mukaleya chakubula kumusompesha. (Kutach. 39:17-20) Kukala kwindi kwakwikala nduñu nikayili kwasendeli yaaka 13. Yumanyi yitukudizila kuyuma yamumwekeneni Yosefu yikutukwasha neyi atwila chatama kudi akwetu akwakwitiya?

¹¹ Yosefu wadiña nakukooleka kwakulejamu mukwawu kayili nsañu yindi. Nawa ona kayili wadiña mukwakutwala lupasa wamwanta. Hayina mpinji, Yosefu nimukwakutwala lupasa ayikasilili hamu, mukwakutwala lupasa waloteli chilota chamulumbulwililiwu kudi Yosefu. Yosefu walumbulwili nindi mukwakutwala lupasa akamufuntishila mudimu windi wadiñayi nakuzata muchota chaFwaro. Hanyima yakwila Yosefu nalumbululi dehi chilota nañovu jaNzambi, wamulumbwilili chamukasililiwu. Tunateli kudizila kuyuma yahosheliyi niyabuliliyi kuhosha.—Kutach. 40:5-13.

12, 13. (a) Mazu aYosefu amulejeliyi mukwakutwala lupasa amwekeshaña ñahi nawu watiyili kutama nachamuyandishiliwu? (b) Yumanyi yabuliliyi kuhosha Yosefu hamulejeleñayi mukwakutwala lupasa?

¹² Tañenu Kutachika 40:14, 15. Anukenu nenu Yosefu wahosheli yomweni nindi “añiyili.” Chakadi nikujina, amwilili chatama. Yosefu wahosheli chakadi nikuhita mumbadi nindi kwosi chuma chatama cheliliyi chaletesheli amukasi. Dichi, wamulejeli mukwakutwala lupasa nindi  yamulejimu Fwaro. Muloñadi? Walumbulwili chuma chakeñeleñayi nindi: “Kulonda akanfumishi mwitalidi.”

¹³ Komana Yosefu wetejeli hohu mwejima mwamwililiwu chakadi kwilahu chuma chidi chejima? Inehi mwani. Welukili chikupu nindi amwilileña chatama. Wamulejeli yuma yejima mukwakutwala lupasa, hadaha wadi kumuhakwilaku. Hela chochu, ilukenu nenu, kwosi Nsona yamwekeshaña nawu Yosefu walejelimu muntu wudi wejima hela Fwaro nindi amanakwindi diwu amwiyili nakumulandisha. Chelili amanakwindi enzi kuEjipitu nawa adimoni cheñi naYosefu, Fwaro wayitambwilili chiwahi nikuyileja nindi ashakami muEjipitu kulonda adiluñisheña “yuma yayiwahi yamwituña.”—Kutach. 45:16-20.

14. Yumanyi yikutukwasha kubula kuhosha chatama neyi anatwili chatama muchipompelu?

¹⁴ Neyi mukwaKristu namoni nindi anamwili chatama, watela wanyi kuya nakushimuna nsachi. Chekala hohu chiwahi kulomba wukwashu kudi aeluda nikuyileja neyi muntu wumu mukachi kachipompelu nakoñi nshidi yahamesu bwi-i. (Lev. 5:1) Ilaña, neyi nsañu munadibombeli wanyi nshidi yahamesu bwi-i, mwatela kumanisha kukala mwayedi wenu chakadi kulejamu muntu wudi wejima, hela aeluda. (Tañenu Matewu 5:23, 24; 18:15.) Twatela kuzatisha yishina yamuBayibolu hakumanisha kukala. Mpinji yikwawu, hanyima yakuhanjeka tunateli kwiluka netu atwila chatama wanyi. Neyi tubula kumutwambila mukwetu mukwaKristu yuma yikutaminaku wanyi! Anukenu nenu, hela neyi yetu tunaluwañeshi hela nehi, kuhosha mazu atama kukuletesha yuma kutaminaku. Kwikala ashinshika kudi Yehova nikudi amanakwetu kukutukwasha kubula kwila mwenimu. Ñimbi yamasamu wahosheli kutalisha hadi muntu “wendaña choloka,” nindi: ‘Watwambilaña  wanyi akwawu nedimi dindi. Wamukoñaña wanyi ibwambu dindi chatama. Washimunaña wanyi nsachi hadi mukwawu.’—Mas. 15:2, 3; Yak. 3:5.

15. Nkwiswinyi yatambwililiyi Yosefu hakwikala nawubwambu naYehova?

¹⁵ Twadizaña chikuma chalema hawubwambu wadiña hakachi kaYosefu naYehova. Hadi yaaka 13 yakabakeniyi, Yosefu wamwekesheli nindi wamweneña yuma neyi chamonañayi Yehova. (Kutach. 45:5-8) Wamutobeleli wanyi Yehova hakukala kwamweneñayi. Hela chakwila wavulameneni wanyi makabi amweneñayi, wahilili wanyi. Chuma chasweja kulema, wetejeli wanyi kubula kuwanina niyiluwa yakoñeleñawu akwawu yimwambuli kudi Yehova. Kashinshi kaYosefu kamukwashili kumona Yehova cholweliyi yuma nichamukiswililiyi hamu nichisaka chindi.

16. Muloñadi wutwatela kuswinina kwakwihi naYehova neyi amanakwetu anatwili chatama?

¹⁶ Ninetu twatela kutwalekahu kwikala nawubwambu wawuwahi naYehova. Bayi twiteja yiluwa yawamanakwetu yitwambuli kudi Nzambi itwakeña nawa itwadifukulañaku. (Rom. 8:38, 39) Ilaña, neyi amanakwetu atwila chatama, twatela kwimbujola Yosefu, kuswina kwakwihi naYehova nawa tumoneña yuma neyi chayimonañayi Nzambi. Neyi tunalondeli dehi chahosha Nsona hakumanisha kukala, twatela kushiya kukala kwetu mumakasa aYehova nakukuhwelelela netu wukolola yuma hampinji yatelela.

17. Tukumwekesha ñahi netu twakuhwelela “Mukwakusompesha iseki dejima”?

¹⁷ Anateli kutwila chatama muloña tunakushakama mukanu kaayi katama. Mpinji yikwawu, enu hela ibwambu denu anateli kumwila chatama muchipompelu. Bayi mutuntuka. (Mas. 119:165) Etu ambuña aNzambi, twalombaña nakumushindamena yena. Cheñi, twelukaña netu hituneluki wunsahu wejimaku. Twelukaña netu kubula kuwanina kwatuleteshaña kutoñojoka mwaheña. Tunadizili kudi Yosefu netu twatela kuleka nhoshelu yatama, muloña yaleteshaña yuma kutaminaku. Chikuma chakukumishaku, chatela tufwileña kumanisha kukala etu aweni, tufwilenu kwikala ashinshika nakuhembelela mpinji yakamanishayi Yehova oku kukala. Neyi tumanishaña kukala muniyi njila chikutukwasha kwikala nawubwambu wawuwahi naYehova nawa wukutukiswila neyi chamukiswililiyi Yosefu. Tunakuhweleli netu Yehova, “Mukwakusompesha iseki dejima,” wukwilaña mwaloña mpinji yejima, muloña “mwatwalañayi mwejima mwawuñaji hohu.”—Kutach. 18:25; Kuhit. 32:4.

18. Tukahanjekadi muchibaaba chinalondelihu?

¹⁸ Muchibaaba chinalondelihu, tukahanjeka hayakutalilahu yakuheñesha wuñanji yawambuña aYehova akunyima. Kuhanjeka haniyi nsañu kukutukwasha kwiluka netu neyi twikala adizoza nawa twanakenaña chakufuma hamuchima chikutukwasha kwiluka chamonañayi Yehova yuma.