1, 2. (a) Indi Elifwazi naBilidadi ahosheli nawudi kutalisha hachitwamukalakelaña Nzambi? (b) Yehova wamwekesheli ñahi chomanañayi yuma?

“MUNTU atweshi kumukwashaku Nzambi? Mukwamaana wukudikwasha yomweni. Chiwudi waloña chinamutiyishi Chinaweji kuwaha? Chiwukuwahisha nankashi njila jeyi chikumukwasha yena?” (Yoba 22:1-3) Mwatoñojokahu dehi hañakwilu yamalwihu amuchidiwu? Elifwazi wakuTemani chamwihwiliyi Yoba awa malwihu, Elifwazi welukili nindi wukwakula nindi inehi. Alunda nindi aBilidadi naShuhi, atachikili kuhosha nawu muntu kwila yekala waloña kudi Nzambi nehi.—Tañenu Yoba 25:4.

² Awa ankundeji akutwamba ahosheleña nawu nyidimu yitwamukalakelaña Yehova yekala yamukunkulwayi, nawa Nzambi watumonaña neyi kanzwanzwa, ivunu hela kabubu. (Yoba 4:19; 25:6) Neyi dihutunatiyi hohu iyi nsañu, tunateli kuhosha netu Elifwazi naBilidadi adiña adizoza. (Yoba 22:29) Yuma yejima yelaña antu yamwekanaña neyi yamukunkulwayi neyi wuyitalila hewulu dampidi hela hawindu yandeki. Komana Yehova dichamonañayi nyidimu yitwazataña hakukwasha  Wanta neyi yatutala kufuma mwiwulu mwamweni? Yehova wamwekesheli chamonañayi yuma hamuzuwililiyi Elifwazi, Bilidadi niZofwari nachatwambiliwu ilaña watiyili kuwaha naYoba, nakumutena nindi “kambuñami.” (Yoba 42:7, 8) Dichi, muntu nateli “kumukwashaku Nzambi.”

3. Elihu wahosheli nindidi hachitwamukalakelaña Yehova, nawa watalishili mudihi?

³ Elihu amuzuwilili wanyi kudi Yehova chenhwiliyi nindi: “Neyi waloña, wudi nakumwinkadi [Nzambi]? Kuchikasa cheyi yena wudi nakutambuladi?” (Yoba 35:7) Komana Elihu watalishili mukwila nindi nyidimu yitwamukalekelaña Nzambi yamukunkulwayi? Inehi. Watalishili mukwila nindi Yehova washindamenaña wanyi hakudifukula kwetu. Yehova wakankila wanyi. Kwosi chuma chidi chejima chitunateli kwila chikuletesha yaheti hela kwikala nañovu. Muloña Nzambi diyi watwinka yuma yejima yayiwahi, yawaana yitukweti hela ñovu jitukweti, nawa wamonaña chitwayizatishaña.

4. Yehova wesekejaña kuhana kwetu kwaluwi nankahi?

⁴ Yehova wamonaña yuma yejima yaluwi yitwelilaña ambuñindi nindi tunakumwilila yena. Yishimu 19:17 yahosha nawu: “Muntu wamutiyilaña kazweñi luwi wudi nakusondamisha Yehova, yena wakamufweta cheñi nachuma chachiwahi chaneliyi.” Komana iyi nsona yinatalishi mukwila nawu Yehova wamonaña luwi lwejima lwamwekeshelañawu atuzweñi? Komana tunateli kukunkulula netu Nleñi wayuma yejima wukweti nyikudi kudi antu akwashili antu nawa netu wamonaña nindi tunamukongweshi nawa wakatushilahu hakufuntisha? Eña, nawa Mwana kaNzambi wamwekesheli chumichi.—Tañenu Luka 14:13, 14.

5. Malwihwinyi itukuhanjekahu?

⁵ Yehova walejeli kaprofwetu Isaya kumuhoshelaku, hakushimuna chatiyañayi kuwaha hakuzatisha antu ashinshika kushikija nkeñelu Yindi. (Isa. 6:8-10) Isaya welili mwamulejeliwu. Makonu, antu amavulu amwekeshaña spiritu yoyimu yakwila nawu, “Yamonu, ntemeshami” hakuzata nyidimu yakala hakumukalakela Yehova. Hela chochu, munateli kutoñojoka nenu: ‘Komana mudimu wunazataña walema? Chineli Yehova wañiteja kudihana nikuzataku, kwila yanyika yuma yakeñekaña kulonda nishimwini Izu dindi hichikweti muloña namudimu wunukutonda kuzataku?’ Shinshikenu yuma yamwekeni mumafuku aDebora naBaraka chiyikwakula awa malwihu.

6. Chambwinyi chadiña hadi aIsarela amunyikala namashidika aYabini?

⁶ A Isarela ‘ayikabishili chatama’ kudi Mwanta Yabini wawaKenani hadi yaaka 20. Antu amunyikala atiyili woma chakwila amwekeneña wanyi. Kuhosha hohu walala, adiña nañovu wanyi, nawa adiña adana yitwa hela yakuvwala yakudikiña nachu, ilaña ayilumbu jawu adiña namakalu ayikuñu anjita 900.—Ansomp. 4:1-3, 13; 5:6-8.

7, 8. (a) Nshimbinyi yatachi yamwinkeliwu Baraka kudi Yehova? (b) A Isarela ashindili ñahi mashidika aYabini? (Talenu mwevulu wakutachikilahu.)

⁷ Hela chochu, Yehova wamulejeli Baraka iyi nshimbi kuhitila mudi kaprofwetu wamubanda nindi: “Yaña, kakundami kumpidi yaTabori, kasendi mayala makombakaji ikumi, nianyana kaNafwatali  nianyana kaZebuluni. Ninami nakakukokela Sisera, mukulumpi wanjita yaYabini, nimakalu indi niluntu lwindi kukaloña Kishoni, nakakwinkayi.”—Ansomp. 4:4-7.

⁸ Antu ejima atiyili awa mazu. Akwakudihana apompeli kumpidi yaTabori. Baraka welili mwamulejeliwu kudi Yehova chakadi kumba mpinji. (Tañenu Ansompeshi 4:14-16.) Hampinji yazuñileñawu muTanaki, kwanokeli nvula yeneni chakwila yelishili malowa. Baraka wayihañili mashidika aSisera hadi makilomita 24 kushika kuHarosheti. Chashikiliwu hakachi, Sisera wayitemukeli mashidika indi akuhwelelayi nakuya kuZayananimi, hadaha kwakwihi naKadeshi. Wayili nakuswama mwitenti daYahela, ñoda Heberi kaKeni nawa amutambwilili kudi Yahela. Wakaamini muloña wazeyeli kunjita. Sisera wazeyeli chikupu chakwila Yahela wahamukili nakumujaha. (Ansomp. 4:17-21) Chilumbu chawaIsarela amujahili! *

9. Nsañwinyi yekala haAnsompeshi 5:20, 21 kutalisha hanjita yalwiliwu naSisera?

⁹ Twatela kudiza tupetulu twejima 4 ni 5 twamukanda waAnsompeshi, muloña kapetulu kamu kalumbululaña nsañu yinabuli mukapetulu kakwawu. Chakutalilahu, Ansompeshi 5:20, 21 yahosha nawu: “Twalwili kwiwulu, tutumbwa munjila jatu twalwili naSisera. Kaloña Kishoni kayikumpwili.” Komana ichi chinatalishi mukwila nawu añelu diwu ayikwashili tahindi nvula yanokeli? Iyi nsañu yashimuna wanyi jiika. Ilaña, kudihu muntu mukwawu kubadika Nzambi watela kuleta yina nvula yakumpwili makalu anjita 900? Ansompeshi 4:14, 15, yashimuna kapampa kasatu nawu Yehova diyi washindili. A Isarela ejima 10,000 kwosi watela kuditiya nindi washindili.

10, 11. “Merozi” wadiñanyi, nawa muloñadi chiyamushiñililiwu?

¹⁰ A Debora naBaraka embili kamina kakushinda hakumushimeka Yehova chayikwashiliyi muchihayamisha, embili nawu: “Mushiñenu Merozi, yishiñenu nankashi awa ashakamaku; nanochu chabuliluwu kwinza nakumukwashaku Yehova, amukwashuku Yehova nanjita yindi yakwasayi ayilobu.”—Ansomp. 5:23.

¹¹ Merozi amushiñili chakwila tukukañanya nikulumbulula. Kwila Merozi wadiña musumba mwadiña antu akaanini kuya kukubulakana kwatachi kwawakwakudihana nehi? Neyi diwu musumba mwahitiliyi Sisera hampinji yatemukileñayi, hanu dinu muloñadi ana antu chamulekeleliwu chatela amujahi? Muloñadi chabuliliwu kudihana hampinji yakeñeleñayi Yehova akwakudihana? Antu 10, 000 amunyisumba yadikumashaniniwu nawu ayili nakubulakana. Fwikijenu awa antu amuMerozi anakumona iwu muntu watama muchima nakuhita lufuchi nkawindi munyikwakwa yamusumba wawu kulonda yapulwishi wumi windi. Iyi yadiña mpinji yayiwahi yateleliwu kwila nkeñelu yaYehova kulonda yayikiswili. Ilaña, hayina mpinji yakala yateleleliwu kwila chuma, komana elilihu chuma chidi chejima? Hadiña chaambu chikupu nachuma cheliliyi Yahela wahamuka chasonekawu mumavasi alondelahu!—Ansomp. 5:24-27.

12. Chaambwinyi chayilwilu yawantu chashimunawu hamukanda waAnsompeshi 5:9, 10, nawa tukudizilaku yumanyi makonu?

¹² Hamukanda waAnsompeshi 5:9, 10, ashimunahu chaambu chekala hayilwilu  yawantu adibombeli naBaraka nanana abulili kudibomba nindi. Debora naBaraka ahamekeli “añuvulu jamuIsarela, adiheni mukachi kawantu chakunyichima yawu awenawu.” Ambukiliku chikupu nanana “endelaña hayimbulu yitooka,” adivwimbili kushilahu ninana “[ashakamineña] hamahina alema,” akeñeli nshakaminu yayiwahi. Nawa ambukiliku cheñi nanana “[endeleña] munjila,” akeñeli kuzatisha njila yapela, ilaña ana ayili nakwasa njita naBaraka kumpidi yaTabori nimuchinekineki chaKishoni adiña namuchima wakudihana. Antu akeñeleña yakuditiyisha awenawu kuwaha ayilejeli nawu ‘toñojokenuña!’ Mwamweni, ateleli kutoñojokahu chikupu hakukooleka kwajimbesheliwu kwakumukwasha Yehova. Dichi, niantu ejima anakufunta hanyima hakumukalakela Nzambi makonu atela kutoñojokahu chikupu.

13. Yilwilu yadiña namutaña waRubeni, Dani niAsheri yaambukili ñahi nayaZebuluni niNafwatali?

¹³ Ana antu adihanini adimweneneni namesu kaapu Yehova chamwekesheliyi nindi wukweti wuswa wakuyuula. Adiña nakukooleka “kwakashimunwina mwelaña Yehova mwaloña.” (Ansomp. 5:11) Kwambukaku, mutaña waRubeni, Dani niAsheri ayiteneni wanyi haAnsompeshi 5:15-17 muloña ashileña nyichima kuyuma yawu, yidi neyi ayimuna, maatu nikwashekenaña maatu kubadika mudimu wayinkeliyi Yehova. Kwambukaku, Zebuluni naNafwatali wena “akeñeli kumona yowu kufwa” hakukwasha Debora naBaraka. (Ansomp. 5:18) Ichi chaambu chadiña hakuzata mudimu wakudikeñela chatudizishaña chikuma chalema.

14. Twamwekeshaña ñahi netu Yehova wukweti wuswa wakuyuula makonu?

¹⁴ Makonu, twazuñaña njita yayeni wanyi, ilaña twekala nakukooleka kwakumwekesha kuhamuka hakuzata mudimu wakushimwina neyena. Mukuloñesha kwaYehova mudi kukankila kweneni kwawakwakudihana. Yihita yawamanakwetu,  ahela niatwansi anakudihana chikupu mumudimu wampinji yejima wudi neyi wupayiniya, kuzatila haBeteli, kutuña Matala aWanta nimatala akupompela kupompa kwanyanya nikwamaneni. Toñojokenu cheñi hadi aeluda anakuzata nyidimu yakala yidi neyi Jikomiti Jatiyañanaña naYipatela nialoñeshaña kupompa kweneni. Ilukenu nenu Yehova watiyaña kuwaha nanyidimu yenu yimwazataña chakufuma hamuchima nawa wakayijimbala wanyi.—Heb. 6:10.

15. Twatela kwiladi hakwila nawu tubuleña kudiwula mudimu watwinkayi Yehova?

¹⁵ Wejima wetu twatela kudihula netu: ‘Komana nalekelaña akwetu kuzata nyidimu? Komana nasha maana hayuma yakumujimba kubadika yuma yakuspiritu? Kufwana Baraka, Debora, Yahela niakwakudihana 10,000, komana nikweti chikuhwelelu niñovu yakuzatisha yuma yinikweti hakwila nkeñelu yaYehova? Neyi inakukeña kubuuka nakuya kumusumba wacheñi nakukeña yuma yakumujimba, komana nalombaña nikutoñojoka chinateli kutiya chisaka chami nichipompelu?’ *

16. Chumanyi chitunateli kumwinka Yehova chabula kwikalayi nachu?

¹⁶ Yehova watulemesha kuhitila mukutwiteja kuhakwilaku chiyuulu chindi. Chineli Diyabolu waletesheli antu kuhakwilaku chiyuulu chindi, neyi muhakwilaku chiyuula chaYehova dikwila nawu munakudikaña naSatana. Yehova watiyaña kuwaha nachikuhwelelu nikashinshi kenu kayisañumuna kumukalakela namuchima wakudihana. (Yish. 23:15, 16) Wazatishaña kashinshi ketu hakumwakula Satana wamusawulaña. (Yish. 27:11) Dichi, neyi mumwovwahila Yehova, dikwila nawu munakumwinka yuma yalema nawa watiyaña kuwaha.

17. Ansompeshi 5:31 yatudizishañadi kutalisha hayuma yikamwekana kumbidi?

¹⁷ Katataka iseki dejima dikali nawantu akeña kuhakwilaku chiyuula chaYehova. Tunakuhembelela odu ifuku. Twembilaña hamu naDebora niBaraka, netu: “Eyi Yehova, ayilumbu jeyi ejima akafwi chochenochu; hakwinza wena akumukeña akekali neyi itañwa haselañayi nañovu jindi.” (Ansomp. 5:31) Iku kulomba akakwakula neyi Yehova najilumuni dehi kaayi katama kaSatana. Chakatachika njita yaAmagedoni, kwosi antu akadihana hakukwashaku kushinda chilumbu. Diyi mpinji ‘yitwakaduñumika, nakumona wamwinu waYehova.’ (2 Kushi. 20:17) Ilaña chayinu mpinji, tukweti kukooleka kwakuvulu kwakuhakwilaku Yehova nakuhamuka nineyena.

18. Neyi mudihana kuzata nyidimu, mukukwasha ñahi antu?

¹⁸ “Muloña antu adiheni chamunyichima yawu awenawu, mushimekenu Yehova!” Dichi, Debora naBaraka atachikili kwimba kamina kawu kakushinda kudi Mukwakubadika Chikupu, bayi neyi kudi yileñaleña. (Ansomp. 5:1, 2) Nimakonu, muchima wenu wakudihana wukwashi antu ‘kumushimeka Yehova!’