1, 2. (a) Tunateli kwesekeja ñahi nshakaminu yamakonu nambanji anakukeña kujahawu? (Talenu mwevulu wakutachikilahu.) (b) Antu akeladi neyi kanu kaayi anakijilumuni dehi?

“MUFU NAKWENDA!” Ichi dichahosheleñawu antu ahembeleña atuyili neyi mbanji anamufumishi dehi mukaleya. Hanu dinu muloñadi awa antu chiyahosheleleñawu awa mazu? Iwu muntu wakola kumujimba, nawa nakati wanyi chakwila nawu wukufwa. Hela chochu, awa antu anakumutwala nakumujaha. Iwu mbanji wadiña wafwa dehi. *

² Munjila yoyimu, kaayi kadi neyi ona iyala anakuya nakujahawu. Nzambi wafuukula dehi kujilumuna kanu kaayi katama nawa iku kujilumuna kudi kwakwihi. Bayibolu yahosha nawu: “Kaayi kanakuhita.” (1 Yow. 2:17) Kanu kaayi akakijilumuna. Ilaña, kukuma kwakanu kaayi kunambuki nakufwa kwanona kayili. Hampinji yinakumujihawu ona kayili, antu amakwawu anateli kuhosha nawu kumujaha nehi muloña anakujinoka chamusompeshawu nawa anakukeña nawu amwinkiku mpinji cheñi. Ilaña kanu kaayi akisompesha dehi kudi nsompeshi  waloña Mwanta wakuleña kwejima. (Kuhit. 32:4) Kukekala wanyi mpinji yakuhembelela hela kujinoka wunsompeshi. Neyi anakijilumuni dehi, antu ejima aketeja nawu mwamweni wasompeli mwaloña. Antu ejima akazañalala!

3. Yumanyi yitukuhanjekahu yakajiya neyi Wanta waNzambi wunenzi?

³ Hela chochu, yumanyi yinadibombeli ‘mukaayi kanakuhita’? Yuma yamonañawu antu makonu nawu yakatwalekahu muchihandilu, yakajiya. Komana iyi nsañu yakuneñesha? Kwakulehi! Muloña iyi nsañu yekala hakachi ‘kansañu yayiwahi yaWanta.’ (Mat. 24:14) Dichi tuhanjekenu hayuma yakajiya neyi Wanta waNzambi wunenzi. Tukuhanjeka hayuma yiwana: antu atama, yipompelu yatama yawakwamatuña, yilwilu yatama niyuma yatama. Hachikuma chejima, tukuhanjeka (1) hakukala kutwamonaña muloña waniniyi yuma yatama, (2) chakelayi Yehova naniyi yuma, ni (3) chakayisinsishayi nayuma yayiwahi.

4. Antu atama atuneñeshaña ñahi?

⁴ Yumanyi yatwilañawu antu atama? Hanyima yakuhosha nindi mumafuku akukuminina “mwakekala mpinji jakala,” kapostolu Pawulu amoneneni kusoneka nawu: “Antu atama niakwakuluwañesha antu, akayaña nakutaminaku.” (2 Tim. 3:1-5, 13) Mwalala iyi yuma yinakumwekana? Etu amavulu atukabishahu dehi kudi antu atama adi neyi akwamadombu, ayiluwañimbi niambanji. Amakwawu hakachi kawu anakwila yuma yatama hatooka; amakwawu hiyakwakuluwañesha antu, aswekaña yuma yelañawu kuhitila mukudimwekesha neyi aloña. Hela chakwila kanda atukabisheñahu dehi, yuma yatama yelañawu yatuneñeshaña. Twatiyaña kutama neyi tutiya yuma yinakwilawu yatama. Neyi tumona anyana, atushinakaji niantu abula wakuyikiña anakuyikabisha, twaneñaña nankashi. Antu atama anakumwekesha wanyi yilwilu yawuntu, ilaña anakumwekesha yilwilu yawunyama niyawundemoni. (Yak. 3:15) Hela chochu, Izu daYehova datulejaña nsañu yayiwahi kutalisha haniyi yuma.

5. (a) Kukoolekanyi kukwetiwu antu atama chayinu mpinji? (b) Chumanyi chikayimwekena antu atama anakukaana kuhimpa yilwilu yawu yatama?

⁵ Yehova wakeladi? Yehova nakuyinka antu mpinji yakuhimpa yilwilu yawu yatama. (Isa. 55:7) Awa antu kanda ayisompeshi. Ilaña nshakaminu yamakonu ayisompesha dehi. Indi antu anakukaana kuhimpa yilwilu yawu, anakutwalekahu kwila yuma yanshakaminu yamakonu kushika nihakatachika lukadi lwasweja? Yehova wahosha nindi wakajilumuna antu ejima atama hamaseki. (Tañenu Masamu 37:10.) Antu atama anateli kutoñojoka nawu akayijilumuna wanyi. Amavulu aswekaña yuma yelañawu nawa kwosi wunakuyibabesha mukanu kaayi nawa hiyanakumona yuma yatama yinakufuma muyuma yelañawuku. (Yoba 21:7, 9) Ilaña, Bayibolu yashimunaña nawu: “Mesu [aNzambi] atalaña mwendelaña muntu, wamonaña mwayañayi mwejima. Hikudi mwidima, hela wulelu wakufwa, kwakubatama akwakukoña yakuluwaku.” (Yoba 34:21, 22) Kwosi muntu wunateli kuswama kudi Yehova Nzambi. Kwosi muntu wunateli kumuluwañesha; nawa kwosi mwidima hela wulelu wunateli kumukañesha Nzambi kumona yuma yinakumwekana. Hanyima yaAmagedoni, twakatalatalaña hadiña antu atama, ilaña  twakayimona wanyi. Akekala ayijilumuna dehi haya nyaaka!—Mas. 37:12-15.

6. Anyi akashala neyi antu atama anayifumishihu, nawa tukuhosheladi netu iyi hinsañu yayiwahi?

⁶ Anyi akasinsa hadi antu atama neyi anayifumishihu? Yehova watushiika nindi: “Akwakudizoza akaswana ituña, akatiya kuwaha nankashi nakushakama chachiwahi chamwena.” Isamu dodimu dahosha cheñi nadu: “Akwakuloña akaswana ituña, akashakamamu haya nyaka.” (Mas. 37:11, 29) “Akwakudizoza” ‘niakwakuloña’ hiyanyi? Akwakudizoza hiyantu atiyililaña mwayilejañayi Yehova nikwiteja wunlomboli windi: akwakuloña hiyantu elaña yuma yaloña kumesu aYehova Nzambi. Makonu, antu atama diwu amavulu kubadika antu aloña mukaayi. Ilaña mwituña dadiha dinakwinza, hikwakekala nawu akwakudizoza niakwakuloña antesha hela amavuluku, ilaña diwu akekala hohu hamaseki. Mwamweni, antu amuchidiwu diwu akelisha iseki kwikala paradisa!

7. Yipompelu yatama yawakwamatuña yatuletelaña ñahi kukala?

⁷ Yipompelu yatama yawakwamatuña yatuletelaña ñahi kukala? Yuma yatama yinakumwekana mukaayi anakuyila kudi yipompelu bayi neyi kudi muntu wumuku. Chakutalilahu, toñojokenu hansakililu yakutwamba chiyinakudimba yihita yawantu kutalisha hachekalayi Nzambi, hadi Bayibolu niyuma yikamwekena antu, iseki niyuma yikwawu. Indi nfulumendi yinakuleta njita nimadombu, yinakukabisha atuzweñi niantu abula wakuyikiña nawa yelaña majika kanwa nichaambu? Indi nyitayi yinakutamisha iseki, yinakumanisha yuma yekala hamaseki nawa yinakudimba antu kulonda antu antesha hohu aheti? Kuhosha hohu chalala, yipompelu diyinakuleta kukala kweneni nankashi mukaayi.

8. Kwesekeja nachashimuna Bayibolu, yumanyi yikamwekena yipompelu yakuhwelelawu antu makonu?

⁸ Yehova wakeladi? Lukadi lwasweja lukatachika neyi akwamapolitiki anabalumukili dehi mazanvu ansakililu yakutwamba emenañaku chivumbi atenañawu nawu Babiloni Muneni. (Chim. 17:1, 2, 16; 18:1-4) Awa mazanvu ansakililu yakutwamba akayijilumuna chikupu. Indi yipompelu yatama yejima yawakwamatuña? Bayibolu yazatisha mpidi niyitutu hakutena yipompelu ninyitayi yakuhwelelawu antu makonu. (Tañenu Chimwekeshu 6:14.) Izu daNzambi dashimuna dehi nawu nfulumendi ninyitayi yawu yashindamenawu akayichañula hayikuku yawu. Nfulumendi yamunu mukaayi kanashinakaji ninyitayi yejima yayikwashañaku kudikaña naWanta waNzambi, akayijilumuna halukadi lwasweja. (Yere. 25:31-33) Kuhiñahu, kwakwekala wanyi cheñi yipompelu yatama yawakwamatuña!

9. Tuneluki ñahi netu mwituña dadiha mwakekala kuluwañesha wanyi?

⁹ Yumanyi yakasinsa hadi yipompelu yatama yawakwamatuña? Neyi Amagedoni yinamani, kwakekalahu chipompelu chidi chejima hamaseki? Bayibolu yashimunaña nawu: “Kudi mawulu amaha niiseki dadiha jitwatalilaña kwesekeja nachikaninu chindi, nawa mwenimu dimu mwakekalaña kuloña.” (2 Pet. 3:13) Mawulu niiseki dadikulu, dikwila  nawu nfulumendi yatama ninyitayi yahamaseki yalombolañawu kudi nfulumendi, yakahita. Yumanyi yakasinsahu? Mazu akwila nawu “mawulu amaha nimaseki amaha” aya mukwila nawu kwakekala nfulumendi yayiha niantu amaha hamaseki akayulañawu kudi iyi nfulumendi. Wanta wakayuulañawu kudi Yesu Kristu wakamwekesha yilwilu yaYehova Nzambi, Nzambi wabulaña kuluwañesha. (1 Kor. 14:33) Dichi “iseki dadiha” akadiwahisha munjila yayiwahi. Muloña mwekala amayala amawahi akalombolaña. (Mas. 45:16) Akayilejaña yuma yakwila kudi Kristu nia 144,000. Twakadiluñisha chikupu kushakama mwituña dakabula yipompelu yatama yawakwamatuña yakasinsawu kudi chiyuulu chimu, chanuñañana nawa chachiwahi.

10. Yilwilwinyi yatama yamwekanaña mwiluña denu, nawa enu nichisaka chenu mwatiyaña ñahi naniyi yilwilu?

¹⁰ Twatiyaña ñahi nayilwilu yatama yinakumwekana? Tunakushakama mwituña mudi yilwilu yatama. Munshakaminu yamakonu mudi yilwilu yawukapwa nsonyi, kubula kushinshika niyilwilu yamadombu. Anvwali chayikalilaña kufumba anyanawu kuniyi yuma yatama. Mutumina nimumavidiyo anakwidishawu mudi yilwilu yatama yinakulebumunawu kulonda yimwekaneña neyi yayiwahi henohu anakufumpa nshimbi jaYehova. (Isa. 5:20) AkwaKristu alala wena atondolwelaña ichi chaaku. Azataña nañovu yejima kulonda abuli kudiñija muyilwilu yatama yafumpaña nshimbi jaYehova.

11. Yehova chajilumwiniyi Sodoma naGomora chatudizishañadi?

¹¹ Yehova wakeladi nayilwilu yatama? Toñojokenu cheliliyi nayilwilu yatama yadiña muSodoma naGomora. (Tañenu 2 Petulu 2:6-8.) Loti muntu waloña, watiyileña kutama nayuma yelileñawu antu ashakamineña mumusumba mwadiñayi nachisaka chindi. Yehova chajilumwiniyi iyi nyisumba yejima, wafumishileñahu yilwilu yejima yatama. Nawa ichi chadiña “chakutalilahu kudi antu abulaña kumwakama Nzambi kutalisha hayuma yinakwinza.” Neyi chochafumishilihu Yehova yilwilu yatama hayina mpinji, dichi wakafumishahu yilwilu yejima yatama hampinji yakajilumunayi nshakaminu yamakonu.

12. Nyidimwinyi yimunakukeña kukazata mwituña dadiha neyi nshakaminu yamakonu yinahiti dehi?

¹² Yumanyi yikasinsa hayilwilu yatama? MuParadisa mwakekala nyidimu yayivulu. Toñojokenu hamudimu wawuwahi wakwilisha adinu iseki kwikala paradisa hela chitwakatuñaña matala etu niawantu itwakeña. Toñojokenu cheñi hampinji yitwakatambwilaña yihita yawantu afwa dehi nikuyidizisha kulonda akeluki yuma yakeñañayi Yehova nichelileñayi nawantu kunyima. (Isa. 65:21, 22; Yil. 24:15) Mpinji yejima twakazataña nyidimu yikatuletelaña muzañalu nikumushimeka Yehova!

13. Yumanyi yatama yinafumi mukudikaña kwaSatana, Adama niEva?

¹³ Yumanyi yatama yatumwekenaña? Antu atama, yipompelu yatama yawakwamatuña niyilwilu yatama yaletaña yuma yatama hamaseki. Hinyi hakachi ketu wukuhosha nindi kanda yaneñeñahu dehi nayuma yinakumwekana yidi neyi njita, wuzweñi hela chaambu chekowa? Indi yikatu nikufwa? Iyi yuma yatuneñesha  wejima wetu. Yinakumwekana muloña Satana, Adama niEva adikañili naYehova. Kwosi muntu niwumu wabulaña kumona yuma yafumaña mukudikaña kwawu.

14. Yehova wakeladi nayuma yatama? Shimunenu chakutalilahu.

¹⁴ Yehova wakeladi nayuma yatama? Toñojokenu hanjita. Yehova washiika nindi wakayifumishahu haya nyaaka. (Tañenu Masamu 46:8, 9.) Indi yikatu? Wakayifumishahu. (Isa. 33:24) Indi kufwa? Yehova wakakuminya haya nyaaka! (Isa. 25:8) Wakafumishahu wuzweñi. (Mas. 72:12-16) Wakafumishahu niyuma yejima yinakukabisha muchidi wamuntu makonu. Wakafumishahu cheñi ‘nimpepela’ yatama yanshakaminu yakaayi kamakonu, kuhiñahu spiritu yaSatana niandemoni jindi akayijilumuna.—Efwes. 2:2.

15. Yumanyi yakajiya hanyima yaAmagedoni?

¹⁵ Fwikijenu munakushakama mwituña mwakadi njita, yikatu nikufwa! Nawa mwakadi mashidika! Kwosi yitwa yanjita hela kwanakana antu afwili munjita. Kwosi yipatela, andotolu, anasi, kusonekesha wumi wenu kulonda akayakameni neyi munafwi; mamamochali, yipenji, malonda wakuchipatela nimajamu! Nawa mwakabula wubanji, makampani akiñaña, mwakabula maalamu, akapokola hela kukiya kuyisu! Antu hiyakakamenaña yuma yidi yejimaku.

16, 17. (a) Antu akapuluka haAmagedoni akatiya ñahi? Lumbululenu. (b) Tuneluki ñahi netu twakatwalekahu kuhanda neyi aka kaayi anakijilumuni dehi?

¹⁶ Chihandilu chakekala ñahi neyi yuma yatama yihiti dehi? Tukutwesha wanyi kufwikija yuma yejima chiyakekala. Tunakabakani nankashi mukanu kaayi hadi mpinji yayilehi chakwila tunakumona yuma neyi kwiji dichiyekala. Neyi chochekala antu ashakamaña kukamwihi nasitesheni yasitima, alekaña kutiya ipumba, hela antu ashakamaña kwakwihi nakwanatilañawu majilu, alekaña kutiya ivumba. Ilaña neyi yuma yejimiyi ayifumishahu, akutiya kuwaha!

¹⁷ Yumanyi yakasinsa hamakabi itwamonaña? Masamu 37:11 yahosha nawu: “Akatiya kuwaha nankashi nakushakama chachiwahi chamwena.” Komana awa mazu anayitiyishi kuwaha wanyi? Yehova wakeñaña nindi mutiyeña kuwaha. Zatenu nañovu kulonda muswini kwakwihi naYehova Nzambi nikuloñesha kwindi muyinu mpinji yakala! Toñojokenuña hakuchiñeja kumukweti nikukwifwikija neyi kwiji kunashikijewi dehi nawa lejenu antu amakwawu. (1 Tim. 4:15, 16; 1 Pet. 3:15) Neyi mwila mwenimu, mukukuhwelela chikupu nenu himwakajilumuka nakanu kaayi katamaku. Ilaña, mukahandaña hohu haya nyaaka namuzañalu!