CHAAKA chinamani, hakachi kawaYinshahu jaYehova mukaayi kejima amayala amavulu ayitondeli kwikala aeluda niankoñi akuzatila. Neyi mudi hakachi kanawa amanakwetu, mwatela kuzañalala namudimu wenu wawuha.

Kuhosha hohu walala, mpinji yikwawu ninenu munateli kudakamena. Jason, eluda wakansi walumbulwili nindi, “Chantondeliwu wueluda, nadakameneneña haniyi nyidimu yayiha.” Mosi niYeremiya chayinkeliwu nyidimu kudi Yehova adakameneni nawu akutwesha wanyi. (Kwid. 4:10; Yere. 1:6) Neyi ninenu dichimwatiyaña, munateli kwila ñahi hakwila nawu mumanishi iku kukala kulonda mupaminiku? Shinshikenu chakutalilahu chakambanji mukwaKristu Timotewu.—Yilw. 16:1-3.

Hadaha Timotewu wadiña nayaaka yakukumishaku yawukampululu hela yakutachika muma 20 hamwililiwu kudi Pawulu nindi atachiki kwendela hamu. Hakusambila, chineli Timotewu wadiña kansi, hadaha watiyileña woma nikudimona nindi wukutwesha wanyi kuzata mudimu windi. (1 Tim. 4:11, 12; 2 Tim. 1:1, 2, 7) Hela chochu, chimwahitili yaaka, Pawulu walejeli chipompelu chamuFwilipi nindi: “Nakuhweleli mudi Mwanta Yesu kuyitemeshela Timotewu katataka . . . Muloña hinukwetihu muntu mukwawu wudi namuchima neyi [yenaku].” (Fwi. 2:19, 20).

Chumanyi chaletesheli Timotewu yekali eluda washikahu? Shinshikenu yikuma 6 yimunateli kudizila kudi yena.

1. Wayakameneneña antu chikupu. Pawulu walelejeli amanakwetu muFwilipi nindi: “[Timotewu] wukwakamena chikupu yuma yinakuyakamisha.” (Fwi. 2: 20) Eña, Timotewu wayakameneneña antu. Wakeñeleña aswini kwakwihi naYehova nawa wadihanini kuzatisha ñovu yindi kulonda yayikwashi.

Bayi mwikala neyi ñendeshi wabasi wakeñaña hohu kushika swayi hasitesheni yejima ilaña kusendaña antu nehiku. William, eluda wunakalakali yaaka kubadika ha 20, wakolesheli amayala amaha atondeliwu nindi: “Keñenuña amanakwetu. Shenu maana hayuma yinakukeñawu, bayi hohu kusha maana hanyidimu yamuchipompeluku.”

2. Watwamijiliku yuma yakuspiritu. Hakushimuna chaambu chadiña hakachi kaTimotewu nawakwawu, Pawulu wahosheli nindi: “Ejima anakufwila hohu yuma yayitiyishaña kuwaha awenawu, bayi yuma yaYesu Kristuku.” (Fwi. 2:21) Pawulu wadiña muRoma hampinji yasonekeleñayi. Welukili nindi amanakwindi amuRoma, ashili maana hayuma yakeñeleñawu. Mpinji yimu, alekeli kusha maana kunyidimu yakuspiritu. Ilaña Timotewu dichadiñayi wanyi! Neyi mpinji yakushimwina yinashiki, wamwekesheleña muchima neyi waIsaya, wahosheli nindi: “Yamonu! Ntemeshami!”—Isa. 6:8.

Munateli kuzata ñahi nakwesekeja nyidimu yenu yakumujimba niyakuspiritu? Chatachi, tondenuhu yuma yabadika. Pawulu wakonkomweneni nindi, ‘ilukenu yuma yalema nankashi.’ (Fwi. 1:10) Sambilenu kukeña yuma yakeñayi Nzambi. Chamuchiyedi, peleshenuku yuma. Lekenu yuma yayimanishilaña mpinji niñovu. Pawulu  wamukolesheli Timotewu nindi: “Temukaku kufwila kwawansi, ilaña fwilaña kuloña, chikuhwelelu, kukeña, kuwunda.”—2 Tim. 222.

3. Wazatileña nañovu mumudimu wajila. Pawulu wayanukishili antu amuFwilipi nindi: “Muneluki wunsahu wadishimwininiyi [Timotewu] yomweni nindi, neyi mwana wunakukalakela hamu natata yindi, niyena dichi chakalakeliyi hamu nanami hakutwala nsañu yayiwahi hambidi.” (Fwi. 2:22) Timotewu wadiña wakatala wanyi. Wazatili nañovu hamu naPawulu nawa chumichi chaletesheli adikundi chikupu.

Makonu, mukuloñesha kwaNzambi mudi nyidimu yayivulu. Iyi nyidimu mwalala yayiwahi chikupu nawa yinateli kuyikundamisha kwakwihi nawamanakwenu niahela. Dichi mpinji yejima ikalenuña nanyidimu “yayivulu yakuzata mumudimu waMwanta.”—1 Kor. 15:58.

4. Wazatishileña yuma yadizileñayi. Pawulu wamusonekeleli Timotewu nindi: “Wunalondeli chikupu ntañishilu yami, chihandilu chami, nkeñelu yami, chikuhwelelu chami, kudiwunjika kwami, kukeña kwami, kuumika kwami.” (2 Tim. 3:10) Muloña wakwila Timotewu wazatishileña yuma yadizileñayi, washikilihu kuzata nyidimu yamaneni.—1 Kor. 4:17.

Komana mukwetihu muntu wakula dehi hela wapama kuspiritu imwatela kwimbujola? Neyi mudana, kwila mukeñahu wumu nehi? Tom, wunakalakali wueluda hadi yaaka yayivulu wanukaña nindi: “Eluda wakuluka yitembi wankeñeli nawa wandizishili chiwahi chikupu. Mpinji yejima namwihwileña nawa nazatishileña yuma yanlejeleñayi. Chumichi chankwashili kupama swayi kuspiritu.”

5. Watwalekelihu kudidizisha yomweni. Pawulu wamukonkomweneni Timotewu nindi: “Ikalaku nachikonkwanyi chakudidizisha eyi aweni chakumwakama Nzambi.” (1 Tim. 4:7) Muntu wahemaña yisela wekalaña namuntu wakumudizisha, ilaña watela cheñi nikudidizishaña yomweni. Pawulu wamulejeli Timotewu nindi: “Twalekakuhu nakutaña nezu datiyakana kudi antu amavulu, kukonkomwena nikutañisha. . . . Wutoñojokeña chikupu hayumiyi; wudinkimu muyumiyi, kulonda kupama kweyi akumoneña hatooka kudi antu ejima.”—1 Tim. 4:13-15.

Ninenu nawa mwatela kutwalekahu kupaminaku. Dizilenuñaku chikupu nawa londelenuña wunlomboli wejima wawuha wumunakutambwila mukuloñesha. Cheñi nawa tondolwelenuña kusweja kudikuhwelela, hadaha kutoñojoka nenu mweluka yuma yayivulu chakwila munateli kumanisha kukala kudi kwejima chakadi kusandujola chiwahi. Chimukumwimbujolaña Timotewu, ‘dihembenuña enu aweni nikusha muchima kuntañishilu yenu.’—1 Tim. 4:16.

6. Washindameneni haspiritu yaYehova. Kutalisha hamudimu waTimotewu, Pawulu wamwanukishili nindi: “Spiritu yajila yashakama mudi etu yikukwashi kuhemba ichi chuma chachiwahi.” (2  Tim. 1:14) Hakwila nawu Timotewu yahembi mudimu windi, wateleleli kushindamena hadi spiritu yaNzambi.

Donald, eluda wunakalakali hadi yaaka yayivulu, wahosheli nindi: “Amayala atondewa atela kulemesha wubwambu wawu naNzambi. Ejima elañamu akuya ‘nakunuña ñovu nañovu.’ Neyi alombaña spiritu yaNzambi nikusoña nyikabu yachu, akwikala nkisu yayeni kudi amanakwawu.”—Mas. 84:7; 1 Pet. 4:11.

Twatiyaña kuwaha kumona amanakwetu amavulu anatondiwu katataka, adi neyi enu, anakutwalekahu kupama kuspiritu. Jason, atenawu hakusambila, wahosheli nindi: “Kufumatuhu hinekalili eluda, nadizi yuma yayivulu nawa ichi woma wamana chikupu. Chayinu mpinji nadiluñishaña mudimu wami nawa nawumonaña nami himudimu wawuwahi chikupu!”

Komana mukutwalekahu kuyilaku hambidi mumudimu waYehova? Fwilenuña kudizila kudi Timotewu. Neyi mwila mwenimu ninenu mukwikala nkisu kudi antu jaNzambi.