1-3. (a) Kukalanyi kwamonañawu atwansi ejima? Shimunenu chakutalilahu.(Talenu mwevulu wakutachikilahu.) (b) Atwansi akwaKristu anateli kumanisha ñahi iku kukala?

FWIKIJENU munakukeña kuya nakwila yuma yalema kutawuni yidi kwakulehi. Hakwila muyi kunidi iluña mwatela kuzatisha basi. Chimwashika hasitesheni, munateli kuluwankana hakumona antu amavulu anakuya nimabasi amavulu. Chachiwahi kwilukila chadimu kumunakuya, muloña chikuyikwasha kukandama basi yinakuya kunodu iluña. Neyi mukandama basi yinakuya kwacheñi, yikuyitwala kwacheñi.

² Atwansi makonu adi neyi antu anakukandama basi. Atumpululu adi halwendu lwalulehi, bayi lwakwenda nabasiku ilaña lwendu lwamuchihandilu chawu. Mpinji yikwawu anateli kuluwankana muloña wayuma yikumonañawu niyuma yikufuukulañawu muchihandilu. Enu atwansi, munateli kudipeleshela yuma neyi mwilukila chadimu yuma yimukela muchihandilu. Yumanyi yimukela muchihandilu?

³ Achinu chibaaba chikwakula ilu lwihu kuhitila mukukwasha atwansi kufuukulahu yuma yikumuzañaleshaña Yehova muchihandilu chawu. Dikwila nawu kumutwamijaku Yehova muyuma yejima muchihandilu,  yidi neyi kutaña shikola, kwiñila mudimu, kukwasha chisaka niyuma yikwawu. Nawa mwabombela kuzataku nyidimu yakuspiritu. Atwansi neyi asha maana hakumuzatila Yehova, nateli kuyikiswila muyuma yejima yikwilañawu muchihandilu chawu.—Tañenu Yishimu 16:3.

4. Tukuhanjekadi muchinu chibaaba?

⁴ Chachiwahi kutoñojoka kuzata nyidimu yakuspiritu henohu muchidi atwansi. Tunahoshelidi mwenimu? Tushinshikenu yuma yisatu yinaleteshi tuhoshi mwenimu. Chuma chatachi nichamuchiyedi chikumwekesha nawu kuzata nyidimu yakuspiritu kwakoleshaña wubwambu wetu naYehova; chamuchisatu chikumwekesha chichawahila kutoñojoka kuzata nyidimu yakuspiritu henohu muchidi atwansi.

5. Chumanyi chalema chiyikuletesha kutoñojoka kuzataku nyidimu yakuspiritu?

⁵ Chuma chatachi chalema chikuletesha tutoñojoki kuzataku nyidimu yakuspiritu, hikumwekesha kusakilila kudi Yehova hakukeña kwindi niyuma yatwililayi. Ñimbi yamasamu wembili nindi: “Chachiwahi kumusakilila Yehova . . . Muloña wunantiyishi kuwaha namudimu weyi, eyi Yehova; nukudisamba nanyidimu yakumakaseyi.” (Mas. 92:1, 4) Enu atwansi, toñojokenu yuma yayinkayi Yehova. Wumi wenu, chikuhwelelu chimukweti, Bayibolu, chipompelu niyuma yimwachiñejaña kumbidi. Kutoñojoka kuzataku nyidimu yakuspiritu hinjila yimu yakumwekeshelamu kusakilila kudi Nzambi haniyi yuma yayinkayi nawa yikuyileñela kuswina kwakwihi nayena.

6. Kutoñojoka hanyidimu yakuspiritu kwatukwashaña ñahi kukolesha wubwambu wetu naYehova? (b) Yumanyi yitwatela kufwila kwila henohu tuchidi atwansi?

⁶ Chuma chamuchiyedi chidi chakwila nawu chimwatachika kuzata nyidimu yakuspiritu, Yehova wukutachika kuchinda nyidimu yenu yayiwahi. Nawa chumichi chikuyikwasha kuswina kwakwihi nayena. Kapostolu Pawulu wakanini nindi: “Nzambi waloña nawa hakavulamena mudimu wenu nikukeña kumwakeñeli ijina dindiku.” (Heb. 6:10) Bayi mutoñojoka nenu muchidi atwansi kutoñojoka kuzataku nyidimu yakuspirituku. Christine, watachikili kutaña yibaaba yahosha hansañu yayihandilu yawaYinsahu ashinshika hadiñayi nayaaka 10. Toby chashikijiliyi yaaka 12, watachikili kutaña Bayibolu yejima hehohu kanda yapapatishewi. Maxim wapatisheweli nayaaka 11 hamu namuhelindi Noemi wadiña nayaaka 10. Wejima wawu ayedi atachikili kutoñojoka kuya nakuzatila haBeteli. Hakwila atwalekihu kutoñojoka kuya nakuzatila haBeteli, alamikili fomu yakuya nakukalakela haBeteli hambañu yamwitala dawu. Kwila mutoñojoka hayuma yimukela nikutachika kuzatilahu nehi?—Tañenu Afwilipi 1:10, 11.

7, 8. (a) Kutoñojoka yuma yakelañayi muntu kumbidi kunateli kumukwasha ñahi kufukuukulahu chiwahi? (b) Kansi wumu wabulililidi kuya kuyunivesiti?

⁷ Chamuchisatu, kutoñojoka yuma yimukela kumbidi muchihandilu kukayikwasha kufuukulahu chiwahi. Atumpululu atela kufuukulahu hakutaña shikola, kwiñila mudimu niyuma yikwawu. Kufuukulahu kudi neyi kutondahu njila yakuya neyi munashiki hamansaña. Neyi muneluki kumunakuya, chikuyikalila wanyi kutonda njila yakuya. Munjila yoyimu, neyi muneluki yuma yimukela kumbidi chikuyikalilaña wanyi kufuukula. Yishimu 21:5 yahosha nawu: “Yitoñojoka yamukwakudikita yatwala kwamukuvulisha hohu.” Neyi mutoñojokaña yuma yimukela kumbidi henohu muchidi atwansi, chikayipelela kuyila. Dicheliliyi Damaris hampinji yafuukwileñayi chuma chalema hadiñayi kampululu.

⁸ Damaris wamanishili shikola nawa wapasili chiwahi. Wakaanini kuya kuyunivesiti nakudiza janshimbi, ilaña watondelihu kuzata mudimu wakufola mali antesha. Muloñadi? Wahosheli nindi: “Nafuukwilihu kuzata wupayiniya hinachidiña kansi. Hinateleleli kuzata mudimu wadi kundilaña mpinji yeneniku. Neyi nayili kuyunivesiti nakutambula digili mujanshimbi, nadi kufolaña mali amavulu, ilaña chadi kunkalila kwiñila mudimu wadi kunkwasha kwikala nampinji.” Ichi Damaris  nashikiji dehi yaaka 20 muwupayiniya. Komana wamonaña nindi welili yuma yayiwahi nawa wafuukwilihu chiwahi hadiñayi kansi? “Kumudimu kunazataña, nahanjekaña nawantu adiza janshimbi. Azataña mudimu wunadi kuzataña neyi nadizili janshimbi. Hela chochu, amavulu azañalalaña wanyi nanyidimu yazatañawu. Kuzata wupayiniya kunankwashi kubula kwikala nachineñi chatiyañawu antu azataña nyidimu yakumujimba nawa kunankwashi kwikala namuzañalu mumudimu waYehova.”

9. Muloñadi chitwatela kuyihamekela atwansi chikupu?

⁹ Atwansi amavulu muyipompelu kunyeñumuka kaayi kejima akeñekaña kuyihameka chikupu. Adihana chikupu kumukalakela Yehova nawa afwilaña kuzata nyidimu yakuspiritu. Atwansi wenawa adiluñishaña chikupu muchihandilu iku anakulondelaña nshimbi jaYehova muyuma yejima yelañawu. Yumiyi mwabombela kutaña shikola, kwiñila mudimu nikukwasha chisaka. Solomoni wasonekeli nindi: “Mukuhweleli Yehova namuchima weyi wejima . . . Mwitijaña Yehova mwejima muwukwilaña, niyena wakakwolwelaña njila jeyi.” (Yish. 3:5, 6) Yehova walemesha chikupu atwansi amuchipompelu chawakwaKristu, wayikeña nankashi nawa wayihembaña, wayikwashaña nikuyikiswila.

10. (a) Muloñadi chitwatela kutwamijilaku mudimu wakushimwina hanyidimu yejima? (b) Tunateli kushimwina ñahi chiwahi?

¹⁰ Kansi wakeñaña kumutiyisha Yehova kuwaha muchihandilu chindi washaña muchima hamudimu wakushimwina. Yesu Kristu washimwini nindi “nsañu yayiwahi atela kusambila kuyishimwina.” (Maku 13:10) Chineli mudimu wetu wakushimwina wunakukeñeka kuwuzata mukunyakashana, diwu mudimu wutwatela kutwamijaku hanyidimu yejima. Kwila muzataku mudimu wakushimwina mpinji yejima nehi? Kwila muzataku wupayiniya nehi? Munateli kwila ñahi neyi mwakeñesha wanyi mudimu wakushimwina? Nawa munateli kushimwina ñahi chiwahi? Kudi yuma yiyedi yinateli kuyikwasha: Loñeshenu chiwahi nawa bayi muleka kuyishimwina akwenu yuma yimwakuhwelelaku. Mukwikalaña namuzañalu chikupu hampinji yimukushimwinaña.

11, 12. (a) Atwansi anateli kwila ñahi hakwila nawu adiloñeshi kushimwina? (b) Kansi wumu welili ñahi hakwila yashimwini hashikola?

¹¹ Chatachi, mwatela kuwana ñakwilu yalwihu lwaswejawu kwihula akwenu imwatañaña nawu kushikola, chidi neyi lwihu lwakwila nawu, “Muloñadi chimwakuhwelela mudi Nzambi?” Hawebusayiti yetu ya jw.org hekala yibaaba yinateli kukwasha atwansi kwakula ilu lwihu. Yenu hanasonekiwu nawu BIBLE TEACHINGS > TEENAGERS. Mukuwana weki shiti hadi mutu wunakuhosha nawu “Why Do I Believe in God?” (“Muloñadi chinakuhwelela mudi Nzambi?”) Weki shiti yikuyikwasha kuwana ñakwilu. Yikweti nsona jisatu jimwatela kuzatisha hakulumbulula yuma yimwakuhwelela.—Aheberu 3:4, Aroma 1:20, niMasamu 139:14. Iyi weki shiti yikuyikwasha kuwana ñakwilu yalwihu ludi lwejima.—Tañenu 1 Petulu 3:15.

¹² Neyi akwenu akashikola anakuyihula, yilejenu aditalili awenawu ha jw.org. Dichuma cheliliyi Luca. Mushikola yawu ahosheleña hakwitiya kwashiyashana, dichi Luca watiyili nsañu yakutwamba yatañiluwu mumukanda yahosheleña hadi aYinsahu jaYehova. Hela chakwila watiyili woma chanti, walombeli lusesa kudi ntañishi yindi nindi yololi iyi nsañu yakutwamba nawa ntañishi wamwitejeli. Luca hakuminini hohu dakulumbulula yuma yakuhwelelayiku, ilaña wayilejeli akashikola ejima webusayiti yetu. Ntañishi wayilejeli akashikola kuya nakutala vidiyo yaBeat a Bully Without Using Your Fists Fists (Etenu Mukwakwetana Chakadi Makofu). Luca watiyili kuwaha chashimwininiyi chiwahi.

13. Muloñadi chitukubulila kuleka neyi tumona kukala?

¹³ Bayi mudifuntamu hela chakwila njila yimunakwendamu yidi namabukuku. (2 Tim. 4:2) Neyi mudi mukukala, toñojokenu yuma yimukela  kumbidi. Katharina watachikili kuyishimwina akwawu kumudimu hadiñayi nayaaka 17. Muntu wumu wamuhosheleña chatama, ilaña yena walekeli kushimwina wanyi. Yilwilu yaKatharina yayiwahi yaleñeleli Hans mwazatilileñawu kutiya kuwaha. Chafuminimu, watachikili kutaña nyikanda yetu, kudiza Bayibolu nawa wapapatisheweli. Haniyi mpinji Katharina wadiña wabukila dehi kwacheñi nawa helukili yuma yejimiyiku. Toñojokenu muzañalu watiyiliyi Mwitala daWanta nachisaka chindi henohu munahiti yaaka 13, hakutiya nawu Hans diyi wunenzi nakuhana mpanji! Katharina welili chiwahi kutwalekahu kuyishimwina akwawu azatileñayi nawu kumudimu!

14, 15. (a) Yumanyi yatela kwanukawu atwansi neyi adi mukukala? (b) Atwansi anateli kushinda ñahi ikakeja dawakwawu?

¹⁴ Achinu chibaaba chinayikwashi kusha muchima hakumukalakela Yehova muchihandilu chenu. Dikwila nawu mwatela kutwamijaku yuma yakuspiritu. Akwenu atwansi amavulu asha maana hakwila yuma yakuditiyisha aweni kuwaha, dichi anateli kutachika kuyileja nawu muyimbujoleña. Mwatela kumwekesha kuhamuka hakwila mutwalekihu kwila yuma yimunafuukuli. Bayi ayiluwañesha kudi akwenuku. Neyi mwanuka chakutalilahu chabasi, kwila mukandama basi yinakuya kwacheñi muloña wakwila akwenu anakukandama munoyu basi anakumwekana muzañaluku.

¹⁵ Kudi njila jajivulu jimunateli kushindilamu ikakeja dawakwenu. Chakutalilahu, mwatela kwikala asoñama kulonda mubuleña kwila yuma yatama. (Yish. 22:3) Nawa mwatela kutoñojokaña hayuma yatama yafumaña mukudikunda nawantu akweti yilwilu yatama. (Ñal. 6:7) Chuma chikwawu chikuyikwasha hikutiyilila neyi anayikwashi. Mwatela kwikala adizoza kulonda mutiyilileña kufumba kwawanvwali nikwawantu apama kuspiritu muchipompelu.—Tañenu 1 Petulu 5:5, 6.

16. Shimunenu chakutalilahu chinakumwekesha chawahila kwikala adizoza.

 ¹⁶ Kudizoza kwamukwashili Christoph kwiteja wukwashu. Hanyima yakupapatishewa, watachikili kuya mwitala dakwilila maekisayizi. Akwawu atwansi awanineñayi kuna atachikili kumuleja nawu yahemeña nawu yisela. Wamulejelimu eluda iyi nsañu, dichi eluda wamulejeli Christoph kutoñojoka hayuma yatama yafumaña muyuma yinakukeñayi muntu kufuukula, chidi neyi kudiñija muyisela yakudibecha. Hela chochu, Christoph watachikili kuhema nawu yisela. Ilaña mukuhita kwampinji, wamweni nindi munichi chisela mwadiña madombu niyuma yatama. Dichi wahanjekeli nawaeluda amavulu, ejima wawu azatishili Nsona hakumukwasha. “Yehova wantemesheleli antu amawahi, nawa namutiyilili Nzambi, hela chakwila hahitili mpinji.” Komana mwekala adizoza chikupu kutambwila wukwashu?

17, 18. (a) Yehova nakukeña nindi atwansi eleñadi? (b) Yumanyi yaditoñeshañawu antu neyi anakuli, nawa munateli kutondwelela ñahi yuma yamuchidiwu? Shimunenu chakutalilahu.

¹⁷ “Eyi mukwenzi [hela chañadima] zañalalaku hawukwenzi weyi, muchima weyi wukuluñishi hamafuku awukwenzi weyi.” (Mukwa. 11:9) Mwamweni, Yehova nakukeña enu atwansi ejima muzañalaleña nankashi. Achinu chibaaba chinashimu njila yimu yikuyikwasha kwila mwenimu. Toñojokenuña hakukalakala nyidimu yakuspiritu nawa mutwamijenuñaku Yehova muyuma yejima yimukufuukulaña. Neyi mutachika kutoñojoka hayumiyi himuchidi atwansi, Yehova wukuyikwasha, wukuyikiña nawa wukuyikiswila. Toñojokenuña hakufumba kwekala Mwizu daNzambi nawa ovwahilenuña kufumba kwakwila nawu: “Anukaña nawa Nleñi yeyi mumafuku awukwenzi weyi.”—Mukwa. 12:1.

¹⁸ Kwosi muntu watwalekañahu kwikala kansi. Atwansi amavulu akulaña swayi. Chawushona, akulumpi amavulu, aditoñeshaña nawa chayikataña kumuchima muloña afuukwilihu chiwahi wanyi hampinji yadiñawu atwansi hela atoñojokelihu wanyi yuma yakelawu kumbidi. Ilaña atwansi atoñojokaña hakuzata nyidimu yakuspiritu makonu aditoñeshaña wanyi hayuma yafuukwiliwu neyi anakuli. Dichuma cheliliyi Mirjana, hadiñayi kampululu wadiña nachawaana mujakuhema. Amutondeli kuya nakuhema yisela yatenañawu nawu Winter Olympic Games, ilaña wafuukwilihu kuzata mudimu wampinji yejima. Mirjana nakalakali yaaka kubadika ha 30, nawa natwalekihu kuzata mudimu wampinji yejima hamu nanfumwindi. Wahosheli nindi: “Mpuhu, kulema, ñovu nimaheta hiyuma yakampinji kantesha nawa hitwatela kufuukula kwila yuma yamuchidiwu muchihandilu chetuku. Chuma chalema hikumukalakela Nzambi nikukwasha antu amakwawu kumukeña Nzambi.”

19. Shimunenu yuma yayiwahi yafumaña mukusha maana hakuzata nyidimu yakuspiritu henohu muchidi atwansi.

¹⁹ Atwansi muchipompelu akeñekaña kuyihameka chikupu muloña amonaña kukala ilaña atwalekañahu kumukalakela Yehova muchihandilu chawu. Atwansi elaña mwenimu kuhitila mukwila yuma yakuspiritu yafuukulawu nikutwamijaku mudimu wakushimwina. Kubombelahu, hiyaluwankanaña nayuma yamukaayiku. Enu atwansi, ilukenu nenu nyidimu yimunakukalakala yalema. Ilukenu nenu amanakwenu niahela akuyikwashaña nawa neyi mutwamijaku Yehova, yuma yejima yimunakufuukula kwila muchihandilu yikwendaña hohu chiwahi.