1. Yehova wayikolesheli nindidi antu hadikañiliwu muEdeni?

KUFUMA tuhu hekaliliwu antu nanshidi nikubula kuwanina, Yehova nadimwekeshi hatooka nindi hiNzambi wakoleshaña. Chelili tuhu antu adikañi muEdeni, wayilejeli anyana kaAdama akavwalika kumbidi mazu akuyikolesha. Bayi neyi antu ajimbesheli yuma yejimaku. Wuprofwetu wasonekawu ha Kutachika 3:15 wayinkeli antu kuchiñeja kwakwila nawu “kapela wakushankulu,” Satana Diyabolu ninyidimu yindi yejima yatama akayijilumuna.—Chim. 12:9; 1 Yow. 3:8.

2. Yehova wamukolesheli ñahi Nowa?

² Kambuña aYehova Nowa washakamineña mukaayi mwadiña antu atama, yena nichisaka chindi hohu diwu adifukwileña kudi Yehova. Chineli ituña mwashakamineñawu mwenzeli madombu niyilwilu yawuvumbi, hadaha Nowa wadi kuzeya. (Kutach. 6:4, 5, 11; Yuda 6) Ilaña Yehova wamulejeli mazu akukolesha amukwashili yatwalekihu ‘kwenda naNzambi.’ (Kutach. 6:9) Yehova  wamulejeli Nowa nindi wakajilumuna akana kaayi katama nawa wamulejeli yuma yakwila hakwila chisaka chindi chikapuluki. (Kutach. 6:13-18) Yehova wadimwekesheli kudi Nowa nindi hiNzambi wakoleshaña.

3. Yoshuwa amukolesheli nawudi? (Talenu mwevulu wakutachikilahu.)

³ Yoshuwa niyena wadiña namudimu weneni chikupu wakulombola antu jaNzambi Mwituña daChikaninu. Mwadibombeleli kulukuka nyisumba yañovu yadiña mudina iluña. Yoshuwa watela watiyili woma. Hamuloña wachumichi, Yehova wamulejeli Mosi kumukolesha Yoshuwa. Dichi Nzambi wahosheli nindi: “Chiña wumuleja Yoshuwa, wumukundeji, wumukoleshi; muloña yena diyi wakazambukañahu dehi kumbidi yawantu awa, wakayiswanisha ituña diwakamona.” (Kuhit. 3:28) Henohu Yoshuwa kanda yatachiki kuzata iwu mudimu, Yehova wamukolesheli, nakuhosha nindi: “Netu nakuleji? Kadikwatishaña, wakomikaña chacheni, bayi wakatiyaña womaku, bayi wakaakama akwenuku; muloña Yehova Nzambi yeyi wudi naneyi mwejima muwukuya.” (Yosh. 1:1,  9) Awa mazu amukolesheli chikupu!

4, 5. (a) Yehova wayikolesheli nindidi antu jindi akunyima? (b) Yehova wamukolesheli ñahi Mwanindi?

⁴ Yehova hakoleshaña hohu muntu nkawindiku, ilaña wayikoleshaña cheñi hamu neyi izanvu. Yehova wahosheli mumazu indi awuprofwetu nakuyikolesha aYudeya akwatiliwu muwunkoli muBabiloni nindi: “Bayi wutiyaña womaku, ami nidi neyi. Bayi wuyeñashanaku, ami yami Nzambi yeyi, nakakwinkaña ñovu; chalala nakakukwashañaku; chalala nakakukwataña chachiwahi nachikasa chami chachidiilu chakuloña.” (Isa. 41:10) AkwaKristu akusambila ayikolesheleña nawa niantu jaNzambi makonu ayikoleshaña.—Tañenu 2 Akorinda 1:3, 4.

⁵ Yesu niyena amukolesheli kudi Tata yindi. Hamupapatishileñawu, Yesu watiyili izu kufuma mwiwulu nawu: “Iwu diyi Mwanami, inakeña, inatiyaña kuwaha.” (Mat. 3:17) Awa mazu amukolesheli Yesu hampinji yadiña nakushimwinayi hamaseki!

6. Chishimu chantalenta chatukoleshaña ñahi?

⁶ Yesu wamwimbujoleleña Tata yindi. Chishimu chantalenta chahosheliyi Yesu muwuprofwetu kutalisha hakukuma kwanshakaminu yamakonu, chayikoleshaña antu kwikala ashinshika. Mwanta wamulemesheli nduñu wejima washinshika namazu akwila nawu: “Wuzataña, eyi nduñu wamuwahi nawa washinshika! Wunashinshiki muyuma yantesha. Dichi inakukutonda wiikali kalama wayuma yayivulu. Zañalelaku hamu nankaaka yeyi.” (Mat. 25:21, 23) Awa mazu atukoleshaña chikupu kutwalekahu kumukalakela Yehova nakashinshi!

7. Yesu wayikolesheli ñahi apostolu indi, nawa wamukolesheli ñahi Petulu?

⁷ Apostolu aYesu kakavulu atobokeleña muloña wakufwila wukulumpi hakachi kawu, ilaña Yesu wadiwunjikili nakuyikolesha kulonda ekali adizoza nawa ekali akwakukalakela akwawu, bayi anyantaku. (Luka 22:24-26) Kakavulu Petulu waluwañesheleña nawa wamukaanini Yesu. (Mat. 16:21-23; 26:31-35, 75) Chatela yamukaani Petulu, ilaña Yesu wamukolesheli nawa wamwinkeli mudimu wakukolesha amanakwindi.—Yow. 21:16.

8. Hezekiya wakolesheli ñahi akulumpi janjita niantu amuYuda?

⁸ Nihampinji yelili Mwana kaYehova kanda  yenzi hamaseki nakuyileja chakukolesha antu, ambuña aYehova ashinshika adiña nakukolesha akwawu. Hayitiyishiliwu woma kudi Ashuri, Hezekiya wapompesheli akulumpi anjita niantu amuYuda nakuyikolesha. “Nawa antu hiyakushindamena hamazu [indi.]”—Tañenu 2 Kushindulula 32:6-8.

9. Mukanda waYoba watudizishañadi kutalisha hakukolesha akwetu?

⁹ Hela chakwila Yoba wakeñekeleña kumukolesha, ilaña wayikolesheli “akwakukundeja akukabisha” asatu, chuma chitwatela kudizilaku neyi tunakukolesha akwetu. Wayilejeli nindi neyi yena diyi wadiña wakola, ‘wadi kuyikolesha nakanwa kindi, wadi kuwundisha chikela chawu nakuyikokweja nanyivumbu yindi.’ (Yoba 16:1-5) Nkumininaku, Yoba amukolesheli kudi Elihu niYehova yomweni.—Yoba 33:24, 25; 36:1, 11; 42:7, 10.

10, 11. (a) Muloñadi mwana kaYefwata wamumbanda chakeñekeleleñayi kumukolesha? (b) Anyi akeñekaña kuyikolesha makonu?

¹⁰ Muntu mukwawu wakunyima wakeñekeleña kumukolesha himwana kaYefwata wamumbanda. Henohu kanda yayi nakulwa njita nawaAmoni, nsompeshi Yefwata wamukanini Yehova nindi neyi amwinkawu aAmoni, muntu watachi wakedika nakumukinkilila neyi nafumi kunjita wakamuhana kulonda yakazateña mudimu waYehova mwitala dindi. Dichi mwanindi wamumbanda, mwanindi wumu hohu, diyi wenjili nakumukinkilila nikuzañalela hamu nindi hanyima yakushinda. Muchima waYefwata wabalukili. Ilaña washikijili mwakaniniyi nawa wamutwalili mwanindi wamumbanda wabulahu dehi kubulakana neyala kuShilo kulonda yakakalakeleña hatabanaka mukuhanda kwindi kwejima.—Ansomp. 11:30-35.

¹¹ Hela chakwila chamukalilili Yefwata, ilaña chaswejeli kumukalila nankashi mwanindi wamumbanda, wadihanini kulonda yashikiji mwakaniniyi tata yindi. (Ansomp. 11:36, 37) Dichi wadi kusumbuka wanyi, kuvwala anyana nikukiña ijina dachisaka niwuswana. Wakeñekeleña kumukundeja nikumukolesha chikupu. Bayibolu yashimunaña nawu: “Chelili chijila muIsarela, anyana awambanda aIsarela hiyakuya hamwaka hamwaka nakumudila mwana kaYefwata wakuGileyadi mafuku awana hamwaka.” (Ansomp. 11:39, 40) Komana kwila tuyihameka nikuyikolesha akwaKristu ajiki anakuzatisha wujiki wawu muloña “[wakwakamena] yuma yaMwanta” nehi?—1 Kor. 7:32-35.

12, 13. Petulu ‘wakolesheli ñahi amanakwindi’?

¹² Hawufuku wakwila kanda yafwi, Yesu wamulejeli kapostolu Petulu nindi: “Shimona, Shimona, tiyaña! Satana nalombi kulonda yayipepi wejima wenu neyi tidiku. Ilaña nayilombeliku nakulembelela nami chikuhwelelu chenu chibuli kuzeya; nawa enu neyi munafunti, mwakakoleshi amanakwenu.”—Luka 22:31, 32.

¹³ Petulu wekalili chishimi muchipompelu chawakwaKristu akusambila. (Ñal. 2:9) Wakolesheli amanakwindi muloña wakuhamuka kwamwekesheliyi haPentekosta nihanyima Pentekosta. Kumakumishilu amudimu windi wakushimwina wazatiliyi mpinji yayilehi, wayisonekeleli akwawu akwaKristu. Walumbulwili nindi: “Nayisonekeli enu mazu antesha kulonda niyikoleshi nikuyileja wunsahu waweni chikupu nami ilu hiluwi lwaNzambi lwalala. Kolelenuña chikupu muluwi  lwenilu.” (1 Pet. 5:12) Nyikanda yonenewa yasonekeliyi Petulu yinatwalekihu kukolesha akwaKristu ejima kufuma kunyima kushika niyinu mpinji yitudi kwakwihi netuña dadiha ditwatalilaña kwesekeja nachikaninu chaYehova.—2 Pet. 3:13.

14, 15. Indi nyikanda yonenewa yasonekeliyi kapostolu Yowanu yinakoleshi ñahi akwaKristu kufuma tuhu kunyima?

¹⁴ Kapostolu Yowanu niyena wadiña chishimi muchipompelu chawakwaKristu akusambila. Nsañu Yayiwahi yasonekeliyi hamudimu waYesu yinakoleshi akwaKristu kufuma tuhu kunyima kushika nimakonu. Hakachi kanyikanda yaNsañu Yayiwahi, mumukanda waYowanu hohu dimwekala mazu ahosheliyi Yesu akwila nawu kukeña dichinjikijilu chakuyilukilaku atumbanji twindi alala.—Tañenu Yowanu 13:34, 35.

¹⁵ Munyikanda yisatu yaYowanu mwekala cheñi nsañu yikwawu yalema. Neyi tunaneñi hamuloña wanshidi, komana twazañalalaña wanyi neyi tutaña netu “mashi aYesu . . . atutookeshaña kunshidi jejima”? (1 Yow. 1:7) Nawa neyi tutwalekahu kudinka nyiloña, komana twakokeleshewaña wanyi nikusakilila neyi tutaña netu “Nzambi wabadika nyichima yetu”? (1 Yow. 3:20) Yowanu hohu nkawindi diyi wasonekeli nindi “Nzambi hikukeña.” (1 Yow. 4:8, 16) Mukanda windi wamuchiyedi niwamuchisatu wahamekaña akwaKristu “anakwenda muchalala.”—2 Yow 4; 3 Yow 3, 4.

16, 17. Kapostolu Pawulu wayikolesheli nindidi akwaKristu akusambila?

¹⁶ Hadaha, kapostolu Pawulu diyi wakolesheli nankashi amanakwindi mumafuku awapostolu. Chinamwekani neyi mumafuku awakwaKristu akusambila, apostolu amavulu  ashakamineña muYerusalema, mwadiña izanvu dalombolaña. (Yilw. 8:14; 15:2) AkwaKristu amuYudeya ashimwininineña hadi Yesu kudi antu adiña akuhwelela dehi mudi Nzambi wumu. Kwambukaku, kapostolu Pawulu amulombweli naspiritu yajila kuya nakushimwina kudi aGiriki niaRoma adifukwileña kudi anzambi amavulu.—Ñal. 2:7-9; 1 Tim. 2:7.

¹⁷ Pawulu wanyeñumukili nankashi mwituña dinakutenawu katataka nawu Turkey, nawa wayili cheñi kuGreece nikuItaly nakutuña yipompelu yawakwaKristu kudi antu abulili kwikala aYudeya. Awa akwaKristu amaha “ayikabishileña kudi antu amwituña [dawu]” dichi akeñekeleña kuyikolesha. (1 Tes. 2:14) Kwakwihi nachaaka cha 50 C.E., Pawulu wasonekeleli chipompelu chachiha chamuTesalonika nindi: “Twamusakililaña Nzambi mpinji yejima chitwayitenaña wejima wenu mukulomba kwetu, muloña mpinji yejima twanukaña mudimu wenu wumwazatili nachikuhwelelu nikukeña nichimwomikili.” (1 Tes. 1:2, 3) Wayilejeli cheñi nindi adikolesheña wumu namukwawu chashimwiniyi nindi: “Dikoleshenuña wumu namukwawu nikudituña wumu namukwawu.”—1 Tes. 5:11.

18. Izanvu dalombolaña damumafuku awapostolu damukolesheli ñahi Fwilipu?

¹⁸ Izanvu dalombweleña mumafuku awapostolu dadiña nakukolesha akwaKristu adiña nakulombola niakwaKristu ejima. Fwilipu mukwakushimwina chashimwinineñayi kudi aSamariya hadi Kristu, amukwashili chikupu kudi izanvu dalombolaña. Datemesheli amamembala ayedi, Petulu niYowanu, kuya nakuyilombelaku awa antu etiyili kulonda atambwili spiritu yajila. (Yilw. 8:5, 14-17) Fwilipu hamu niantu akwashiliyi kwikala akwaKristu akolesheweli chayikwashiliwu kudi izanvu dalombolaña.

19. Yumanyi yafuminimu chelili izanvu dalombolaña ditemesheli chipompelu chawakwaKristu akusambila mukanda?

¹⁹ Kuhiñahu izanvu dalombolaña adihwili kufuukulahu neyi akwaKristu abulili kwikala aYudeya atela kuyalamisha hela nehi, neyi chichadiña kudi aYudeya kwesekeja nanshimbi jaMosi. (Yilw 15:1,2) Hanyima yakuyikwasha kudi spiritu yajila nihanyima yakushinshika muNsona, izanvu dalombweleña dafuukwilihu nawu hiyatela kwalamaku nawa dasonekeleli yipompelu mukanda kutalisha haniyi nsañu. Izanvu dalombolaña datemesheli amanakwetu kutwala mukanda kuyipompelu. Yumanyi yafuminimu? “Chamanishiliwu kutaña iwu mukanda, azañaleli nankashi nanochu chayikolesheliwu.”—Yilw. 15:27-32.

20. (a) Izanvu Dalombolaña makonu dakoleshaña ñahi amanakwetu mukaayi kejima? (b) Chibaaba chinalondelihu chikakula lwihwinyi?

²⁰ Makonu Izanvu Dalombolaña dawaYinsahu jaYehova dakoleshaña amamembala amuchisaka chaBeteli, azataña mudimu wakushimwina wampinji yejima kushilahu niamanakwetu akwaKristu amukaayi kejima. Akoleshewaña neyi chayikolesheliwu akwaKristu akusambila, azañalalaña nankashi nanochu chayikoleshañawu. Kubombelahu, mu 2015 Izanvu Dalombolaña dedishili buloshuwa yaFuntenu kudi Yehova, nawa iyi buloshuwa yinakoleshi antu amavulu nankashi kunyeñumuka kaayi kejima. Komana amanakwetu alombolaña hohu diwu atela kumwimbujola Yehova kukolesha amakwawu? Chibaaba chinalondelihu chikakula ilu lwihu.