1, 2. (a) Muloñadi antu adiñaku mumafuku akapostolu Pawulu chiyahosheleleñawu nankashi hawuduñu nihakusubuka? (b) Pawulu wayilejeleña antu nindi kudinyi kwatela kuwanawu kusubuka kwalala?

ANTU adiña muRoma, ashakamineña nawakwaKristu akusambila, adivwimbileña nakudimona nawu diwu eluka nshimbi, eluka kusompa nawa asubuka. Ilaña, ñovu nikulema kwaWanta wawaRoma akwimwekesheleleña hadi anduñu. Mpinji yimu, antu akushika kuma pesenti 30 amwituña adiña anduñu. Chakadi nikujina, antu niakwaKristu ahosheleña nankashi hawuduñu nihakusubuka.

² Nyikanda yasonekeliyi kapostolu Pawulu yahosha nankashi hakusubuka. Hela chochu, bayi neyi yahosheleña hansañu yakusubuka kwakeñeleñawu antu mwituña hayina mpinjiku. Pawulu niakwawu akwaKristu hiyayileña kudi anyuuli nakulomba lusesa kulonda ekali asubukaku, ilaña azatileña nañovu kukwasha antu amakwawu kulonda eluki nsañu yayiwahi yaWanta waNzambi nikuyileja kulema kwefutu danyiloña dahaniniyi Yesu Kristu. Pawulu wayilejeli amanakwindi akwakwitiya kunateli Kuwanawu kusubuka kwalala. Chakutalilahu, mumukanda windi wamuchiyedi  wayisonekeleliyi akwaKristu amuKorinda, wahosheli nindi: “Yehova hiSpiritu, nawa kwejima kudi spiritu yaYehova, kwenoku dikwekala nikusubuka.”—2 Kor. 3:17.

3, 4. (a) Chumanyi chaletesheli Pawulu kusoneka mazu ekala ha 2 Akorinda 3:17? (b) Twatela kwiladi hakwila tudiluñisheña kusubuka kwafumaña kudi Yehova?

³ Kumatachikilu amukanda wayisonekeleliyi Akorinda, Pawulu wahosheli hakulema kwaMosi hasulukiliyi haMpidi yaSinayi hanyima yakufuma kumesu akañelu kaYehova. Antu chiyamumweniwu Mosi atiyili woma, dichi Mosi wadibutili ihina kumesu. (Kwid. 34:29, 30, 33; 2 Kor. 3:7, 13) “Ilaña,” Pawulu walumbulwili nindi, “neyi muntu yabalumukila kudi Yehova, idi ihina adibutununañahu.” (2 Kor. 3:16) Mazu ahosheliyi Pawulu atalisha mudihi?

⁴ Neyi chitwadizili muchibaaba chinafumihu, Yehova, Nleñi wayuma yejima, diyi Muntu hohu wadiluñishaña kusubuka kwakweni nawa kwakadi mwakukumina. Chidi hohu chiwahi kutoñojoka netu kudi Yehova nawa “kwejima kudi spiritu yaYehova”, dikwekala nikusubuka. Hela chochu, hakwila tudiluñishi iku kusubuka, twatela ‘kubalumukila kudi Yehova,’ dikwila nawu kwikala ibwambu dindi. A Isarela hadiñawu muchinkalampata hiyamweneña chayikwashileñawu kudi Yehovaku. Nyichima niyitoñojoka yawu yabutikili nawa yachinchikili, ashili maana hakudiluñisha kusubuka kwakumujimba kwabuliliwu muEjipitu.—Heb. 3:8-10.

5. (a) Spiritu yaYehova yaletaña kusubuka kwamuchidinyi? (b) Tuneluki ñahi netu kusubuka kwatwinkayi Yehova kwatwalekañahu hela chakwila anatukasi? (c) Malwihwinyi itwatela kwakula?

⁵ Hela chochu, kusubuka kwenzaña hamuloña waspiritu yaYehova kwabadika chikupu kusubuka kwakufuma muwuduñu wakumujimba. Antu akañanyaña kuleta kusubuka kwalala. Ilaña spiritu yaYehova yaletaña kusubuka kwalala kwakwikala asubuka kunshidi nikukufwa, nikusubuka muwuduñu wakudifukula kwakutwamba nitushidikilu twaku. (Rom. 6:23; 8:2) Iku hikusubuka kwakweni chikupu! Muntu nateli kudiluñisha iku kusubuka hela chakwila anamukasi hela wudi muwuduñu. (Kutach. 39:20-23) Dichuma chamumwekeneni Muhela Nancy Yuen niManakwetu Harold King, ejima wawu ayikasili yaaka yayivulu mukaleya muloña adiña nachikuhwelelu. Alumbulula yuma yayimwekeneni nawa munateli kuyiwana haJW Broadcasting. (Yenu hanasonekiwu nawu INTERVIEWS AND EXPERIENCES > ENDURING TRIALS.) Hela chochu, twatela kudihula netu, tunateli kumwekesha ñahi netu twalemesha kusuba kwetu? Nawa tunateli kuzatisha ñahi chiwahi kusubuka kwetu?

6. A Isarela amwekesheli ñahi kubula kusakilila hakusubuka kwayinkeliyi Yehova?

⁶ Neyi twiluka kulema kwachawaana, tunateli kumwekesha kusakilila kudi muntu wunatwinki chawaana. A Isarela hiyamwekesheli kusakilila hakusubuka kwayisubwiliyi Yehova hayifumishiliyi muwuduñu muEjipituku. Hahitili hohu tukweji twantesha kufuma hayifumishiliwu muwuduñu, atachikili kufwila yakuda yadileñawu muEjipitu, nawa adiwili yakuda yayinkeleñayi Yehova chakwila akeñeleña nikufunta kuEjipitu. Alemesheliku ‘inshi, tutanda, mafu, sapoli nikanyenzi’ kubadika kusubuka kwayinkeliyi Nzambi kwakudifukula kudi Nzambi walala, Yehova. Tahindi dichaletesheli Yehova yazuweña hadi antu jindi? (Kuch. 11:5, 6, 10; 14:3, 4) Twatela kudizila kuniyi nsañu.

7. Pawulu wazatili ñahi kwesekeja nakufumba kwindi kwekala ha 2 Akorinda 6:1, nawa ninetu tunateli kwila ñahi mwomumu?

 ⁷ Kapostolu Pawulu wayilembeleleli akwaKristu ejima nindi alemesheña kusubuka kwatwinkayi Yehova mukudikeñela kuhitila mudi Mwanindi, Yesu Kristu. (Tañenu 2 Akorinda 6:1.) Toñojokenu chichamukatileña Pawulu nichamukabishileña chinleji chindi muloña wakwikala muwuduñu wanshidi nikufwa. Hela chochu, wahosheli mazu akusakilila nindi: “Namusakilili Nzambi kuhitila mudi Yesu Kristu Mwanta wetu!” Muloñadi? Wayilumbulwilili akwawu akwaKristu nindi: “Muloña lushimbi lwaspiritu lwahanaña wumi kuhitila mudi Kristu Yesu, lunayisubuli kulushimbi lwanshidi nilwakufwa.” (Rom. 7:24, 25; 8:2) Kufwana Pawulu, ninetu twatela kulemesha chatukuulayi Yehova kuwuduñu wanshidi nikufwa. Hamuloña wefutu danyiloña, tunateli kumukalakela Nzambi nachinleji chitooka nikwikala namuzañalu hakumukalakela.—Mas. 40:8.

8, 9. (a) Kapostolu Petulu watusoñamishili nindidi kutalisha hakuzatisha kusubuka kwetu? (b) Kukalanyi kutwamonaña makonu?

⁸ Kubombela hakumwekesha kusakilila, bayi tuzatishaña chatama kusubuka kwetuku. Kapostolu Petulu watusoñamishili kubula kuzatisha kusubuka kwetu kulonda tukoñeleñamu yuma yafwilaña mujimba. (Tañenu 1 Petulu 2:16.) Komana iku kusoñamisha, kunayanukishi wanyi yuma yayimwekeneni aIsarela muchinkalampata? Nawa ninetu tudi muniku kukala, hadaha kunabadiki nankashi. Satana nikaayi kindi aletaña yuma yakokolaña kuhitila munvwalilu nimmwekenu, yakuda niyakunwa, kuhema niyisela, kushilahu niyuma yikwawu. Antu atiyakeshaña yuma yawu yakulandisha kakavulu azatishaña antu amwekanaña lubanji kulonda atukokoli tulandi yuma yitunakubula kukeña. Dichi tunateli kuzatisha kusubuka kwetu chatama kuhitila mukulanda yuma yitwabula kukuhwelela.

⁹ Tunateli kukuzatisha cheñi kufumba kwaPetulu muyuma yalema yamuchihandilu, yidi neyi kutaña shikola, kutonda nyidimu hela yuma yakwila. Chakutalilahu, atwansi amavulu makonu kumashikola afwilaña kuzata nañovu kulonda akayi kumashikola ahewulu. Ayilejaña nawu neyi ataña shikola yahewulu akeñila nyidimu yamali amavulu kubadika ejima ataña mashikola amwishina. Muloña wayuma yafwilañawu muchihandilu, atwansi amavulu anateli kuyikokola nayuma yamuchidiwu. Chumanyi chatela kwanukawu atwansi nianvwali jawu?

10. Yumanyi yitwatela kwanuka neyi hitukuzatisha kusubuka kwetu hakutonda yuma yitunakukeña?

¹⁰ Antu amakwawu atoñojokaña nawu chineli kutondahu iyi yuma hichisenda chamuntu yomweni, atela kwikala asubuka kutonda yuma yinayitiyishi kuwaha chakala hohu chinleji chawu chinayiteji. Hadaha anukaña mazu aPawulu ayisonekeleliyi akwaKristu akuKorinda kutalisha hayakuda nindi: “Muloñadi kusubuka kwami chiyakukusompeshelawu nachinleji chamuchima chamuntu wacheñi?” (1 Kor. 10:29) Hela chakwila twasubuka kutondahu kwila yuma yidi neyi kutaña shikola niyuma yakwila, ilaña twatela kwanuka netu kusubuka kwetu kukweti mwakukumina nawa yuma yejima yitukufuukula kwila munateli kufuma yuma yayiwahi hela yatama. Dichaletesheli Pawulu kuhosha nindi: “Yuma yejima ayiteja munshimbi, ilaña bayi neyi yuma yejima yayiwahiku. Yuma yejima ayiteja munshimbi, ilaña bayi neyi yuma yejima yakoleshañaku.” (1 Kor. 10:23) Awa mazu atukwashaña kwiluka nawu kudi yuma yalema yitwatela kwila kubadika yuma yitwakeñaña neyi hitukuzatisha  kusubuka kutukweti muyuma yejima yitwelaña muchihandilu.

11. Muloñadi chatusubwililiwu?

¹¹ Hampinji yasoñamishileñayi kutalisha hakuzatisha chatama kusubuka, Petulu washimwini chikuma chitwatela kwila. Watulejeli kuzatisha kusubuka kwetu kwikala “anduñu jaNzambi.” Dichi, nkeñelu yayeni yaYehova yatusubwililiyi kufuma kulushimbi lwashindi nikufwa kuhitila mudi Yesu, wakeñeleña nindi tudihani nakwikala “anduñu jaNzambi.”

12. Chumanyi chitwadizilaña kudi Nowa nichisaka chindi?

¹² Njila yayiwahi yikutukwasha kubula kuzatisha kusubuka kwetu chatama nikubula kwikala anduñu akufwila yuma yamukaayi niyuma yakumujimba, hikufwila chikupu yuma yakuspiritu. (Ñal. 5:16) Shinshikenu chuma cheliliyi nkakulula Nowa nichisaka chindi. Ashakamineña mwituña mwadiña madombu niyilwilu yatama. Hela chochu, hiyetejeli yuma yakumujimba hela yuma yafwilileñawu antu ayinyeñumukili kuyiluwañeshaku. Chumanyi cheliliwu hakwila abuli kuyiluwañesha? Ashili maana hakuzata nyidimu yayinkeliyi Yehova, dikwila nawu kutuña watu, kupompesha yakuda yawu niyawatunyama nikusoñamisha antu amakwawu. ‘Nowa welili mwejima mwamulejeliyi Nzambi. Dimu mweliliyi.’ (Kutach. 6:22) Mwafuminidi? Nowa nichisaka chindi apulukili hakukuma kwakana kaayi.—Heb. 11:7.

13. Mudimwinyi wamwinkeliwu Yesu nawa wenkeliyi akwakumulondela?

¹³ Chumanyi chatulejayi Yehova nindi twileña makonu? Chineli tudi atumbanji twaKristu, tweluka chikupu netu Nzambi watwinka mudimu wakuzata. (Tañenu Luka 4:18, 19.) Makonu, antu amavulu ayiputisha mesu kudi nzambi yanshakaminu yamakonu nawa eluka wanyi nawu adi muwuduñu wakudifukula kwakutwamba, wakufwila yuma yakumujimba nimapolitikisi. (2 Kor. 4:4) Twatela kumulondela Yesu kuhitila mukukwasha antu kulonda amwiluki nawa adifukuleña kudi  Yehova, Nzambi wakusubuka. (Mat. 28:19, 20) Iwu mudimu wapela wanyi nawa mudi kukala kwakuvulu. Kumaluña amakwawu antu akalisha nawa amakwawu azuwa. Dichi wejima wetu twatela kudihula netu, ‘Kwila nizatisha kusubuka kwami kulonda nikwashi mudimu waWanta nehi?’

14, 15. Mudimu wakushimwina wunakusañumuna antu jaYehova kwiladi? (Talenu mwevulu wakutachikilahu.)

¹⁴ Twatiyaña kuwaha nankashi hakumona antu amavulu aneluki mpinji yitunashikimu nawa anapeleshiku yihandilu yawu kulonda azateña chikupu mudimu wakushimwina. (1 Kor. 9:19, 23) Amakwawu azatilaña mumaluña mwashakamañawu; amakwawu ayaña kudi kukaankila. Chileji chinakumwekesha nawu hadi yaaka yitanu yinahitihu, nambala yawantu akubadika ha 250,000 anatachiki kuzata wupayiniya wampinji yejima nawa nambala yawapayiniya ampinji yejima yinabadiki ha 1,100,000. Antu amavulu anakuzatisha chiwahi kusubuka kwawu kumukalakela Yehova!—Mas. 110:3.

¹⁵ Yumanyi yayikwashili awa amanakwetu niahela kuzatisha kusubuka kwawu chiwahi? Shinshikenu hadi John naJudith, anakalakeli mumatuña amavulu hadi yaaka 30. Anukaña nawu chatachikili Shikola yaMudimu yawuPayiniya mu 1977, yadiña nakukolesha nankashi akwakushimwina kuya nakuzatila kudi kukaankila. John wahosheli nindi hakwila nawu akalakaliku iwu mudimu, walekeli nyidimu kulonda apeleshiku chihandilu chawu. Chashikiliwu mwituña dacheñi, kulomba nikushindamena hadi Yehova dikwayikwashili kushinda kukala kwakudiza idimi dadiha, kwinjilila chisemwa niiluña dadiha. Atiyaña ñahi haniyi yaaka yinakalakaliwu mudimu wakushimwina? John wahosheli nindi: “Nakalakeli mudimu wawuwahi wunabulili kwiluka nawa wunabulahu dehi kuzata.” Watwalekelihu nindi: “Namwilukili chikupu Yehova nami hitata wukweti kukeña. Ichi natiyishishi chikupu chalumbuluka nsona yaYakoba 4:8 yahosha nawu: ‘Swinenu kwakwihi naNzambi, niyena wukuswina kwakwihi nanenu.’ Nelukili nami nawani yuma yinakeñeleña, muzañalu walala muchihandilu.”

16. Antu amavulu anazatishi ñahi kusubuka kwawu chachiwahi hela chakwila amonaña kukala?

¹⁶ Kwambukaku naJohn niJudith, antu amakwawu azatañaku wupayiniya hadi mpinji yantesha hohu muloña wakukala kwamwekanaña. Hela chochu, antu amavulu adihanaña kuzataku nyidimu yaWanta yakutuña mukaayi kejima. Chakutalilahu, hikwadiña kutuña kasanji keneni kuWarwick, New York, amanakwetu niahela akushika ku 27,000 adihanini kuzataku hadi nyilungu yiyedi, amakwawu tukweji, amakwawu chaaka chimu nikubadikahu. Amavulu apelesheliku yihandilu yawu kulonda azatiku iwu mudimu. Ichi hichakutalilahu chinakumwekesha nawu antu anakuzatisha chiwahi kusubuka kwayinkayi Nzambi kulonda amushimeki nikumulemesha Yehova, Nzambi wakusubuka!

17. Yumanyi yayiwahi yatalilañawu antu ejima azatishaña chiwahi kusubuka kwayinkayi Nzambi?

¹⁷ Twasakililaña muloña tunamwiluki Yehova nawa tunateli kudiluñisha kusubuka kwafumaña mukudifukula kwalala. Dichi tumwekesheña netu twalemesha kusubuka kuhitila muyuma yitwatondaña. Chatela tuzatisheña kusubuka kwetu chatama, tuzatisheña kusubuka kwetu nikukooleka kwafumañamu kulonda tumukalakeli Yehova kwesekeja nahanakumini ñovu yetu. Neyi twila mwenimu, tukutalilaña kudiluñisha nkisu yatushiikayi Yehova neyi mazu aniwu wuprofwetu anashikijewi dehi akwila nawu: “Yileñaleña niyena akayisubula kuwuduñu wakutoka nakwikala yasubuka mukulema kwawanyana kaNzambi.”—Rom. 8:21.