KAKAVULU, mumafuku akapostolu Pawulu kwadiña kwosi matu asendeleña antu. Hakwila muntu yayi nawatu, mukwakwenda wadiña nakwihula antu neyi chakwila anelukiku watu wunakusenda yiteli wayileña kunakuyayi nawa neyi chakwila wunateli kusendaku antu. (Yil. 21:2, 3) Hela chakwila watu wayileña kwacheñi, mukwakwenda wasulukileña kwayileña watu kulonda yakandami watu wacheñi wunakuya kunakuyayi.—Yil. 27:1-6.

Akwakwenda namatu hiyendeleña mpinji yejimaku, adiña nampinji yendeleñawu. Bayi neyi akwakwendesha matu abulileña kwendesha muloña wanchiluku, ilaña kudi yuma yikwawu yaletesheleña, yidi neyi amona ikololu nashakami hamwonji wambopolu nakuhosha hela neyi amona watu wunafwili kuchikumu. Neyi amona kudi mpepela yayiwahi atachikileña kwenda. Mukwakwenda neyi yawana watu wunakuya, wasendeleña yiteli yindi nakuya kwemenaña matu nakuhembelela kulonda abidiki mpinji yikunyamuka watu.

Mukwakushimuna nsañu wumu Lionel Casson wahosheli nindi: “Mumusumba waRoma akwakwenda ayipelesheleliku kwakuwanina matu akukandama chatela ayeña nakukeñakeña awenawu kwakukandamina. Iluña dimu kwakukandamina dadiña kukaloña Tiber. Mutawuni yaOstia mwadiña iluña dimu dadiña natusanji twatuvulu. Tusanji twenitu twadiña twawantu akweti matu adiña nayikumu yambokamboka: Aweni matu adiña akuNarbonne [yatenañawu makonu nawu France] adiña nakasanji kamu, akuCarthage [yatenañawu makonu nawu Tunisia] niwena adiña nakamu, . . . Kushilahu amakwawu. Muntu wudi wejima wunakukeña watu wakukandama, wayileña nakwihula kutusanji twenitu kulonda amoni watu wunakuya kunakuyayi.”

Kwendela hakaluñalwiji kwadiña nakukwashaku antu kuhemba mpinji, ilaña mwadiña wubanji. Kakavulu, Pawulu wadiña nakumona kukala hampinji yayileñayi halwendu lwawuminshonali, matu adiña nakukisika.—2 Kor. 11:25.