Manakwetu Winston, tulejiku chiwamwilukili Nzambi.

Ankulishili kudi anvwali abula kwitiya, twashakamineña hafamu muQueensland, Australia. Muloña wakushakama hahalehi nawantu, nadiña nakuhanjeka hohu nachisaka chetu. Chinashikijili yaaka 12, natachikili kukeñakeña chalala hadi Nzambi. Nalombeli kudi yena nakumuleja nami niluki chalala hadi yena. Nkuminaku, nafumini kufamu nawa nawanini mudimu kuAdelaide, South Australia. Hinadiña nayaaka 21, nayili nakunooka muSydney nawa twadibulakeni naPam. Dichi wanlejeli nsakililu yimu yaBritish-Israel, yahoshaña nawu aBritish afuma kumutaña waIsarela wajimbeli. Hadi iyi nyitaña, izanvu dahoshaña nawu, hinyitaña ikumi yawanta wakukabeta kaluwunda yayili muwunkoli muyaaka nkulakaji 8 B.C.E. Dichi chinafuntili kuAdelaide, natachikili kuhanjeka haniyi nsañu namukwetu mutwazatilileña wadiña nakudiza Bayibolu nawaYinsahu jaYehova. Hanyima yakuhanjeka nindi hadi maora antesha hohu, hayuma yakuhwelelawu aYinsahu, nelukili nami kulomba kwami kunalombeli kuwansi anakwakuli. Nadizileña chalala hadi Nleñi yami niWanta windi. Nawanini ‘mperola yasweja kulema wuseya.’—Mat. 13:45, 46.

Muhela Pam, ninenu mwatachikili kukeñakeña mperola muwansi. Mwayiwanini ñahi?

Nakulilili muchisaka chayileña munsakililu mumbaka yaCoffs Harbour, New South Wales. Anvwali jami niankaka akuhweleleli ntañishilu yezanvu daBritish-Israel. Mwanyikami weyala, yayami wamumbanda kushilahu tuhu niasonyi jami, atukulishili nakukuhwelela nawu Nzambi wakeña hohu antu akweti ankakulula jawu aBritish. Hela chochu, hinetejeli iyi ntañishiluku nawa natiyili nami nakundama kwakwihi naNzambi wanyi. Hinadiña  nayaaka 14, nayili mumachechi ambokamboka adi neyi, Anglican, Baptist, niSeventh-day Adventist. Hela chochu, hiyankwashili kumwiluka Nzambiku.

Chisaka chetu chabukilili kuSydney, kutwadibulakeneni naWinston, wayili nakunooka. Neyi chashimunayi hakusambila, nsañu yakwitiya yitwahanjekelihu yamuleñeleleli kudiza nawaYinsahu. Nyikanda yansonekeleleñayi mwadiña nsona jamuBayibolu. Natela kushimuna chalala, hakusambila nakameneneña nawa nahilileña. Nkumininaku, nenjili nakwiluka nami yuma yasonekeleñayi yadiña chalala.

Mu 1962, nabukilili kuAdelaide kulonda nikali kwakwihi naWinston. Wanloñesheleli kwakushakama, kudi aYinsahu adisumbula, Thomas naJanice Sloman, adiña amishonali muPapua New Guinea. Ammwekesheleleli luwi chikupu, nadiña hohu nayaaka 18, ilaña ankwashili kwiluka yuma yayivulu hadi Yehova. Dichi, ninami natachikili kudiza Izu daNzambi, hashimbwili wanyi nelukili nami nawani chalala. Chelili tunadisumbuli dehi naWinston, twatachikili kuzata mudimu wawuwahi wakumuzatila Yehova, mudimu wunatukwashi kulemesha mperola yayiwahi yitwawanini hela chakwila twahitileña mukukala.

Manakwetu Winston, tulejenuku chimwatachikili mudimu waYehova.

Hashimbwili wanyi nahitwadisumbwili naPam, Yehova watachikili kutwinka nyidimu yamaneni mumudimu windi. (1 Kor. 16:9) Mudimu watachi atulejeliwu kudi manakwetu Jack Porter, wadiña nkoñi wetu wañinza. (Chayinu mpinji twekala mamembala hamu muKomiti Yamutayi kuKasanji kaAustralasia.) Jack nimwinikwindi, Roslyn, Atukolesheli nawu tutachiki kuzata wupayiniya wampinji yejima, twadiluñishili iwu mudimu yaaka yitanu. Chinashikijili yaaka 29, ami naPam atwilili nawu tutachiki mudimu wawunkoñi hayitutu yakuSouth Pacific, yadiña mumakasa amutayi waFiji. Yitutu yeniyi yadiña American Samoa, Samoa, Kiribati, Nauru, Niue, Tokelau, Tonga, Tuvalu, niVanuatu.

Muniyi yaaka, antu adiña hayitutu yakwakulehi ayijinokeleña aYinsahu jaYehova, dichi twadiña ababala nawa asoñama. (Mat. 10:16) Yipompelu yadiña yanyanya nawa antu amakwawu adiña nakutuloñeshela hakukama wanyi. Dichi twalombeleña kudi antu amwiluña neyi chakwila akutwiteja kushakama nawu. Mpinji yejima adiña nakutukwasha.

Manakwetu Winston, mwakeñeli nankashi mudimu wakubalumuna. Chumanyi chaletesheli musweji kukeña iwu mudimu?

Chitwatachikili kuzatila hachitutu chaTonga, amanakwetu adiña hohu namatilakiti ninyikanda yantesha mwidimi daTongan, dahaPolynesian. Mumudimu wakushimwina azatishileña mukanda waChizungu waThe Truth That Leads to Eternal Life (Chalala Chalombolaña Kuwumi Wahaya Nyaka). Chikwadiña shikola yawakulumpi yanyilungu yiwana, akulumpi asatu amunidi iluña etejeli kubalumuna mukanda mwidimi daTongan hela chakwila elukishili Chizungu wanyi. Pam wasonekeli manyusikiliputi nawa twayitemesheli kumutayi wakuUnited States kulonda ayipulinti. Mudimu wejima wasendeli nyilungu 8. Hela chakwila twabalumwini chiwahi wanyi, iwu mukanda wakwashili antu amavulu ahoshaña idimi daTongan kudiza chalala. Ami naPam twekala akwakubalumuna wanyi, ilaña iwu mudimu watusañumwini.

Muhela Pam, chihandilu chadiña ñahi hachitutu kwambukaku nakuAustralia?

Chadiña chambukaku chikupu. Kwesekeja nakutwadiña, mumaluña amakwawu kwadiña ñweneni nankashi, kutata nikututa, nyilonda, yikatu nikukeha kwayakuda mpinji jikwawu. Munjila yikwawu, hakumana kwefuku nifuku, twatiyileña kuwaha kumona kaluñalwiji mufale yetu, ijina daSamoan diyatenañawu nachu matala akuPolynesia akwambila nanyisasa nawa abula jimbañu. Mpinji yikwawu nawufuku kakweji kadiña nakutoñeka chakwila twadiña nakumona nyitondu yanyiñaji nawa kakweji kadiña ninakutoñekela hakaluñalwiji. Iyi mpinji yadiña yayiwahi nankashi muloña yadiña nakutukwasha kutoñojoka  chikupu hayuma yayiwahi nikulomba chatela tutoñojokeña hayuma yatama.

Twakeñeli nankashi atwansi, adiña namaleñu nawa atiyili kuwaha kutumona etu anyitooka twafumini kwacheñi. Hampinji yitwendeleleli Niue, kakansi kamu kakwatili hawuvuji wadiña hamakasa aWinston nawa wahosheli nindi, “awa mavuji amawahi.” Chakadi nikujina, kanda amoneñahu dehi makasa awuvuji nawa welukili chakuwutena wanyi.

Twatiyili kutama hakumona antu chadiña nakukabakanawu. Adiña namaluña amawahi ilaña hiyadiña nayipateliku nawa hikwadiña menji amawahi akunwaku. Hela chochu, amanakwetu hiyadiña nakwakamaku. Kudi wena yadiña nshakaminu yayiwahi. Adiña namuzañalu kushakama hamu nachisaka chawu nikwikala neluña dakupompela, kuyadiña nakumushimekelawu Yehova. Chakutalilahu chawu chatukwashili kusha muchima hayuma yasweja kulema nikupeleshaku chihandilu chetu.

Muhela Pam, haniyi mpinji mwadiña nakutaha menji nikuloñesha yakuda kunidi iluña dadiha, mwatwesheli ñahi?

Nasakililaña muloña atata andizishili. Andizishili yuma yayivulu yidi neyi kubutula kesi nikutelekahu nichakuhanda nayuma yantesha yakumujimba. Mpinji yimu yitwayili kuKiribati, twashakamineña mukaditala kanyanya kakwambila namatahu nawa kakutuña namateti. Hakwila nawu niteleki, nadiña nakupunda kadibuku nikubutwilamu kesi nawa nashileñahu mafulu acoconut kulonda kesi kakwati. Kuya nakutaha menji twadiña nakwimana mumusululu hamu nawambanda amunidi iluña. Hakutaha menji, adiña nakuzatisha mutondu wadiña namamita 1.83 (6 ft) kwakasililiwu monji wanyanya, wamwekeneña neyi mubeñu. Chatela akasiliku ilowa kunsa yamonji, akasililiku chifoyu. Neyi yinashiki dehi mpinji yakutaha, muntu himuntu wadiña nakumbila monji mumenji nikuwukoka swayi. Chifoyu chelileña chideta iku naniku chinzala nimenji. Natoñojokeleña nami chapela, dichi mpinji yami yashikili. Nanatilili monji mwishima mapampa kakavulu, ilaña chifoyu cheteleña hohu hamenji nakufumpoka. Chelili ejima analeki dehi kuseha, mumbanda wumu wadihanini kunkwashaku. Awa antu adiña nakunkwasha nikuntiyila luwi.

Wejima wenu mwakeñeli mudimu wenu wumwazatilileña hayitutu. Kwila mutulejaku yuma yayiwahi yimwanukaña nehi?

Winston: Hahitili mpinji hakwila nawu tudizi chisemwa. Chakutalilahu, neyi amanakwetu anatuloñesheli yakuda, atwinkeleña yakuda yejima yadiñawu nayu. Hakusambila twelukili wanyi netu twatela kuyishilahu. Dichi twadiileña yakuda yejima yaloñesheleñawu. Hela chochu, chitwelukili chichadiña, twatachikili kuyishilahu. Hela chakwila twadiña nakuluwañesha, amanakwetu adiwileña. Hitwadiña mumudimu wawunkoñi, adiña nakutiya kuwaha kutumona neyi tunayendeli hanyima yatukweji 6 hela kubadikahu. Kufumishaku amanakwetu muchipompelu amudina iluña, yetu hohu aYinsahu amweniwu kufuma tuhu kunyima.

Neyi tunayendeli chadiña nakuhana wunsahu kudi antu amuniyi nyikala. Antu amavulu atoñojokeleña nawu amanakwetu adiña hohu kadizanvu kanyanya kabulakenaña hanichi chitutu. Dichi neyi ami niPam tunayendeli, antu ahachitutu enjili nakwiluka nawu komana amanakwetu akweti kuloñesha kwadakamenaña wumu namukwawu nawa atiyili kuwaha.

Pam: Chuma chimu chinanukaña hiyuma yamwekeni hampinji yitwadiña kuKiribati, kwadiña chipompelu mwadiña hohu amanakwetu niahela antesha. Mukulumpi wumu hohu wadiñaku, Itinikai Matera, wazatileña nañovu kulonda yatwakameni. Ifuku dimu wenjili iku nasendi chimpaya mwadiña iteta dimu. Wahosheli nindi: “Nayileteli.” Chadiña chakala kuwana iteta dakasumbi muyina yaaka. Hela chakwila aka kachuma kadiña kanyanya, ilaña kuhana kwawu kwadiña kwakufuma hamuchima.

Muhela Pam, chimwahitili yaaka mwatamishili, Chumanyi chayikwashili kuumika?

Nemitili mu 1973 hitwadiña muSouth Pacific naWinston. Twafuukwilihu kufunta kuAustralia,  chelili tunashakamiku dehi tukweji tuwana natamishili. Winston niyena waneñeli chikupu chineli wadiña mwanindi. Chineñi chadiña kumuchima chatachikili kumana chovu-chovu, ilaña chamanini wanyi sampu chitwatambwili Kaposhi Kakutalila ka April 15, 2009. “Malwihu Kufuma Kudi Antañi” lwihu lwadiña nawu: “Neyi nkemba yofwila mwivumu damama yindi, komana kuduhu kuchiñeja kudi kwejima kwakusañuka?” Ichi chibaaba chatukwashili kwiluka netu yuma yejima yidi mumakasa aYehova welaña yuma yayiwahi mpinji yejima. Wukooka yilonda yawantu amavulu yatukatishawu muwumi mukanu kaayi katama hampinji yakamulombolayi Mwanindi ‘kukisañana nyidimu yaSatana.’ (1 Yow. 3:8) Ichi chibaaba chatukwashili cheñi kulemesha chikupu “mperola” yitukweti etu antu jaYehova. Chineli tuneluki chalala hayuma yitwachiñejaña, twakundejewaña mpinji yejima hela chakwila tunakuhita mukukala kwambokamboka.

Hanyima yakwila tunajimbeshi dehi mwanetu, twatachikili cheñi mudimu wampinji yejima. Twazatiliku tukweji twantesha haBeteli yakuAustralia nawa twatachikili cheñi mudimu wawunkoñi. Mu1981, hanyima yakuzataku yaaka yiwana munyikala yamuNew South Wales niSydney, atutambikili kuya kumutayi wakuAustralia, neyi chawuteneneñawu kufuma tuhu kutachi.

Manakwetu Winston, komana yuma yimwahitilimu hayitutu yaSouth Pacific yayikwashili mumudimu wenu wawumembala Wakomiti Yamutayi muAustralasia?

Munjila jikwawu. Chatachi, kasanji kakuAustralia ayilejeli nawu akameneña American Samoa niSamoa. Nkumininaku, mutayi waku New Zealand awubombeli hamu naAustralia. Dichi maluña akamenañawu kudi mutayi waAustralasia mudi Australia, American Samoa niSamoa, the Cook Islands, New Zealand, Niue, Timor-Leste, Tokelau, niTonga, kumaluña kweniku nendeleliku neyi ñimenu wamutayi. Yuma yinamoni hakuzatila hamu nanawa amakwetu niahela ashinshika haniyi yitutu kunankwashi chikupu hayinu mpinji yinnakuyikalakela hakasanji kamutayi.

Mukukunkulula nikuhosha nami, ami niPam twelukili netu muyuma yejima yitunahitimu bayi neyi akulumpi hohu diwu atela kumukeñakeña Nzambiku. Atwansi niwena akeñaña “mperola yasweja kulema wuseya,” hela chakwila antu amakwawu muchisaka ashañaku maana wanyi. (2 Anya. 5:2, 3; 2 Kushi. 34:1-3) Kuhosha hohu walala, Yehova hiNzambi wukweti kukeña wunakukeña antu ejima, atwansi niakulumpi kwikala nawumi.

Ami niPam chitwatachikili kumukeñakeña Nzambi yaaka 50 yinahitihu, twelukili wanyi yuma yadi kufumamu. Chalala chaWanta himperola yasweja kulema wuseya. Tunakufwila chikupu kukwatisha kuniyi mperola yalema nañovu jetu jejima.