1. Chumanyi chinakufwila kwilawu ambuña aNzambi ejima, nawa muloñadi? (Talenu mwevulu wudi hakava.)

KRISTU YESU walejeli akwakumulonda nindi “yenu mwakelishi antu akunyuza yejima ekali atumbanji.” (Mat. 28:19) Ambuña aNzambi ashinshika ejima anakukeña kudiza chinateliwu ‘kuzata chikupu’ iwu mudimu wayinkawu kuzata. (2 Tim. 4:5) Iwu mudimu walema nankashi, nawa wunakukeñeka kuzatilahu swayi kubadika nyidimu yejima yamuchihandilu. Hela chochu, chinateli kwikala chakala kuzata mpinji yeneni kwesekeja nachitunakukeña.

2. Kukalanyi kwatukañeshaña kuzata chikupu mudimu wetu wakushimwina?

² Kudi nyidimu yikwawu yalema yakeñekaña kuzatisha mpinji niñovu jetu. Chakeñekaña kuzata maora amavulu hefuku kumudimu kulonda twikali namali akudikwasha nachu nikukwasha chisaka chetu. Chinateli kutukalila kuzata nyidimu yakwakamena chisaka chetu, indi kwiji twakata hela tunakuneña muloña wakukala kwenzaña muwushinakaji. Tunateli kudikita ñahi chikupu mudimu wakushimwina hela chakwila tunakuhita mukukala?

3. Tunateli kuhosha netudi kwesekeja namazu aYesu adi haMatewu 13:23?

³ Neyi kukala kutunakumona kunakutukañesha kuzata kwesekeja nahakumina ñovu jetu munyidimu yaYehova, bayi tuzeyaku. Yesu welukili nindi bayi neyi ejima anateli kuzata chochimu mumudimu waWantaku. (Tañenu Matewu 13:23.) Yehova walemesha nyidimu yejima yitwazataña mumudimu windi, chakala tunakuzata hanakumini ñovu jetu. (Heb. 6:10-12) Munjila yikwawu, tunateli kutoñojoka netu chihandilu chetu chikutwiteja wanyi kuzata nankashi. Muchinu chibaaba tukuhanjeka  chitunateli kutwamijaku mudimu wakushimwina muchihandilu chetu, kupeleshaku chihandilu nichitunateli kuwahishaku njila yakushimwinamu nikudizisha. Chatachi, kuzata chikupu mumudimu wakushimwina chatalisha mudihi?

4. Kuzata chikupu mumudimu wakushimwina kwatalisha mudihi?

⁴ Kazata chikupu mudimu wakushimwina kwatalisha mukwila nawu twatela kushimwina nikudizisha hakumina ñovu jetu. Hikwatalisha hohu hampinji yitunateli kushimwinaku. Chuma chalema kudi Yehova himuloña waweni wutwashimwinaña. Twazataña namuchima wetu wejima mumudimu wakushimwina muloña wakumukeña Yehova niakwetu antu. * (Maku 12:30, 31; Kol. 3:23) Kumukalakela Nzambi namuchima wetu wejima kwatalisha mukudihana etu aweni kuzatisha ñovu jetu nikuzata hakumina wuswa wetu mumudimu wakushimwina. Neyi twiluka netu kushimwina hikukoleka, tukuzataña chikupu hakumina ñovu jetu kushimwina nsañu yayiwahi kudi antu ejima.

5-6. Shimunenu muntu wukweti mpinji yantesha chinateliyi kutwamijaku mudimu wakushimwina.

⁵ Fwikijenu hadi iwu mukwenzi wembaña banjo [guitar]. Wakeña kwimba tumina mpinji yejima yinakeñiyi. Nkumininaku yeñila nimudimu wakwimba banjo kunsa yanyilungu kwiluña dakunookela kwalandishañawu yakuda nimadilinki. Hela chochu, hawanañamu mali amavulu akudikwasha nachuku. Dichi wazataña mudimu wakulandisha musitolu, kufuma haChimu nakushika haChitanu. Hela chakwila wazatishaña mpinji yindi yejima nakulandisha musitolu, ilaña wakeña kwimba tumina. Wafwilaña kukulukila mujakwimba nawa nakukeña kwikala ñimbi. Dichi, neyi nawaniku kapinji kantesha, wembaña tumina.

⁶ Munjila yoyimu, himukutwesha kwikala nampinji yakushimwina kwesekeja nachimunakufwilaku. Hela chochu, diyi mudimu imwakeña. Mwafwilaña kuwahishaku ntañishilu yenu kulonda muyishikeña antu hanyichima nansañu yayiwahi. Muloña wakwila mukweti nyidimu yikwawu yakuzata, munateli  kutachika kutoñojoka chimunateli kutwamijaku mudimu wakushimwina.

7-8. Tunateli kumwimbujola ñahi Yesu kutalisha hamudimu wakushimwina?

⁷ Yesu walemesheli nankashi mudimu wakushimwina. Chuma chadiñi chalema muchihandilu chindi hikushimwina haWanta waNzambi. (Yow. 4:34, 35) Wendeleña maluña amalehi kulonda ashimwini antu amavulu. Wakeñeleña njila yejima yakuhanjekelamu nawantu kumaluña kwawanikaña antu amavulu nikumatala awu. Yesu watwamijiliku mudimu wakushimwina muchihandilu chindi.

⁸ Tunateli kumwimbujola Kristu kuhitila mukwikalaku nampinji yakushimwina nsañu yayiwahi kudi kwejima nawa mpinji yejima. Twalekaña yuma yakuditiyisha nachu etu aweni kuwaha kulonda tuzateña mudimu wakushimwina. (Maku 6:31-34; 1 Pet. 2:21) Amakwawu muchipompelu hiyapayiniya adimena, ampinji yejima hela akukwasha. Amakwawu anadizi madimi acheñi amakwawu nawa anakuzatila kumaluña kudi kukankila. Ilaña, mudimu weneni wakushimwina awuzataña kudi akwakushimwina, azataña hakumina ñovu jawu. Hela chochu, Yehova hatulombaña chuma chitukubula kutwesha kumwinkaku. Wakeñaña wejima wetu kudiluñisha mudimu wajila hampinji yitwashimwinaña “nsañu yayiwahi yakulema yaNzambi wamuzañalu.”—1 Tim. 1:11; Kuhit. 30:11.

9. (a) Pawulu watwamijiliku ñahi mudimu wakushimwina hela chakwila wazatileña mudimu wakumujimba? (b) Yilwilu 28:16, 30, 31 yamwekeshaña nawu Pawulu welili ñahi namudimu wakushimwina?

⁹ Kapostolu Pawulu walemesheli nankashi mudimu wakushimwina muchihandilu chindi. Hampinji yadiñayi muKorinda halwendu lwamuchiyedi lwawumishonali, mali amumanini, dichi watachikili kuzata mudimu wakutuña matenti. Hela chochu, Pawulu hashili maana hamudimu wakutuña matentiku. Wazatili iwu mudimu kulonda yadikwashi nachu mumudimu wakushimwina mpinji yashimwinineñayi nsañu yayiwahi kudi aKorinda “chakadi kuyifwetesha.” (2 Kor. 11:7) Hela chakwila Pawulu wazatileñaku nyidimu yikwawu yakumujimba, kutwamijaku mudimu wakushimwina nawa washimwinineña haSabata yejima. Hanyima yakwila yuma yinawahiku, Pawulu “watachikili kusha maana chikupu hamudimu wakushimwina mazu, nakushimwina kudi aYudeya nakuyileñela eteji nawu Yesu diyi Kristu.” (Yil. 18:3-5; 2 Kor. 11:9) Hampinji yamukasililiwu mwitala dindi dakusonkela muRoma yaaka yiyedi, Pawulu wayishimwinineña enyi nawa wasonekeleña nyikanda. (Tañenu Yilwilu 28:16, 30, 31.) Kwosi chuma chetejeliyi Pawulu kwikala chalema kubadika mudimu windi wakushimwinaku. Wasonekeli nindi: “Muloña waniwu mudimu wunatukunjikiwu . . . , hitwazeyañaku.” (2 Kor. 4:1) Kufwana Pawulu, hela chikwila tunateli kuzata mpinji yeneni kunyidimu yakumujimba, twatela kutwamijaku mudimu waWanta muchihandilu.

10-11. Tunateli kudikita ñahi mumudimu wakushimwina hela chakwila tudi nakukala kumujimba?

¹⁰ Neyi tunakukañanya kushimwina kwitala nikwitala muloña wawushinakaji niyikatu kumujimba, tunateli kuzatishaku njila yikwawu yakushimwinamu. AkwaKristu akusambila ashimwinineña kwejima kwadiña antu. Ahanjekeleña nawantu chalala, kwitala nikwitala, kumaluña kwawanikileña antu, wunsahu wamumpanji “nawantu awanikileña” kudi kwejima. (Yil. 17:17; 20:20) Neyi chinakutukalila kwenda, twatela kushakama kumaluña kwawanikaña antu amavulu kulonda tushimwineña antu anakuhita. Hela twatela kushimwina wunsahu wamumpanji, kusoneka nyikanda, hela  kushimwina hafoni. Akwakushimwina amavulu akañanyaña kushimwina kwitala nikwitala muloña wayikatu hela kukala kukwawu, anateli kwikala namuzañalu neyi azatishañaku iji njila hakushimwina.

¹¹ Munateli kudikita chikupu mumudimu wakushimwina hela chakwila munakumona kukala kumujimba. Talenu cheñi chakutalilahu chaPawulu. Wahosheli nindi: “Nikweti ñovu yakuhita muyuma yejima muloña wanowu wanyinkaña ñovu.” (Fwi. 4:13) Pawulu wakeñeli iyi ñovu hampinji yakatiliyi halwendu lwindi lwawumishonali. Wayilumbulwilili Aŋalija nindi: “Chikatu chami dichanletesheli niyishimwini enu nsañu yayiwahi katachi.” (Ñal. 4:13) Munjila yoyimu, kukala kumukweti kumujimba kunateli kuyiletesha ninenu kushimwina nsañu yayiwahi kudi antu amakwawu, adi neyi, andotolu, anansi, niantu anakuyakamena. Awa antu ekalaña kunyidimu mpinji yendelaña akwakushimwina kumatala awu.

12. Kwikala nadisu “datala mumu hohu” chatalisha mudihi?

¹² Yesu wahosheli nindi: “Inoñu damujimba hidisu. Dichi neyi disu deyi datala mumu hohu[Hela “diweni,” tth.], mujimba weyi wejima wukutoñekaña.” (Mat. 6:22) Watalishili mudihi? Watalishili mukwila nindi twatela kupeleshaku chihandilu chetu hela kusha maana hachuma chimu,hela nkeñelu, bayi kuluwankanaku. Yesu yomweni wamwekesheli chumichi kuhitila mukusha maana hamudimu wakushimwina, nawa wayidizishili atumbanji twindi kusha muchima hakumukalakela Yehova nihaWanta Windi. Twamwimbujolaña Yesu neyi tutwamijaku  mudimu wakushimwina muchihandilu chetu, “kusambila kukeña Wanta[waNzambi] nikuloña kwindi.”—Mat. 6:33.

13. Chumanyi chinateli kutukwasha kusha maana hamudimu wakushimwina?

¹³ Njila yimu mutunateli kushila muchima hamudimu wakushimwina hikupeleshaku chihandilu chetu kulonda tuzatisheña mpinji yeneni kukwashaku antu amakwawu amwiluki Yehova nikumukeña. * Chakutalilahu, kwila tukeheshaku mpinji yitwazataña kumudimu kulonda twikaleñaku nampinji yeneni yakushimwina mumulungu nehi? Kwila tukeheshaku mpinji yakuhema yinakutumanishila mpinji nehi?

14. Yumanyi yeliliwu adisumbula kulonda ekaleña nampinji yeneni yakushimwina?

¹⁴ Chumichi dicheliliyi mukulumpi, Elias niñodindi. Walumbulwili nindi: “Hitwashikeneni kutachika wupayiniyaku, ilaña kudi yuma yitwelileña kulonda tuzatisheña mpinji yeneni mumudimu wakushimwina. Dichi twelileña tuyuma twanyanya kulonda tushimwineña nankashi. Chakutalilahu, twakehesheliku jakulandalanda, kuhema nawa twalombeli kudi antu atwiñija nyidimu kutukeheshelaku mafuku akuzata kulonda twikaleña nampinji yakushimwina. Yuma yafuminimu, twatachikili kushimwina namelela, kulombola atudizi aBayibolu amavulu nikushimwina kayedi mukachi kamulungu mukakweji. Twadiluñishili chikupu.

15-16. Kwesekeja na 1 Timotewu 4:13, 15, tunateli kutwalekahu ñahi kuwahishaku njila yakushimwinamu? (Talenu cheñi chikasha chinakwila nawu “ Yuma yinateli Kunkwasha Kudikita Chikupu Mudimu Wami Wakushimwina.”)

¹⁵ Njila yikwawu mutunateli kuzata chikupu mumudimu wakushimwina hikuwahishaku  njila yakushimwinamu. Antu azataña nyidimu yimu akeñekaña kutwalekahu kudiza mpinji yejima kulonda atweshi kwiluka yuma yayivulu. Dichuma chakeñekaña nikudi akwakushimwina aWanta. Twatela kutwalekahu kudiza kulonda twiluki chakushimwina.—Yish. 1:5; tañenu 1 Timotewu 4:13, 15.

¹⁶ Hanu dinu, tunateli kutwalekahu ñahi kwiluka chakushimwina? Hikutiyilila nakanañachima kunshimbi yitwatambwilaña muKupompa kwaChihandilu niMudimu kwamulungu nimulungu. Iku kupompa kwatudizishaña chikupu chitunateli kuwahishaku njila yakushimwinamu mwiha. Chakutalilahu, neyi cheyamani nakufumba atudizi adiña najimpanji, tunateli kudizilaku yuma yinateli kutukwasha mumudimu wakushimwina. Twatela kuzatisha yuma yitwadizili hampinji yitunakuhanjeka nsañu yayiwahi namuntu. Twatela kulomba wukwashu hela kuzata namukulumpi wetu wezanvu hela mukwakushimwina mukwawu wapama, chidi neyi payiniya hela nkoñi wañinza. Neyi tukulukila kuzatisha chozelu chejima chidi muChikasha chaYozelu Yakuzatisha Hakudizisha, tukudiluñishaña chikupu kushimwina nikudizisha.

17. Yumanyi yinateli kufumamu neyi mudikitaña chikupu mudimu wakushimwina?

¹⁷ Hikukoleka chikupu muloña Yehova watwiteja kwikala “akwakukalakala hamu” nindi. (1 Kor. 3:9) Neyi “[mwiluka] yuma yalema nankashi” nawa musha muchima hamudimu wakushimwina wawakwaKristu, ‘mukumukalakela Yehova nakuzañalala.’ (Fwi. 1:10; Mas. 100:2) Chineli mudi akwakumukalakela Nzambi, mwatela kukuhwelela chikupu nenu nateli kuyinka ñovu yimwakeñaña kulonda muzati nankashi mudimu wakushimwina hela chakwila munakuhita mukukala hela kudi yuma yinakuyikañesha. (2 Kor. 4:1, 7; 6:4) Hela chakwila kukala kumunakumona kukuyileñela kuzataku mpinji yantesha hela kushimwina chikupu, munateli ‘kuzañalala’ neyi muzataña namuchima wenu wejima mumudimu wakushimwina. (Ñal. 6:4) Neyi mudikitaña chikupu mudimu wakushimwina, mukumwekesha nenu mwamukeña Yehova niakwenu antu. “Muloña mukwila mwenimu, [mukadaamwina enu] aweni ninowu akutiyililaña.”—1 Tim. 4:16.