1-2. Muloñadi Yesu chakameneniyi?

HEFUKU dindi dakukumishaku hadiñayi muntu hamaseki, Yesu wakameneni nankashi. Katataka akabakani nikumujaha kumakasa awantu afumpaña nshimbi. Bayi neyi Yesu wadiña nakwakama muloña wakufwa kwenjileña nakumonayiku. Wamukeñeli nankashi Tata yindi nawa wakeñeleña kumuzañalesha. Yesu welukili nindi neyi atwalekahu kwikala washinshika mukukala kwayileña nakumonayi, wukuleñela antu amakwawu kuhakwilaku ijina daYehova. Yesu wakeñeli cheñi antu, nawa welukili nindi antu anateli kwikala nakuchiñeja kwakwikala nawumi wahaya nyaka neyi atwalekahu kwikala washinshika kudi Yehova kushika nikukufwa.

² Hela chakwila Yesu wadiña mukukala kwasweja, wadiña nakuwunda. Wayilejeli apostolu indi nindi, “nayinki kuwunda kwami.” (Yow. 14:27) Wadiña “nakuwunda kwaNzambi,” kuwunda kwekalaña namuntu muloña wakwikala nawubwambu wawuwahi naYehova. Iku kuwunda kwamuleñeleli Yesu kubula kwakama.—Fwi. 4:6, 7.

3. Yumanyi yitukuhanjeka muchinu chibaaba?

³ Hakachi ketu hihakekalahu muntu wukakabakana nakukala kwomikiliyi Yesuku, ilaña ejima amulondaña Yesu akumonaña kukala. (Mat. 16:24, 25; Yow. 15:20) Kufwana Yesu, mpinji yikwawu tunateli kwakama. Yumanyi yitwatela kwila kulonda tubuli kusweja kwakama nikubula kujimbesha kuwunda kwetu? Tushinshikenu yuma yisatu yeliliyi Yesu hampinji yadiñayi nakushimwina hanu heseki nichitunateli kumwimbujola neyi tumona kukala.

4. Kwesekeja na 1 Atesalonika 5:17 shimunenu yakutalilahu yinakumwekesha nawu Yesu watwalekelihu kulomba hefuku dakukumishaku hanu heseki?

⁴ Tañenu 1 Atesalonika 5:17. Yesu walombeleña mpinji yejima kushika nihefuku dakukumishaku. Hayilejeleñayi atumbanji twindi chakwanakana kufwa kwindi, walombeli hadinkendi nihavinyu. (1 Kor. 11:23-25) Henohu kanda afumi kwadiilileñawu Chipandakenu, walombeli nawatumbanji twindi. (Yow. 17:1-26) Yena niatumbanji twindi chashikiliwu haMpidi yaMaolivi hawuna wufuku, walombeli nakufuntisha funtishahu. (Mat. 26:36-39, 42, 44) Nawa mazu akukumishaku ahosheliyi Yesu henohu kanda yafwi, adiña akulomba. (Luka 23:46) Yesu walombeli kudi Yehova hayuma yejima yamumwekeneni hadina ifuku.

5. Muloñadi apostolu chakañenyiwu kumwekesha wulobu?

⁵ Chuma chaletesheli Yesu yomiki kweseka, hikushindamena hadi Tata yindi mukulomba. Apostolu akañenyi kutwalekahu kulomba hawuna wufuku. Chafuminimu, mpinji yakweseka chiyashikili akañenyi kumwekesha wulobu. (Mat. 26:40, 41, 43, 45, 56) Neyi tumona kweseka, tunateli kutwalekahu kwikala ashinshika neyi tumwimbujola Yesu ‘nikutwalekahu kulomba.’ Yumanyi yitwatela kulomba?

6. Chikuhwelelu chinateli kutukwasha ñahi kutwalekahu kwikala mukuwunda?

⁶ Twatela kumulomba Yehova kulonda ‘yatuvulishili chikuhwelelu.’ (Luka 17:5; Yow. 14:1) Twatela kwikala nachikuhwelelu muloña Satana nakweseka antu ejima amulondaña Yesu. (Luka 22:31) Chikuhwelelu chinateli kutukwasha ñahi kutwalekahu kwikala mukuwunda  hela chakwila tunakumona kukala kwamboka mboka? Neyi tuzata nañovu hakuumika kukala kwejima kutunakumona, chikuhwelelu chikutuleñela kushiya yuma yejima mumakasa aYehova. Muloña tuneluki netu yena nateli kumanisha kukala kwejima kubadika etu aweni nawa tukwikala nakuwunda kwamuyitoñojoka nimumuchima.—1 Pet. 5:6, 7.

7. Yuma yahosheliyi Robert yinayikwashi ñahi?

⁷ Kulomba kwatukwashaña kwikala nakuwunda kwamuyitoñojoka hela chakwila tunakuhita mukweseka. Talenu chuma chamumwekeneni mukulumpi washinshika Robert, wudi nayaaka kubadika ha 80. Wahosheli nindi: “Kufumba kwekala haAfwilipi 4:6, 7 kunankwashi kushinda kukala kwakuvulu. Nadiña namali wanyi. Najimbesheli kukoleka kwami kwakwikala mukulumpi hakapinji kantesha.” Chumanyi chamukwashili Robert kwikala nakuwunda kwamuyitoñojoka? Wahosheli nindi: “Chinatachikili kwakama, nalombeleña. Nelukili nami neyi nitwalekahu nakulomba nikwikala nakuwunda.”

8. Neyi chinashimuniwu haYowanu 8:29, chumanyi chikwawu chamuleñeleli Yesu kwikala nakuwunda kwamuyitoñojoka?

⁸ Tañenu Yowanu 8:29. Hela chakwila adiña nakumukabisha, Yesu wadiña nakuwunda kwamuyitoñojoka muloña welukili nindi wadiña nakumutiyisha Tata yindi kuwaha. Watwalekelihu kumwovwahila hampinji yichakalili kwila mwenimu. Wamukeñeli nankashi Tata yindi nawa walemesheli kumukalakela Yehova muchihandilu chindi. Henohu kanda enzi heseki, wadiña “mukalawenu” waNzambi. (Yish. 8:30)  Nawa mpinji yadiñayi heseki, wadiña nakuyidizisha antu hadi Tata yindi. (Mat. 6:9; Yow. 5:17) Iwu mudimu wamuzañalesheleña Yesu chikupu.—Yow. 4:34-36.

9. Kuzata nankashi mumudimu wakushimwina kwatukwashaña ñahi kwikala nakuwunda kwamuyitoñojoka?

⁹ Tunateli kumwimbujola Yesu neyi tumwovwahilaña Yehova nawa neyi “mpinji yejima [twikalaña] nayuma yayivulu yakuzata mumudimu waMwanta.” (1 Kor. 15:58) Neyi tushaña “maana chikupu” hamudimu wakushimwina, tukwakamaña nankashi wanyi hela chakwila tudi nakukala. (Yil. 18:5) Chakutalilahu, antu itwawanaña mumudimu wakushimwina amonaña kukala kwasweja kubadika etu. Hela chochu, neyi atachika kumukeña Yehova nikulondela kufumba kwindi, chihandilu chawu chawahaña nawa ekalaña namuzañalu. Mpinji yejima yitwayimonaña namuzañalu chatuleñelaña kukuhwelela netu Yehova wukutwakamena. Nawa chumichi chikutuleñela kwikala nakuwunda kwamuyitoñojoka. Chumichi chamukwashili muhela wadiña nachineñi nawa wadimweneña nindi wamukunkulwayi. Wahosheli nindi: “Neyi nashi muchima mumudimu wakushimwina, nekalaña nachineñi wanyi nawa nekalaña namuzañalu. Muloña neyi nidi mumudimu wakushimwina, naditiyaña nami nakundami kwakwihi naYehova.”

10. Yuma yahosheliyi Brenda yinayikwashi ñahi?

¹⁰ Talenu cheñi chakutalilahu chamuhela Brenda. Yena nimwanindi wamumbanda akata chikatu chafwana. Muhela Brenda wendelaña mukakinga kawayifwayi nawa wudana ñovu. Mpinji yikwawu washimwinaña kwitala nikwitala, ilaña kakavulu wasonekaña nyikanda. Wahosheli nindi: “Chinelukili nami chikatu chami anateli kuchuuka wanyi, nashili hohu mana hamudimu wakushimwina. Neyi inakushimwina natoñojokaña hakukala kunikweti wanyi. Chanleñelaña kusha maana hakukwasha antu inahanjekaña nawu mwiluña dachipompelu dakushimwina. Nawa chumichi chanleñelaña kutoñojoka hakuchiñeja kwakumbidi.”

11-13. (a) Yumanyi yeliliwu apostolu niantu amakwawu yinakumwekesha nawu adiña amabwambu jaYesu amawahi? (b) Amabwambu jaYesu amukwashili ñahi?

¹¹ Mpinji yejima yadiña nakushimwinayi Yesu, apostolu ashinshika adiña amabwambu jindi chikupu. Azatili kwesekeja nachishimu chakwila nawu: “kwekala ibwambu wasweja kulamata, chakubadika mana kweyi.” (Yish. 18:24) Yesu wayilemesheli awa amabwambu. Mpinji yashimwinineñayi, kwosi manakwindi asemukayi nindi wamukuhweleleliku. (Yow. 7:3-5) Mpinji yimu antaña jindi amwilili nawu nazaluki. (Maku 3:21) Kwambukaku, Yesu walejeli apostolu indi ashinshika hawufuku wakwila kanda yafwi nindi: “Enu iyenu munatwalekihu kuumikila hamu nanami mukweseka kwami.”—Luka 22:28.

¹² Mpinji yikwawu apostolu amuneñesheleña Yesu, ilaña hashili maana hayiluwa yawuku ilaña welukili nindi amukuhweleleli. (Mat. 26:40; Maku 10:13, 14; Yow. 6:66-69) Hawufuku wadiñayi nawu hamu henohu kanda amujahi, Yesu wayilejeli awa amayala ashinshika nindi: “Nayiteni nami amabwambu jami, muloña nayileji yuma yejima yinatiyili kudi Tata yami.” (Yow. 15:15) Chakadi nikujina, amabwambu jindi amukolesheli chikupu. Wukwashu wamukwashiliwu mumudimu windi wakushimwina wamuleñeleleli kwikala namuzañalu.—Luka 10:17, 21.

¹³ kubombela hadi apostolu, Yesu wadiña cheñi nawamabwambu amakwawu, amayala niambanda, amukwashili mumudimu wakushimwina nimunjila yikwawu. Amakwawu amutambikileña kuya nakudiila kumatala awu. (Luka 10:38-42; Yow. 12:1, 2) Amakwawu  endeleña nindi nikumwinkahu yuma yawu. (Luka 8:3) Yesu wadiña nawamabwambu amawahi muloña niyena wadiña ibwambu dawu wamuwahi. Wayililileña antu yuma yayiwahi nawa hakeñeleña nindi wena amwilili yuma yikukañanyawuku. Yesu wadiña wawanina, ilaña watiyili kuwaha chamukwashileñawu kudi amabwambu jindi abula kuwanina. Chakadi nikujina, amukwashili kwikala nakuwunda kwamuyitoñojoka.

14-15. Tunateli kwikala ñahi nawamabwambu amawahi, nawa anateli kutukwasha ñahi?

¹⁴ Amabwambu amawahi anateli kutukwasha kwikala ashinshika kudi Yehova. Nawa njila yayiwahi yitunateli kwilishilamu amabwambu amawahi hikwikala ibwambu wamuwahi. (Mat. 7:12) Chakutalilahu, Bayibolu yatukoleshaña kuzatisha mpinji yetu niñovu jetu kukwashaku amakwawu, sweje-e “wunakaankili.” (Efwes. 4:28) Kwila mutoñojokahu muntu wudi wejima muchipompelu imunateli kukwashaku nehi? Kwila muya nakumulandilaku mukwakushimwina wakata hela wakula dehi yuma nehi? Kwila muloñeshelaku yakuda chisaka chidi nakukala kwamali nehi? Neyi mweluka chakuzatisha jw.org^® webusayiti niJW Library^® app, kwila mukwashaku amakwawu muchipompelu chenu chakuyizatisha nehi? Neyi tusha maana hakukwasha amakwawu, tukwikala namuzañalu.—Yil. 20:35.

¹⁵ Amabwambu itwekala nawu atukwashaña neyi tumona kukala, nawa atukwashaña kwikala nakuwunda kwamuyitoñojoka. Neyi chatiyilileñayi Elihu mpinji yahosheleñayi Yoba hayihuñu yindi, amabwambu jetu adiwunjikaña nakutiyilila neyi tunakuyilumbulwila kukala  kwetu. (Yoba 32:4) Bayi neyi amabwambu jetu diwu atela kutufuukwilaku, ilaña twatela kutiyilila kufumba kwawu kwashindamena haBayibolu. (Yish. 15:22) Mwanta Davidi wetejeli wukwashu kudi amabwambu jindi, ninetu bayi tudiwulaña wukwashu kufuma kudi amabwambu anakutukwashaku. (2 Sam. 17:27-29) Kwikala nawamabwambu amawahi hikukooleka, muloña hichawana kufuma kudi Yehova.—Yak. 1:17.

16. Kwesekeja na Afwilipi 4:6, 7, njilanyi yimu hohu mutunateli kwikalila nakuwunda? Lumbululenu.

¹⁶ Tañenu Afwilipi 4:6, 7. Muloñadi Yehova chatulejelañayi nindi tunateli kwikala nakuwunda kwahanañayi “kuhitila mudi Kristu Yesu”? Muloña tunateli kwikala hohu nakuwunda kwamuyitoñojoka nimumuchima neyi tutiyishisha nikwikala nachikuhwelelu mumudimu wazatañayi Yesu. Chakutalilahu, nshidi jetu jejima anateli kuyanakena kuhitila hohu mwifutu danyiloña daYesu. (1 Yow. 2:12) Neyi tutoñojokaña hachumichi, tukukundejewa. Chineli Yesu diyi Mwanta waWanta waNzambi, wukafumishahu yuma yejima yaletayi Satana nikaayi kindi. (Isa. 65:17; 1 Yow. 3:8; Chim. 21:3, 4) Chumichi chatukwashaña kuchiñeja. Hela chakwila Yesu watwinka mudimu wakala, yena wudi nanetu, wukutukwashaña kushika nihakukuma kwanshakaminu yamakonu. (Mat. 28:19, 20) Chumichi chatukoleshaña nankashi. Wukwashu, kuchiñeja nikuhamuka, yumiyi diyi yitwakeñaña hakwila nawu twikali nakuwunda.

17. (a) MukwaKristu nateli kwikala ñahi nakuwunda kwamuyitoñojoka? (b) Kwesekeja nachinatukaniwu haYowanu 16:33, yumanyi yitunateli kwila?

¹⁷ Hanu dinu, munateli kwikala ñahi nakuwunda kwamuyitoñojoka henohu munazeyi nakukala kwasweja? Munateli kwikala naku neyi mwimbujolaña yuma yeliliyi Yesu. Chatachi, lombenu nikutwalekahu nakulomba. Chamuchiyedi, mwovwahilenu Yehova nikushimwina neyena hela chakwila chinateli kwikala chakala kwovwahila. Chamuchisatu, itejenu akwenu ayikwashi mumpinji yakweseka. Nkumininaku, kuwunda kwaNzambi kwakahemba yitoñojoka yenu nimuchima wenu. Nawa kufwana Yesu, mwakashinda kweseka kwejima.—Tañenu Yowanu 16:33.