1. Neyi chinalumbululiwu haAefwesesa 6:10-13, chumanyi chimu chasweja kulema chinakumwekesha nawu Yehova watwakamenaña? Lumbululenu.

CHUMA chimu chasweja kulema chidi chakwila nawu Yehova watwakamenaña kuhitila mukutukwasha etu ambuña indi kutondolwela ayilumbu jetu. Satana niandemoni diwu ayilumbu jetu. Yehova watusoñamishaña hadi awa ayilumbu, nawa watwinkaña yuma yakeñekaña hakwila nawu tudikañi nawu. (Tañenu Aefwesesa 6:10-13.) Neyi twiteja wukwashu waYehova nawa tushindamena chikupu hadi yena, tunateli kumutondolwela Diyabolu. Tunateli kwikala nachikuhwelelu neyi chadiña nakapostolu Pawulu. Wasonekeli nindi: “Neyi Nzambi wudi nanetu, hinyi wukutwimakena?”—Rom. 8:31.

2. Tukuhanjekadi muchinu chibaaba?

² Etu akwaKristu alala hitwashaña nankashi maana hadi Satana niandemoniku. Twashaña maana nankashi hadi Yehova nikumukalakela. (Mas. 25:5) Hela chochu, twatela kwilukahu yuma yimu yelañayi Satana. Muloñadi? Kulonda tutondolweli kutupepa neyi halwalu kudi Satana. (2 Kor. 2:11; tth.) Muchinu chibaaba, tukuhanjeka hachuma chimu chazatishañayi Satana niandemoni hakuluwañesha antu. Tukuhanjeka cheñi hachitunateli kuyitondolwela.

3-4. (a) Kupanda hichumanyi? (b) Antu añahi akuhwelela chikupu muyuma yakupanda?

³ Njila yimu yeneni yazatishañayi Satana niandemoni hakuluwañesha antu hikupanda. Antu azatishaña jakupanda  elaña nawu anateli kuyuula hela kwila yuma yinateli kubula kwilukawu hela kuyuula antu. Chakutalilahu, amakwawu elaña nawu elukaña yuma yikamwekana kumbidi kuhitila mukuhoña. Amakwawu anateli kumwekesha neyi ahoshaña nawantu afwa dehi. Amakwawu azatishaña wuloji hela majiki, nawa anateli kulowa muntu mukwawu. *

⁴ Antu añahi akuhwelela chikupu muyuma yakupanda? Kusandujola kwadiñaku mumatuña 18 muLatin America ni muCaribbean awanini nawu hakachi kawantu asatu hakwikala muntu wumu wakuhwelela mumajiki, wuloji, kupesha, nawa antu amavulu akuhwelela nawu chinatwesheki kuhanjeka nawandemoni. Kwadiña cheñi kusandujola kukwawu kwadiñaku mumatuña 18 muAfrica. Kweniku, ahosheli nawu hakachi kawantu ayedi, wumu wakuhwelela muwuloji. Hela chochu, kwejima kutwashakamaña, twatela kutondolwela kupanda. Satana nakufwila kuluwañesha “antu ashakama hamaseki hejima.”—Chim. 12:9.

5. Yehova watiyaña ñahi nansañu yakupanda?

⁵ Yehova “Nzambi yansañu yalala.” (Mas. 31:5) Indi watiyaña ñahi nansañu yakupanda? Wakuhela chikupu! Yehova wayilejeli aIsarela nindi: “Kudeyi bayi kwakamwekana muntu wakahitisha mwanindi weyala hela mwanindi wamumbanda mukesuku, hela mukwakuhoña, hela mukwakuhoña natutumbwa, hela wasansa nyiseñu, hela mukwakupanda, hela mukwakukaya, hela mukwakupesha, hela katepa, hela kadañuku. Muloña antu ejima elaña yumiyi Yehova wayimona nindi hiyakwakushimana.” (Kuhit. 18:10-12) AkwaKristu hiyadi munshimbi jaMosiku. Hela chochu, tweluka netu wahimpa wanyi kutalisha hansañu yakupanda.—Mal. 3:6.

6. (a) Satana wazatishaña ñahi kupanda kulonda aluwañeshi nachu antu? (b) Kwesekeja naMukwakutaŋisha 9:5, afu ekala ñahi?

⁶ Yehova watusoñamishaña hansañu yakupanda muloña weluka nindi Satana wazatishaña kupanda kulonda aluwañeshi nachu antu. Satana wazatishaña nsañu yakupanda kulonda atandisheña nachu makudi, nimakudi akwila nawu afu ashakamaña kwiluña dimu. (Tañenu Mukwakutañisha 9:5.) Satana wazatishaña cheñi kupanda kulonda achinisheña nachu antu nikuyifumisha kudi Yehova. Wakeñaña antu elaña yuma yakupanda nindi akuhweleli mudi aspiritu atama chatela akuhweleli mudi Yehova.

7. Yumanyi yatulejañayi Yehova?

⁷ Neyi chitwashimuna hakusambila, Yehova watulejaña yuma yitwatela kwiluka kulonda abuleña kutudimba kudi Satana niandemoni. Tushinshikenu yuma yitwatela kwila kulonda tumushindi Satana niandemoni.

8. (a) Njilanyi mutunateli kukanina makudi atandishaña aspiritu atama? (b) Masamu 146:4 yasololaña ñahi makudi aSatana kutalisha hadi afu?

⁸ Tañenuña Izu daNzambi nikutoñojoka chikupu. Iyi diyi njila mutunateli kukanina makudi atandishaña aspiritu atama. Izu daNzambi didi neyi mpoku yakabali yawambuka yinateli kusolola makudi atandishañayi Satana. (Efwes. 6:17) Chakutalilahu, izu daNzambi dasololaña makudi akwila nawu  antu afwa anateli kuhanjeka nawantu amomi. (Tañenu Masamu 146:4.) Datulejaña cheñi nawu Yehova hohu diyi wunateli kushimuna yuma yidi kumbidi. (Isa. 45:21; 46:10) Neyi tutañaña Izu daNzambi nikutoñojoka chikupu mpinji yejima, tukwikala adiloñesha kukaana nikuhela makudi akeñañawu aspiritu atama nawu tukuhweleli.

9. Yilwilwinyi yitwatondolwelaña yakundama kukupanda?

⁹ Kaanenu kwila yuma yejima yakundama kukupanda. Chineli tudi akwaKristu alala, twelaña yuma yakundama kukupanda wanyi. Chakutalilahu, hitwayaña kudi antu ahoñaña hela kuhanjeka nawafu munjila yidi yejimaku. Neyi chitwadizili muchibaaba chinafumihu, twatondolwelaña tushidikilu twahayipenji twashindamena hakwila nawu afu ekala amomi nawa adi kwiluña dacheñi. Hitwayaña kudi akwakuhoña natutumbwa hela akwakuhoña kulonda atuleji yuma yakumbidiku. (Isa. 8:19) Tweluka netu yilwilu yejimiyi yafwana nawa yinateli kutuleñela kwila yuma yelañayi Satana niandemoni.

10-11. (a) Yumanyi yeliliwu amakwawu mumafuku awapostolu hanyima yakudiza chalala? (b) Kwesekeja 1 Akorinda 10:21, muloñadi chitwatela kuyimbujolela akwaKristu akusambila, nawa tunateli kwila ñahi mwenimu?

¹⁰ Lekenu yuma yejima yakundama kukuhoña. Antu amakwawu ashakamineña muEfwesesa mumafuku awapostolu elileña yuma yakupanda. Chadiziliwu chalala, ahimpili chikupu. “Antu amavulu owu akoñeleña yuma nawukwashu wawandemoni apompesheli nyikanda yawu hamu nakuyochela hamesu awantu ejima.” (Yil. 19:19) Awa antu azatili nañovu kulonda atondolweleli aspiritu atama. Nyikanda yawu yahosheleña hakupanda yadiña yawuseya. Chatela ayihani hela kuyilandisha, ayikisañeni. Ashili maana hakumutiyisha Yehova kuwaha chatela ashi muchima hakulema kwamali alandiliwu nachu nyikanda yawu.

¹¹ Tunateli kuyimbujola ñahi akwaKristu  amumafuku awapostolu? Chikuwaha neyi tuleka yuma yejima yitukweti yakundama kukuhoña. Yumiyi munabombeli yitumbu yawaña, nyiseñu, hela yuma yikwawu yavwalañawu antu kulonda adikiñeña nachu kudi aspiritu atama.—Tañenu 1 Akorinda 10:21.

12. Malwihwinyi itwatela kudihula kutalisha hayisela?

¹² Shinshikenuña chikupu hayisela yimwahemaña. Dihulenu nenu: ‘Komana natañaña nyikanda, mamagazini, hela yibaaba yahaIntaneti yahoshaña hansañu yakupesha? Indi tumina tunatiyililaña, mavidiyo ninsañu yaha TV hela yisela yavidiyo yinahemaña? Komana yisela yinahemaña mwabombela jakupanda? Komana mwabombela yuma yidi neyi yishimukulu nyisalu hela kuhoña? Komana yamwekesha majiki, kusakula nayinjikijilu hela kushiñana kwamwekanaña neyi hichisela hohu?’ Hela chochu, bayi neyi nsañu yejima yabula kukundama kuchihandilu yakundama kukupandaku. Neyi munakutoñojoka hayisela, fwilenu kutonda yuma yinateli kuyikwasha kutondolwela yuma yahelayi Yehova. Twafwilaña “kwikala nachinleji chamuchima chitooka kumesu aNzambi nikumesu awantu.”—Yil. 24:16. *

13. Yumanyi yitwatela kutondolwela?

¹³ Lekenu kushimuna nsañu yakundama kudi andemoni. Hansañu yeniyi, twatela kwimbujola yuma yeliliyi Yesu. (1 Pet. 2:21) Henohu kanda yenzi hamaseki, Yesu wadiña mwiwulu nawa welukili yuma yayivulu hadi Satana niandemoni. Ilaña halumbulwileña yuma yakoñeli ana andemoni atamaku. Yesu washili maana hakutañisha antu hadi Yehova bayi hadi Satanaku. Twatela kumwimbujola Yesu kuhitila mukubula kutandisha  nsañu yawandemoni. Ilaña, twamwekeshaña mumazu etu netu “Muchima wami hiwukusumpoka hohu nansañu yabadika kuwaha,” dikwila nawu, chalala.—Mas. 45:1.

14-15. (a) Muloñadi chitwatela kubulila kuchina aspiritu atama? (b) Wunsahwinyi wunakumwekesha nawu Yehova wakiñaña antu jindi?

¹⁴ Bayi muchinaña aspiritu atamaku. Mukanu kaayi katama, yuma yatama yinateli kutumwekena. Wubanji, yikatu, hela kufwa yinateli kwinza chakadi kukuhwelela. Ilaña hitwatela kutoñojoka netu aspiritu abulaña kumwekana diwu anakojejiku. Bayibolu yalumbulula nawu “mpinji nakululakana” yinateli kumwekena muntu wudi wejima. (Mukwa. 9:11) Yehova wamwekesha nindi wukweti ñovu chikupu kubadika andemoni. Chakutalilahu, Nzambi hamwitejeli Satana kumujaha Yobaku. (Yoba 2:6) Mumafuku aMosi Yehova wamwekesheli nindi wadiña nañovu chikupu kubadika atutepa amuEjipitu. (Kwid. 8:18; 9:11) Yesu amwinkeli ñovu kudi Yehova, dichi wamwekesheli ñovu jindi kuhitila mukumunatila Satana niandemoni heseki kufuma mwiwulu. Nawa kumbidi akayikasila mumaleñi kulonda akabuleña kukatisha antu.—Chim. 12:9; 20:2, 3.

¹⁵ Tunakumona wunsahu wawuvulu wunakumwekesha chinakukiñayi Yehova antu jindi makonu. Toñojokenu hachumichi: Twashimwinaña nikutañisha chalala mwahita iseki dejima. (Mat. 28:19, 20) Chafumañamu, twasololaña nyidimu yatama yaDiyabolu. Neyi Satana wadiña nañovu, chiña wadi kukañesha nyidimu yetu, ilaña kwila yatwesha nehi. Dichi hitwatela kuchina aspiritu atamaku. Tweluka netu “mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.” (2 Kushi. 16:9) Neyi twikala ashinshika kudi Yehova, andemoni kwila atukatisha nehi.

16-17. Hanenu chakutalilahu chinakumwekesha nawu chakeñekaña kwikala ahamuka kukaana aspiritu atama.

¹⁶ Chakeñekaña kwikala ahamuka hakwila nawu tukaani aspiritu atama, sweje-e neyi amabwambu jetu itwalemesha hela antaña  jetu anakutudimbulula. Ilaña Yehova wakiswilaña ejima amwekeshaña kuhamuka. Talenu chakutalilahu chamuhela Erica wakuGhana. Erica wadiña nayaaka 21 hadiziliyi Bayibolu. Chineli tata yindi wadiña kapristu wahoñeleña, amukuhweleleli kudibomba mutushidikilu mwabombeleli kuda mbiji yalambwileñawu kudi tunzambi kwadifukwileñayi tata yindi. Erica chakaaniniyi, chisaka chindi chahosheli nawu neli kasawuntu kudi anzambi. Chisaka chakuhweleleli nawu anzambi akuyibabesha chikupu muyitoñojoka nikumujimba.

¹⁷ Chisaka chaErica chesekeli chikupu kumukanjikija kulonda yalondeli tushidikilu, ilaña wakaanini, chakwila wafumini nihetala. A Yinsahu amakwawu amwitejeli kushakama nawu. Muniyi njila, Yehova wamukiswilili Erica nachisaka chikwawu, akwawu akwakwitiya ekalili neyi amanakwindi niahela. (Maku 10:29, 30) Hela chakwila antaña jindi amukanini nikwocha yuma yindi, Erica watwalekelihu kwikala washinshika kudi Yehova, wapapatisheweli nawa chayinu mpinji hipayiniya wampinji yejima. Hatiyaña andemoni womaku. Kutalisha hadi chisaka chindi, Erica wahoshaña nindi, “nalombaña mafuku ejima nami chisaka chami chikekali namuzañalu wakumwiluka Yehova nikwikala nakusubuka kwenzaña kuhitila mukumuzatila Nzambi yetu wukweti kukeña.”

18. Nkiswinyi yitwatambwilaña muloña wakumukuhwelela Yehova?

¹⁸ Bayi neyi chikuhwelelu chetu akacheseka munjila yoyimuku. Hela chochu, wejima wetu twatela kumukuhwelela Yehova nikutondolwela aspiritu atama. Neyi twila mwenimu, tukatambwila nkisu jajivulu nawa tukutondolwela kutuluwañesha kumakudi aSatana. Nawa makudi awandemoni hiyakutukañesha kumukalakela Yehovaku. Chuma chasweja kulema, tukukolesha wubwambu wetu naYehova. Kambanji Yakoba wasonekeli nindi, “mwovwahilenuña Nzambi; ilaña dikañenu naDiyabolu, niyena wukuyitemuka. Swinenu kwakwihi naNzambi, niyena wukuswina kwakwihi nanenu.”—Yak. 4:7, 8.