1. Muloñadi chitwakwilañahu hakupompa?

 MULOÑADI chitwayilaña nakupompa? Chatachi, nakumushimeka Yehova. (Mas. 26:12; 111:1) Twayaña cheñi nakupompa kulonda tudikolesheña wumu namukwawu muyinu mpinji yakala. (1 Tes. 5:11) Neyi twolola chikasa nakwakulahu, twelaña iyi yuma yiyedi yitunashimuni.

2. Mpinjinyi yitunateli kwakulahu hakupompa?

² Mulungu-himulungu, twekalaña nakukooleka kwakwakulahu. Chakutalilahu, hakupompa kwakunsa yamulungu, tunateli kwakulahu hakudiza Kaposhi Kakutalila. Hakupompa kwamukachi kamulungu, tunateli kwakulahu haYuma Yalema yakuSpiritu, haKudiza Bayibolu haChipompelu nihampanji jikwawu jakuhanjeka.

3. Kukalanyi kutunateli kumona, nawa AHeberu 10:24, 25 yinateli kutukwasha ñahi?

³ Wejima wetu twakeñaña kumushimeka Yehova nikukolesha akwetu itwadifukulaña nawu. Ilaña neyi tunakukeña kwakulahu, kudi yuma yinateli kutukañesha. Tunateli kutiya woma kwakulahu, indi kwiji tukukeñaña kwakulahu ilaña hiyanateli kutwinka kukooleka kwakwakulahu kakavulu neyi chitunakukeñaku. Tunateli kumanisha ñahi iku kukala? Twawanaña ñakwilu mumukanda wayisonekeleliwu aHeberu kudi kapostolu Pawulu. Chayilejeleñayi hachichalemena kupompela hamu, wahosheli nindi twatela kusha muchima “[hakudikolesha] nankashi wumu namukwawu.” (Tañenu AHeberu 10:24, 25.) Neyi twanukaña netu tunateli kukolesha antu mwizaza hela namazu antesha hohu itukwakula akumwekesha  chikuhwelelu chetu, tukufwilaña kwakulahu. Nawa neyi anakutwinka kukooleka wanyi kwakwakulahu kakavulu, tunateli kutiya kuwaha netu akwetu niwena muchipompelu akwikala nakukooleka kwakwakulahu.—1 Pet. 3:8.

4. Yumanyi yisatu yalema yitukuhanjekahu muchinu chibaaba?

⁴ Muchinu chibaaba, tukusambila kuhanjeka chitunateli kudikolesha wumu namukwawu muchipompelu chanyanya mudi antu antesha anateli kwakulahu. Kuhiñahu, tukuhanjeka chitunateli kudikolesha wumu namukwawu muchipompelu cheneni mwekala antu amavulu ololaña makasa kulonda akulihu. Nkumininaku, tukuhanjeka hachitunateli kwakula munjila yinateli kukolesha akwetu.

5. Tunateli kudikolesha ñahi wumu namukwawu neyi antu antesha hohu diwu anapompi?

⁵ Muchipompelu chanyanya hela mwizanvu, mwekalaña wanyi antu amavulu anateli kwinkawu kukooleka kwakwakulahu kudi wunakulombola. Mpinji jikwawu, nateli kuhembelelaku chantesha hakwila kumwekani muntu wunakukeña kwakulahu. Kupompa kunateli kutachika kuleta wuudi, nawa chumichi chikuyikoleshaña antu wanyi. Chumanyi chimwatela kwila? Ololenuña chikasa kakavulu. Neyi mwila mwenimu, munateli kusañumuna akwenu kwakulahu kakavulu.

6-7. Tunateli kukeheshaku ñahi woma watukañeshaña kwakulahu hakupompa?

⁶ Indochi neyi mwatiyaña woma kwakulahu? Amavulu dichatiyañawu. Hela chochu, hakwila mukolesheña nankashi amanakwenu niahela, kwila mukeñaku njila jinateli kuyikwasha kukeheshaku woma wakwakulahu nehi? Munateli kwila ñahi mwenimu?

⁷ Kuhituluka munjila jashimunawu muTuposhi twaKutalila twedishawu dehi kunateli kuyikwasha. b Chakutalilahu, loñeshenuña chiwahi. (Yish. 21:5) Neyi mutiyishisha nsañu yimukudiza, chikuyipelela kwakulahu hakupompa. Cheñi, ñakwilu yenu yikaleña yayihi. (Yish. 15:23; 17:27) Ñakwilu yayihi yikuyiletesha mubuli kutiya woma kwakulahu. Ñakwilu yayihi, hadaha yikweti hohu mukuku wamazu wumu hela yiyedi, yikuyipelela amanakwenu niahela kutiyishisha chikuma kubadika ñakwilu yayilehi mudi yikuma yayivulu. Neyi mwakulaña ñakwilu yayihi mumazu enu, mukumwekesha nenu mwaloñesha chiwahi nawa mwatiyishisha nsañu yimunakudiza hakupompa.

8. Yehova watiyaña ñahi neyi tunakuzata kwesekeja nahakumina ñovu jetu?

⁸ Indi neyi mweseka iji njila jejima ilaña muchidi kutiya woma wakwakulahu kakavulu? Ilukenu nenu Yehova wukusakilila neyi muzata kwesekeja nahakumina ñovu jenu kwakulahu. (Luka 21:1-4) Kuzata nañovu hikunatalishi mwikala nawu mwatela kuzata kubadika muñovu jenuku. (Fwili. 4:5) Fuukulenu chuma chimunakukeña kwila, fwilenu kuchizata nawa lombenu ayinki muchima wakudiwunjika. Chatachi, hadaha chuma chimunakufwila kwila hikwakulahu hohu hela kamu muwihi.

9. Muloñadi chichinateli kwikalila chakala kwakulahu muchipompelu cheneni?

⁹ Neyi muchipompelu chenu mudi akakushimwina amavulu, munateli kwikala nakukala kwambukaku. Hadaha muloña wakwila mudi amanakwetu niahela amavulu akulañahu, kakavulu  enu hiyayinkaña kukooleka kwakwakulahuku. Chakutalilahu, Danielle, c watiyaña kuwaha kwakulahu mpinji yejima hakupompa. Wamonaña nindi hinjila yakudifukwilamu, njila yakukoleshelamu akwawu, nawa nindi hinjila yamukwashaña kukuhwelela chikupu yuma yatañishaña Bayibolu. Ilaña chabuukililiyi muchipompelu cheneni, hiyavulileña kumwinka kukooleka kwakwakulahuku, mpinji jikwawu nichikumana kupompa hakwileñahu hela kamuku. Wahosheli nindi: “Naneñeleña. Natiyileña neyi anantambuli kukooleka. Neyi chumichi chitwalekahu kumwekana, wukutachika kutoñojoka neyi hadaha anakwililamu hohu.”

10. Yumanyi yitunateli kwila yikutukwasha kwikala nakukooleka kwakwakulahu hakupompa?

¹⁰ Komana mwatiyahu dehi neyi chatiyileñayi Danielle? Neyi dichimwatiyaña, hadaha munateli kwikala mukweseka kwakuleka kwakulahu nakutiyilila hohu chinakwakulawu akwenu hakupompa. Ilaña bayi muzeya nakuleka kwakulahuku. Chumanyi chimwatela kwila? Chuma chinateli kuyikwasha hikuloñesha ñakwilu jajivulu mukupompa-hikupompa. Chikufumamu, neyi anayinki wanyi kukooleka kwakwakulahu kumatachikilu akudiza, mukwikala nakukooleka kukwawu kwakwakulahu henohu kupompa kanda kumani. Neyi munakuloñesha Kaposhi Kakutalila Kakudizamu toñojokenu paragilafu niparagilafu chiyinakwatankani namutu hanashindameni chibaaba. Neyi mwila mwenimu, hadaha mukwikala nakukooleka kwakwakulahu munoyu nsañu yimunakudiza. Kubombelahu, munateli kudiloñesha kwakulahu mumaparagilafu mudi nsañu yakunama yamuBayibolu yakala kulumbulula. (1 Kor. 2:10) Muloñadi? Hadaha hakudiza haniyi nsañu kunateli kwikala hohu antu antesha akukeña kwakulahu. Indi neyi hanyima yakuzatisha iji njila jejima muwana nenu mpinji yejima yimwayaña nakupompa ayinkaña wanyi kukooleka kwakwakulahu? Munateli kuhanjeka nawukulombolaña henohu kupompa kanda nakumuleja lwihu lumukukeña kwakula.

11. AFwilipi 2:4 yatukoleshaña kwiladi?

¹¹ Tañenu AFwilipi 2:4. Chamwoneneniwu, kapostolu Pawulu wakolesheli akaKristu  kutwamijaku yuma yatiyishaña akwawu kuwaha. Tunateli kuzatisha ñahi iku kufumba hampinji yitunakupompa? Kuhitila mukwanuka netu akwetu niwena anakukeña kwakulahu.

12. Njilanyi yimu yayiwahi yakukoleshelamu akwetu hakupompa? (Talenu cheñi mwevulu.)

¹² Toñojokenu chumichi. Neyi munakuhanjeka nawakwenu, komana mukuhoshaña nankashi chakwila anakukañanya nikuhoshahu? Inehi! Mukukeña niwena ahosheñahu. Munjila yoyimu, hakupompa, twakeñaña antu amavulu akuleñahu. Kafwampi, njila yimu yayiwahi yakukoleshelamu amanakwetu niahela hikuyinka kukooleka kwakumwekeshelamu chikuhwelelu chawu. (1 Kor. 10:24) Tuhanjekenu chitunateli kwila mwenimu.

13. Yumanyi yitwatela kwila hakwila antu amavulu mwizaza akulihu?

¹³ Chuma chimu chitwatela kwila hikwihihishaku ñakwilu jetu, kulonda amavulu ekali nakukooleka kwakwakulahu. Akulumpi niakakushimwina amakwawu apama atela kwikala akutalilahu amawahi. Hela neyi munakuhana ñakwilu yayihi, tondolwelenu kuhosha hayikuma yayivulu nankashi. Neyi muhosha yuma yejima yidi muparagilafu, akwenu akukañanya yikuma yakwakula. Chakutalilahu, muyinu paragilafu anashimuni njila jiyedi jinateli kutukwasha, kuhana ñakwilu yayihi nikutondolwela kuhosha hayikuma yayivulu nankashi. Neyi yenu atachi anenkiwu kukooleka kwakwakulahu muyinu paragilafu, kwila muhosha hohu hachikuma chimu haniyi yikuma nehi?

14. Chumanyi chinateli kutukwasha kwiluka mapampa itwatela kwolola chikasa? (Talenu cheñi mwevulu.)

¹⁴ Zatishenu kashinshi kulonda mwiluki mapampa imukukeña kwakulahu. Neyi tuswejaña kwolola chikasa mwanti-mwanti, tukuletesha wunakulombola kutachika kutwinka yowenetu kukooleka kwakwakulahu henohu kudi niamakwawu anabuli kwakulahu. Chumichi chinateli kuletesha amakwawu kuleka kwolola makasa.—Mukwa. 3:7.

15. (a) Chumanyi chitwatela kwila neyi anatwinkihu wanyi kukooleka kwakwakulahu? (b) Anakulombola anateli kutoñojokelaku ñahi antu ejima? (Talenu chikasha chinakwila nawu “ Neyi Munakulombola.”)

 ¹⁵ Neyi akakushimwina amavulu anakwolola makasa hampinji yakudiza, tunateli kwakulahu wanyi kakavulu kwesekeja nachitunakukeña. Mpinji jikwawu, hadaha wunakulombola nateli kutwinka kukooleka kwakwakulahu wanyi. Chumichi chinateli kutuneñesha, ilaña bayi tumona netu kudi chuma chinaleteshi hakwila abuli kutwinka kukooleka kwakwakulahuku—Mukwa. 7:9.

16. Tunateli kukolesha ñahi akwetu akulañahu?

¹⁶ Neyi munakulihu wanyi kakavulu kwesekeja nachimunakukeña, kwila mutiyilila nakanañachima hampinji yinakwakulawu akwenu nawa hanyima yakupompa muyihameka hañakwilu yawu nehi? Mazu enu anateli kuyikolesha amanakwenu niahela neyi chochadi kuyikolesha ñakwilu yimwadi kuhana. (Yish. 10:21) Kuhameka akwetu hinjila yikwawu mutunateli kudikoleshela wumu namukwawu.

17. (a) Anvwali anateli kukwasha ñahi anyanawu kuloñesha ñakwilu jinayiteleli? (b) Kwesekeja nachashimunawu muvidiyo, yumanyi yiwana yitwatela kwila hakuloñesha ñakwilu? (Talenu cheñi tumazu twaheshina.)

¹⁷ Tunateli kudikolesha ñahi cheñi wumu namukwawu hakupompa kwetu? Neyi mudi  anvwali, kwashenu anyanenu kuloñesha ñakwilu yinesekani nayaaka yawu. (Mat. 21:16) Mpinji jikwawu, twadizaña hansañu yakunama, chidi neyi kukala kwamuwulu hela yilwilu yatama yitwatela kutondolwela, ilaña munateli kuwanikahu paragilafu yimu hela ayedi munateli kwakula mwana wanyanya. Cheñi, kwashenu anyanenu eluki chuma chikuletesha hadaha abuli kuyinka kukooleka kwakwakulahu mpinji yejima yikwololawu makasa. Kuyilumbulwila mwenimu chikuyikwasha kubula kuneña neyi akwawu anayinki kukooleka ilaña wena nehi.—1 Tim. 6:18. d

18. Tunateli kutondolwela ñahi kuhosha nankashi hadi etu aweni neyi tunakwakulahu? (Yishimu 27:2)

¹⁸ Wejima wetu tunateli kuloñesha ñakwilu yikumulemesha Yehova nikukolesha akwetu akaKristu. (Yish. 25:11) Mpinji yikwawu tunateli kuhosha hayuma yatumwekeneni, ilaña twatela kutondolwela kuhosha nankashi hadi etu aweni. (Tañenu Yishimu 27:2; 2 Kor. 10:18) Hela chochu, twatela kuhosha nankashi hadi Yehova, Izu dindi nihadi antu jindi ejima. (Chim. 4:11) Neyi lwihu lwaparagilafu lunakukeñeka nawu tuhoshi hayuma yatumwekeneni, chidi hohu chiwahi kwila mwenomu. Chakutalilahu kutalisha haniyi nsañu chidi muparagilafu yinalondelihu muchinu chibaaba.

19. (a) Yumanyi yikufumamu neyi tutoñojokelañaku akwetu ejima anapompi? (ARoma 1:11, 12) (b) Yumanyi yayitiyishaña kuwaha halwenu kutalisha hakwakulahu hakupompa?

¹⁹ Hela chakwila hiyashaku nshimbi hachitwatela kwakulaku, wejima wetu twatela kufwilaña kwakula munjila yikukolesha akwetu. Tunateli kwila mwenimu kuhitila mukubula kwakulahu mwanti-mwanti. Hela tunateli kwila mwenimu kuhitila mukuzañalala nakukooleka kutukweti kwakwakulahu nikutiya kuwaha netu akwetu niwena adi nakukooleka kwakwakulahu. Neyi tushaña muchima hayuma yinateli kuzañalesha akwetu hakupompa, wejima wetu ‘tukudikoleshaña, muntu-himuntu.’—Tañenu ARoma 1:11, 12.