1. Kansi weyala wumu wamwekesheli ñahi nindi wakuhweleleli mukusañuka?

 KANSI wejina daMatthew wekala nachikatu cheneni chinaleteshi amuladiki kakavulu. Hadiñayi nayaaka 7, yena nichisaka chindi adiña nakutala progiramu yahakakweji ya JW Broadcasting^®. Kumakumishilu aprogiramu, amweni vidiyo yakamina yamwekesheleña antu anakutambwila antaña jawu anasañuki. b Hanyima yaprogiramu, Matthew wayili kudi anvwali jindi, wayikwatili mumakasa nakuhosha nindi: “Mama, Tata, munamoni? Hela neyi nafwi, nakasañuka hampinji yakasañulañawu antu. Munateli kunhembelela; yuma yakekala CHIWAHI.” Munateli kufwikija chatiyiliwu ana anvwali chelukiliwu nawu mwanawu wakuhweleleli mukusañuka?

2-3. Muloñadi chichawahila neyi tutoñojokaña hachikaninu chakusañuka?

² Mpinji yejima, wejima wetu tukwilaña chiwahi neyi tutoñojokaña hachikaninu chamuBayibolu chahosha hakusañuka kudi kumbidi. (Yow. 5:28, 29) Muloñadi? Muloña tuneluki wanyi mpinji yitunateli kukata chikatu cheneni hela kufwisha muntu itwakeña mukukasumwisha. (Mukwa. 9:11; Yak. 4:13, 14) Kuchiñeja kwakusañuka kutukweti kukutukwasha kuumika iku kukala kwejima. (1 Tes. 4:13) Nsona jatukoleshaña nawu Tata yetu wamwiwulu watwiluka chiwahi, watukoleshaña nawa watukeña chikupu. (Luka 12:7) Yehova Nzambi watela kutwiluka chiwahi hakwila akatusañuli nayilwilu niwuswa wutwadiña nawu wakwanuka yuma. Yehova watukeña nankashi nawa watwinka kukooleka kwakwikala nawumi wahaya nyaaka. Hela chakwila tunafwi, wakatusañula!

³ Muchinu chibaaba, tukusambila kuhanjeka muloña waweni wutwatela kukuhwelela muchikaninu chakusañuka. Kuhiñahu,  tukuhanjeka hansañu yamuBayibolu yinateli kukolesha chikuhwelelu chetu yikweti mazu hanashindameni muntu wachinu chibaaba wunakwila nawu: “Manakweyi wukusañuka.” (Yow. 11:23) Nkumininaku, tukwiluka chitunateli kukuhwelela chikupu mukusañuka.

4. Hakwila tukuhweleli muchuma chinatukaniwu, chumanyi chitwatela kwiluka? Shimunenu chakutalilahu.

⁴ Hakwila tukuhweleli muchuma chinatukaniwu, twatela kwiluka chikupu netu muntu wunatukani wukweti muchima wakufwila kwilamu niñovu hela wuswa wakushikija munakaniyi. Chakutalilahu, fwikijenu itala denu dinakisiki chikupu nampepela yasweja. Ibwambu denu enza kudi enu nakuyikana nindi: ‘Nukukukwashaku kutuñulula itala deyi.’ Nakutwamba wanyi nawa munamukuhweleli nenu wudi namuchima wakufwila kuyikwasha. Neyi weluka kutuña nawa wudi nayozelu yakeñekaña, muneluki cheñi nenu wukweti wuswa wakwilamu. Dichi munakuhweleli munakaniyi. Indi kutalisha hachikaninu chaNzambi chakusañula antu? Mwamweni wudi namuchima wakufwila kwilamu niñovu yakushikija mwakanayi?

5-6. Tuneluki ñahi netu Yehova wafwilaña kusañula antu afwa dehi?

⁵ Komana Yehova wafwilaña kusañula afu? Chakadi nikujina, wafwilaña kwilamu. Woneneni ansoneki amavula aBayibolu kusoneka chikaninu chindi chakusañula antu kumbidi. (Isa. 26:19; Hos. 13:14; Chim. 20:11-13) Nawa neyi Yehova nakani, mpinji yejima washikijaña munakaniyi. (Yosh. 23:14) Kafwampi, Yehova wafwilaña kusañula antu afwa dehi. Tunahoshelidi mwenimu?

⁶ Talenu mazu ahosheliyi nkakulula Yoba. Welukili chikupu nindi hela wukufwa, Yehova wukufwilaña kumumona wamumi cheñi. (Yoba 14:14, 15, tth.) Yehova wuchidi kukeñesha kumona akakudifukula indi ejima afwa dehi anekali cheñi amomi. Wafwilaña kuyisañula akekali akola kumujimba nawa akweti muzañalu. Indi antu amavulu afwa chakadi kwikala nakukooleka kwakudiza chalala chahosha hadi Yehova? Nzambi yetu wukweti kukeña wafwilaña kuyisañula niwena. (Yilw. 24:15) Wakeñaña nindi akekali nakukooleka kwakwikala amabwambu jindi nawa akashakameña haya nyaaka hamaseki. (Yow. 3:16) Chalala, Yehova wafwilaña kusañula antu afwa dehi.

7-8. Tuneluki ñahi netu Yehova wukweti ñovu yakusañula antu afwa dehi?

⁷ Komana Yehova wukweti cheñi ñovu yakusañula antu afwa dehi? Eña! Yena diyi “Wañovu Jejima.” (Chim. 1:8) Dichi wukweti ñovu yakushinda chilumbu wudi wejima, kushilahu nikufwa. (1 Kor. 15:26) Kwiluka chumichi kwatukoleshaña nikutukundeja. Talenu chuma chamumwekeneni Muhela Emma Arnold. Yena nichisaka chindi amweni kukala kwakuvulu kwesekeli chikuhwelelu chawu haNjita yaKaayi Yamuchiyedi. Hakwila akundeji mwanindi wamumbanda waneñeli muloña wakufwisha antu akeñeliyi afwili muyilombu yadiña muNazi, muhela Emma wahosheli nindi: “Neyi kufwa kukutwalekahu kusha antu mumpompa jachu, dikwila nawu kudi nañovu kubadika Nzambi, netu?” Mwamweni, kwosi chuma chikweti ñovu kubadika Yehovaku! Nzambi wañovu jejima waleñeli wumi wukweti ñovu yakuyinka cheñi antu afwa dehi wumi.

⁸ Chuma chikwawu chaleteshaña twiluki netu Nzambi nateli kusañula antu afwa dehi chidi chakwila nawu havulamenañaku. Watambikaña tutumbwa twejima hamajina. (Isa. 40:26) Cheñi, wanukaña antu afwa dehi. (Yoba 14:13; Luka 20:37, 38) Nateli kushikena kwanuka yuma yejima kutalisha hadi owu antu akasañulayi, kushilahu mmwekenu yawu, yilwilu yawu, yuma yamweniwu muchihandilu niwuswa wawu wakwanuka yuma.

9. Chumanyi chaletesha mukuhweleli muchikaninu chaYehova chakusañula antu kumbidi?

 ⁹ Chakadi nikujina, tunateli kukuhwelela muchikaninu chaYehova chakusañula antu kumbidi muloña tuneluki netu wafwilaña kwilamu nawa wukweti ñovu yakushikija munakaniyi. Talenu chuma chikwawu chikuletesha tukuhweleli muchikaninu chaNzambi chahosha hakusañuka: Muloña Yehova wasañulahu dehi antu. Kunyima, wayinkeli amayala antesha ashinshika ñovu, kushilahu niYesu, yakusañula afu. Tuhanjekenu hansañu yahosha hamuntu wumu asañwiliwu kudi Yesu, yasonekawu muYowanu kapetulu 11.

10. Chumanyi chinamwekani muBetani hampinji yinakushimwinayi Yesu kwishinadi daYodani, nawa chumanyi chineliyi? (Yowanu 11:1-3)

¹⁰ Tañenu Yowanu 11:1-3. Fwikijenu chuma chinamwekani muBetani kumakumishilu achaaka cha 32 C.E. Yesu wukweti amabwambu jindi adikundayi nawu muniwu mukala, Lazaru niahela jindi ayedi, aMariya naMata. (Luka 10:38-42) Ilaña Lazaru nakati, nawa ahela jindi anakameni. Anatemeshi mazu kudi Yesu nawa haniyi mpinji wudi kwishinadi daYodani, iluña dakwendahu mafuku ayedi kufuma kuBetani. (Yow. 10:40) Chawushona, Lazaru nafwi hampinji yinashikiyi ntemesha kudi Yesu. Hela chakwila Yesu neluki nindi ibwambu dindi dihanafwiyi, ilaña natwalekihu kushakama kwenoku mafuku ayedi, kuhiñahu nakasi lwendu lwakuya kuBetani. Dichi Yesu hanashikiyi, nawani Lazaru nashikiji dehi mafuku awana kufuma hafwiliyi. Yesu nafuukulihu kwila chuma chikukwasha amabwambu jindi nawa chikuletesha Nzambi amulemeshi.—Yow. 11:4, 6, 11, 17.

11. Chumanyi chalema kutalisha hawubwambu chitunakudizila kuniyi nsañu?

¹¹ Kuniyi nsañu tunadiziliku chuma chalema kutalisha hawubwambu. Toñojokenu hachumichi: Mariya naMata chatemesheliwu mazu kudi Yesu, hiyamwilili nawu enzi kuBetaniku. Ahosheli hohu nawu ibwambu dindi akeñeliyi wakatili. (Yow. 11:3) Lazaru chafwiliyi, Yesu wadi kumusañwila kwokuna kwadiñayi. Ilaña, Yesu wafuukwilihu kuya kuBetani kulonda akadimoni nawamabwambu jindi aMariya naMata. Komana mudihu nebwambu denu wunateli kwinza nakuyikwasha chakadi kumutambika? Neyi wudikwoku, mwatela kumushindamena nenu wukuyikwasha “mumpinji yayihuñu.” (Yish. 17:17) Ninetu twatela kwikala ibwambu wamuchidiwu kudi akwetu, neyi chadiñayi Yesu! Ichi dinu tufuntenu kuniyi nsañu kulonda tumoni chuma chalondelelihu.

12. Yesu namukani Mata nindidi, nawa muloñadi chatela kukuhwelelayi munamukaniyi? (Yowanu 11:23-26)

¹² Tañenu Yowanu 11:23-26. Mata neluki nindi Yesu wudi kwakwihi naBetani. Nanyakali kuya nakumukinkilila nakumuleja nindi: “Mwanta, neyi wadiña kunu, manakwami hadi kufwaku.” (Yow. 11:21) Mwamweni, wadi kumuuka Lazaru. Ilaña Yesu nakutoñojoka kwilahu chuma chakuhayamisha. Namukani nindi: “Manakweyi wukusañuka.” Namuleji cheñi Mata chuma chikwawu chikuletesha akuhweleli muchuma chinamukaniyi, nindi: “Yami kusañuka niwumi.” Eña, wudi nañovu yamwinkawu  kudi Nzambi yakusañula afu. Henohu ichi chuma kanda chimwekani, wasañwili kansi wamumbanda wafumini tuhu nakufwa nawa wasañwili cheñi kansi weyala, hadaha hefuku dafwiliyi tuhu. (Luka 7:11-15; 8:49-55) Komana wukutwesha kusañula muntu wunashakami mafuku awana kufuma hafwiliyi nawa wunatachiki kutoka?

13. Neyi chinashimuniwu haYowanu 11:32-35, chumanyi chineliyi Yesu hakumona Mariya niakwawu anakudila? (Talenu cheñi mwevulu.)

¹³ Tañenu Yowanu 11:32-35. Fwikijenu chuma chinalondelihu. Mariya, muhela aLazaru mukwawu nayi nakumukinkilila Yesu. Nafuntishihu mazu ahosha muhelindi Mata nindi: “Mwanta, neyi wadiña kunu, manakwami hadi kufwaku.” Yena niakwawu adiyi nawu ananeñi chikupu. Yesu naneñi chikupu hakuyimona nikutiya chinakudilawu. Muloña wawushona wunayitiyiliyi amabwambu jindi, nawulumuni madilu. Weluka chichakataña neyi wufwisha muntu iwakeña. Chakadi nikujina, nakufwila kufumishahu kukala kunaleteshi adileña!

14. Chuma chelili Yesu hamumweniyi Mariya nakudila chatukwashaña kwiluka nawu Yehova wekala ñahi?

¹⁴ Chuma cheliliyi Yesu hamumweniyi Mariya nakudila chatudizishaña nawu Yehova hiNzambi waluwi. Tunahoshelidi mwenimu? Neyi chitwamweni muchibaaba chinafumihu, Yesu watoñojokaña chikupu nikutiya neyi chatiyañayi Tata yindi. (Yow. 12:45) Dichi, neyi tutaña nawu Yesu wayitiyililili amabwambu jindi afwishili wushona chikupu chakwila wadilili, tunateli kukunkulula netu Yehova niyena watutiyilaña wushona chikupu neyi amona tunakudila muloña wachineñi. (Mas. 56:8) Komana chumichi hichayileteshaña mukeñeña kuswina kwakwihi naNzambi yetu wukweti luwiku?

15. Neyi chinashimuniwu haYowanu 11:41-44, chumanyi chinamwekani kwijamu daLazaru? (Talenu cheñi mwevulu.)

¹⁵ Tañenu Yowanu 11:41-44. Yesu nashiki kwijamu daLazaru nawa naleji antu nindi afumishi ilola dinajikiwu kwijamu. Mata nayikaanishi nindi yinu mpinji mujimba watela wunatachiki dehi kununka. Yesu namwakuli nindi: “Komana nakuleja wanyi nami neyi wukuhwelela wukumona kulema kwaNzambi?” (Yow. 11:39, 40)  Kuhiñahu Yesu nafumbuli mesu indi mwiwulu nakulomba hamesu awantu amavulu. Nakukeña mpuhu yejima yiyi kudi Yehova hachuma chinakukeña kumwekana. Kufumahu Yesu nabidiki nindi: “Lazaru, idikakumu!” Nawa Lazaru hakwidika mwijamu. Yesu neli chuma chatoñojokañawu antu amakwawu nawu chikutwesheka wanyi.

16. Nsañu yekala muYowanu kapetulu 11 yatukwashaña ñahi kukuhwelela chikupu mukuchiñeja kwakusañuka?

¹⁶ Nsañu yekala muYowanu kapetulu 11 yatukwashaña kukuhwelela chikupu mukuchiñeja kwakusañuka. Munjilanyi? Anukenu Yesu chamukaniniyi Mata nindi: “Manakweyi wukusañuka.” (Yow. 11:23) Kufwana Tata yindi, Yesu nakufwila kwilamu nawa wukweti ñovu yakushikija ichi chikaninu. Madilu awulumwiniyi amwekesheli nawu wakeñeshaña kufumishahu kufwa nichineñi chenzaña muloña wakufwa. Nawa mpinji yafuminiyi Lazaru mwijamu, Yesu wamwekesheli cheñi nindi wukweti ñovu yakusañula afu. Toñojokenu cheñi hamazu aYesu amwanukishiliyi Mata nindi: “Komana nakuleja wanyi nami neyi wukuhwelela wukumona kulema kwaNzambi?” (Yow. 11:40) Tukweti wunsahu wawuvulu wukuletesha tukuhweleli netu chikaninu chaNzambi chakusañula antu chakashikijewa. Hanu dinu, yumanyi yitwatela kwila hakwila tukuhweleli chikupu muniku kuchiñeja.

17. Chumanyi chitwatela kwanukaña neyi tutaña muBayibolu nsañu yahosha hakusañuka?

¹⁷ Tañenuña nikutoñojoka chikupu hansañu yahosha hadi antu asañwiliwu. Bayibolu yashimuna antu 8 asañwiliwu nakwikala cheñi nawumi hanu hamaseki. c Komana kwila mwikala nampinji yakudiza chikupu hansañu yahosha hadi awa antu asañwiliwu nehi? Chimukudizaña anukenuña nenu awa antu adiña kwoku, adiña amayala, ambanda nianyana. Talenu yuma yalema yimunateli kudizilaku. Toñojokenu hansañu  yamuntu-himuntu asañwiliwu chiyinakumwekesha nawu Nzambi wafwilaña kwilamu nawa wukweti ñovu yakusañula afu. Chasweja kubadika, toñojokenu hakusañuka kwalema chikupu, kwaYesu. Anukenu nenu hampinji yamusañwiliwu Yesu antu amavulu amweni chumichi, nawa dichatukwashaña kukuhwelela chikupu netu kwakekala kusañuka.—1 Kor. 15:3-6, 20-22.

18. Chumanyi chimwatela kwila hakwila tumina twahosha hakuchiñeja kwakusañuka tuyikwasheña? (Talenu cheñi tumazu twaheshina.)

¹⁸ Zatishenuña ‘tumina twakuspiritu’ twahosha hakuchiñeja kwakusañuka. d (Efwe. 5:19) Itu tumina twatukwashaña kukuhwelela chikupu mukusañuka, twakoleshaña chikuhwelelu chetu muniku kuchiñeja kwakuwahi. Tiyililenuña kunitu tumina, tudizenuña nawa hanjekenuña munatalishi mazu adimu hakudifukula kwenu kwachisaka. Mazu adimu yihembelenuña kumutu nimumuchima. Chikufumamu, neyi mumona kweseka kwasweja hela mufwisha muntu imwakeña, spiritu yaYehova yikuyikwasha kwanuka itu tumina nawa tukuyikundeja nikuyikolesha.

19. Yumanyi yitunateli kufwikija hadi antu akasañulawu? (Talenu chikasha chinakwila nawu “ Malwihwinyi Imukukeña Kuyihula?”)

¹⁹ Zatishenuña wuswa wenu wakufwikija yuma. Yehova watwinka wuswa wakudifwijika tudi mwituña dadiha. Muhela wumu walumbulwili nindi: “Nadifwikiji kapampa kakavulu nidi mwituña dadiha neyi kwiji inakwipula ivumba dankenu yalubanji muParadisa.” Fwikijenu munadiwani nawamayala niambanda ashinshika adiñaku kunyima. Hinyi imunakukeñesha kudimona nindi? Malwihwinyi imukumwihula? Fwikijenu cheñi munadiwani nawantaña jenu niamabwambu afwili dehi. Fwijikijenu yuma yikumwekana hampinji yimunekali cheñi nawu, mazu imukusambila kuhosha, chimukuyikumbata namuzañalu nichimukudila madilu amuzañalu.

20. Chumanyi chitwatela kufwilaña kwila?

²⁰ Twasakililaña nankashi hachikaninu chaYehova chakusañula antu! Twatela kukuhwelela netu ichi chikaninu chakashikijewa, muloña Yehova wafwilaña kwilamu nawa wukweti ñovu yakushikija ichi chikaninu. Dichi tufwileña kutwalekahu kukolesha chikuhwelelu chetu muniku kuchiñeja kwakuwahi. Neyi twila mwenimu, tukuswina chikupu kwakwihi naNzambi watukana hamuntu-hamuntu nindi, ‘Antu iwakeña akasañuka!’