1-2. Yumanyi yitwatela kwila hampinji yitunakuhembelela kaayi kakaha?

 TWALEMESHA chikaninu chaYehova chakufumishahu kanu kaayi nakuhiñishahu kaayi kakaha mwakekala kuloña. (2 Pet. 3:13) Hela chakwila tweluka wanyi mpinji yakenza kaayi kakaha, wunsahu wunakumwekesha nawu kunashali hohu kampinji kantesha.—Mat. 24:32-34, 36; Yilw. 1:7.

² Chayinu mpinji, hela chakwila tunashimbuli muchalala hela nehi, wejima wetu twatela kukolesha chikuhwelelu chetu munichi chikaninu. Muloñadi? Muloña nimuntu wudi nachikuhwelelu chakola nateli kuzeya. Kafwampi, kapostolu Pawulu washimwini kubula chikuhwelelu nindi “[hinshidi] yanyakalaña kututañila.” (Heb. 12:1) Hakwila chikuhwelelu chetu chibuli kuzeya, twatela kutoñojokaña chikupu mpinji yejima hawunsahu wunakumwekesha nawu kaayi kakaha kadi kwakwihi.—Heb. 11:1.

3. Yumanyi yitukuhanjekahu muchinu chibaaba?

³ Muchinu chibaaba, tukuhanjeka hanjila jisatu mutunateli kukoleshela chikuhwelelu chetu muchikaninu chaYehova chakaayi kakaha kuhitila: (1) mukutoñojoka chikupu hefutu danyiloña, (2) mukutoñojoka chikupu hañovu jaYehova, (3) nimukwila yuma yakuspiritu. Kuhiñahu tukuhanjeka mazu aYehova amulejeliyi Habakuki chakoleshañawu chikuhwelelu chetu makonu. Tuhanjekenu ntahi hayuma yimu yitunateli kufuukula chayinu mpinji yakeñekaña kwikala nachikuhwelelu chakola muchikaninu chakaayi kakaha kanakwinza.

 YUMA YITUNATELI KUFUUKULA YAKEÑEKAÑA CHIKUHWELELU CHAKOLA

4. Yumanyi yitunateli kufuukula yakeñekaña etu kwikala nachikuhwelelu chakola?

⁴ Ifuku niifuku, twafuukulaña yuma yakeñekaña etu kwikala nachikuhwelelu chakola. Chakutalilahu, twafuukulaña hadi antu itwatela kudikunda nawu, yisela yitwatela kutonda, shikola yitwatela kuya, muntu itwatela kudisumbula nindi, kwikala nawanyana hela nehi, nimudimu itwatela kwiñila. Tukwila chiwahi neyi tudihula netu, ‘Komana yuma yinafuukulaña kwila yamwekeshaña nawu neluki chikupu nami kanu kaayi kakapinji kantesha nawa keña akisinsi kudi kaayi kaNzambi kakaha? Tahindi nafuukulaña yuma yelañawu antu abula kukuhwelela nawu anateli kushakama haya nyaaka?’ (Mat. 6:19, 20; Luka 12:16-21) Tukufuukulaña mwamuwahi neyi tukuhwelela chikupu netu kaayi kakaha kadi mukamwihi.

5-6. Muloñadi chitwatela kwikalila nachikuhwelelu chakola mumpinji yayihuñu? Shimunenu chakutalilahu.

⁵ Twahitaña cheñi mukukala kwakeñekaña etu kwikala nachikuhwelelu chakola. Tunateli kumona ikabisha, kuyekela nayikatu, hela kukala kukwawu kunateli kutuzeyesha. Hakusambila, tunateli kumona neyi tukutwesha kuumika kukala kutukweti. Ilaña neyi kukala kutwalekahu, neyi chavula kumwekana nakukala kwakuvulu, tukukeñekaña kwikala nachikuhwelelu chakola hakwila tuumiki nikutwalekahu kumukalakela Yehova namuzañalu.—Rom. 12:12; 1 Pet. 1:6, 7.

⁶ Hampinji yitunakumona kukala, tunateli kutoñojoka netu kaayi kaYehova kakaha kakenza swayi wanyi. Komana ichi chinayi mukwila nawu chikuhwelelu chetu chazeya? Inehi. Talenu ichi chakutalilahu. Hampinji yitudi muchishika chasweja, tunateli kutachika kutoñojoka netu kwakekalahu mpinji yeyena wanyi. Hela chochu, mpinji yeyena yenzaña nakwikalaku. Munjila yoyimu, neyi tunazeyi chikupu tunateli kutachika kutoñojoka netu kaayi kakaha kakenza wanyi. Ilaña neyi tukweti chikuhwelelu chakola, twelukaña netu yikaninu yaNzambi yikashikijewa. (Mas. 94:3, 14, 15; Heb. 6:17-19) Ichi chikuhwelelu, chikutukwasha kutwalekahu kulemesha kudifukula kudi Yehova muchihandilu chetu.

7. Yitoñojokanyi yitwatela kutondolwela?

⁷ Twatela cheñi kwikala nachikuhwelelu chakola hakwila tuzati mudimu wakushimwina. Antu amavulu itwashimwinaña atoñojokaña nawu “nsañu yayiwahi” yahosha hakwinza kwakaayi kaNzambi kakaha yalala wanyi. (Mat. 24:14; Ezek. 33:32) Hitunakukeña kwiteja yitoñojoka yawu yakujinoka yituluwañeshiku. Hakwila tubuli kwiteja chuma chamuchidiwu kutumwekena, twatela kutwalekahu kukolesha chikuhwelelu chetu. Tuhanjekenu njila jisatu mutunateli kwilila mwenimu.

KUTOÑOJOKA CHIKUPU HEFUTU DANYILOÑA

8-9. Kutoñojoka chikupu hefutu danyiloña kunateli kukolesha ñahi chikuhwelelu chetu?

⁸ Njila yimu mutunateli kukoleshela chikuhwelelu chetu hikutoñojoka chikupu hefutu danyiloña. Ifutu danyiloña hiwunsahu wamwekeshaña nawu yikaninu yaNzambi yakashikijewa. Neyi tutoñojokaña chikupu hachahanininiwu ifutu danyiloña niyuma yabombelelimu, twakuhwelelaña chikupu netu chikaninu chaNzambi chakwikala nawumi wabulaña kukuma mukaayi kakawahi chikashikijewa. Tunahoshelidi mwenimu?

⁹ Hanu dinu, yumanyi yabombeleli mwifutu danyiloña? Yehova watemesheli Mwanindi wawedi akeñayi nankashi, muntu adikundayi nindi, kufuma mwiwulu nakwinza hanu hamaseki kulonda avwaliki neyi muntu wawanina. Hadiñayi hamaseki, Yesu womikili kukala kwashiyashana. Kuhiñahu wakabakeni nawa  wafwili kufwa kwayeña. Iwu wadiña hiwuseya weneni chikupu wafweteliyi Yehova! Nzambi yetu wukweti kukeña hadi kwiteja Mwanindi kukabakana nikufwa kulonda atwinki chihandilu chachiwahi ilaña chakuhanda hohu hakampinji kanteshaku. (Yow. 3:16; 1 Pet. 1:18, 19) Chineli wahanini wuseya weneni ñana, Yehova wakaletesha twakashakameña haya nyaaka mukaayi kakaha.

KUTOÑOJOKA CHIKUPU HAÑOVU JAYEHOVA

10. Kwesekeja naAEfwesesa 3:20, yumanyi yinateli kwilayi Yehova?

¹⁰ Njila yamuchiyedi mutunateli kukoleshela chikuhwelelu chetu hikutoñojoka hañovu jaYehova. Wukweti ñovu yakushikija yuma yejima yakanañayi. Antu amavulu makonu atoñojokaña nawu chikaninu chakwikala nawumi wahaya nyaaka mukaayi kakaha hichakashikijewaku. Ilaña kakavulu Yehova wakanaña yuma yinateli kukañanya kwilawu antu. Muloña hiNzambi Wañovu Jejima. (Yoba 42:2; Maku 10:27) Dichi twahayamaña wanyi neyi atushiika kutwilila yuma yayiwahi.—Tañenu AEfwesesa 3:20.

11. Shimunenu yikaninu yaNzambi yakuhayamisha yashiikiliyi. (Talenu chikasha chinakwila nawu “ Yikaninu Yimu Yakuhayamisha Yashikijeweli.”)

¹¹ Talenu yuma yamwekeni neyi yikutwesheka kuzatika wanyi yakaniniyi Yehova antu jindi kunyima. Wayikanini aAbarahama naSara nindi akavwala mwana weyala muwushinakaji. (Kutach. 17:15-17) Wamulejeli cheñi nindi mutaña windi akawinka ituña daKenani. Hadi yaaka yayivulu yashakamini mutaña waAbarahama, dikwila nawu aIsarela, muwuduñu muEjipitu, chatela chamwekeni neyi ichi chikaninu chakashikijewa wanyi. Ilaña chashikijeweli. Chimwahitili mpinji, Yehova washimwini nindi kashinakaji Elizabeta wakavwala mwana. Wamulejeli cheñi mujiki Mariya nindi, wakamuvwalila Mwanindi owu wakaniniyi Yehova kunyima hadi yaaka yayivulu mwitempa daEdeni nindi wakenza—ichi chikaninu nichena chashikijeweli!—Kutach. 3:15.

12. Yoshuwa 23:14 niIsaya 55:10, 11, yatukwashaña kwilukadi kutalisha hañovu jaYehova?

¹² Twakuhwelelaña chikupu muñovu jaYehova jakuleta kaayi kakaha neyi tutoñojokaña hayikaninu yakaniniyi nichayishikijañayi. (Tañenu Yoshuwa 23:14; Isaya 55:10, 11.) Chumichi chatuleteshaña kwikala adiloñesha chiwahi kukwasha antu kulonda eluki nawu chikaninu chahosha hakaayi kakaha bayi neyi hichilota hela kaanuku. Yehova yomweni diyi wahosheli kutalisha hamawulu amaha niiseki dadiha nindi: “Awa mazu atelela kuyikuhwelela nawa alala.”—Chim. 21:1, 5.

ILENUÑA YUMA YAKUSPIRITU

13. Kupompa kwachipompelu kunateli kukolesha ñahi chikuhwelelu chetu? Lumbululenu.

¹³ Njila yamuchisatu yinateli kutukwasha kukolesha chikuhwelelu chetu hikwila yuma yakuspiritu. Chakutalilahu, talenu kupompa kwetu kwachipompelu chikwatukwashaña. Muhela Anna, wunazati yaaka yayivulu munyidimu yashiyashana mumudimu wampinji yejima, wahosheli nindi: “Kupompa kwakoleshaña chikuhwelelu chami chikupu. Hela chakwila owu nhoshi watañishaña chiwahi nankashi wanyi, indi kwiji wahoshaña hohu hansañu yawenimbu, kakavulu natiyañamu chikuma chalema chankwashaña kutiyishisha chalala chamuBayibolu, nawa chumichi chakoleshaña chikuhwelelu chami.” b Chakadi nikujina, twatiyaña cheñi kuwaha nañakwilu jakoleshaña chikuhwelelu chetu jahanañawu antu mwizaza.—Rom. 1:11, 12; 10:17.

14. Kushimwina kwakoleshaña ñahi chikuhwelelu chetu?

¹⁴ Twakoleshaña cheñi chikuhwelelu chetu neyi tuya nakushimwina. (Heb. 10:23) Muhela  Barbara, wunamukalakeli Yehova kubadika hayaaka 70, wahosheli nindi: “Nenzi nakuwana nami mudimu wakushimwina wakoleshaña chikuhwelelu chami mpinji yejima. Mpinji yejima yinalejaña antu hayikaninu yaYehova yayiwahi, chikuhwelelu chami chakolelañaku.”

15. Kudiza nkawetu kwakoleshaña ñahi chikuhwelelu chetu? (Talenu cheñi nyevulu.)

¹⁵ Talenu chuma chikwawu chakuspiritu chakoleshaña chikuhwelelu chetu: kudiza nkawetu. Muhela Susan wawana nindi chuma chamukwashaña hikutanjikila chadimu mpinji yakudiza. Wahosheli nindi: “Hamulungu, naloñeshelaña chadimu chibaaba chamuKaposhi Kakutalila chakudiza mulungu wunalondelihu. Hachimu niHachiyedi, naloñeshaña kupompa kwamukachi kamulungu. Mafuku anashali, nekalaña nakudiza kwankawami.” Kuhitila mukulondela iyi ndandanda yakudiza nkawami, muhela Susan natwalekihu kukolesha chikuhwelelu chindi. Muhela Irene, wunakalakali yaaka yayivulu hakasanji keneni kamukaayi kejima, wenza nakwiluka nindi kudiza hawuprofwetu wamuBayibolu kwakoleshaña chikuhwelelu chindi. Wahosheli nindi, “Natiyaña kuwaha kwiluka nami wuprofwetu waYehova wunakushikijewa wejima.” c

“CHAKADI NIKUJINA, CHAKASHIKIJEWA”

16. Muloñadi mazu akukolesha amulejeliwu Habakuki kudi Yehova chinatukundaminiwu ninetu makonu? (AHeberu 10:36, 37)

¹⁶ Ambuña aYehova amakwawu anatalili hadi mpinji yayilehi kukuma kwayuma yanshakaminu yamakonu. Antu amakwawu atoñojokaña nawu, chikaninu chaNzambi chinakushikijewa swayi wanyi. Yehova weluka chatiyañawu ambuñindi, dihafumini amuleji kaprofwetu Habakuki nindi: “Chimwenu chakumpinji yatoñolawu dehi, chinakunyakala kushikijewa, nawa chikashikijewa. Hela chikulaba, chichiñilileña! Muloña chakadi nikujina, chakashikijewa. Hichakalabaku!” (Hab. 2:3) Komana  mazu ahosheliyi Nzambi akukolesha akundamini hohu kudi Habakuki? Tahindi mazu indi anatukundami ninetu makonu? Chamwoneneniwu, kapostolu Pawulu wakundamishili awa mazu kudi akaKristu, anakutalila kaayi kakaha. (Tañenu AHeberu 10:36, 37.) Mwamweni, twatela kukuhwelela netu hela chakwila chikaninu chakutwamwina chinakumwekana neyi chinashimbuli, “chakadi nikujina, chakashikijewa. Hichakalabaku!”

17. Muhela wumu wazatishili ñahi kufumba kwamulejeliwu Habakuki kudi Yehova?

¹⁷ Ambuña aYehova amavulu anazatishi kufumba kwaYehova ‘kwakutwalekahu kuchiñilila,’ hela chakwila hanahiti yaaka yayivulu. Chakutalilahu, muhela Louise, watachikili kumukalakela Yehova mu 1939. Wahosheli nindi: “Hayina mpinji, natoñojokeleña nami Amagedoni yakenza henohu kanda nimanishi shikola. Ilaña yenjili wanyi. Hadi yaaka yayivulu, chuma chankwashaña hikutaña nsañu yinatenaña nami ‘nsañu yakuchiñilila,’ dikwila nawu nsañu yamuBayibolu yahosha hadi Nowa, Abarahama, Yosefu niantu amakwawu ahembeleleli hadi mpinji yayilehi henohu kanda atambwili wufwetu wayikaniniwu kudi Yehova. Kutwalekahu kuchiñilila kunankwashi ami niantu amakwawu kukuhwelela netu kaayi kakaha kadi kwakwihi nankashi.” Antu amavulu anadifukuli kudi Yehova hadi yaaka yayivulu niwena dichakuhwelelawu!

18. Kushinshika yileñaleña kunateli kutukwasha ñahi kukuhwelela chikupu netu kaayi kakaha kakenza?

¹⁸ Mwamweni, kaayi kakaha kanda kenzi. Hela chochu, toñojokenu hayuma yimu yekalaku, chidi neyi tutumbwa, nyitondu, anyama niantu. Kwosi wunateli kujinoka nindi iyi yuma yejima yekalaku wanyi, hela chakwila kwadiña mpinji yimu yadiñaku wanyi. Yekalaku muloña Yehova diyi wayileñeli. (Kutach. 1:1, 26, 27) Nzambi yetu cheñi wafuukula dehi kuleta kaayi kakaha. Wakela mwafuukulayi. Mukaayi kakaha, antu akashakamaña haya nyaaka nawa akola kumujimba. Hampinji yatoñolayi dehi Nzambi, kaayi kakaha kakekalaku neyi chiyekalaku yuma yamumawulu niyahamaseki yitwamonaña.—Isa. 65:17; Chim. 21:3, 4.

19. Munateli kukolesha ñahi chikuhwelelu chenu?

¹⁹ Chayinu mpinji, zatenuña kwesekeja nahakumina ñovu jenu kulonda mukolesheña chikuhwelelu chenu. Mwekeshenuña kusakilila hefutu danyiloña. Toñojokenuña chikupu hañovu jaYehova. Ilenuña yuma yakuspiritu. Neyi mwilaña yumiyi, mukwikala hakachi kawantu “akaswana yuma yakanawu muloña wachikuhwelelu nikudiwunjika kwawu.”—Heb. 6:11, 12; Rom. 5:5.