1. Tweluka netudi?

 CHINELI tudi antu jaYehova, tweluka netu watukeña nawa wakeñaña nindi tushakameña chiwahi. (Rom. 8:35-39) Tweluka cheñi netu yishina yamuBayibolu yatukwashaña neyi tuyizatishaña. (Isa. 48:17, 18) Hanu dinu, tukwila ñahi neyi tumona kukala kutwabula kukuhwelela?

2. Kukalanyi kutunateli kumona, nawa iku kukala kunateli kuletesha tudihuli netudi?

² Ambuña aYehova ejima amonaña kukala. Chakutalilahu, muntu wamuchisaka nateli kwila chimu chinateli kutuneñesha. Hadaha tudi nachikatu cheneni chinakutukañesha kuzata nankashi mumudimu waYehova. Tunateli kuhita mukukala kweneni muloña wawubanji wadimwekenaña. Indi kwiji anateli kutukabisha muloña wayuma yitwakuhwelela. Neyi tumona kukala kwamuchidiwu, hadaha tukudihula netu: ‘Muloñadi yumiyi chiyinakummwekena? Kudihu chuma chinneli? Komana chumichi chinakumwekesha nawu Yehova nakunkiswila wanyi?’ Mwatiyahu dehi muniyi njila? Neyi mwatiyahu dehi muniyi njila, bayi muneñaku. Ambuña aYehova amavulu ashinshika niwena atiyahu dehi muniyi njila.—Mas. 22:1, 2; Hab. 1:2, 3.

3. Yumanyi yitunateli kudizila Kwisamu 34:19?

³ Tañenu Isamu 34:19. Talenu yuma yalema yidi munidi isamu: (1) Antu aloña amonaña kukala. (2) Yehova watupulwishaña mukukala kutwamonaña. Yehova watupulwishaña ñahi? Njila yimu mwatupulwishilañayi, hikutukwasha kumona  yuma munjila yayiwahi hela chakwila yuma yinatami mukanu kaayi. Yehova watukana nindi tukwikalaña namuzañalu hampinji yitunakumukalakela, ilaña hatukana nindi tukwikalaña nachihandilu chakadi kumona kukalaku. (Isa. 66:14) Watulejaña nindi tusheña muchima hachihandilu chetu chakumbidi, mpinji yitwakekala nachihandilu chachiwahi chakeñañayi nindi twakadiluñisheña haya nyaaka. (2 Kor. 4:16-18) Chayinu mpinji, watukwashaña kutwalekahu kumukalakela ifuku niifuku.—Mukeña 3:22-24.

4. Tukuhanjekadi muchinu chibaaba?

⁴ Tuhanjekenu yuma yitunateli kudizila kudi akakudifukula aYehova ashinshika akunyima niamakonu. Neyi chitukumona, tunateli kumona kukala kwakadi kukuhwelela. Ilaña neyi tumushindamena Yehova, hakakañanya kutukwashaku. (Mas. 55:22) Chitukuhanjekaña hadi awa antu, dihulenu nenu: ‘Nadi kwila ñahi neyi yami namweni kukala kwamuchidiwu? Yuma yeliliwu awa antu yinankwashi ñahi kumukuhwelela chikupu Yehova? Yumanyi yalema yinnadiziliku yinatela kuzatisha muchihandilu chami?’

5. Kukalanyi kwamweniyi Yakoba muloña waLabani? (Talenu mwevulu wudi hakava.)

⁵ Ambuña aYehova akunyima amweneña kukala kwabulileñawu kukuhwelela. Talenu yuma yamumwekeneni Yakoba. Amulejeli kudi tata yindi nawu asumbuli mumbanda hakachi kanyana kaLabani awambanda, ntaña yindi wadiña wetiya nawa amukanini nawu Yehova wakamukiswila chikupu. (Kutach. 28:1-4) Dichi Yakoba welili mwamulejeliwu. Wafumini mwituña dawu daKenani nakuya kwashakamineñayi Labani, owu wadiña nawanyanindi awambanda ayedi, aLiya naRacheli. Yakoba wakeñeli mwana kaLabani wakansi, Racheli, nawa wetejeli kumuzatila tata yindi yaaka 7 henohu kanda amusumbuli. (Kutach. 29:18) Ilaña yuma hiyazatikili neyi chakuhweleleliyi Yakobaku. Labani wamudimbili chakwila wasumbwili mwanindi wamukulumpi, Liya. Chimwahitili mulungu wumu, Labani wamwitejeli Yakoba kumusumbula Racheli, ilaña wateleleli kuzatilahu yaaka 7 yikwawu. (Kutach. 29:25-27) Labani wamwekesheleña cheñi wupwapoki hazatileñayi naYakoba. Wamwilili Yakoba chatama hadi yaaka 20!—Kutach. 31:41, 42.

6. Kukalanyi kukwawu kwashiyashana kwomikiliyi Yakoba?

⁶ Yakoba womikili kukala kukwawu kwashiyashana. Wadiña nachisaka cheneni, ilaña anyanindi awamayala hiyadiña nakutiyañana mpinji yejimaku. Alandishili nimanakwawu Yosefu muwuduñu. Anyana kaYakoba ayedi, aSimiyoni naLevi, aleteli kasawuntu muchisaka nihejina daYehova. Kubombelahu, ñoda Yakoba akeñeliyi nankashi, Racheli, wafwili hampinji yapaapileñayi mwanawu wamuchiyedi. Nawa muloña wanzala yakapwelendendi, Yakoba wayili kwituña daEjipitu henohu wakula dehi.—Kutach. 34:30; 35:16-19; 37:28; 45:9-11, 28.

7. Yehova wamwekesheli ñahi kudi Yakoba nindi wamutiyileña kuwaha?

⁷ Mukukala kwejimiku, Yakoba halekeli kumukuhwelela Yehova niyikaninu yindiku. Yehova niyena wamwekesheli kudi Yakoba nindi wamutiyileña kuwaha. Chakutalilahu, hela chakwila Labani welili wupwapoki, Yehova wamwinkeli Yakoba yuma yayivulu. Nawa toñojokenu Yakoba chamusakilililiyi Yehova hampinji yadimweniyi cheñi naYosefu, mwana atoñojokeleñayi hadi mpinji yayilehi nindi wafwa dehi! Muloña wakwila Yakoba wadiña nawubwambu wakola naYehova, chumichi chamukwashili kuumika kukala kwejima kwamweneñayi. (Kutach. 30:43; 32:9, 10; 46:28-30)  Neyi tutwalekahu kwikala nawubwambu wakola naYehova, ninetu tunateli kuumika kukala kwejima kutunamoni kutwabula kukuhwelela.

8. Mwanta Davidi wafwilileña kwiladi?

⁸ Mwanta Davidi helili yuma yejima yafwilileñayi kwila mumudimu waYehovaku. Chakutalilahu, Davidi wafwilileña chikupu kumutuñila Nzambi yindi tembeli. Walejeli kaprofwetu Natani iyi yitoñojoka. Natani niyena wamulejeli nindi: “Ilaku yuma yejima yidi kumuchima weyi, muloña Nzambi walala wudi naneyi.” (1 Kushi. 17:1, 2) Awa mazu atela amukolesheli chikupu Davidi. Hadaha hohenohu watachikili kutoñojoka chakuzata iwu mudimu weneni.

9. Davidi welili ñahi nansañu yakuneñesha yamulejeliwu?

⁹ Hela chochu, hashimbwili wanyi kaprofwetu kaYehova wafuntili nakumuleja nsañu yakuneñesha. “Hawowenowu wufuku,” Yehova wamulejeli Natani nindi Davidi hidiyi wukutuña tembeliku, ilaña wumu hakachi kawanyanindi awamayala diyi wakatuña. (1 Kushi. 17:3, 4, 11, 12) Davidi welili ñahi chamulejeliwu awa mazu? Wahimpili yitoñojoka yindi. Washili muchima hakupompesha mali niyuma yakakeñayi mwanindi Solomoni hakuzata iwu mudimu.—1 Kushi. 29:1-5.

10. Yehova wamukiswilili ñahi Davidi?

¹⁰ Hanyima yakumuleja David nindi diyi wukutuña wanyi tembeli, Yehova wakwatili chitiyañenu nayena. Yehova wamukanini Davidi nindi mwanindi wumu wakayuula haya nyaaka. (2 Sam. 7:16) Fwikijenu owu muzañalu wakatiyayi Davidi hakwiluka nindi nakushakama muChiyuulu chaYaaka Ikombakaji chaYesu, Mwanta wamuchisaka chindi! Iyi nsañu yinakutukwasha kwiluka nawu hela chakwila hitukutwesha kuzata nyidimu yejima yitwafwilileña kumuzatila Yehovaku, Nzambi yetu nateli kutwinka yuma yikwawu yayiwahi yitwabulili kukuhwelela.

11. AkaKristu akusambila ayikiswilili ñahi hela chakwila Wanta hiwenjili kwesekeja nachakuhweleleliwuku? (Yilwilu 6:7)

¹¹ AkaKristu akusambila amweneña kukala kwabulili kukuhwelelawu. Chakutalilahu, atalilileña chikupu kwinza kwaWanta waNzambi, ilaña elukili wanyi mpinji yiwakenza. (Yilw. 1:6, 7) Hanu dinu, chumanyi cheliliwu? Atwalekelihu kudikita mumudimu wakushimwina. Nsañu yayiwahi chiyataandileña, amweni wunsahu wamwekesheleña nawu Yehova wadiña nakukiswila nyidimu yazatileñawu.—Tañenu Yilwilu 6:7.

12. AkaKristu akusambila elili ñahi hikwenjili nzala yakapwelendendi?

¹² Mpinji yimu, nzala yakapwelendendi yenjili “heseki dejima hashakama antu.” (Yilw. 11:28) Iyi nzala yashikeneni niakaKristu akusambila. Fwikijenu chakabakeniwu muloña waniyi nzala. Chakadi nikujina, nyitu yayisaka yakameneni chiyatela kukeñela yisaka yawu yakuda. Indi atwansi akeñeleña nankashi kuzataku mudimu wakushimwina? Komana atoñojokeli nawu atela kuhembelelaku chantesha? Hela chakwila adiña nakukala kwamuchidiwu, akaKristu akusambila ahimpili chihandilu chawu. Atwalekelihu kushimwina kuzatisha njila yejima yatwesheleñawu nawa adiña namuzañalu wakwinkahu akwawu akakwitiya amuYudeya yuma yadiñawu nayu.—Yilw. 11:29, 30.

13. Nkiswinyi jatambwililiwu akaKristu hampinji yikwadiña nzala yakapwelendendi?

¹³ Nkiswinyi jatambwililiwu akaKristu hampinji yikwadiña nzala yakapwelendendi? Ana atambwilili yuma yakudikwashamu nachu amweni Yehova chayikwashileñayi. (Mat. 6:31-33) Atela adikundili chikupu nawakwawu akakwitiya ayikwashili. Nawa ana ahaniniku yawaana hela ana azatiliku mudimu wakuhana iyi yuma, atiyili muzañalu wafumaña mukuhana. (Yilw. 20:35) Yehova wayikiswilili wejima  wawu muloña ahimpili chihandilu chawu kwesekeja nachadiña yuma.

14. Chumanyi chayimwekeneni aBaranaba nakapostolu Pawulu, nawa yumanyi yayiwahi yafuminimu? (Yilwilu 14:21, 22)

¹⁴ AkaKristu akusambila kakavulu adiña nakuyikabisha, mpinji jikwawu ayikabishileña nihampinji yabulili kukuhwelelawu. Talenu chuma chayimwekeneni aBaranaba nakapostolu Pawulu hampinji yashimwinineñawu mwiluña damuLisitira. Hakusambila, ayitambwilili namuzañalu kudi ana adiña nakuyitiyilila. Ilaña chimwahitili mpinji, akakudikaña “ashinjilili mazaza awantu,” nawa amakwawu hakachi kanawa antu amwasili Pawulu malola nakukeña kumujaha. (Yilw. 14:19) Ilaña aBaranaba naPawulu atwalekelihu kushimwina kwiluña dacheñi. Yumanyi yafuminimu? Akwashili “antu antesha kwikala atumbanji,” nawa yuma yahosheleñawu niyelileñawu yakolesheli akwawu akakwitiya. (Tañenu Yilwilu 14:21, 22.) Amavulu ahetelelimu muloña aBaranaba naPawulu hiyalekeli kushimwina hela chakwila ayikabishileñaku. Yehova wakatukiswila, chakala hohu neyi tubula kuleka kuzata mudimu watwinkayi.

15. Chumanyi chimunadizili kudi Manakwetu A. H. Macmillan?

¹⁵ Muyaaka yakutwala ku 1914, antu jaYehova adiña nakutalila chikupu nawu kudi yuma yikumwekana. Chakutalilahu, talenu chuma chamwekeni kudi Manakwetu A. H. Macmillan. Manakwetu Macmillan wakuhweleleli nindi keña atambwili isomu dindi dakuya mwiwulu neyi chakuhweleleliwu amavulu hayina mpinji. Mumpanji yahaniniyi muSeptember 1914, wahosheli nindi: “Hadaha iyi diyi mpanji yawantu amavulu yakukumishaku yinnahani.” Hela chochu, iyi diyi mpanji yindi yadiña yakukumishaku wanyi. Chimwahitili mpinji, Manakwetu Macmillan wasonekeli nindi: “Hadaha etu amakwawu twanyakeli kutoñojoka netu tunakuya mwiwulu chochichi.” Wabombelelihu nindi: “Chuma chitwateleli kwila hikutwalekahu kudikita mumudimu waMwanta.” Manakwetu Macmillan watwalekelihu kudikita. Wadikitileña chikupu mumudimu wakushimwina. Wadiña nakukooleka kwakukolesha amanakwetu amavulu akasiliwu mutuleya muloña wakubula kudiñija munsañu jamatuña nachiyuulu. Nawa watwalekelihu kuya kukupompa kwachipompelu nihampinji yelili nashinakaji dehi. Yumanyi yayiwahi yafuminimu chelili Manakwetu Macmillan atwalekihu kumukalakela Yehova hadiña nakuhembelelayi isomu dindi? Chikwashalili mpinji yantesha hakwila afwi mu 1966, wasonekeli nindi: “Chikuhwelelu chami chichidi chakola neyi chichadiña kunyima.” Ichi dichuma chachiwahi chitwatela kwila wejima wetu, sweje-e neyi tunomiki kukala hadi mpinji yayilehi kubadika chitwakuhweleleli!—Heb. 13:7.

16. Kukalanyi kwakadi kukuhwelela kwamweniyi Manakwetu Herbert Jennings niñodindi? (Yakoba 4:14)

¹⁶ Antu jaYehova amavulu alwishaña nayikatu yabulili kukuhwelelawu. Chakutalilahu, munsañu yachihandilu chindi, Manakwetu Herbert Jennings b walumbulwili yena niñodindi chadiluñishileñawu mumudimu wawu wawumishonali muGhana. Hela chochu, mukuhita kwampinji amukwatili nachikatu chafwana chakuwoñu. Manakwetu Jennings wazatishili mazu ekala haYakoba 4:14, nawa walumbulwili nindi iku kukala kwamweniyi “kwadiña hichuma chikamwekana ‘kumadiki’ chitunabuli kukuhwelela.” (Tañenu.) Wasonekeli nindi: “Muloña waniku kukala twahimpili yitoñojoka yetu, twafuukwilihu kufuma muGhana nikushiya amabwambu jetu itwadikundili nawu  nakufunta kuCanada [kuchipateli].” Yehova wamukwashili Manakwetu Jennings niñodindi kutwalekahu kumukalakela nakashinshi hela chakwila amweneña iku kukala.

17. Chuma cheliliyi Manakwetu Jennings chakwashili ñahi akwawu akakwitiya?

¹⁷ Mazu aManakwetu Jennings akufuma hamuchima ekala munsañu yachihandilu chindi anakwashi chikupu antu amakwawu. Muhela wumu wasonekeli nindi: “Chinatañili ichi chibaaba, mazu adiñamu anshikili chikupu hamuchima. . . . Chinatañili nsañu yahosha hadi Manakwetu Jennings chashiliyi mudimu windi nakuya kuchipateli muloña wayikatu yindi, chumichi chankwashili kumona kukala kwami munjila yayiwahi.” Manakwetu wumu niyena wasonekeli nindi: “Nadiña mukulumpi muchipompelu hadi yaaka 10, ilaña nalekeli muloña wachikatu chakuwoñu. Yitoñojoka yakwila nawu kwosi chuma chinatela kwila yanneñesheleña chakwila nakañenyeña nikutaña yibaaba yahosha hansañu yachihandilu. . . . Ilaña kuumika kwaManakwetu Jennings kwankolesheli.” Chumichi chinakutwanukisha nawu neyi tuumika kukala kutunabuli kukuhwelela, tunateli kukolesha akwetu. Hela chakwila yuma yihimpika muchihandilu chetu kwesekeja nachitwabulili kukuhwelela, ninetu tunateli kukwasha antu amakwawu kwikala nachikuhwelelu nikuumika.—1 Pet. 5:9.

18. Neyi chinamwekeshiwu hanyevulu, chumanyi chimunakudizila kudi ntuluwa wakuNigeria?

¹⁸ Kukala kudi neyi chipupu chaCOVID-19 kunaleteshi antu jaYehova amavulu kukabakana. Chakutalilahu, ntuluwa wumu muNigeria wadiña nayakuda yantesha nankashi. Ifuku dimu nantetemena, mwanindi wamumbanda wamwihwili yakuda yikudañawu neyi ateleka kaapu kalosu kakukumishaku. Iwu muheletu wamulejeli mwanindi nindi hiyashalilihu namali hela yakudaku, ilaña nindi atela kumwimbujola ntuluwa wakuZarefwati, kuhitila  mukuloñesha yakuda yawu yashalilihu nikumukuhwelela chikupu Yehova. (1 Anya. 17:8-16) Henohu kanda atachiki nikutoñojoka hayakuda yikudawu hachayili, atambwilili yawaana yakukwasha antu adi mukukaankila yafuminini kudi akwawu akakwitiya. Ayinkeli yakuda yayivulu yatela kudawu kubadika hanyilungu yiyedi. Iwu muhela wahosheli nindi wahayamini hakwiluka nindi Yehova wadiña nakutiyilila chikupu kunsañu yahanjekeliyi namwanindi. Mwamweni, neyi tumushindamena Yehova, kukala kwakubula kukuhwelela kutwamonaña muchihandilu kunateli kutuswija kwakwihi nayena.—1 Pet. 5:6, 7.

19. Kukalanyi kunomikiyi Manakwetu Aleksey Yershov?

¹⁹ Muyaaka yinahitihu, amanakwetu niahela amavulu anomiki ikabisha hadaha dabulili kukuhwelelawu. Talenu chuma chamumwekeneni Manakwetu Aleksey Yershov, washakamaña kuRussia. Antu jaYehova munidi iluña adiña asubukaku chanti hampinji yapapatisheweliyi Manakwetu Yershov mu 1994. Hela chochu, muyaaka yalondelelihu yuma yahimpili muRussia. Mu 2020, itala daManakwetu Yershov adilukukili nakukeñakeñamu yuma, nawa yuma yayivulu yadiñayi nayu ayisendeli. Chimwahitili tukweji twatuvulu, nfulumendi yamwinkeli muloña nawu himbanji. Chaswejeli kutama, iyi nyiloña yashindameneni havidiyo yakwatili muntu watwambileña kumwekesha mpwila yakudiza Bayibolu hadi chaaka chimu nakubadikahu. Wenowu wunfwikiji!

20. Yumanyi yinamukwashi Manakwetu Yershov kukolesha wubwambu windi naYehova?

²⁰ Kudihu yuma yayiwahi yinafumi mukuumika kwaManakwetu Yershov? Eña. Wubwambu windi naYehova wunakoleliku chikupu. Wahosheli nindi: “Ami nañodami twalombelaña hamu kakavulu. Neluki nami hinadi kutwesha kuumika iku kukala chakadi wukwashu waYehovaku.” Wabombelelihu nindi: “Kudiza kwakankawami kwankwashaña kumanisha chineñi. Natoñojokaña chikupu hadi ambuña aNzambi ashinshika akunyima. MuBayibolu asonekamu nsañu yayivulu yamwekeshaña chichalemena kwikala adiwunjika nikumukuhwelela Yehova.”

21. Yumanyi yitunadizi muchinu chibaaba?

²¹ Yumanyi yitunadizi muchinu chibaaba? Mpinji yikwawu twamonaña kukala kutunabuli kukuhwelela mukanu kaayi. Hela chochu, Yehova wakwashaña ambuñindi mpinji yejima neyi amushindamenaña. Neyi chashimunawu munsona hanashindameni achinu chibaaba, “muntu waloña wamonaña kukala kwakuvulu, ilaña Yehova wamupulwishaña mukukala kwejima.” (Mas. 34:19) Dichi tutwalekenuhu kushindamena hañovu jaYehova jatukwashaña, bayi hamakabi itunakuhitamuku. Chikufumamu, ninetu tukuhosha neyi chahosheliyi kapostolu Pawulu nindi: “Nikweti ñovu yakuhita muyuma yejima muloña wanowu wanyinkaña ñovu.”—Fwili. 4:13.