1. Shimunenu chuma chamwekeni hampinji yakoñeliyi Yesu chihayamisha chindi chatachi.

 FWIKIJENU chuma chinakumwekana kukumana kwa 29 C.E. hampinji yinatachikiyi Yesu mudimu windi. Yesu nimama yindi Mariya, kushilahu niatumbanji amakwawu anayitambiki kuchawija chawulu muKana, mukala wakukabeta kakuchimunswa chaNazareta, mukala mwashakamañayi Yesu. Mariya hibwambu danichi chisaka nawa hadaha nakuyikwashaku kwakamena antu anenzi. Ilaña hampinji yachawija, vinyu yinamani nawa iku kukala kunateli kutiyisha chisaka nsonyi chikupu nianakudisumbula. b Hadaha antu anenzi anavuli nankashi kubadika chakuhwelelawu. Mariya nanyakali kuya kudi mwanindi nakumuleja nindi: “Vinyu yinayimani.” (Yow. 2:1-3) Chumanyi chineliyi Yesu? Neli chuma chakuhayamisha chikupu, nabalumuni menji muchihayamisha nakwikala “vinyu yayiwahi.”—Yow. 2:9, 10.

2-3. (a) Yihayamishanyi yakoñeliyi Yesu? (b) Kuhanjeka hayihayamisha yakoñeliyi Yesu kunateli kutukwasha ñahi?

² Yesu wakoñeleña yihayamisha yikwawu yayivulu hampinji yazatileñayi mudimu wendi. c Wazatishili ñovu yindi yakuhayamisha kulonda akwashi antu amavulu. Chakutalilahu, muyihayamisha yiyedi hohu yakoñeliyi, mwadiishiliyi amayala 5,000 nawa mukuhita  kwampinji amayala 4,000, hadaha abadikili antu 27,000 neyi tubombelahu ambanda nianyana adiña kwenoku. (Mat. 14:15-21; 15:32-38) Haniji mpinji jejima jiyedi, Yesu wokili cheñi antu amavulu adiña akata. (Mat. 14:14; 15:30, 31) Fwikijenu owu muzañalu watiyiliwu mazaza awantu hakuyuuka nikuyidiisha kudi Yesu muchihayamisha!

³ Makonu, kuyihayamisha yakoñeliyi Yesu tunateli kudizilaku yuma yayivulu. Muchinu chibaaba, tukuhanjeka yuma yalema yitukudizila kuniyi yihayamisha yinateli kukolesha chikuhwelelu chetu. Kuhiñahu tukuhanjeka chitunateli kwikala adizoza nikumwekesha wushona neyi wamwekesheliyi Yesu hakoñeleñayi yihayamisha.

4. Yihayamisha yakoñeliyi Yesu yatudizishaña yuma yalema yinateli kukolesha chikuhwelelu chetu mudanyi?

⁴ Yihayamisha yakoñeliyi Yesu yatudizishaña yuma yalema yinateli kukolesha chikuhwelelu chetu mudi yena niTata yindi. Wakoñeleña iyi yihayamisha muloña Yehova diyi wamwinkeleña ñovu. Yilwilu 10:38 yatulejaña nawu: “[Nzambi wamuwayishili Yesu naspiritu yajila nikumwinka] ñovu, nawa wahitañeneña mwituña dejima nakukoña yuma yayiwahi nikuuka antu ejima akabishileñawu kudi Diyabolu, muloña Nzambi wadiña nayena.” Anukenu cheñi nenu, muyuma yejima yahosheleñayi Yesu niyelileñayi, kushilahu niyihayamisha yakoñeliyi, wamwekesheli chikupu chatoñojokañayi Tata yindi nichatiyañayi. (Yow. 14:9) Talenu yuma yisatu yalema yitunateli kudizila kuyihayamisha yakoñeliyi Yesu.

5. Chumanyi chamusañumwineña Yesu kukoña yihayamisha? (Matewu 20:30-34)

⁵ Chatachi, Yesu niTata yindi atukeña chikupu. Hadiñayi hamaseki, Yesu wamwekesheli chayikeñayi nankashi antu kuhitila mukuzatisha ñovu yindi yakuhayamisha kulonda akwashi antu akabakeneña. Mpinji yimu, amayala amputamesu ayedi amwaabilili nawu ayikwashi. (Tañenu Matewu 20:30-34.) Ilukenu nenu Yesu “wayitiyilili wushona,” kuhiñahu wayuukili. Neyi chayizatishawu awa mazu aha, mazu achiGiriki abalumunawu nawu “wayitiyilili wushona” atalisha kuwushona wasweja watiyañayi muntu mukachi kamujimba windi. Iwu wushona wasweja, wamwekeshaña nawu muntu wukweti kukeña, diwu wamusañumwini niYesu kudiisha antu adiña nanzala nikuuka mukambumba. (Mat. 15:32; Maku 1:41) Twatela kukuhwelela netu Yehova, Nzambi waluwi, niMwanindi atukeña nankashi nawa chayikataña neyi tunakukabakana. (Luka 1:78; 1 Pet. 5:7) Anakufwila chikupu kufumishahu yihuñu yejima yinakukabisha antu.

6. Ñovwinyi yamwinkawu Yesu kudi Nzambi?

⁶ Chamuchiyedi, Nzambi wamwinka Yesu ñovu yakumanisha kukala kwejima kunakumonawu antu. Kuhitila muyihayamisha yakoñeliyi, Yesu wamwekesheli ñovu yikwetiyi yakumanisha kukala kwejima kutunateli kukañanya kumanisha etu aweni. Chakutalahu, wukweti ñovu yakutusubula kuyuma yaleteshaña antu amoneña kukala, dikwila nawu kutusubula kunshidi yitwaswana nikukukala kwafumañamu, kukata nikufwa. (Mat. 9:1-6; Rom. 5:12, 18, 19) Yihayamisha yakoñeliyi yamwekesheli nawu nateli kuuka yikatu “yeñi-nayeñi” kushilahu nikusañula afu. (Mat. 4:23; Yow. 11:43, 44) Wukweti cheñi ñovu yakuwundisha mpepela yeneni nikushinda aspiritu atama. (Maku 4:37-39; Luka 8:2) Twakoleshewaña chikupu hakwiluka netu Yehova wamwinka Mwanindi iyi ñovu!

7-8. (a) Yihayamisha yakoñeliyi Yesu yatukwashaña kukuhwelela yumanyi? (b) Chihayamishanyi chimwafwilaña kumona mukaayi kakaha kanakwinza?

⁷ Chamuchisatu, twatela kukuhwelela chikupu netu yuma yayiwahi yatukanawu yakaleta Wanta waNzambi yakashikijewa. Yihayamisha  yakoñeliyi Yesu hadiñayi hanu hamaseki neyi muntu yatukwashaña kwiluka yuma yayivulu yakakoñayi hamu neyi Mwanta wamwiwulu waWanta waNzambi. Talenu yuma yitukudiluñisha katataka muchiyuulu chaKristu. Twakekala akola kumujimba muloña wakafumishahu yikatu niwufwayi wejima wunakukabisha antu. (Isa. 33:24; 35:5, 6; Chim. 21:3, 4) Hitwakafwaña nzala hela kukabakana muloña wawubanji wadimwekenañaku. (Isa. 25:6; Maku 4:41) Twakazañalala chikupu hakutambwila antaña niamabwambu akafumaña “mumajamu achanukishu.” (Yow. 5:28, 29) Chihayamishanyi chimwafwilaña kumona mukaayi kakaha kanakwinza?

⁸ Hakoñeleñayi yihayamisha, Yesu wamwekesheleña kudizoza niwushona chikupu, yilwilu yitwatela kwikala nayu ninetu. Tuhanjekenu hayakutalilahu yiyedi, tukutachika nansañu yahosha hachawija chawulu chadiña muKana.

9. Chumanyi cheliliyi Yesu hachawija chawulu? (Yowanu 2:6-10)

⁹ Tañenu Yowanu 2:6-10. Vinyu chiyamanini hachawija chawulu, komana Yesu wateleleli hohu kwilahu chuma? Inehi. Kwosi wuprofwetu washimwineñahu dehi nawu Mesiya wakela vinyu muchihayamishaku. Fwikijenu hohu chimunateli kutiya neyi yuma yakunwa hachawija chenu chawulu yimanina hakachi. Hadaha Yesu wamwekesheleli ichi chisaka wushona, sweje-e akankaña nakalemba, muloña wakeñeleña wanyi nindi asawuki. Dichi, neyi chashimunawu kumatachikilu, wakoñeli ichi chihayamisha. Wabalumwini menji,  dikwila nawu malita akushika ku 390 (magaloni 103) nakwikala vinyu yayiwahi nankashi. Hadaha welili vinyu yayivulu ñana kulonda yikwawu yishalihu akayizatishi kumbidi hela akayilandishi hakwila antu adisumbwileña akekali namali amavulu akudikwashamu nachu kumujimba. Awa adisumbwili atela atiyili kuwaha chikupu!

10. Yumanyi yalema yekala munsañu yasonekawu muYowanu kapetulu 2? (Talenu cheñi mwevulu.)

¹⁰ Talenu yuma yalema yekala munsañu yasonekawu muYowanu kapetulu 2. Neyi chimwamona Yesu hidiyi wenzesheli nsaba jamalola namenjiku. Chatela adimwekeshi nindi diyi wunakoñi ichi chuma, wayilejeli akakuzata kwinzesha iji nsaba. (Mavasi 6, 7) Nawa hanyima yakubalumuna menji kwikala vinyu, Yesu hanonelihu vinyu nakumutwalila mukulumpi wachawijaku. Ilaña, walejeli akakuzata kwila mwenimu. (Vasi 8) Yesu wanonelihu wanyi kaapu yavinyu nakuyinyamuna mwiwulu hamesu awantu anenzi, nakutachika kudisamba nindi, ‘Tompenuhu vinyu yinneli!’

11. Chumanyi chitunateli kudizila kuchihayamisha chakoñeliyi Yesu?

¹¹ Chumanyi chitunateli kudizila kuchihayamisha chakoñeliyi Yesu chakubalumuna menji kwikala vinyu? Twadizilañaku chitunateli kwikala adizoza. Yesu hadisambili nachihayamisha chakoñeliyiku; kafwampi hadisambileña nayuma yejima yelileñayiku. Ilaña wadizozeleña nawa wetejeleña kalemesha nimpuhu yejima kuya kudi Tata yindi. (Yow. 5:19, 30; 8:28) Neyi twikalaña adizoza neyi Yesu hitwakadisambaña nayuma yitwelañaku. Bayi tudisambaña etu aweni nayuma yitwelaña mumudimu waYehovaku, ilaña tudisambeña hakukooleka kutukweti kwakukalakela Nzambi wamuwahi. (Yer. 9:23, 24) Twatela kumwinka kalemesha kamutelela. Kwosi chuma chachiwahi chitunateli kwila chakadi wukwashu waYehovaku.—1 Kor. 1:26-31.

12. Njilanyi yikwawu mutunateli kwikalila adizoza neyi Yesu? Shimunenu chakutalilahu.

¹² Talenu njila yikwawu mutunateli kwikalila adizoza neyi Yesu. Fwikijenu ichi chakutalilahu: Mukulumpi nazatishi mpinji yeneni kukwasha nkoñi wakuzatila wakansi kuloñesha mpanji yindi yatachi yawantu amavulu. Chinafumimu, manakwetu wakansi nahani chiwahi mpanji yindi, nawa yinazañaleshi chipompelu. Chinamani kupompa, muntu wumu nenzi kudi iwu mukulumpi nakumuleja nindi: ‘Manakwetu Kanaña wahana chiwahi mpanji, netu? Komana iwu mukulumpi wukuhosha nindi: ‘Eña, ilaña nazatisha mpinji yeneni kumukwasha’? Tahindi wukuhosha nindi: ‘Eña, wahana chiwahi. Nantiyishi kuwaha’? Neyi twadizoza, hitukukeñaña netu atuhamekeña hayuma yayiwahi yitwelilaña akwetuku. Twazañalalaña muloña tweluka netu Yehova wamonaña nawa walemeshaña yuma yitwelaña. (Esekejenu Matewu 6:2-4; Heb. 13:16) Mwamweni, twamutiyishaña Yehova kuwaha neyi twikalaña adizoza neyi Yesu.—1 Pet. 5:6.

13. Chumanyi chinamoniyi Yesu kwakwihi namusumba waNena, nawa nelihu chumanyi? (Luka 7:11-15)

¹³ Tañenu Luka 7:11-15. Fwikijenu chuma chamwekeni chelili Yesu nazatiku dehi chikunku mumudimu windi wakushimwina. Nayi kuNena, musumba wamuÑaliliya wekala kwakwihi naShunemi, oku kwasañwililiyi kaprofwetu Elisha mwana kamumbanda wumu kwakwihi nayaaka 900 yahitilihu. (2 Anya. 4:32-37) Yesu chinashikiyi kwakwihi nachiisu, namoni chendu chawantu anakufuma mumusumba anakuya nakujiika. Ichi chuma chinatami nankashi, ntuluwa najimbeshi mwanindi wumu hohu. Ilaña iwu mama yawantu wunafwishi wudi nkawindi wanyi, wudi hamu nezaza deneni dawantu anafumi mumusumba. Yesu nemiki chendu  chawantu nawa namukoñeli iwu mama yawantu wunafwishi chuma chakuhayamisha, namusañwili mwanindi! Ichi dichihayamisha chatachi hayihayamisha yisatu yakusañula antu yakoñeliyi Yesu yashimunawu muNyikanda yaNsañu Yayiwahi.

14. Yumanyi yalema yidi munsañu yasonekawu muLuka kapetulu 7? (Talenu cheñi mwevulu.)

¹⁴ Talenu yuma yimu yalema yidi munsañu yekala muLuka kapetulu 7. Neyi chimunamoni, Yesu ‘wamumweni’ mama yawantu wafwishili, kuhiñahu “wamutiyilili wushona.” (Vasi 13) Hadaha Yesu wamumweni nakudila iku nakwendela kwakwihi namujimba wamwanindi nawa wamutiyilili wushona. Yesu hakuminini dakumutiyila mama yawantu wushonaku, ilaña wamumwekesheleli wushona. Chakadi nikujina, wahanjekeli nindi namazu akumukolesha nindi: “Lekaku kudila.” Kuhiñahu welilihu chuma kulonda amukwashi. Wamusañwilili mwanindi nawa “wamuhanini kudi mama yindi.”—Mavasi 14, 15.

15. Chumanyi chitunateli kudizila kuchihayamisha chakoñeliyi Yesu?

¹⁵ Chumanyi chitunateli kudizila kuchihayamisha chakoñeliyi Yesu chakusañula mwana kantuluwa? Tunakudizilaku chitunateli kumwekeshela antu anafwishi wushona. Hela chochu, hitunateli kusañula afu neyi cheliliyi Yesuku. Ilaña kufwana Yesu, tunateli kumwekeshela antu anafwishi wushona kuhitila mukwiluka kukala kunakumonawu. Tunateli kuyimwekeshela wushona kuhitila mukuhosha nikuzata kwesekeja nahanakumi ñovu jetu kulonda tuyikwasha nikuyikundeja. d (Yish. 17:17; 2 Kor. 1:3, 4; 1 Pet. 3:8) Hela kuhosha hohu nawu mazu antesha nikuyizatilaku tunyidimu, yumiyi yinateli kuyikolesha nikuyikundeja chikupu.

16. Neyi chinamwekeshiwu hamwevulu, chumanyi chimunadizili kuchuma chamumwekeneni mama yawantu wafumini tuhu nakufwisha mwanindi?

¹⁶ Talenu ichi chuma chamwekeni. Hadi yaaka yinahitihu, hampinji yembileñawu kamina hakupompa kwachipompelu, muhela wumu wamweni mama yawantu wadiña kwakwihi nakudila. Aka kamina kahosheleña hakuchiñeja kwakusañuka nawa ona mama yawantu dihafuminiyi tuhu  nakufwisha mwanindi wamumbanda wanyanya. Iwu muhela chelukiliyi chumichi, wayili hohenohu kudi iwu mama yawantu, wamukwatili nawa wembilili nindi hamu kamina kejima. Chimwahitili mpinji, iwu mama yawantu wahosheli nindi: “Namweni amanakwetu niahela chankeñawu chikupu.” Watiyili kuwaha nankashi muloña wayili nakupompa. Wahosheli nindi: “Kwitala daWanta dikutwatambwilaña wukwashu.” Twatela kukuhwelela chikupu netu Yehova wamonaña nawa walemeshaña nituyuma twanyanya tutwelaña hakumwekeshela antu anafwishi wushona, owu ‘anachikeki muspiritu.’—Mas. 34:18.

17. Yumanyi yitunadizi muchinu chibaaba?

¹⁷ Kudiza Nyikanda yaNsañu Yayiwahi yahosha hayihayamisha yakoñeliyi Yesu, kunateli kukolesha chikuhwelelu chetu. Yatudizishaña nawu Yehova niYesu atukeña nankashi, Yesu wukweti ñovu chikupu yakumanisha kukala kwamonañawu antu, nawa nawu twatela kukuhwelela chikupu yuma yayiwahi yatukanawu yidi kwakwihi yakaleta Wanta. Hampinji yitunakushinshika haniyi nsañu, tunateli kutoñojoka chikupu hanjila mutunateli kwimbujolela yilwilu yadiña naYesu. Kwila muloñesha kudiza kwankawenu hela Kudifukula kwaChisaka kulonda mwakashinshiki hayihayamisha yikwawu yakoñeliyi Yesu nehi? Talenu yuma yimunadiziliku nawa lejenuku antu amakwawu oyu yuma. Neyi mwilaña mwenimu, nsañu yimukuhanjekaña nawakwenu yikwikalaña yakukolesha chikupu!—Rom. 1:11, 12.

18. Yumanyi yitwakahanjekahu muchibaaba chinalondelihu?

¹⁸ Kumakumishilu amudimu windi, Yesu wakoñeli chihayamisha chamuchisatu hayihayamisha yisatu yakoñeliyi yakusañula antu yashimunawu. Ilaña ichi chihayamisha chadiña chambukaku, muloña wasañwili ibwambu dindi nawa wamusañwili hanyima yakwila munahiti dehi mafuku awana kufuma hafwiliyi. Yumanyi yitunateli kudizila kunichi chihayamisha? Nawa tunateli kukolesha ñahi chikuhwelelu chetu mukuchiñeja kwakusañuka? Chibaaba chinalondelihu chakakula awa malwihu.