1. Paradisa yakuspiritu hichumanyi, nawa chumanyi chitwatela kufwilaña kwila?

 MAKONU heseki hadi paradisa yachifwikija munenzali antu anakuzata nañovu kwila yuma yayiwahi. Mwenzala antu amavulu nankashi anakudiluñisha kuwunda kwalala. Antu adi dehi muniyi paradisa hiyatoñojokañahu jakufumamuku. Akeñaña cheñi antu amavulu kwinza nakudibomba nawu munidi iluña dadimena. Iluñanyi denidi? Idi iluña hiparadisa yakuspiritu! a

2. Chumanyi chatuhayamishaña kutalisha haparadisa yakuspiritu?

² Munjila yakuhayamisha, Yehova waleña iluña dachifwikija mwekala antu awunda nawa anuñañana hela chakwila ashakamaña mukaayi kaSatana katama nawa mudi wubanji, mudi antu adihela wumu namukwawu. (1 Yow. 5:​19; Chim. 12:12) Nzambi yetu wakukeña wamonaña yuma yatama yaluwañeshaña antu muniyi nshakaminu yamakonu, ilaña etu ambuñindi watwinkaña yuma yatukwashaña kwikala akola kuspiritu. Izu dindi datena paradisa yakuspiritu nawu ‘chiswamu’ nawa nawu “itempa dakutukumwina chiwahi.” (Isa. 4:6; 58:11) Muloña wakuyikiswila kudi Yehova, ana ashakamaña muniyi paradisa adi namuzañalu nawa akiñewa munanu mafuku akukuminina akala.​—Isa. 54:14; 2 Tim. 3:⁠1.

3. Isaya kapetulu 65 yashikijeweli ñahi kushankulu?

³ Kuhitila mudi kaprofwetu Isaya, Yehova walumbulwili yuma yakamwekenaña antu akashakamaña muparadisa yakuspiritu. Munateli kuwana chalumbulwiliyi muIsaya kapetulu 65, nsona yashikijeweli katachi kunyima mu 537 B.C.E. Hayina mpinji aYudeya abalumukili munyichima, ayisubwili muwunkoli muBabiloni nawa afuntili kumukala wawu. Yehova wayikiswilili antu jindi nawa wayikwashili kuwahisha musumba waYerusalema walubanji  wakisikili nikwilisha tembeli yadiñamu kwikala cheñi iluña dakudifukwilamu kudifukula kwalala muIsarela.​—Isa. 51:11; Zek. 8:⁠3.

4. Isaya kapetulu 65 yinakushikijewa ñahi makonu?

⁴ Kushikijewa kwamuchiyedi kwawuprofwetu waIsaya kwatachikili mu 1919 C.E. hampinji akakudifukula aYehova adiku makonu yayisubwiliwu muwunkoli muBabiloni Muneni. Kufumahu, paradisa yakuspiritu yatachikili kutaanda mwahita iseki dejima. Akakushimwina nsañu yaWanta adikita atuñili yipompelu yayivulu nawa asoñeli nyikaabu yakuspiritu. Amayala niambanda adiña akamadombu hakusambila amwekesheleña yilwilu yawunyama, “[avwalili] wuntu wawuha waleñeliwu kwesekeja nankeñelu yaNzambi.” (Efwe. 4:​24) Hela chochu, nkisu jajivulu jalumbulwiliyi Isaya jakashikijewa kumbidi mukaayi kakaha. Ilaña nichayinu mpinji kudi yuma yayiwahi yitunakudiluñisha. Tutalenu iyi paradisa yakuspiritu chiyatukundama nimuloña waweni wutwatela kubulila kufumamu.

YILWILU YAKUYILUKILAKU ANA ADI MUPARADISA YAKUSPIRITU

5. Neyi chashiikawu haIsaya 65:​13, yumanyi yitwadiluñishaña etu adi muparadisa yakuspiritu?

⁵ Muchifwikija ayikutishaña nikuyiwundisha. Wuprofwetu waIsaya wamwekesha chaambu cheneni chekala hachihandilu chawantu ekala muniyi paradisa yakuspiritu nachihandilu chawantu abula kwikala muniyi paradisa. (Tañenu Isaya 65:13.) Yehova wayinkaña akakudifukula indi yuma yayivulu yakuspiritu yakeñañawu. Tukweti spiritu yindi yajila, Izu dindi niyakuda yayivulu yakuspiritu kulonda “tudi, . . . tunwi, . . . [nawa] tuzañalali.” (Esekejenu Chimwekeshu 22:17.) Ilaña hadi chaambu cheneni nawantu abula kwikala muparadisa yakuspiritu, wena “afwaña nzala . . . , atiyaña mpwila . . . , [nawa] atiyaña nsonyi.” Hiyakweti yakuda yakuspirituku.​—Amosi 8:​11.

6. Yoweli 2:​21-​24 yalumbulula ñahi yakuda yetu yakuspiritu, nawa chumanyi chitwatela kwila hakwila yitukwashi?

⁶ Muwuprofwetu windi, Yoweli wazatishili yuma yalema muchihandilu yidi neyi mbutu, vinyu, nimanji amuolivi nakumwekesha nindi Yehova wenkaña antu jindi chakufuma hamuchima yuma yakeñañawu, kushilahu niyakuda yakuspiritu. (Yoweli 2:​21-​24) Welaña mwenimu kuhitila muBayibolu nimunyikanda yetu yashindamena haBayibolu, hawebusayiti yetu, kushilahu kupompa kwetu kwachipompelu, kupompa kwanyanya nikupompa kwamaneni. Tunateli kuda yakuda yakuspiritu mafuku ejima, nawa chuma chikufumamu, muchifwikija tukutiya netu anatwikutishi nikutuwundisha.

7. Yumanyi yaleteshaña ‘nyichima yetu kuzañalala’? (Isaya 65:⁠14)

⁷ Akweti muzañalu nawa azañalalaña nayuma yikwetiwu. Antu jaNzambi anateli “[kubula] nyiñula” muloña nyichima yawu yasakililaña chikupu. (Tañenu Isaya 65:14.) Chalala chatukoleshaña niyikaninu yatukundejaña yekala Mwizu daNzambi kushilahu niyuma yalala yitwachiñejaña yashindamena hamulambu wefutu danyiloña waKristu, yaleteshaña ‘nyichima yetu kuzañalala.’ Neyi tuhanjekaña haniyi yuma nawamanakwetu niahela akuspiritu, twazañalalaña nankashi!​—Mas. 34:8; 133:​1-3.

8. Yilwilwinyi yiyedi yabadika yakwilukilaku antu ekala muparadisa yakuspiritu?

⁸ Kukeña nikunuñañana kwekala hakachi kawantu jaYehova, hiyilwilu yiyedi yabadika yakwilukilaku antu ekala muparadisa yakuspiritu. ‘Kunuñañana kwamwekeshañawu’ kwatukwashaña kwiluka chihandilu chichakekala mukaayi kakaha, mwakaswejawu ambuña aYehova kwikala nakukeña nikunuñañana kubadika makonu. (Kol. 3:​14) Muhela wumu mukaKristu wahosheli hachuma chamweniyi kutalisha hadi antu jaYehova hadimweniyi nawu katachi, wahosheli nindi: “Nelukili wanyi chakwikala namuzañalu, nimuchisaka chetu himwadiña  muzañaluku. Katachi kinamweni antu anakudimwekeshela kukeña kwalala, yadiña mpinji yinadibulakeni nawaYinsahu jaYehova.” Muntu wejima wunakukeña kwikala namuzañalu walala nikuzañalala nayuma yikwetiyi, watela kwikala muparadisa yetu yakuspiritu. Hichikweti muloña nachayimonañawu ambuña aYehova kudi antu amukaayiku, ilaña akweti ijina dalema kudi Yehova nikudi akakudifukula indi ejima.​—Isa. 65:⁠15.

9. Isaya 65:​16, 17 yashiika nawudi kutalisha hamakabi itunakumona muchihandilu?

⁹ Akasunuka nawa awunda. Isaya 65:14 yahosha nawu ana afuukulañahu kubula kwikala muparadisa yakuspiritu ‘adilaña muloña nyichima yawu yakataña nawa adilaña makumbu muloña wayihuñu.’ Indi kutalisha hayuma yejima yaleteshaña antu jaNzambi kutiya kuyeña nikukabakana? Chakadi nikujina, iyi yuma “akayivulamena [nawa] mesu [aNzambi] hiyakamonahu cheñi yumiyiku.” (Tañenu Isaya 65:​16, 17.) Yehova wakafumishahu makabi itunakumona, nawa mukuhita kwampinji hitwakanukaña cheñi awa makabi ejima itunakumonaku.

10. Muloñadi chimwasakililaña hakukooleka kumukweti kwakwikala nawamanakwenu niahela akaKristu? (Talenu cheñi mwevulu.)

¹⁰ Nichayinu mpinji, twekalaña awunda neyi tuya kukupompa kwetu kwawakaKristu, kutwatiyaña kwikala akasunuka nikubula kutoñojoka hamakabi itunakumona mukanu kaayi katama. Twakwashaña cheñi amanakwetu niahela kwikala mukuwunda neyi tumwekeshaña kukeña, muzañalu, kuwunda, luwi nikwovwaha, yilwilu yekala hakachi kanyikaabu yaspiritu yaNzambi. (Ñal. 5:​22, 23) Twasakililaña nankashi kwikala mukuloñesha kwaNzambi! Ana atwalekañahu kwikala muparadisa yakuspiritu akamona chakashikijewa chikaninu chaNzambi chejima chakuleña “mawulu amaha niiseki dadiha.”

11. Kwesekeja naIsaya 65:​18, 19, paradisa yakuspiritu yaleñayi Yehova yatuleteshaña kwiladi?

¹¹ Akweti muchima wakusakilila nawa atiyaña kuwaha. Isaya walumbulula cheñi muloña waweni “[wutwazañalelaña] nikutiya kuwaha” muparadisa yakuspiritu. Iyi paradisa yachifwikija ayileñeli kudi Yehova. (Tañenu Isaya 65:​18, 19.) Dichi, chatuhayamishaña wanyi kwiluka netu Yehova nakutuzatisha kukwasha antu afumi mumakuloñesha amukanu kaayi mwabulaña kuyidizishawu chalala chahosha hadi Nzambi, kulonda tuyilomboli muparadisa yetu yalubanji yachifwikija! Twatiyaña kuwaha yuma yayiwahi yitwadiluñishaña muloña wakwikala muchalala, nawa chumichi chatusañumunaña kulejaku antu yumiyi.​—Yere. 31:⁠12.

12. Yikaninu yashimunawu haIsaya 65:​20-​24 yayileteshaña kutiya ñahi, nawa muloñadi?

 ¹² Cheñi twasakililaña nikutiya kuwaha muloña wayuma yitwachiñejaña hakwikala enimbu amuparadisa yakuspiritu. Toñojokenu hohu hayuma yitwakamona nikwila mukaayi kaNzambi kakaha! Bayibolu yatushiika nawu: “Himwakekalahu cheñi mukeki wakashakama hohu mafuku anteshaku, hela mukulumpi wakakañanya kushikija mafuku akuhanda kwindiku.” Twakatuña “matala etu nawa twakashakamamu, nawa twakadima matempa anyivinyu nawa twakada nyikaabu yayu.” ‘Hitwakakabakana chamukunkulwayiku,’ muloña “[akatukiswila] kudi Yehova.” Watukana kutwinka wumi wakiñewa, wawuwahi nawa wukweti nkeñelu. “Nawa henohu kanda atambiki,” yena wakeluka chuma chejima chinakukeñayi muntu-himuntu “kulonda [akekutishi] yuma yejima yayumi nayuma yakeñañawu.”​—Isa. 65:​20-​24; Mas. 145:⁠16.

13. Isaya 65:25 yashimuna yilwilwinyi yahimpañawu antu muchihandilu chawu neyi atachika kumukalakela Yehova?

¹³ Ekalaña mukuwunda nawa akiñewa. Nawukwashu waspiritu yaNzambi, antu amavulu adiña nayilwilu yawunyama kunyima, ahimpa nakwikala nayilwilu yayiwahi muchihandilu chawu. (Tañenu Isaya 65:25.) Afwomona yaaku yatama yadiñawu nayu kunyima. (Rom. 12:2; Efwe. 4:​22-​24) Hela chochu, antu jaNzambi achidi abula kuwanina, dichi twakatwalekahu kuluwañesha. Ilaña, Yehova wanuñañesha “antu ejima” nakukeña nikuwunda kwabulaña kumana. (Tit. 2:​11) Ichi hichuma chakuhayamisha chatela kwilawu hohu kudi Nzambi Wañovu Jejima!

14. Chuma chamumwekeneni manakwetu wumu chi­nakumwekesha ñahi nawu nsañu yekala haIsaya 65:25 ­yalala?

¹⁴ Komana mwamweni antu anateli kuhimpa yilwilu yawu? Talenu ichi chuma chamwekeni. Kansi wumu weyala akasiliwu mukaleya mapampa amavulu hampinji yashikijiliyi yaaka 20, wadiña nayilwilu yatama nankashi nimadombu. Amukasileña muloña wakwiya nyotoka, kwiñila mumatala nakwiya ninyiloña yikwawu yamaneni yakoñeleñayi. Wazuñileña namuntu wudi wejima wukumuvuloka. Chatiyiliyi katachi chalala chamuBayibolu nawa yatachika kuya kupompa kwawaYinsahu jaYehova, wakuhweleleli nindi nawani chuma chalema chatela kwilayi muchihandilu, dikwila nawu kudifukula kudi Yehova muparadisa yakuspiritu. Chelili apapatishewi nakwikala Chinsahu, wavulileña kutoñojoka hamazu ekala haIsaya 65:25 chamukundaminiwu. Wahimpili nakuleka kwikala neyi mutupa, dikwila nawu muntu wamadombu, nawa wekalila neyi mwana kamukoku wawunda.

15. Muloñadi wutunakukeñela kutambika antu amakwawu kulonda adibombi hamu nanetu muparadisa yakuspiritu, nawa tunateli kwila ñahi mwenimu?

¹⁵ Isaya 65:13 yatachika namazu akwila nawu: “Yehova Mwanta Wabadika nahoshi nindi.” Vasi 25 yakuma namazu akwila nawu “dichinahoshiyi Yehova.” Mazu indi ashikijewaña mpinji yejima. (Isa. 55:​10, 11) Paradisa yakuspiritu yidi dehi kwoku chayinu mpinji. Yehova waloñesha chisaka chawakakudifukula chaambukaku chikupu. Muloña wakwikala munichi chisaka, twadiluñishaña kuwunda kwashikila chayinu mpinji nawa twatiyaña kwikala akiñewa mukanu kaayi mwenzala madombu. (Mas. 72:⁠7) Muloña wayumiyi, tunakukeña kukwasha antu amavulu nankashi kulonda adibombi nanetu muchisaka chetu chawakaKristu. Tunateli kwila mwenimu kuhitila mukusha muchima hakwilisha atumbanji.​—Mat. 28:​19, 20.

CHITUNATELI KUKOKOLA ANTU KWINZA MUPARADISA YAKUSPIRITU

16. Antu ayikokaña ñahi nakwinza muparadisa yakuspiritu?

¹⁶ Wejima wetu tukweti mudimu walema wakukokola antu kwinza muparadisa ­yakuspiritu.  Tunateli kuzata chiwahi iwu mudimu neyi tumwimbujolaña Yehova. Hayikanjikijaña antu kwinza mukuloñesha kwindi chakadi awenawu kufuukulahuku. Ilaña, ‘wakokelaña’ antu kudi yomwenindi chakadi kuyikanjikija. (Yow. 6:​44; Yer. 31:⁠3) Antu akweti nyichima yayiwahi adizaña hakukeña kwaYehova niyilwilu yindi yayiwahi, ekalaña aswayi kuyikokela kudi yena. Yilwilu yetu yayiwahi niyuma yayiwahi yitwelaña yinateli kukokola ñahi antu kwinza muparadisa yakuspiritu?

17. Tunateli kukokola ñahi antu kwinza muparadisa yakuspiritu?

¹⁷ Njila yimu mutunateli kukokwela antu kwinza muparadisa yakuspiritu, hikumwekeshela akwetu mutwadifukwilaña kukeña niluwi. Neyi antu enza nakupompa nanetu katachi kukupompa kwachipompelu, tunakukeña atiyi neyi chatiyiliwu ana abulili kwitiya hadaha enjileña nakupompa muKorinda yakushankulu. Ahosheli nawu: “Chalala Nzambi wudi mukachi kenu.” (1 Kor. 14:​24, 25; Zek. 8:​23) Dichi, twatela kutwalekahu kwovwahila kufumba kwakwila nawu “shakamenuña mukuwunda wumu namukwawu.”​—1 Tes. 5:​13.

18. Yumanyi yinateli kukokola antu kwinza mukuloñesha kwetu?

¹⁸ Mpinji yejima tufwileña kumona amanakwetu niahela akaKristu neyi chayimonañayi Yehova. Twelaña mwenimu kuhitila mukusha muchima hayilwilu yawu yayiwahi bayi hayiluwa yawu yikujimañana katatakaku. Tunateli kumanisha kukala kutukweti nawakwetu munjila yakukeña neyi mpinji yejima “[tuditiyilaña] luwi wumu namukwawu, wushona nikudanakena wumu namukwawu.” (Efwe. 4:​32) Neyi twilaña mwenimu, paradisa yakuspiritu yakakokola antu anakukeña kuyimwekeshela yilwilu yoyimu. b

 TWALEKENUHU KWIKALA MUPARADISA YAKUSPIRITU

19. (a) Neyi chinamwekeshiwu muchikasha chinakwila nawu “ Ayili Nawa Afuntili,” yumanyi yahosheliwu antu amu hanyima yakufunta muparadisa yakuspiritu? (b) Chumanyi chitukufwilaña kwila? (Talenu cheñi mwevulu.)

¹⁹ Twasakililaña nankashi hakwikala naparadisa yakuspiritu! Chayinu mpinji yinaswejeliku lubanji nawa mudi enimbu amavulu amushimekaña Yehova kubadika chichadiña kunyima. Dichi tutwalekihu kusakilila haya nyaaka haparadisa yatuleñelayi Yehova. Muntu wejima wunakukeña kumuwundisha, kuzañalala nayuma yikwetiyi, kwikala wawunda nawa wakiñewa, watela kwinza muparadisa yakuspiritu! Hela chochu, ikalenu asoñama, muloña Satana nakuzata nañovu kulonda atufumishi muniyi paradisa. (1 Pet. 5:8; Chim. 12:⁠9) Bayi tumwiteja atufumishimuku. Tuzatenu nañovu kulonda tuhembi paradisa yakuspiritu yalubanji, yakadi majilu nawa mudi kuwunda.