1. Yehova wakeñaña nindi twiikali antu amuchidinyi?

 CHUMA chimu hayuma yayizañaleshaña eyala namumbanda himpinji yavwalikaña mwana. Hela chakwila anvwali amukeñaña mwanawu wunavwaliki, hiyakeñaña nawu akatwalekihu kwikala mukekiku. Kafwampi, akamaña nankashi neyi owu mwana nakukula wanyi. Munjila yoyimu, Yehova wazañalalaña neyi twila yuma yakutachikilahu yatukwashaña kwikala akakumulondela Yesu, hela chochu, Wakeñaña wanyi nindi tutwalekihu kwikala anyikeki kuspiritu. (1 Kor. 3:⁠1) Ilaña wakeñaña nindi twiikali akaKristu “[apama] chikupu”.​—1 Kor. 14:⁠20.

2. Yumanyi yitukuhanjekahu muchinu chibaaba?

² Kwikala mukaKristu wapama chikupu kwatalisha mudihi? Yumanyi yitwatela kwila hakwila twiikali akaKristu apama chikupu? Yakuda yakola yakuspiritu yatukwashaña ñahi kupama? Nawa muloñadi wutwatela kutondolwela kusweja kudikuhwelela? Muchinu chibaaba, tukuhanjeka hañakwilu janawa malwihu.

KWIKALA MUKAKRISTU WAPAMA CHIKUPU KWATALISHA MUDIHI?

3. Kwikala mukaKristu wapama chikupu kwatalisha mudihi?

³ MuBayibolu, mazu achiGiriki abalumunawu nawu “muntu wapama chikupu” anateli cheñi kutalisha kwizu dakwila nawu “kuwanina,” hela “kushikila.” a (1 Kor. 2:⁠6) Etu akaKristu twapamaña chikupu neyi tukula kufuma kuwukeki wakuspiritu, nakwikala amayala hela ambanda akuspiritu. Ilaña hela chakwila tunashikiji ichi chikonkwanyi, hitwatela kuleka kutwalekahu kupama kuspirituku. (1 Tim. 4:​15) Wejima wetu, kushilahu ninowu achidi atwansi muyaaka, tunateli kupama kuspiritu. Hanu dinu yumanyi yamwekeshaña nawu mukaKristu napami?

4. MukaKristu wapama amwilukilaña kuyumanyi?

⁴ MukaKristu wapama himuntu welaña yuma yejima yakeñañayi  Nzambi nindi eleña, bayi kutondahu yuma yimu hohu yinakukeña kwilayiku. Ilaña muloña wakubula kuwanina, nateli kukoña yiluwa. Hela chochu, wamwekeshaña muchihandilu chindi chejima nindi watoñojokaña nikwila yuma kwesekeja nankeñelu yaNzambi. Navwali wuntu wawuha nawa mpinji yejima wazataña nañovu kulonda atachiki kutoñojoka kwesekeja nachatoñojokañayi Nzambi. (Efwe. 4:​22-​24) Nadidizishi yomweni chakufuukula chachiwahi kwesekeja nanshimbi niyishina yaYehova, dichi hakeñekaña nshimbi jajivulu hakwila eluki chakuyuula yilwilu yindiku. Neyi yafuukula, wazataña nañovu kwila munafuukuliyi.​—1 Kor. 9:​26, 27.

5. Kukalanyi kunateli kumonayi mukaKristu wabula kupama? (AEfwesesa 4:​14, 15)

⁵ Kwambukaku, mukaKristu wabulaña kupama chinateli kwikala chaswayi kumuluwañesha kudi antu “adimbaña akwawu” nawa nateli kukuhwelela antu atudikaña nsañu jakutwamba haintaneti niakakusekesha. b (Tañenu AEfwesesa 4:​14, 15.) Nateli kutiyila akwawu ichima, kubobola nawu, kuhila swayi, hela kushikena kwila chuma chatama neyi wudi mukweseka.​—1 Kor. 3:⁠3.

6. Munateli kulumbulula ñahi chapamañayi muntu kuspiritu? (Talenu cheñi mwevulu.)

⁶ Neyi chitwashimuna hakusambila, Nsona yesekeja kupama kuspiritu nakukula kumujimba. Mwana helukaña yuma yayivuluku, dichi kwatela kwikala mukulumpi watela kumulombola. Chakutalilahu, mama yawantu nateli kuleja mwanindi wamumbanda nindi amukwati kuchikasa hampinji yinakukilukawu mukwakwa. Neyi nakuliku dehi, mama yawantu nateli kumuleka mwanindi kukiluka nkawindi mukwakwa, ilaña wukumwanukisha kutalatala iku niniku kulonda amoni neyi kudi motoka wunakwinza. Neyi mwana nakuli dehi watondolwelaña iwu wubanji nkawindi. Neyi chakeñaña anyana anyanya wukwashu kufuma kudi akulumpi kulonda atondolweli wubanji, akaKristu abula kupama kakavulu akeñaña wukwashu kufuma kudi akaKristu apama kulonda atondolweli yuma yejima yinateli kuluwañesha wubwambu wawu naYehova nikuyikwasha kufuukula chiwahi. Kwambukaku, neyi akaKristu apama anakufuukula, atoñojokaña chikupu hayishina yamuBayibolu kulonda eluki chatoñojokañayi Yehova hanoyu nsañu, kuhiñahu dinu hiyakuyizatisha.

7. Komana mukaKristu wapama wakeñaña kumukwasha kudi akwawu?

 ⁷ Komana chumichi chinatalishi mukwila nawu mukaKristu wapama hakeñaña wukwashu kudi akwawuku? Inehi. Apama niwena akeñaña wukwashu mpinji yikwawu. Ilaña muntu wabula kupama wakeñaña akwawu kumuleja yuma yatela kwilayi hela kumufuukwilaku yuma yatela kufuukulayi yomweni. Kwambukaku, mukaKristu wapama wazatishaña maana niyuma yamwekeneni akwawu iku nakwanuka nindi Yehova nakukeña “[adisendeli] chisenda chindi yomweni.”​—Ñal. 6:⁠5.

8. Munjilanyi antu apama mwambukilawu kudi wumu namukwawu?

⁸ Neyi chochambukañawu akulumpi mumwekenu, akaKristu apama niwena ekalaña nayilwilu yakuspiritu yashiyashana chidi neyi maana, kuhamuka, chisambu nikutoñojokelaku. Kubombelahu, neyi akaKristu apama ayedi amona kukala kwadifwana, anateli kukunkulula munjila jambuka ilaña jetejewa muNsona. Dichuma chavula kumwekana, sweje-e neyi akaKristu anakufuukula kushindamena hachinleji chawu chamuchima. Muloña wakwiluka kulema kwachumichi, atondolwelaña kusompesha akwawu anafuukuli mwambuka nachinafuukuliwu wena. Ilaña ashaña muchima hakwikala anuñañana.​—Rom. 14:10; 1 Kor. 1:​10.

YUMANYI YITWATELA KWILA HAKWILA TWIIKALI AKAKRISTU APAMA?

9. Komana twashikenaña hohu kupama kuspiritu chakadi kwilahu chuma? Lumbululenu.

⁹ Mwana wanyanya wadikulilaña chovu-chovu mukuhita kwampinji, ilaña kwosi muntu washikenaña kupama kuspiritu chakadi kwilahu chuma. Chakutalilahu, amanakwetu niahela ashakamineña muKorinda etejeli nsañu yayiwahi, apapatisheweli, atambwilili spiritu yajila nawa nshimbi jayinkeleñawu kudi kapostolu Pawulu jayikwashili. (Yilw. 18:​8-​11) Hela chochu, chimwahitili yaaka kufuma hapapatisheweliwu, amavulu achidiña kanda apami. (1 Kor. 3:⁠2) Yumanyi yitwatela kwila hakwila tutondolweli kubula kupama swayi kuspiritu?

10. Yumanyi yitwatela kwila hakwila tupami? (Yuda 20)

¹⁰ Hakwila tupami twatela ntahi kwikala namuchima wakufwila kupama. Antu ‘akeña kubula maana,’ atiyaña kuwaha kutwalekahu kwikala anyikeki kuspiritu, hiyapamañaku. (Yish. 1:​22) Hitunakukeña kwikala neyi ana antu anakuli dehi chikupu kumujimba ilaña anatwalekihu kushindamena hadi anvwali jawu kuyifuukwila yuma yinateli kwilawuku. Ilaña, twatela kudilila etu aweni yuma yikutukwasha kupama kuspiritu. (Tañenu Yuda 20.) Neyi muchidi kuzata nañovu kulonda mupami, lombenu nenu Yehova ayinki “muchima wakufwila kukoña yuma niñovu yakwilamu.”​—Fwili. 2:​13.

11. Yumanyi yatwinkawu yinateli kutukwasha kupama? (AEfwesesa 4:​11-​13)

¹¹ Yehova weluka nindi hitunateli kupama chakadi wukwashuku. Ana akalakalaña hamu neyi atubiña nawa antañishi muchipompelu chawakaKristu, adiloñesha kutukwasha kwikala ‘antu apama nankashi’ kuspiritu, “[ashika] chikupu muchiiminu chaKristu.” (Tañenu AEfwesesa 4:​11-​13.) Yehova watwinkaña cheñi spiritu yindi yajila kulonda yitukwashi kwikala ‘nayitoñojoka yaKristu.’ (1 Kor. 2:​14-​16) Kubombelahu, Nzambi woneneni Nyikanda yaNsañu Yayiwahi yiwana kulonda atukwashi kwiluka Yesu chatoñojokeleñayi, chahosheleñayi nichelileñayi yuma hampinji yazatileñayi mudimu windi hanu hamaseki. Neyi mwimbujolaña Yesu chatoñojokañayi nichelañayi yuma, mukutwesha kushikija chikonkwanyi chenu chakwikala mukaKristu wapama.

YAKUDA YAKOLA YAKUSPIRITU CHIYATUKWASHAÑA

12. Indi “ntañishilu yatachi yahosha hadi Kristu” hintañishilwinyi?

¹² Hakwila tupami chikupu, twatela cheñi ‘kumanisha ntañishilu yatachi yahosha hadi  Kristu,’ dikwila nawu, ntañishilu yalema yakutachikilahu yawakaKristu. Yakutalilahu yimu hakachi kaniyi ntañishilu yalema yakutachikilahu diyeniyi, kubalumuka mumuchima, chikuhwelelu, chipapatishu nikusañuka. (Heb. 6:​1, 2) Iyi ntañishilu dihashindamena chikuku chawakaKristu. Muloña wachumichi, dichaletesheli kapostolu Petulu ahoshi hayumiyi hatañishileñayi izaza dawantu haPentekosta. (Yilw. 2:​32-​35, 38) Twatela kwiteja iyi ntañishilu yatachi hakwila twiikali atumbanji twaKristu. Chakutalilahu, Pawulu wasoñamishili nindi muntu wejima wukudikaña nantañishilu yahosha hakusañuka, dikwila nawu nakukaana yuma yejima yakuhwelelawu akaKristu. (1 Kor. 15:​12-​14) Hela chochu, hitwatela hohu kukumina hakwiluka ntañishilu yalema yatachi yachalalaku.

13. Yumanyi yitwatela kwila hakwila yakuda yakola yakuspiritu yashimunawu haAHeberu 5:​14 yitukwashi? (Talenu cheñi mwevulu.)

¹³ Kwambukaku nantañishilu yatachi, yakuda yakola yakuspiritu mwabombela kwiluka nshimbi jaYehova niyishina yindi yatukwashaña kutiyishisha chatoñojoñayi. Hakwila iyi yakuda yitukwashi, twatela kudizaña nkawetu, kutoñojokahu chikupu nikuzatisha chiwahi yuma yitwadizaña Mwizu daNzambi. Neyi twilaña mwenimu, tukwiluka chakufuukula munjila yikumutiyishaña Yehova kuwaha. c​—Tañenu AHeberu 5:​14.

14. Pawulu wayikwashili ñahi aKorinda kupama?

¹⁴ AkaKristu abula kupama kakavulu chayikalilaña neyi amona kukala kunakukeñeka kutoñojoka hayishina yamuBayibolu nikuyizatisha. Neyi kwosi lushimbi lwamuBayibolu lwahosha hanoyu nsañu, hadaha amakwawu akutoñojoka nawu anateli kwila chuma chejima chinakukeñawu. Amakwawu anateli kukeña lushimbi nihansañu yinakubula kukeñeka lushimbi. Chakutalilahu, chinamwekani neyi akaKristu amuKorinda amwihwili Pawulu neyi chakwila kwadiñahu lushimbi lwayitejeli hela kuyikaanisha kuda yakuda yalambwileñawu kudi ankishi. Chatela ayileji chuma chatela kwilawu, Pawulu walemesheli mudimu wazataña chinleji chamuchima nawa welukili nindi muntu-himuntu wukweti “wuswa . . . wakutonda.” Wahosheli hayishina yimu yamuBayibolu yadi kuyikwasha kufuukula chiwahi kulonda yinleji  yawu yanyichima yibuli kuyifwisha nanyiloña nawa abuli kuhukesha akwawu. (1 Kor. 8:​4, 7-9) Dichi Pawulu wakwashileña aKorinda kupama kuspiritu kulonda azatisheña ñovu jawu jakutoñojoka chiwahi chatela ashindameneña hadi akwawu hela kukolela hohu kunshimbi.

15. Pawulu wayikwashili nahi akaKristu aHeberu kupama kuspiritu?

¹⁵ Twadizilañaku chuma chalema kunsañu yasonekeleliwu akaKristu aHeberu kudi Pawulu. Amakwawu alekeli kutwalekahu kupama kuspritu; kafwampi “[afuntili] cheñi kunyima nakukeña mayeli bayi yakuda [yakuspiritu] yakolaku.” (Heb. 5:​12) Hiyadizileña nikwiteja yuma yayiha yayidizishileñawu kudi Yehova muchipompeluku. (Yish. 4:​18) Chakutalilahu, aYudeya amavulu akakwitiya achidiña nakutiyakesha Nshimbi jaMosi hela chakwila hahitili yaaka 30 kufuma halekesheliwu iji Nshimbi muloña wamulambu waKristu. (Rom. 10:4; Tit. 1:​10) Iyi yaaka 30 yayikwashili akaKristu aYudeya kwikala nampinji yeneni yakwiluka nawu hiyateleleli cheñi kulondela ajina Nshimbiku! Muntu wejima watañahu dehi mukanda wonenewa waPawulu wayisonekeleliyi aHeberu, wukwiteja nindi muniwu mukanda mwekala yakuda yakuspiritu yakola. Iwu mukanda wayikwashili kumona nawu njila yayiha yakudifukwilamu yashiliku Yehova kuhitila mudi Yesu yadiña yayiwahi nankashi. Wayikwashili cheñi kwikala ahamuka kulonda atwalekihu kushimwina hela chakwila ayikabishileña kudi aYudeya.​—Heb. 10:​19-​23.

TONDOLWELENU KUSWEJA KUDIKUHWELELA ENU AWENI

16. Kubombela hakuzata nañovu kulonda tupami, chumanyi chitwatela kwila?

¹⁶ Bayi neyi twatela kuzataña nañovu hohu kulonda twiikali apamaku, ilaña twatela cheñi kutwalekahu kwikala apama. Chumichi chakeñekaña kutondolwela kusweja kudikuhwelela. (1 Kor. 10:12) Twatela ‘kudesekaña’ etu aweni kulonda twiluki neyi tunatwalekihu kupama.​—2 Kor. 13:⁠5.

17. Mukanda wayisonekeleliwu aKolosi kudi Pawulu wamwekeshaña ñahi chichalemena kutwalekahu kwikala apama?

¹⁷ Mumukanda wayisonekeleliwu aKolosi, Pawulu washimwinimu cheñi chichalemena kutwalekahu kupama. Hela chakwila ekalili aKristu apama chikupu, Pawulu wayilejeli nindi ekali asoñama nankashi kulonda abuli kuluwankana nayitoñojoka yawantu amukaayi. (Kol. 2:​6-​10) Nawa Epafwarasa, welukili chiwahi antu  adiña muchipompelu, watwalekelihu kulomba nindi ‘ashimati chikupu,’ hela apami. (Kol. 4:​12) Chumanyi chitunateli kudizilaku? Wejima wawu ayedi aPawulu naEpafwarasa elukili nawu hakwila tutwalekihu kwikala apama, twatela kuzata nañovu muntu-hamuntu nikulomba netu Nzambi atukwashi. Akeñeleña nawu aKolosi atwalekihu kwikala akaKristu apama chikupu hela chakwila amweneña kukala.

18. Chumanyi chinateli kumumwekena mukaKristu wapama? (Talenu cheñi mwevulu.)

¹⁸ Pawulu wayisoñamishili aHeberu nindi neyi mukaKristu wapama abula kwikala wasoñama, anateli kuleka kumutiya kuwaha kudi Nzambi haya nyaaka. Muchima wamukaKristu wunateli kukola chikupu chakwila hakutwesha kubalumuka mumuchima kulonda amwanakeni kudi Nzambiku. Ilaña aHeberu dicheliliwu wanyi. (Heb. 6:​4-9) Indi ana azeyaña hela ahañañawu mukuloñesha makonu ilaña mukuhita kwampinji abalumuka mumuchima? Neyi adizoza nakubalumuka mumuchima, akumwekesha nawu hiyadi neyi ana ateneniyi Pawulu mumukanda wasonekeliyi nindi anateli kuleka kuyitiya kuwaha kudi Nzambi haya nyaakaku. Hela chochu, neyi afunta kudi Yehova, akeñekaña wukwashu wahanañayi. (Ezek. 34:​15, 16) Akulumpi anateli kuleja Chinsahu wapama kulonda ayikwashi kwikala cheñi nawubwambu wakola naNzambi.

19. Yumanyi yitwatela kwilaña?

¹⁹ Neyi munatwalekihu kuzata nañovu kulonda mwiikali mukaKristu wapama, munateli kushikija chikonkwanyi chenu! Twalekenuhu kuda yakuda yakola yakuspiritu nawa fwilenuña kutoñojoka chikupu neyi chatoñojokañayi Yehova. Nawa neyi mudi dehi mukaKristu wapama, twalekenuhu kuzata nañovu kwikala apama chayinu mpinji nihaya nyaaka.