1. Antu jaYehova azatilileña ñahi hamu mumafuku awapostolu?

 MPINJI yejima yayinkañayi Yehova antu jindi mudimu watela kuzatawu, wakeñaña nindi azatileña hamu. (1 Kor. 14:33) Chakutalilahu, Nzambi wakeñaña nindi nsañu yayiwahi ayishimwini mwahita iseki dejima mwashakamawu antu. (Mat. 24:14) Yehova wamwinka Yesu wuswa wakulombola iwu mudimu. Nawa Yesu natwalekihu kumona kwila nindi iwu mudimu anakuwuzata munjila yayiwahi. Mumafuku awapostolu, chelili yipompelu ayituñi mumaluña ashiyashana, atondeli akulumpi kulonda ahaneña nshimbi nikulombola. (Yilw. 14:23) MuYerusalema mwadiña izanvu dawamayala atondewa. Munidi izanvu mwadiña apostolu niakulumpi atuñileña nshimbi jateleleli kwovwahila yipompelu yejima. (Yilw. 15:2; 16:⁠4) Muloña wakwovwahila nshimbi jatambwilileñawu, “yipompelu yatwalekelihu kwikala nachikuhwelelu chakola nawa antu avulilileñaku.”​—Yilw. 16:⁠5.

2. Kufuma tuhu mu 1919, Yehova walombolaña ñahi antu jindi nikuyinka yakuda yakuspiritu?

² Yehova natwalekihu kukwasha antu jindi kuzatila hamu nimakonu. Kufuma tuhu mu 1919, Yesu wazatishaña izanvu danyanya dawamayala awayishewa kuloñesha mudimu wakushimwina nikwinka akakumulondela yakuda yakuspiritu. a (Luka 12:42) Chakadi nikujina, Yehova nakukiswila mudimu wanidi izanvu.​—Isa. 60:22; 65:​13, 14.

3-4. (a) Lumbululenu yuma yayiwahi yafumañamu neyi tuzatilaña hamu. (b) Yumanyi yitukuhanjekahu muchinu chibaaba?

 ³ Neyi twazatilileña hamu wanyi, hitwadi kutwesha kuzata mudimu watwinkayi Yesu nindi tuwuzatiku. (Mat. 28:​19, 20) Chakutalilahu, twili netu neyi atwinkeleña wanyi maluña akushimwinamu; muntu wejima wadi kushimwinaña kwejima kunakeñiyi. Akakushimwina amavulu adi kuyaña nakushimwina mumaluña wowamu mpinji yejima, ilaña mumaluña amakwawu kushimwinamu nehi. Kudihu yuma yikwawu yayiwahi yimunateli kutoñojokahu yafumañamu neyi tuzatilaña hamu?

⁴ Yuma yeliliyi Yesu hadiñayi hamaseki yatuleteshaña kwiluka chatukwashañayi kuzatila hamu makonu. Muchinu chibaaba, tukuhanjeka yuma yeliliyi Yesu nikuloñesha kwetu chikwalondelaña yuma yeliliyi. Tukuhanjeka cheñi yuma yinateli kutukwasha kumwekesha netu twakuhwelela kuloñesha kwaYehova.

KULOÑESHA KWETU CHIKWALONDELAÑA YUMA YELILIYI YESU

5. Njilanyi yimu mutwamwekeshelaña netu tunakulondela yuma yeliliyi Yesu? (Yowanu 8:​28)

⁵ Yesu wadizilili kudi Tata yindi wamwiwulu yuma yatela kwilayi niyatela kuhoshayi. Kuloñesha kwaYehova kwalondelaña yuma yeliliyi Yesu kuhitila mukuzatisha Izu daNzambi hakutukwasha kwiluka yuma yayiwahi niyuma yatama, nawa kwatwinkaña nshimbi jatukwashaña muchihandilu chetu. (Tañenu Yowanu 8:​28; 2 Tim. 3:​16, 17) Mpinji yejima atwanukishaña kutaña Izu daNzambi nikuzatisha yuma yitwatañaña. Yumanyi yayiwahi yafumañamu neyi twovwahila iku kufumba?

6. Njilanyi yimu yalema nankashi yatukwashaña kutiyishisha nsañu yitunakudiza muBayibolu?

⁶ Mwafumaña yuma yayiwahi nankashi neyi tudizaña Bayibolu kuzatisha nyikanda yetu yawakaKristu. Chakutalilahu, twesekejaña yuma yatudizishaña Bayibolu nawunlomboli wutwatambwilaña mukuloñesha. Neyi tumona netu wunlomboli wutunatambwili wunashindameni haNsona, twakuhwelelaña chikupu kuloñesha kwaYehova.​—Rom. 12:⁠2.

7. Nsañwinyi yashimwinineñayi Yesu, nawa kuloñesha kwaYehova kwamwimbujolaña ñahi?

⁷ Yesu washimwinini “nsañu yayiwahi yaWanta waNzambi.” (Luka 4:​43, 44) Yesu walejeli cheñi atumbanji twindi kushimwina haWanta. (Luka 9:​1, 2; 10:​8, 9) Makonu ejima ekala mukuloñesha kwaYehova ashimwinaña nsañu yaWanta hichikweti muloña nakwashakamañawu hela nyidimu yikwetiwuku.

8. Mudimwinyi walema watwinkawu?

⁸ Tukweti kukooleka chikupu kwakuleja antu chalala chahosha haWanta waNzambi! Bayi neyi ejima akweti iku kukoolekaku. Chakutalilahu, Yesu hadiñayi hamaseki, hetejeli aspiritu atama kushimwina hansañu yahosheleña hadi yenaku. (Luka 4:​41) Makonu, henohu muntu kanda atachiki kuya nakushimwina hamu nawantu jaYehova, watela ntahi kushikahu kuzata iwu mudimu. Twamwekeshaña netu twalemesha nankashi mudimu wakushimwina kuhitila mukuyishimwina antu haWanta waNzambi kwejima kutudi nawa mpinji yidi yejima. Kufwana Yesu, twazataña nañovu mudimu wakutumba nikutukumwina mbutu yachalala chaWanta munyichima yawantu.​—Mat. 13:​3, 23; 1 Kor. 3:⁠6.

9. Kuloñesha kwaNzambi kwazataña ñahi nañovu hakwila kukojeji ijina daNzambi adiluki?

⁹ Yesu wakojejeli ijina daNzambi adiluki. Yesu walombeli kudi Tata yindi wamwiwulu nindi: “Ami nakojeji ijina deyi adiluki.” (Yow. 17:26) Neyi cheliliyi Yesu, kuloñesha kwaYehova kunakuzata nañovu kukwasha antu kwiluka ijina daNzambi. Bayibolu yaNsona jaKaayi Kakaha yinakwashani chikupu muniyi njila kuhitila mukufuntisha ijina daNzambi hamaluña hidatela kwikala. Iyi Bayibolu chayinu mpinji anayibalumuni yamukuma hela yachibalu mumadimi  kubadika 270. MuNsañu Jikwawu A4 ni A5 yidi muniyi Bayibolu, mukuwanamu nsañu yikuyikwasha kwiluka yuma yaletesheli afuntishi ijina daNzambi muBayibolu. Nsañu Jikwawu C, yekala muBayibolu yaKudizamu, yamwekeshaña hatooka nawu ijina daNzambi datela kuwanika muNsona jawakaKristu jachiGiriki mapampa 237.

10. Yumanyi yimunadizili kumazu ahosheli mumbanda wumu wakuMyanmar?

¹⁰ Neyi cheliliyi Yesu, tunakukeña kukwasha antu amavulu kwiluka ijina daNzambi. Mumbanda wumu wadiña nayaaka 67 wakuMyanmar chelukiliyi nindi Nzambi wukweti ijina, wawulumwini madilu nakuhosha nindi: “Aka dikatachi muchihandilu chami kinnatiyi nawu ijina Nzambi diyi Yehova. . . . Munandizishi chuma chalema nankashi chinabulili kwiluka.” Neyi chinamwekeshiwu munichi chuma chamwekeni, kwiluka ijina daNzambi kunateli kukwasha chikupu antu akweti nyichima yashinshika.

TWALEKENUHU KUKUHWELELA CHIKUPU KULOÑESHA KWETU

11. Akulumpi anateli kumwekesha ñahi nawu akuhwelela kuloñesha kwaYehova? (Talenu cheñi mwevulu.)

¹¹ Njilanyi yimu mwamwekeshelañawu akulumpi nawu akuhwelelaña chikupu kuloñesha kwaNzambi? Neyi atambwila nshimbi, akulumpi atela kujitaña nakanañachima nikuzata hakumina ñovu jawu kwovwahila oju nshimbi. Chakutalilahu, hiyatambwilaña hohu nshimbi jahoshaña hachakuhana chiwahi jimpanji nichakulomba muchipompeluku, ilaña nichatela kwakamenawu anyikoku aKristu. Akulumpi ovwahilaña nshimbi jatambwilañawu mukuloñesha, akwashaña antu ayikunjikawu kutiya nawu akiñewa nawa ayikeña.

12. (a) Muloñadi wutwatela kwovwahila anakulombola? (AHeberu 13:​7, 17) (b) Muloñadi wutwatela kushila muchima hayuma yayiwahi yelañawu anakulombola?

¹² Neyi tutambwila nshimbi kudi akulumpi, twatela kuyovwahila chakufuma hamuchima. Neyi twila mwenimu, tukuyikwasha anakulombola kuzata mudimu wawu chiwahi. Bayibolu yatukoleshaña nawu twovwahileña nikutiyilila anakulombola. (Tañenu AHeberu 13:​7, 17.) Kwila mwenimu kunateli kwikala kwakala mpinji jikwawu. Muloñadi? Muloña awa amayala awanina wanyi. Hela chochu, neyi tushaña muchima hayiluwa yawu chatela tusheña muchima hayuma yayiwahi yelañawu, dikwila nawu, tunakukwasha ayilumbu jetu. Tunahoshelidi mwenimu? Tukutachika kuleka kukuhwelela kuloñesha kwaNzambi, chuma chafwilañawu akakutudimbulula. Yumanyi yitwatela kwila hakwila twiluki nikukaana mazu akutwamba ahoshañawu ayilumbu jetu?

BAYI MWITEJA ANTU AMAKWAWU AYIKOJEJI MULEKI KUKUHWELELA KULOÑESHAKU

13. Ayilumbu jaNzambi afwilaña ñahi kutamisha kuloñesha kwindi?

¹³ Akakumudimbulula Nzambi afwilaña kutamisha yuma yayiwahi yelaña kuloñesha kwindi. Chakutalilahu, twadizaña muNsona netu Yehova wakeñaña akakudifukula indi kwikala akadi majilu kumujimba, muyilwilu nikuspiritu. Wakeñaña nindi muntu wejima wabulaña kubalumuka mumuchima watwalekañahu kwila yuma yamajilu, atela kumufumisha muchipompelu. (1 Kor. 5:​11-​13; 6:​9, 10) Twovwahilaña ilu lushimbi lwamuNsona. Ilaña muloña wakwovwahila ilu lushimbi, akakutudimbulula ahoshaña nawu twakeña antu wanyi, twayifwishaña nanyiloña nawa hitwakeña muntu wamwekeshaña yilwilu yaambuka nayetuku.

14. Hinyi waleteshaña antu ahosheña mpanji jakutwamba kutalisha hakuloñesha kwetu?

¹⁴ Ilukenu waleteshaña atulukukeña. Satana Diyabolu diwaleteshaña antu ahosheña mpanji jakutwamba kutalisha hakuloñesha kwetu. “Diyi tata yakutwamba.” (Yow. 8:​44; Kutach. 3:​1-5) Dichi twatela kukuhwelela netu Satana wukuzatishaña antu amuhakwilañaku kutaandisha  mpanji jakutwamba kutalisha hakuloñesha kwetu. Dichuma chamumwekeneni Yesu niakaKristu akusambila.

15. Yumanyi yamwililiwu Yesu niakakumulondela kudi akulumpi jakudifukula?

¹⁵ Hela chakwila Mwana kaNzambi, Yesu, wadiña wawanina nawa wakoñeleña yihayamisha yamaneni, Satana wazatishili antu amakwawu kutaandisha nsañu yayivulu yakutwamba kutalisha hadi yena. Chakutalilahu, akulumpi jakudifukula alejeleña antu nawu ñovu jazatishileñayi Yesu hakufumisha andemoni, amwinkeleña kudi ‘nyuuli wawandemoni.’ (Maku 3:​22) Hampinji yamusompesheleñawu Yesu, akulumpi jakudifukula amutwikili muloña wakuhosha kasawuntu nawa ashinjilili mazaza awantu kulonda alombi nawu Yesu amujahi. (Mat. 27:20) Nkumininaku, akakumulondela Kristu chashimwinineñawu nsañu yayiwahi, ana ayidimbulwileña “asañumwini antu” kulonda ayikabishi ana akaKristu. (Yilw. 14:​2, 19) Kutalisha haYilwilu 14:​2, Kaposhi Kakutalila kaDecember 1, 1998, kalumbulwili nawu: “Antu amuhakwilileñaku Satana akaanineña nsañu yashimwinineñawu akaKristu nawa ahosheleña yuma yatama nankashi hadi wena kulonda antu abuleña kuyitiyilila nawa ayiheli.”

16. Chumanyi chitwatela kwanukaña neyi tutiya mpanji jakutwamba?

¹⁶ Satana wuchidi kutwamba niyinu mpinji. Makonu, natwalekihu “[kuluwañesha] antu ashakama heseki hejima.” (Chim. 12:⁠9) Neyi mutiya antu anakuhosha mpanji jakutwamba kutalisha hakuloñesha kwetu indi kwiji hadi amanakwetu anakulombola, anukenu ayilumbu jaNzambi chamwililiwu Yesu niatumbanji adiñaku mumafuku awapostolu. Makonu, antu jaYehova anakuyikabisha nikuyitwambila neyi chashimwineñahu dehi Bayibolu. (Mat. 5:​11, 12) Mpanji jakutwamba jahoshañawu hadi  etu jinateli kutuluwañesha wanyi neyi twiluka waleteshaña antu ahosheña iji mpanji nawa twilahu chuma swayi-swayi kulonda tudikiñi. Chumanyi chitwatela kwila?

17. Tunateli kutondolwela ñahi mpanji jakutwamba kutuluwañesha? (2 Timotewu 1:​13) (Talenu cheñi chikasha chinakwila nawu “ Chimwatela Kwila Neyi Munatiyi Mpanji jaKutwamba.”)

¹⁷ Kaanenuña mpanji jakutwamba. Kapostolu Pawulu washimwini hatooka chuma chitwatela kwila neyi tutiya mpanji jakutwamba. Wamulejeli Timotewu nindi “akonkomweni antu amakwawu aleki . . . kusha maana kumpanji jakutwamba” nawa nindi “akaaneña mpanji jakutwamba jamukunkulwayi.” (1 Tim. 1:​3, 4; 4:⁠7) Hela chakwila mukeki nateli kunona chuma chidi chejima nakuchiisha hakanwa, ilaña mukulumpi weluka wubanji wunateli kufumamu, kwila ela chuma chamuchidiwu nehi. Twakaanaña mpanji jakutwamba muloña tweluka kujafuminaña. Twatiyililaña hohu “mazu amawahi” achalala.​—Tañenu 2 Timotewu 1:​13.

18. Tunateli kumwekesha ñahi netu twakuhwelela kuloñesha kwaYehova?

¹⁸ Tunahanjeki hohu hanjila jisatu jekala hanjila jayivulu jamwekeshaña kuloñesha kwaNzambi chikwamwimbujolaña Yesu. Chimukudizaña Bayibolu, ilukilenuhu njila jikwawu kuloñesha mukwamwimbujolelaña Yesu. Kwashenu amakwawu muchipompelu chenu kulonda ekali namuchima wakukuhwelela chikupu kuloñesha kwetu. Nawa twalekenuhu kumwekesha kusakilila kuhitila mukumukalakela Yehova nakashinshi nikuzatila hamu nakuloñesha kunakuzatishayi hakushikija nkeñelu yindi. (Mas. 37:28) Dichi, tutwalekenuhu kulemesha kukooleka kutukweti kwakuzatila hamu nawantu jaYehova akweti kukeña nawa ashinshika.