Navwalikili mu 1955, twekala amayala asatu nawa yami kabinda. Nakulilili kuchikumu chakukabeta kakuchimunswa kaFinland, iluña dinakutenawu chayinu mpinji nawu musumba waVantaa.

Amama apapatisheweli nakwikala Chinsahu chaYehova hikwashalili yaaka yantesha henohu kanda nivwaliki. Hela chochu, atata akeñeli chalala wanyi nawa hiyetejeleña amama kudiza nanetu anyana hela kutusenda nakupompaku. Dichi amama atudizishileña nsañu yalema yakutachikilahu yachalala chaBayibolu neyi atata hosiwu.

Kufuma tuhu kuwansi, natwalekelihu kumwo­vwahila Yehova. Chakutalilahu, hinadiña nayaaka 7, ntañishi yetu kushikola wanhililili nankashi muloña nakaanini kuda yakuda yatenañawu nawu ­verilättyjä (makeeki akuFinland akutuña namashi). Wankwatili nachikasa chimu hanyibaña kulonda añasamishi mukanwa, nawa wesekeli kunkanjikija foloku nindi andiishi chikunku chakeeki nachikasa chindi chikwawu. Napakwili iyi foloku yadiña muchikasa chindi.

Atata afwili hinadiña nayaaka 12. Kufuma haniyi mpinji, natachikili kuya nakupompa. Amanakwetu muchipompelu añakameneneña, nawa chumichi chankwashili kupama kuspiritu. Natachikili kutaña Bayibolu hefuku-hefuku nawa nadizileña nakanañachima munyikanda yetu yawakaKristu. Kudiza muniyi njila kwankwashili kupapatishewa ­hinadiña nayaaka 14, haAugust 8, 1969.

 Chinamanishili hohu shikola yakumujimba, natachikili wupayiniya wampinji yejima. Chimwahitili nyilungu yantesha, nayili nakukalakela kwadiña kukaankila kweneni, muPielavesi, kwakwihi nahakachi kaFinland.

MuPielavesi, namweni kansi wamumbanda inasumbwili. Chilwilu chindi chakwikala wamwovu nikusha maana kuyuma yakuspiritu, diyuma yankokweli. Hakeñeleña kutuumbakana hela kwikala namaheta amavuluku. Wejima wetu ayedi twafwilileña kumukalakela Yehova hakumina ñovu jetu, mumudimu wudi wejima wukutwinkawu. Twadisumbwili haMarch 23, 1974. Chatela tuyi nakuhema hanyima yakudisumbula, twayili kuKarttula kwadiña kukaankila chikupu kwawakakushimwina aWanta.

Kufuma tuhu hitwadisumbwili, Yehova namwekeshi nindi wukutwakamenaña muyuma yakumujimba neyi tusambilaña kukeña Wanta windi. (Mat. 6:​33) Chakutalilahu, hitwadiña muKarttula, twadiña namotoka wanyi. Hakusambila, twazatishileña makinga. Hela chochu, mumpinji yachishika kwatuutileña nankashi. Hakwila tushimwini mumaluña ejima akushimwinamu achipompelu chetu, twakeñekeleña kwikala namotoka. Ilaña hitwadiña namali akutwesha kulanda motokaku.

Chakadi nikukuhwelela, yayami weyala wenjili nakututala. Watwinkeli motoka yindi chakufuma hamuchima. Wadiña wayifwetela dehi mali amusonku afwetañawu hachaaka-hachaaka. Chuma chakeñekeleña kudi etu hikulandilamu hohu manji. Dichi twekalili namotoka wutwakeñeleña.

Yehova wamwekesheli nindi diyi watwakameneneña kuyuma yakumujimba. Mudimu wetu wadiña wakusambila kukeña Wanta.

Hitwadiña kuShikola yaMudimu wawaPayiniya mu 1978, manakwetu Raimo Kuokkanen, a wumu hakachi kanowu atudizishileña watukolesheli nindi tusoneki fomu yakulombelahu kuya kuShikola yaGiliyadi. Dichi twatachikili kudiza Ingilishi kulonda twakatweshi kuya kuniyi shikola. Hela chochu, mu 1980, henohu kanda tusoneki fomu yakulombelahu kuya kushikola, atutambikili kuya nakuzatila hakasanji kamutayi muFinland. Hayina mpinji, akaBeteli hiyayitejeli kuya kuGiliyadiku. Ilaña twakeñeleña kuzatila kwakeñeleña Yehova nindi tuzatili bayi kutwakeñeleña etu aweniku. Dichi twetejeli iwu ­mutambi.  Hela chochu, twatwalekelihu kudiza Ingilishi muloña twatoñojokeleña netu hadaha twakekalahu nakukooleka kwakulomba kuya kuGiliyadi.

Chimwahitili yaaka yantesha, Izanvu Dalombolaña detejeli akaBeteli kwikala nakukooleka kwakulomba kuya kuGiliyadi. Hohenohu twasonekeli mafomu akulombelahu kuya kuniyi shikola bayi neyi twatiyileña kutama kuzatila haBeteliku. Dichichadiña wanyi! Twakeñeleña hohu kudihana kuya nakukalakela kudi kwejima kwadiña kukaankila neyi atwiteja. Atutambikili kuGiliyadi nawa twamanishili shikola yamunaamba 79, muSeptember 1985. ­Atutemesheli kuya nakuzatila kuColombia.

Hitwayili muColombia, atulejeli kuya nakuzatila ntahi hakasanji kamutayi. Nazatileña nañovu mudimu wanyinkeliwu, ilaña hanyima yakuzatila hakasanji kamutayi hadi chaaka chimu natoñojokeli nami atuhimpiku mudimu. Aka dikadiña katachiki nawa kakukumishaku muchihandilu chami kinalombeli nami atuhimpiku mudimu. Kuhiñahu atutemesheli hamu neyi amishonali kumusumba waNeiva, kwiluña daHuila.

Mpinji yejima natiyaña kuwaha kushimwina. Hinachidiña mujiki muFinland, mpinji jikwawu nashimwinineña kutachika nantetemena nankashi kushika nimelela. Chitwadisumbwili hohu, ami naSirkka twazatilileña hamu cheñi mafuku ejima mumudimu wakushimwina. Neyi tunakuzatila kumaluña akushimwina akwakulehi, mpinji jikwawu twakaamineña mumotoka wetu. Chumichi chatukwashileña kubula kumanisha mpinji yeneni nakwenda nawa chatuletesheleña kutachika kushimwina swayi hefuku dinalondelihu.

Mumudimu wawumishonali, twekalili cheñi namuchima wakudikita mumudimu wakushimwina neyi wutwadiña nawu hakusambila. Chipompelu chitwadiñamu chatoheli nawa amanakwetu niahela muColombia atulemesheleña, kutukeña nikutusakilila.

Matawuni adiña kukamwihi namusumba waNeiva kunazatilileña, mwadiña aYinsahu wanyi. Nakameneneña nankashi chakashika nsañu yayiwahi kunawa maluña. Hela chochu, muloña wamazanvu awakamadombu, hiyetejeleña antu afuma kwacheñi munawa maluñaku. Dichi nalombeli nami muntu wumu munawa matawuni akekalihu Chinsahu. Natoñojokeleña nami iwu muntu watela ntahi kushakama muNeiva kulonda akadizi chalala. Dichi, nalombeli cheñi nami neyi napapatishewi dehi akapami kuspiritu, kuhiñahu dinu akafunti kutawuni yawu nakushimwina. Nateleleli kwiluka nami Yehova wadiña nanjila yayiwahi yakumanishilamu iku kukala kubadika chinatoñojokeleña.

Hashimbwili wanyi, natachikili kudizisha Bayibolu kansi weyala wejina daFernando González. Washakamineña muAlgeciras, tawuni yimu yadiña hakachi kamatawuni mwabulili aYinsahu. Fernando wendeleña makilomita kubadika ha 50 (mamayilu 30) kwinza kuNeiva nakuzata. Waloñesheleña chiwahi nankashi kudiza-hikudiza nawa hashimbwili wanyi watachikili kwinza kukupompa kwejima. Kufuma tuhu mulungu watachi watachikiliyi kudiza, Fernando wapompesheleña akwawu mutawuni mwashakamineñayi nakuyileja yuma yadizayi hampinji yadizañayi Bayibolu.

Fernando wapapatisheweli muJanuary 1990, hanyima yakudiza hadi tukweji 6. Kuhiñahu, wekalili payiniya wampinji yejima. MuAlgeciras chimwekalili Chinsahu wumu wamu dodina iluña, kasanji kamutayi  kamweni nawu chidi hohu chiwahi kutemesha apayiniya adimena kuya nakuzatila mudina iluña. MuFebruary 1992, atuñili chipompelu muniyi ­tawuni.

Komana Manakwetu Fernando washimwinineña hohu mutawuni mwashakamineñayi? Inehi! Chasumbwiliyi, yena niñodindi abuukilili kuSan Vicente del Caguán, tawuni yikwawu mwabulili aYinsahu. Kweniku atachikishili chipompelu. Mu 2002, Manakwetu Fernando amutondeli kwikala nkoñi wañinza, nawa yena niñodindi Olga  anatwalekihu mumudimu wakwenda kushika niyinu mpinji.

Kunichi chuma chamwekeni nadizililiku kutena mukulomba yuma yinakundami kunyidimu yitunakuzata mukuloñesha kwetu. Yehova welaña yuma yitunateli kukañanya kwila. Kafwampi, yena diyi mwini mudimu wakwañula bayi neyi etuku.​—Mat. 9:​38.

Mu 1990 atutemesheli mumudimu wakwenda. Ñinza yatachi yitwazatililimu yadiña mumusumba weneni, muBogotá. Iwu mudimu watwakamishili. Ami nañodami tudi antu hohu, hitukwetihu yawaana yabadika yakwila yumaku. Nawa hitwenjililili kushakama munyisumba yamaneniku. Hela chochu, Yehova washikijili chikaninu chindi chekala haAFwilipi 2:​13, chakwila nawu: “Nzambi diyi wayikoleshaña kuhitila mukuyinka muchima wakufwila kukoña yuma niñovu yakwilamu, kwesekeja nanochu chatiyañayi kuwaha.”

Mukuhita kwampinji, atutemesheli kuya nakuzatila muñinza yadiña mwiluña daMedellín, musumba wunashimuna hakusambila. Antu munidi iluña enjililili kutiya madombu munyikwakwa chakwila alekeli nikwakama. Chakutalilahu, mpinji yimu henohu inakulombola kadizi, mata atachikili kuvuma hanji yetala dakadizi inalombweleña. Nakeñeleña kukaama hamaseki, ilaña kadizi watwalekelihu kutaña paragilafu chakadi kutiya woma. Chamanishiliyi kutaña, walombeli lusesa nindi ayi hanji. Chimwahitili kampinji kanti, wafuntili iku nasendi anyana anyanya ayedi nawa wahosheli nindi, “Muñanakeniku mwani, naya nakusenda anyanami.”

Kwadiña mpinji jikwawu jitwadiña muwubanji wadifwanaku naniwu. Ifuku dimu chitwadiña nakushimwina mumudimu wakwitala niitala, ñodami wenjili lufuchi kudi ami iku nakumwekana kutokoloka. Wahosheli nindi kudi muntu wunamulozi. Chumichi chañakamishili nankashi. Ilaña, chimwahitili mpinji twelukili netu ona iyala walozañeneña walozeleña ñodami wanyi; walozeleña muntu wahitileña kwakwihi nañodami.

Mukuhita kwampinji, ninetu twalekeli kutiya woma madombu. Twakolesheweli nanochu chomikileñawu akwetu aYinsahu ashakamineña munawa maluña amweneña kukala kwamuchidiwu nikwabadikahu. Twakunkulwili netu neyi Yehova wayikwashileña, wukutukwashaña ninetu. Mpinji yejima twovwahilileña akulumpi amunidi iluña, twatondolweleña yuma yikusha wumi wetu muwubanji, nawa yuma yinashali twayishileña mumakasa aYehova.

Hela chochu, kukala kukwawu hikwashileña wumi wetu muwubanji neyi chitwatoñojokeleñaku. Mpinji yimu, natiyili neyi mazu awambanda ayedi anakubobola hanji yetala damuntu wunayili nakutala. Nakeñeleña wanyi kutala antu anakubobola, ilaña mwini itala wanlejeli nindi ninzi kwikeki dahawiñililu. Nkumininaku, namweni atuda  ayedi, atiyakeneña neyi ambanda “anakubobola” asombolweleña mazu ahosheleña antuñi janiwu mwini itala.

Mu 1997, antondeli kwikala ntañishi waShikola yaKudiza Mudimu wawuNkoñi. b Mpinji yejima natiyileña kuwaha kuya kumashikola aWanta, ilaña hinatoñojokelihu nami nakekalahu nakukooleka kwakudizisha akwetuku.

Mukuhita kwampinji, nekalili nkoñi wankambi. Iyi ntanjikilu chayilekesheliwu, nafuntili mumudimu wakwenda. Dichi kubadika hadi yaaka 30, nakalakali hamu neyi ntañishi nawa nkoñi wendaña. Muniyi nyidimu munafumi nkisu jajivulu nankashi. Hela chochu, mpinji jikwawu namonaña kukala. Lekenu niyileji.

Nekala nachilwilu chakuhamuka nankashi. Chumichi chankwashaña kuumika kukala kunamonaña. Hela chochu, mpinji jikwawu nakeñaña hohu kushikena kwolola yuma muyipompelu. Kakavulu, nashikeneneña kuyileja amanakwetu amakwawu chakubula kuyihita mumbadi nami amwekesheleña akwawu kukeña nikuyitoñojokelaku. Kuhosha hohu chalala, kwila yuma muniyi njila kwamwekesheli hatooka nawu hinadiña naniyi yilwiluku.​—Rom. 7:​21-​23.

Muloña wayiluwa yami, mpinji jikwawu naneñaña nankashi. (Rom. 7:​24) Mpinji yimu, namulejeli Yehova mukulomba nami chikuwaha hohu neyi nukuleka mudimu wawumishonali nakufunta kuFinland. Hanidi ifuku namelela, nayili nakupompa. Yuma yinadizili hakupompa yankwashili kukuhwelela nami natela kutwalekahu mumudimu wami nikuzatila hayiluwa yami. Kushika nilelu, nasakililaña nankashi Yehova chakwiliyi kulomba kwami. Kubombelahu, namusakililaña chikupu chinankwashiyi kuzatila hayiluwa yami.

Ami naSirkka twamusakililaña nankashi Yehova hakutwinka kukooleka kwakuzatisha chihandilu chetu chejima mumudimu wampinji yejima. Nawa namusakililaña Yehova hama hakunyinka mumbanda wunatwalekihu kumwekesha kukeña nikashinshi hadi yaaka yejimiyi.

Katataka nishikiji yaaka 70 nawa nikuleka kukalakala hamu neyi ntañishi nawa nkoñi wendaña. Hela chochu, chumichi chinakunneñesha wanyi. Muloñadi? Muloña neluki chikupu nami chuma chamulemeshaña nankashi Yehova hikumukalakela nakudikehesha nawa neyi tumushimekaña namuchima wunenzali nakukeña nikusakilila. (Mika 6:​8; Maku 12:​32-​34) Hakwila tumulemeshi Yehova, bayi neyi chakeñekaña kwikala namudimu wukuletesha tutuumbakani nankashiku.

Neyi nitoñojoka hanyidimu yejima yinnazati, nanukaña nami hiyanyinkeli iyi nyidimu muloña wakwila nadiña walema kubadika akwetuku; hela hiyanyinkeleña iyi nyidimu muloña kudi yuma yinelukili nankashiku. Chinjila mwani! Ilaña, Yehova wanyinkeli iyi nyidimu yindi yejima muloña waluwi lwindi lwasweja. Wanyinkeleña iyi nyidimu, hichikweti muloña nakuzeyazeya kwamiku, neluka nami natweshaña kuzata iyi nyidimu yejima chiwahi nawukwashu waYehova hohu. Muloña wachumichi, mukuzeyazeya kwami munamwekeni ñovu jaNzambi.​—2 Kor. 12:​9.