1. Amakwawu atiyaña ñahi kuhanjeka nawantu mumudimu wakushimwina? (Talenu cheñi mwevulu.)

 ETU ANTU jaYehova twashimwinaña antu muloña twamukeña Tata yetu wamwiwulu nawa twakeñaña kukwasha antuñi netu kulonda amwiluki. Akakushimwina amavulu adiluñishaña chikupu mudimu wakushimwina. Ilaña amakwawu adiluñishaña wanyi. Muloñadi? Amakwawu ekala nansonyi nankashi nawa atoñojokaña nawu akutwesha wanyi. Amakwawu akasunukaña wanyi kuya kumatala ambala chakadi kuyitambika. Amakwawu atiyaña woma nawu akuyizuwila. Amakwawu ayidizisha kutondolwela kuhilisha akwawu. Hela chakwila amukeña Yehova chikupu, awa amanakwetu niahela chayikalilaña nankashi kushimwina antu abula kwilukawu nsañu yayiwahi. Hela chochu, eluka chalemena iwu mudimu, dichi ayaña nakushimwina mpinji yejima. Yehova watiyaña kuwaha nankashi!

2. Neyi chayikalilaña kwikala namuzañalu mumudimu wakushimwina, muloñadi wumwatela kubulila kuzeya?

² Komana mpinji jikwawu chayikalilaña kwikala namuzañalu mumudimu wakushimwina muloña wakutiya muniyi njila? Neyi dichimwatiyaña, bayi muzeyaku. Neyi munakutiya nenu mukutwesha wanyi, dikwila nawu mwadizoza nawa munakukeña wanyi antu asheña maana hadi enu. Chinakumwekesha cheñi nawu munakukeña wanyi kutaadeka nawantu. Nawa kwosi muntu wakeñaña nindi ahilishi akwawu, sweje-e neyi nakuzata nañovu kulonda ayilili yuma yayiwahi. Tata yenu wekala mwiwulu weluka kukala kwejima kumwamonaña nawa nakukeña kuyikwasha kwesekeja nakukala kumukweti. (Isa. 41:13) Muchinu chibaaba, tukuhanjeka hanjila jitanu jinateli kuyikwasha kwimika mushindu iku kukala nichimunateli kwikala namuzañalu mumudimu wakushimwina.

 ITEJENU IZU DANZAMBI DIYIKOLESHI

3. Chumanyi chamukwashili kaprofwetu Yeremiya kushimwina antu?

³ Kufuma tuhu kunyima, nsañu yafuma kudi Nzambi yakoleshaña ambuñindi neyi akweti mudimu wakala kuzata. Chakutalilahu, toñojokenu hadi kaprofwetu Yeremiya. Washintajalili hamwinkeliwu kudi Yehova mudimu wakushimwina. Yeremiya wahosheli nindi: “Ami neluka kuhosha wanyi, muloña nichidi kansi hohu.” (Yere. 1:⁠6) Chumanyi chamukwashili kwikala wahamuka? Amukolesheli kudi izu daNzambi. Wahosheli nindi: “Dekalili neyi kesi kanakubidima kanashinkiliwu mumafwaha ami, nawa nazeyeli nakudihemba idi izu.” (Yere. 20:​8, 9) Hela chikwila Yeremiya wazatilileña mwiluña mwadiña antu akalisha, nsañu yamulejeliwu nawu ashimwini yamwinkeli ñovu yamukwashili kuzata chiwahi mudimu wamwinkeliwu.

4. Yumanyi yafumañamu neyi tutañaña Izu daNzambi nikutoñojokahu chikupu? (AKolosi 1:​9, 10)

⁴ Nsañu yekala Mwizu daNzambi yayinkaña akaKristu ñovu. Chasonekeleleñayi chipompelu chamuKolosi, kapostolu Pawulu wayilejeli amanakwindi nindi neyi eluka kwiluka kwalala kwadi kuyisañumuna “[kwenda] nanochu chakeñañayi Yehova” hampinji yatwalekelihu ­“kusoña nyikaabu munyidimu yayiwahi yejima.” (Tañenu AKolosi 1:​9, 10.) Iyi nyidimu yayiwahi mwabombela kushimwina nsañu yayiwahi. Dichi neyi tutañaña Izu daNzambi nikutoñojokahu chikupu, chikuhwelelu chetu chakolelañaku nawa twelukaña chichalemena kushimwina nsañu yaWanta.

5. Yumanyi yitwatela kwila hakwila tutiyishishi nsañu yitunakutaña nikudiza muBayibolu?

⁵ Hakwila tutiyishishi nsañu yitunakudiza Mwizu daNzambi, twatela kwikalaña nampinji yeneni yakutaña, kudiza nikutoñojokahu chikupu. Neyi muwana nsona yimunabuli kutiyishisha, bayi muyikilukilaku. Ilaña zatishenu Chitwa chaKukwasha aYinsahu jaYehova haKusandujola Nsañu hela nyikanda yetu yikwawu kulonda mwiluki chinayilumbululiwu oyu vasi. Neyi mwikalaña nampinji yeneni yakudiza, mukukuhwelelaña chikupu muchalala chaMwizu daNzambi. (1 Tes. 5:​21) Neyi mutiyishisha chalala chekala Mwizu daNzambi, mukutiyaña kuwaha kulejaku akwenu yuma yimunadizi.

LOÑESHENU CHIWAHI HENOHU KANDA MUYI NAKUSHIMWINA

6. Muloñadi wutwatela kudiloñeshela chiwahi henohu kanda tuyi nakushimwina?

⁶ Neyi muloñesha chiwahi henohu kanda muyi nakushimwina, mukwikala akasunuka  kuhosha nawantu. Yesu wayikwashili atumbanji twindi kudiloñesha henohu kanda ayitemeshi kuya nakushimwina. (Luka 10:​1-​11) Muloña wakwila azatishili yuma yayidizishiliwu kudi Yesu, atumbanji azañaleli nankashi hayuma yayiwahi yayivulu yazatiliwu.​—Luka 10:⁠17.

7. Tunateli kudiloñesha ñahi henohu kanda tuyi nakushimwina? (Talenu cheñi mwevulu.)

⁷ Tunateli kudiloñesha ñahi henohu kanda tuyi nakushimwina? Twatela kutoñojoka hachitwatela kulumbulula chiwahi chalala mumazu etu etwaweni. Kwakwashanaña cheñi kutoñojoka hayuma yiyedi hela yisatu yavula kuhoshawu antu amwiluña detu dakushimwina nichitwatela kuyakula. Dichi neyi tunakuhanjeka nawantu, twatela kwikala awunda, kutumba chimwemweta nikwikala akasunuka.

8. AkaKristu ekala ñahi neyi nsaba jamawumba jalumbulwiliyi kapostolu Pawulu?

⁸ Kapostolu Pawulu wazatishili chakutalilahu hakulumbulula mudimu wutwazataña mumudimu wakushimwina, hahosheliyi nindi: “Tukweti idi iheta munsaba jamawumba.” (2 Kor. 4:⁠7) Idi iheta hichumanyi? Himudimu wakwamwina mawumi awantu wakushimwina nsañu yaWanta. (2 Kor. 4:⁠1) Nsaba jamawumba jemenañaku chumanyi? Jemenañaku ambuña aNzambi ashimwinaña nsañu yayiwahi kudi antu. Mumafuku aPawulu, akakulanda nakulandulula azatishileña nsaba jamawumba kusendelamu yuma yalema chidi neyi yakuda, vinyu nimali. Munjila yoyimu, Yehova watwinka nsañu yalema yansañu yayiwahi. Nawukwashu waYehova, tunateli kwikala nañovu yikutukwasha kutwalekahu kushimwina.

LOMBENUÑA MWIIKALI AHAMUKA

9. Tunateli kwimika ñahi mushindu kutiya antu woma? (Talenu cheñi mwevulu.)

⁹ Mpinji jikwawu tunateli kutiya antu woma. Tunateli kwimika ñahi mushindu iku kukala? Talenu chalombeliwu apostolu hayikaanishiliwu kushimwina. Chatela atiyi woma, amulombeli Yehova ayikwashi “kulonda atwalekihu kuhosha izu [dindi] nakuhamuka.” Yehova washikeneni kwakula kulomba kwawu. (Yilw. 4:​18, 29, 31) Neyi mpinji jikwawu twatiyaña antu woma, ninetu twatela kulomba kudi Yehova kulonda atukwashi. Mulombenu Yehova ayikwashi muswejeshi kukeña antu kulonda mubuleña kutiya woma kuleja antu nsañu yayiwahi.

10. Yehova watukwashaña ñahi kuzata mudimu watwinkayi wakwikala aYinsahu jindi? (Isaya 43:​10-​12)

¹⁰ Yehova watutonda kwikala aYinsahu jindi,  nawa watukana kutukwasha kwikala ahamuka. (Tañenu Isaya 43:​10-​12.) Talenu njila jiwana mwatukwashilañayi. Njila yatachi, Yesu wekalaña nanetu mpinji yejima yitunakushimwina nsañu yayiwahi. (Mat. 28:​18-​20) Njila yamuchiyedi, Yehova watonda añelu atukwashaña. (Chim. 14:⁠6) Njila yamuchisatu, Yehova watwinka spiritu yindi yajila yatukwashaña kwanuka yuma yitunadizi. (Yow. 14:​25, 26) Njila yamuchiwana, Yehova watwinka amanakwetu niahela itwazataña nawu. Nawukwashu waYehova niwawamanakwetu atukeña, tukweti yuma yejima yinateli kutukwasha kwikala ahamuka nikutwalekahu kushimwina.

HIMPENUÑA KWESEKEJA NACHIDI YUMA MWILUÑA DENU NAWA IKALENU NAMMWENU YAYIWAHI

11. Neyi munayi nakushimwina, yumanyi yimwatela kwila hakwila muwaneña antu amavulu? (Talenu cheñi mwevulu.)

¹¹ Komana mwatiyaña kutama neyi antu himunakuvula kuyiwana hamatalaku? Munateli kudihula nenu: ‘Chayinu mpinji antu ekala mwiluña dinashimwinaña atela adi kudihi?’ (Yilw. 16:13) ‘Atela anayi nakuzata ­tahindi anayi nakulanda hela nakulandisha yuma?’ Neyi dichidi yuma, kwila muya nakushimwina munyikwakwa munakuhita antu amavulu nehi? Manakwetu wejina daJoshua wahosheli nindi, “Nashimwinaña neyi inakuhita mumaluña mwalandishilañawu yuma nikumaluña amakwawu kwawanikaña antu amavulu.” Yena nañodindi, Bridget, awanaña antu amavulu hamatala neyi aya nakushimwina namelela niHamulungu namwaana.​—Efwe. 5:​15, 16.

12. Munateli kwiluka ñahi yuma yakuhwelelawu antu hela yayakamishaña?

¹² Neyi antu anakushaku muchima wanyi kunsañu yimunakuyishimwina, fwilenu kwiluka yuma yakuhwelelawu hela yinakuyakamisha. Manakwetu Joshua namuhela Bridget, azatishaña lwihu lwekala hambidi yatilakiti hakutachika kuhanjeka nawantu. Chakutalilahu, neyi anakuzatisha tilakiti yekala nalwihu lwahosha nawu Indi Bayibolu Mwayimonaña Ñahi? ahoshaña nawu: “Antu amakwawu amonaña Bayibolu nawu himukanda wafuma kudi Nzambi, ilaña amakwawu hiyayimonaña muniyi njilaku. Indi enu mwatoñojokañahu nenudi?” Kuhosha muniyi njila kakavulu kwaleteshaña atachiki kuhanjeka.

13. Muloñadi wutunateli kumwena netu tunazati mudimu wetu hela chakwila antu anakaani kututiyilila? (Yishimu 27:⁠11)

 ¹³ Hela chakwila antu akutiyilila hela nehi hampinji yitunakushimwina, etu tunazati mudimu wetu. Muloñadi? Muloña tuneli chuma chinakukeña Yehova niMwanindi nawu twili, dikwila nawu tunashimwini. (Yilw. 10:42) Hela chakwila tunawanihu wanyi muntu wakuhosha nindi indi kwiji anakukaana nsañu yitunakuyishimwina, twatela kuzañalala muloña tuneluki netu tunakumutiyisha Tata yetu wamwiwulu kuwaha.​—Tañenu Yishimu 27:⁠11.

14. Muloñadi wutwatela kuzañalela neyi mukwetu mukakushimwina awana muntu wunamwekeshi mpwila mwiluña detu dakushimwina?

¹⁴ Tunateli cheñi kuzañalala neyi mukwetu mukakushimwina awana kadizi wunamwekeshi mpwila mwiluña mutwashimwinaña. Kaposhi Kakutalila kesekeja mudimu wetu nakukeñakeña mwana wunajimbali. Antu amavulu azatilaña hamu kuya nakumukeñakeña iwu mwana kumaluña ashiyashana. Neyi owu mwana anamuwani, wejima wawu azañalalaña, bayi neyi ona wamuwana hohuku. Munjila yoyimu, mudimu wakwilisha atumbanji twawuzatilaña hamu wejima wetu. Wejima wetu twakeñekaña kuzatila hamu hakwila tushimwini iluña detu dejima dakushimwinamu, nawa wejima wetu twazañalalaña neyi tumona wamuha natachiki kwinza nakupompa.

SHENU MUCHIMA HAKUKEÑA KUMWAMUKEÑA YEHOVA NIAKWENU ANTU

15. Kuzatisha nsona yaMatewu 22:​37-​39 yinateli kutukwasha ñahi kwikala neyena chikupu dakudikita mumudimu wakushimwina? (Talenu cheñi mwevulu wudi hakava.)

¹⁵ Tunateli kwikala neyena chikupu dakudikita neyi tushaña muchima hakukeña kutwamukeña Yehova niakwetu antu. (Tañenu Matewu 22:​37-​39.) Fwikijenu Yehova chinateli kuzañalalayi neyi atumona tunakuzata iwu mudimu nimuzañalu wunateli kwikala nawantu neyi atachika kudiza Bayibolu! Toñojokenu cheñi wamwinu watalilañawu antu atambwilaña nsañu yitwashimwinaña.​—Yow. 6:​40; 1 Tim. 4:​16.

16. Tunateli kwikala ñahi namuzañalu mumudimu wakushimwina neyi kudi yuma yinakutukañesha kufuma hetala? Shimunenu yakutalilahu.

¹⁶ Komana munakukañanya kufuma hetala muloña kudi yuma yimu yinakuyikañesha? Neyi dichichidi, shenuña muchima hakwila yuma yimukutwesha hakwila mumwekeshi kukeña kumwamukeña Yehova niakwenu antu. Mumpinji yachipupu chaCovid-19, aSamuel  nawaDania akañenyeña kufuma hetala. Muniyi mpinji yakala, mpinji yejima ashimwinineña kuzatisha foni, kusoneka nyikanda nikulombola atudizi aBayibolu haZoom. Manakwetu Samuel washimwinineña antu adibulakeneñayi nawu kuchipateli kwamuukilileñawu chikatu chakansa. Wahosheli nindi: “Makabi atuzeyeshaña muyitoñojoka, kumujimba nikuspiritu. Twatela kumukalakelaña Yehova namuzañalu.” Henohu ichi chipupu chichidi, muhela Dania wadimbukili, dichi wadiña mukadidi hadi tukweji tusatu. Kuhiñahu wendeleleña hakakinga kawayifwayi hadi tukweji 6. Wahosheli nindi: “Nesekeleña kwila yuma yinatwesheleña kwila kwesekeja nachadiña yuma hayina mpinji. Nashimwinineña nansi wenjileña nakuntala ninana atuleteleleña yuma hetala. Nahanjekeleña cheñi chiwahi namumbanda wazatilileña hakampani yalandishaña yuma yakuzatisha muchipateli.” Kukala kwahitilimu aSamuel nawaDania kwayikañesheli kuzata neyi chazatileñawu kunyima, ilaña azatileña kwesekeja nahakumina ñovu jawu nawa kuzata muniyi njila kwayileteleleña muzañalu.

17. Chumanyi chimwatela kwila hakwila njila jinashimuniwu muchinu chibaaba jiyikwashi?

¹⁷ Njila jinashimuniwu muchinu chibaaba jazatikaña chiwahi neyi tujizatishaña jejima. Iji njila jejima jidi neyi yuma yashimunawu yakuzatisha hakwocha dinkendi. Neyi iyi yuma yejima yashimunawu muyibomba hamu, mukutuña dinkendi dadiwahi nankashi. Neyi tuzatishaña iji njila jejima jitunadizi. Tukwikala adiloñesha chikupu kukañesha yitoñojoka yatama nawa tukushimwinaña namuzañalu.