Kapostolu Pawulu amoneneni kusoneka yilwilu yayiwahi 9 yenzaña muloña waspiritu yajila. (Ñal. 5:22, 23) Walumbulwili iyi yilwilu yayiwahi yejima nindi, “nyikabu yaspiritu.” * Neyi twikala naniyi nyikabu dikwila nawu tudi ‘nawuntu wawuha.’ (Kol. 3:10) Kufwana mutondu wasoñaña nyikabu neyi awakamena, dichi muntu nateli kumwekesha nyikabu yaspiritu neyi spiritu yajila yinakumukwasha.—Mas. 1:1-3.

Chilwilu chatachi chamukabu waspiritu chateneniyi Pawulu hikukeña nawa chalema nankashi. Muloñadi chichalemena? Pawulu wahosheli nindi chakadi kukeña wadiña “wamukunkulwayi.” (1 Kor. 13:2) Hanu dinu kukeña kwatalisha mudihi, tunateli kwikala naku ñahi, nawa tunateli kukumwekesha ñahi?

Hela chakwila hitukutwesha kulumbulula mwatalisha ichi chilwilu chakukeñaku, Bayibolu yalumbulula chitunateli kukumwekesha. Chakutalilahu, twatañaña netu kukeña “kwadiwunjikaña nawa kwatiyilaña luwi.” Cheñi, “kwazañalalaña nachalala,” nawa “kwabutaña yuma yejima, kwakuhwelelaña yuma yejima, kwachiñejaña yuma yejima, kwomikaña yuma yejima.” Kukeña kwambombelamu cheñi kukeña akwetu nikuyakamena kushilahu nikudikunda nawu. Munjila yikwawu, kubula kukeña kwamwekenaña mukwikala nalwisu, kudinka wanta, yilwilu yabula kutela, kudikeña, kuhemba nkunyi nikubula kwanakena. Kwambukaku naniyi yilwilu yatama, kukeña kutwakeñaña kwikala naku “hikwakeñaña hohu kuditiyisha kwakweni kuwahaku.”—1 Kor. 13:4-8.

“Nzambi hikukeña.” Mwamweni, Yehova diyi wasweja kwikala nakukeña. (1 Yow. 4:8) Nyidimu niyuma yelañayi yamwekeshaña nawu wukweti kukeña. Kukeña kwabadika kwakeñeliyi antu, kwamwekeni hatemesheliyi Yesu nakutukabakena nikutufwila. Kapostolu Yowanu wahosheli nindi: “Muloña wachumichi, Nzambi wamwekesheli kukeña kwindi hadi etu hakutemesha mukaayi Mwanindi wumu hohu kulonda tukatweshi kwikala nawumi kuhitila mudi yena. Imu dimwatalisha iku kukeña, Nzambi diyi watukeñeli etu nakututemeshela Mwanindi kwikala mulambu wakufumishahu nshidi jetu, bayi neyi yetu twamukeñeliku.” (1 Yow. 4:9, 10) Chineli Nzambi watukeña, nateli kutwanakena, tunateli kwikala nakuchiñeja niwumi.

Yesu wamwekesheli nindi wakeña antu kuhitila mukudihana kwila nkeñelu yaNzambi. Pawulu wasonekeli nindi [Yesu] wahosheli nindi: “Talaña! Ami nenzi nakwila nkeñelu yeyi.’ . . . Kuhitila muniyi ‘nkeñelu,’ anatujiliki namulambu wamujimba waYesu Kristu walambwiliyi kamu hohu.” (Heb. 10:9, 10) Kwosi muntu wunateli kumwekesha kukeña kwasweja. Yesu wahosheli nindi: “Kwosi muntu wukweti kukeña kunabadiki iku kwakwila muntu yahani wumi windi kukoola amabwambu jindiku.” (Yow. 15:13) Komana etu antu abula kuwanina  tunateli kwimbujola kukeña kwamwekesheliyi Yehova niYesu? Eña! Tushinshikenu chitunateli kuyimbujola.

Pawulu watulejeli nindi: “Ikalenu akwakwimbujola Nzambi neyi anyana akeñayi, nawa endenuña mukukeña neyi chatukeñeliyi Kristu nikudihana yomweni kukoola etu.” (Efwe. 5:1, 2) ‘Twendaña mukukeña’ neyi tumwekeshaña kukeña muchihandilu chetu chejima. Twamwekeshaña kukeña kweniku muyuma yitwelaña bayi mumazu hohuku. Yowanu wasonekeli nindi: “Enu anyana inakeña, hitwatela kukeña akwetu namazu hela hakanwaku, ilaña munyidimu nimuchalala.” (1 Yow. 3:18) Chakutalilahu, neyi tunakwenda mukukeña Nzambi niakwetu antu, chikutukwasha kushimwina “nsañu yayiwahi yaWanta.” (Mat. 24:14; Luka 10:27) Tukwendaña cheñi mukukeña neyi twadiwunjika, tukweti luwi nawa twanakenaña. Dichi Bayibolu yatufumbaña nawu: “Neyi chayanakeneniyi Yehova chakufuma kumuchima, ninenu nawa mwatela kwila mwomumu.”—Kol. 3:13.

Hela chochu, kukeña kwalala kwatela wanyi kwikala kwawunfwikiji. Chakutalilahu, nvwali wukweti kukeña kwawunfwikiji nateli kumwinka mwanindi wunakudila chuma kulonda yamumweneshi. Ilaña nvwali wakeña mwanindi chikupu wukumona njila yayiwahi yakumumweneshelamu. Munjila yoyimu, Nzambi diyi kukeña, ilaña “antu akeñayi Yehova wayibabeshaña.” (Heb. 12:6) Neyi tunakwenda mukukeña, ninetu tunateli kubabesha neyi chinatwesheki. (Yish. 3:11, 12) Hela chochu, neyi tunakubabesha twatela kwanuka netu ninetu tudi akwashidi nawa twelaña yuma yabulaña kumwekesha kukeña. Dichi, wejima wetu kudi yuma yitwatela kwila hakwila nawu tumwekeshi kukeña. Yumanyi yeniyi? Tushinshikenu njila jisatu.

Chatachi, mulombenu Nzambi kulonda yayinki spiritu yindi, yatukwashaña kwikala nakukeña. Yesu wahosheli nindi Yehova wenkaña “antu amulombaña spiritu yajila.” (Luka 11:13) Neyi tulomba spiritu yajila nikufwila ‘kwendaña naspiritu,’ tukumwekeshaña kukeña mpinji yejima. (Ñal. 5:16) Chakutalilahu, neyi mudi eluda muchipompelu chawakwaKristu, munateli kulomba spiritu yajila kulonda yiyikwashi kufumba antu kuzatisha Nsona munjila yakukeña. Hela neyi mudi anvwali, munateli kulomba spiritu yaNzambi kulonda yiyikwashi kufumba anyanenu mukukeña bayi mukuhilaku.

Chamuchiyedi, toñojokenu Yesu chamwekesheliyi kukeña nihampinji yamwililiwu chatama. (1 Pet. 2:21, 23) Twatela kwanukaña chakutalilahu chaKristu neyi anatuhilishi hela anatwili chatama. Hampinji yamuchidiwu, twatela kudihula netu, ‘Yesu wadi kwiladi?’ Muhela Leigh chatoñojokeliyi hanilu lwihu chamukwashili nankashi kutoñojoka henohu kanda yeli chuma. Wahosheli nindi: “Ifuku dimu, mukwetu mutwazatilileña wayitemesheleli akwetu mutwazatilileña e-melu nakunhosha chatama nihanyidimu yinazatileña. Natiyili kutama. Ilaña natoñojokeli nami, ‘Nateli kumwimbujola ñahi Yesu chinatela kwila naniwu muntu?’ Natoñojokeli hayuma yadi kwilayi Yesu. Dichi nadiwili iyi nsañu nawa nahoshelihu cheñi wanyi. Kuhiñahu, nenjili nakwiluka nami iwu mukwetu nazatileña nindi wadiña nakukala kwayikatu nawa wakameneni. Namweni nami, wasonekelelimu hohu wanyi. Kutoñojoka hachakutalilahu chaYesu chakumwekesha kukeña nihampinji yinakwiliwu chatama kwankwashili ninami kumukeña iwu mukwetu inazatileña nindi. Mwamweni, neyi tumwimbujola Yesu, mpinji yejima tukwilaña yuma munjila yakukeña.

Chamuchisatu, ikalenu nakukeña kwakudihana, chilwilu chakuyilukilaku akwaKristu alala. (Yow. 13:34, 35) Kutalisha haniyi nsañu, Nsona yatulejaña kwikala “nayitoñojoka” yadiña naYesu. Kuhitila mukushiya mawulu, “washiyili yuma yejima yadiñayi nayu,” “kushika nikukufwa” kukola etu. (Fwi. 2:5-8) Chitukwimbujolaña kukeña kwindi kwakudihana, yitoñojoka yetu nichitwatiyaña chikwikala neyi chatiyileñayi Kristu, nawa chikutukwasha kutwamijaku  yuma yakeñañawu akwetu kubadika yuma yitwakeñaña. Yumanyi yikwawu yafumaña mukwikala nakukeña?

Neyi tukumwekesha kukeña, mukufuma yuma yayiwahi yayivulu. Talenu yakutalilahu yayedi:

• KUKEÑA KWAWAMANAKWETU MUKAAYI KEJIMA: Chineli twadikeña wumu namukwawu, tunakuhweleli netu tunateli kuya muchipompelu chidi chejima mukaayi kejima, amanakwetu niahela akutushikija namuzañalu. Iku hikukookela kweneni kwakutukeña kudi amanakwetu amukaayi kejima.’ (1 Pet. 5:9) Kufumishaku antu jaNzambi, anyi cheñi akweti kukeña kwamuchidiwu?

• KUWUNDA: “Kuditiyilila wumu namukwawu mukukeña” kwatukwashaña “kunuñañana.” (Efwes. 4:2, 3) Twamonaña iku kunuñañana hakupompa kwetu kwachipompelu, kupompa kwañinza nikweluña. Komana mukwiteja wanyi nenu kuwunda kwamuchidiwu kunakumwekana mukanu kaayi? (Mas. 119:165; Isa. 54:13) Twamwekeshaña netu twakeña amanakwetu kuhitila mukufwila kuleta kuwunda. Nawa twamutiyishaña kuwaha Tata yetu wamwiwulu.—Mas. 133:1-3; Mat. 5:9.

Pawulu wasonekeli nindi “kukeña kwatuñaña.” (1 Kor. 8:1) Kukeña kwatuñaña ñahi? Mukapetulu 13 kamukanda watachi wayisonekeleliyi akwaKorinda, wuyatenañawu nawu “Isamu daKukeña,” kapostolu walumbulwili kukeña chikwatuñaña. Chuma chatachi, kukeña kwafwilaña kutiyisha mukawu kuwaha. (1 Kor. 10:24; 13:5) Kubombelahu, chineli kukeña kwatoñojokelañaku, kwadiwunjika nawa kwawunda, kwakwashaña yisaka kwikala nakukeña nawa kwanuñañeshaña yipompelu.—Kol. 3:14.

Kukeña kutwamukeña Yehova kwalema nawa kwakwashaña antu ejima. Kukeña kwamuchidiwu kwanuñañeshaña antu afuma kuyitachi yashiyashana, akweti makowa nimadimi ambokamboka, kwikala amuzañalu hakumukalakela Yehova namuzañalu nawa namuchima wawu wumu. (Zef. 3:9) Tufwilenu kumwekesha ichi chilwilu chalema chamukabu waspiritu yaNzambi mpinji yejima.