HADIÑA kumakumishilu aNovember mu 1932 muMexico City. Kumatachikilu amulungu, maloboti ahamukwakwa ayishili muniwu musumba mwekala antu 1,000,000. Dichi awa maloboti anakumwekesha yuma yalema yinakumwekana. Akamba nsañu amuniwu musumba anakubidika nsañu yadiña nakumwekana muniwu mulungu. Anayi kwemenaña sitima namakamela nakuhembelela ñenji walema wunayendeli, Joseph F. Rutherford, presidenti waWatch Tower Society. A Yinsahu amunidi iluña niwena anatiyi kuwaha kutambwila Manakwetu Rutherford, wunenzi kukupompa kweluña kwamafuku asatu.

Golden Age yashimwini nawu; “chakadi nikujina, akunu kupompa akakwanukaña mpinji yejima muloña kunashimuni chalala muMexico.” Chumanyi chaletesheli iku kupompa kwampompeliwu hohu kudi antu 150, akwiluki kudi antu ejima?

Henohu iku kupompa kanda, muMexico mwadiña hohu akwakushimwina aWanta antesha. Kufuma tuhu mu 1919, apompeleña kupompa kwanyanya, ilaña yipompelu yakeheli muyaaka yalondelelihu. Chashinkwiliwu kasanji kamutayi muMexico City mu 1929, chamwekesheli nawu yipompelu yikuvulilaku. Hela chochu, kudi yuma yikwawu yakañesheleña. Chiyayilejeliwu nawu bayi abombaña mudimu wakushimwina namudimu wakulunda nakulandula, kolopota wumu wahilili nakuleka. Dichi welishili izanvu dindi dawatudizi aBayibolu. Hayoyeniyi mpinji, nkoñi wakasanji wakoñeli nshidi, kwakeñekeleña wakumusinsa. Dichi aYinsahu ovwahila muMexico akeñekeleña kuyikolesha kuspiritu.

Manakwetu Rutherford chenjiliyi, wayikolesheli chikupu awa amanakwetu. Wahanini mpanji jahakupompa jiyedi nijimpanji jitanu jahachisanji. Yikunzulemba yamuMexico yatiyakesheli nsañu yayiwahi mwituña dejima katachi. Chamanini kupompa, nkoñi wakasanji atondeliwu watachikili kuloñesha chakuzata mudimu. Nawa aYinsahu adiña neyena, ayili nakushimwina hanyima yakuyikolesha nikutambwila wukwashu waYehova.

Chaaka chalondelelihu, mwadiña kupompa kweluña kuyedi, kumu kwadiña mumusumba waVeracruz nawa kukwawu kwadiña muMexico City. Atachikili kuzata nañovu nawa mwafumineña yuma yayiwahi. Mu 1931 mwekalili akwakushimwina 82. Chimwahitili yaaka 10, avulililiku kapampa 10. Mu 1941, antu akushika ku 1,000 ayili kuMexico City kuKupompa Kweneni.

Mu 1943 aYinsahu azatili kampeni kakutiyakesha Kupompa kwadiña munyisumba 12 yaMexico kwadiña nakwila nawu “Free Nation” (“Matuña Akasunuka.”) * Makadi ayedi ayikudikileña, yimu  kumbidi yikwawu kunyima. Iyi diyi njila yazatishileñawu aYinsahu kufuma mu 1936.

Magazini ya La Nación yahosheli kutalisha hamakadi avwaliliwu muMexico nawu: “Ifuku dakutachika [dakupompa,] [aYinsahu] ayilejeli kutambika antu amavulu. Ifuku dalondelelihu antu enjili nakupompa avulili.” Aka kampeni kahilishili Chechi yaKatolika, chafuminimu apangili kampeni kakuyikañesha aYinsahu. Hela chakwila kwadiña ikañesha, amanakwetu niahela amavulu ahamukili kuhanjeka nawantu mumukwakwa. La Nación yahosheli cheñi nawu: “Antu ejima mumusumba ayimweni . . . Amayala niambanda atachikili kutiyakesha ‘nsañu yadiña hamakadi.’” Muniyi magazini mwadiña mwevulu wawamanakwetu adiña munyikwakwa yaMexico City iku anavwali chipapilu. Heshina hadiña mutu wakwila nawu: “Tunashinki nyikwakwa.”

Hayina mpinji, aYinsahu amavulu adihanineña kuya kukupompa kweneni kukukwawu kwadiña muMexico. Antu amavulu afumineña kunyikala yakwakulehi kwabula nyotoka nimasitima. Chipompelu chimu chasonekeli nawu: “Njila yimu yadiña yaswayi kuhanjekelamu yadiña hohu kuzatisha telegirafu.” Dichi, endeleña kuzatisha yimbulu hela kwenda hamaseki hadi mafuku amavulu hakwila ashiki kudi sitima kulonda ashiki kukupompa.

A Yinsahu amavulu adiña atuzweñi, akañenyeña kufweta mali alwendu lumu kuya kukupompa. Chashikiliwu, amavulu ashakamini nawaYinsahu amunidi iluña, atambwilili amanakwawu. Amakwawu akamineña muMatala aWanta. Mpinji yimu añenji akushika ku 90 ashakamini hakasanji kamutaayi. Kweniku “akamineña hamakatani anyikanda 20.” Yearbook yashimwini nawu awa amanakwetu asakilili muloña “hakamineñawu hadiña hahovu nawa hatata kubadika hasimenti.”

Awa aYinsahu amwekesheli kusakilila, atiyili kuwaha kupompa hamu nawakwawu akwaKristu hiyashili maana hakukala kwamweneñawuku. Makonu, akwakushimwina muMexico anavuli kwakwihi na 1 miliyoni. Adina iyena achidi nadu. * Chileji chamu 1949 chafumini kukasanji kamutayi kaMexico chahosheli hadi amanakwetu nawu: “Kukala kwamweneñawu mpinji yikwawu kwayizeyesheleña wanyi kuspiritu, muloña kupompa kwejima kutwadiña naku diyi yadiña mpanji yahosheleñawu mpinji yejima. Nawa amanakwetu enhwileña mpinji yejima nawu tukapompa cheñi mpinjinyi?” Awa mazu anakuzatika nimakonu.—From our archives in Central America.