1, 2. (a) Tukuhosheladi netu tukutwesha kuvwala wuntu wawuha? (b) Yilwilwinyi yawuntu wawuha yashimunawu haAkolosi 3:10-14?

NHOSHELU yakwila nawu “wuntu wawuha,” ayitena kapampa kayedi muBayibolu yaNew World Translation of the Holy Scriptures. (Efwes. 4:24; Kol. 3:10) Yatalisha hawuntu “waleñeliwu kwesekeja nankeñelu yaNzambi.” Tunateli kwikala naniwu wuntu wawuha. Muloñadi? Muloña Yehova wayileñeli antu neyi chekalayi yomweni. Dichi tunateli kwikala nayilwilu yindi yayiwahi.—Kutach. 1:26, 27; Efwes. 5:1.

² Mwamweni, chineli twaswana kubula kuwanina kudi anvwali jetu akusambila, twafwilaña kwila yuma yatama. Hadaha twaluwankanaña cheñi neluña mutwashakamaña. Hela chochu, naluwi lwaNzambi tunateli kwikala nayilwilu yayiwahi yakeñañayi Nzambi. Hakwila twikali nayilwilu yayiwahi, tukuhanjeka yilwilu yawuntu wawuha yamwoneneniwu kapostolu Pawulu kusoneka. (Tañenu Akolosi 3:10-14.) Tukuhanjeka chitunateli kumwekesha iyi yilwilu mumudimu wakushimwina.

3. Chilwilwinyi chawuntu wawuha?

³ Hanyima yakutukolesha nawu tuvwaleña wuntu wawuha, Pawulu watwalekelihu kulumbulula nindi kubula chaambu hichilwilu chakuvwala wuntu wawuha. Washimwini nindi: Kwekala wanyi “kaGiriki hela kaYudeya, waalama hela wabula kwalama, ñiinza hela kaSikita, nduñu hela muntu wasubuka.” * Muloñadi muchipompelu chimwatela kubulila kwikala chaambu chekowa, chaambu chamatuña hela chakutaña? Muloña atumbanji twaKristu alala ‘wejima wawu ekala wumu.’—Kol. 3:11; Ñal. 3:28.

4. (a) Ambuña aYehova atela kudimona ñahi wumu namukwawu? (b) Yumanyi yinateli kuletesha akwaKristu kubula kwikala anuñañana?

⁴ Antu avwala wuntu wawuha alemeshaña akwawu akwakwitiya niantu abula kwitiya, hela chakwila ataña hela ataña wanyi. (Rom. 2:11) Mumatuña amakwawu chinateli kuyikalila. Chakutalilahu, muSouth Africa aYinsahu amavulu achidi kushakama mumaluña atondeliwu nawu mwatela kushakama antu ekowa dimu, dikwila nawu musumba wawantu eyila hela iluña dakushakama antu amakowa amboka mboka. Dichi, hakwila nawu amanakwetu ayileji nawu atela ‘kutohesha kukeña kwawu,’ Izanvu Dalombolaña dashiliku ntanjikilu yimu muOctober 2013 yakukoleshelamu amanakwetu kulonda adiluki wumu namukwawu. (2 Kor. 6:13, ftn.) Yumanyi yadiña muniyi ntanjikilu?

5, 6. (a) Ntanjikilwinyi yaloñesheliwu mwituña dimu hakwila nawu antu jaNzambi anuñañani? (Talenu mwevulu wakutachikilahu.) (b) Munafumi yumanyi?

⁵ Aloñesheli ntanjikilu yakwila nawu yipompelu yiyedi yahoshaña madimi ambokamboka hela akweti makowa ashiyashana abulakaneña kunsa yanyilungu yikwawu. Amanakwetu niahela muniyi yipompelu yejima ashimwininineña hamu, kupompa hamu nikuya nakudila hamu yakuda kumatalawu. Yipompelu yayivulu yazatilili hamu, nawa kasanji kamutayi katambwilili nsañu yayiwahi kudi antu acheñi kutalisha haniyi ntanjikilu. Chakutalilahu, mukulumpi wachechi wumu wahosheli nindi, “Ami hinidi Chinsahuku, ilaña inakuhosha nami mwadiloñesha kuzatila hamu, cheñi himukweti chaambu chekowaku nawa mwakwatankana.” Indi iyi ntanjikilu yayikwashili ñahi aYinsahu?

⁶ Hakusambila, muhela Noma wahoshaña idimi daXhosa wakeñeleña wanyi kutambika anakwetu azungu apompeleña muchipompelu chazatishileña Chizungu kwitala dindi. Ilaña hanyima yakushimwina hamu nawaYinsahu azungu nikudiila hamu kumatala awu, wahosheli nindi, “Hiyantu neyi chochitwekala etu!” Chiyashikili mpinji yawamanakwetu ahoshaña Xhosa kuzatila nachipompelu chazatishaña Chizungu, wayiloñesheleli awa amanakwetu yakuda. Hakachi kanawa enyi, hadiña nieluda wamuzungu. Dichi Noma wahosheli nindi: “Nahayamini muloña washakamini hamaseki.” Iyi ntanjikilu chiyatwalekelihu, amanakwetu niahela amavulu ekalili namabwambu amaha nawa anakufwila kutwalekahu kudikunda.

7. Muloñadi chitwatelela kutwalekahu kutiyila akwetu wushona?

⁷ Tukutwalekahu kumona kukala sampu kaayi kaSatana kanakumi. Tunakumona kukala kudi neyi kubula nyidimu, yikatu, makabisha, wubanji wadimwekenaña, kujimbesha yuma yetu muloña wayikonkojola nikukala kukwawu. Twatela kwikala naluwi hakwila nawu tudikwashi wumu  namukwawu mumakabi itunakumona. Wushona wunateli kutukwasha kutiyila akwetu luwi. (Efwes. 4:32) Iyi yilwilu yawuntu wawuha yikutukwasha kumwimbujola Nzambi nikukundeja antu amakwawu.—2 Kor. 1:3, 4.

8. Yumanyi yinateli kufumamu neyi tumwekeshaña luwi niwushona kudi antu ejima muchipompelu? Shimunenu chakutalilahu.

⁸ Tunateli kwakamena ñahi añinza hela atuzweñi adi muchipompelu chetu? Twatela kukwata wubwambu nanawa antu nikuyikwasha kwiluka nawu alema chikupu muchipompelu. (1 Kor. 12:22, 25) Toñojokenu yuma yamumwekeneni Dannykarl wafumini kuPhilippines nakuya kuJapan. Kumudimu kwazatileñayi amumweneña wanyi neyi chamweneñawu akwanyidimu amakwawu. Dichi wayili nakupompa nawaYinsahu jaYehova. Dannyikarl wahosheli nindi: “Antu amavulu apompeli adiña aJapapanese, ilaña antambwilili chiwahi neyi kwiji nadiña mwenimbu.” Atwalekelihu kumumwekeshela luwi. Nawa chumichi chamukwashili kuyilaku hambidi kuspiritu. Wapapatisheweli nawa chayinu mpinji hieluda. Akwawu aeluda amumonaña Dannykarl niñodindi Jennifer nawu akwashaña chipompelu. Aeluda ahoshaña hadi wena nawu, “Apeleshaku chihandilu, hiyapayiniya nawa atwamijañaku Wanta hambidi.”

9, 10. Shimunenu yakutalilahu yinakumwekesha nkisu yafumaña mukumwekesha wushona mumudimu wakushimwina.

⁹ Neyi tushimwinaña nsañu yaWanta kudi antu, tukwikala nakukooleka kwakwila “yayiwahi kudi antu ejima.” (Ñal. 6:10) Kutiyila añinza wushona kunakwashi aYinsahu amavulu kudiza madimi acheñi. (1 Kor. 9:23) Munafumi yuma yayiwahi chikupu. Chakutalilahu, muhela Tiffany payiniya wakuAustralia wadizili chiSwahili kulonda yakwashi chipompelu chazatishaña idimi dachiSwahili mumusumba waBrisbane. Hela chakwila kudiza idimi chakalili, ilaña Tiffany wudi namuzañalu muchihandilu chindi. Wahosheli nindi: “Neyi wunakukeña kwikala namuzañalu mumudimu wakushimwina, kalakelaku muchipompelu chazatishaña idimi dacheñi. Chidi neyi kwiji wunayi wanyi kwituña dacheñi.” Mukumona kunuñañana kwekala hakachi kwawamanakwetu mukaayi kejima.

¹⁰ Shinshikenu cheñi chisaka chimu muJapan. Sakiko mwanawu wamumbanda wahosheli nindi: “Muyaaka yamuma 1990, chitwashimwinineña, kakavulu twabulakeneña antu afuma kuBrazil. Neyi tuyitañila nsona muBayibolu yamwidimi dawu daPortuguese, nsona jidi neyi Chimwekeshu 21:3, 4 hela Masamu 37:10, 11, 29, adiña nakutiyilila nakanañachima nawa mpinji yikwawu  awulumwineña madilu.” Ichi chisaka chatwalekelihu kutiyila antu wushona. Sakiko wahosheli cheñi nindi: “Chitwamweni netu awa antu adi nampwila yakukeña kudiza, twatachikili kudiza chiPortuguese.” Kuhiñahu, ichi chisaka chapangili chipompelu chazatishaña idimi daPortuguese. Hadi yaaka yayivulu, ichi chisaka chinakwashi antu amavulu afuma kumatuña acheñi kumwiluka Yehova. Sakiko wabombelelihu nindi: “Kudiza idimi daPortuguese wadiña mudimu weneni, ilaña mwafumini yuma yayiwahi. Twamusakililaña Yehova.”—Tañenu Yilwilu 10:34, 35.

11, 12. (a) Muloñadi chitwatela kuvwala wuntu wawuha? (b) Yumanyi yikutukwasha kwikala adizoza?

¹¹ Yilwilu yetu yakuvwala wuntu wawuha yatela kumulemesha Yehova bayi kutuhamekelahu kudi antuku. Anukenu nenu chileñaleña wawanina wakuspiritu wavulumwini muloña wakudivwimba. (Esekejenu Ezekeli 28:17.) Etu antu akwanshidi chinateli kutukalila kutondolwela kudivwimba hela kudinka wanta. Hela chochu, tunatweshi kuvwala kudizoza. Chumanyi chikutukwasha kwila mwenimu?

¹² Hakwila nawu tudizozi, twatela kwikalaña nampinji yakutoñojkahu chikupu hansañu yitwadizaña Mwizu daNzambi. (Kuhit. 17:18-20) Sweje-e dinu, twatela kutoñojoka hantañishilu yaYesu nichakutalilahu chindi chachiwahi chakuzata nyidimu yakehelamu. (Mat. 20:28) Yesu wawelesheli atumbanji twindi kunyendu. (Yow. 13:12-17) Twatela cheñi kulomba spiritu yaNzambi yitukwashi kulonda tuleki yilwilu yakuditohesha nakudimona neyi twabadika akwetu.—Ñal. 6:3, 4; Fwi. 2:3.

13. Yumanyi yafumaña mukwikala adizoza?

¹³ Tañenu Yishimu 22:4. Akwakudifukula alala ejima atela kwikala adizoza. Mukudizoza mwafumaña yuma yayiwahi. Neyi twikala adizoza chikutukwasha kuleta kuwunda nikunuñañana muchipompelu. Neyi tukutwalekahu kwikala adizoza, Nzambi wukututiyila luwi lwasweja. Kapostolu Petulu wasonekeli nindi: “Wejima wenu dizozenuña kudi wumu namukwawu, muloña Nzambi wadikañaña nawakwakudivwimba, ilaña akwakudizoza wayitiyilaña luwi lwasweja.”—1 Pet. 5:5.

14. Muntwinyi itwatela kwimbujola wamwekesheli kuwunda nikudiwunjika?

¹⁴ Mukanu kaayi kamakonu, antu awunda nawa adiwunjika ayimonaña nawu azeya. Yitoñojoka yamuchidiwu yambukaku chikupu nachalala. Iyi yilwilu yayiwahi yafuma kudi Nleñi wayuma yejima. Yehova Nzambi diyi muntu wawunda nawa wadiwunjika. (2 Pet. 3:9) Shinshikenu chayakwiliyi Abarahama niLoti kuzatisha añelu. (Kutach. 18:22-33; 19:18-21) Cheñi, hadi yaaka yakubadika ha 1, 500, Yehova wanakeneni muza wawaIsarela.—Ezek. 33:11.

15. Yesu wamwekesheli ñahi kuwunda nikudiwunjika?

¹⁵ Yesu wadiña ‘wawunda.’ (Mat. 11:29) Wamwekesheli kudiwunjika hakwiteja kuzeyazeya kwawatumbanji twindi. Hampinji yadiña nakuzatayi mudimu wakushimwina hamaseki, Yesu wamweni yilwilu yatama yamwekesheleñawu akulumpi jansakililu. Hela chochu, wadiña wawunda nawa wadiwunjika kushika nimpinji yamujahiliwu chatama. Hampinji yafwileñayi kufwa kwayeña hamutondu wakuyandishila, Yesu walombeli kudi Tata yindi kwanakena ayilumbu jindi. Wahosheli nindi, “hiyaneluki chuma chinakwilawuku.” (Luka 23:34) Wamwekesheli chikupu kuwunda  nikudiwunjika mumpinji yakala.—Tañenu 1 Petulu 2:21-23.

16. Munjilanyi mutunateli kumwekeshela kuwunda nikudiwunjika?

¹⁶ Tunateli kumwekesha ñahi kuwunda nikudiwunjika? Pawulu wateneni njila yimu hampinji yayisonekeleliyi amanakwindi nindi: “Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu. Neyi chayanakeneniyi Yehova chakufuma kumuchima, ninenu nawa mwatela kwila mwomumu.” (Kol. 3:13) Mwamweni, twatela kwikala awunda nawa adiwunjika hakwila nawu twovwahili ilu lushimbi. Twatela kwanakenaña kulonda twikaleña anuñañana muchipompelu.

17. Kuwunda nikudiwunjika kwalemenadi?

¹⁷ MukwaKristu wejima watela kwikala wawunda nawa wadiwunjika. Kuwunda nikudiwunjika kwalema muloña kwakatukwasha kupuluka. (Mat. 5:5; Yak. 1:21) Sweje-e, iyi yilwilu yatukwashaña kumulemesha Yehova nikukwasha antu amakwawu kulondela kufumba kwamuBayibolu.—Ñal. 6:1; 2 Tim. 2:24, 25.

18. Kukeña kwendelaña ñahi hamu nakubula chaambu?

¹⁸ Yilwilu yejima yitunahanjekihu yendelaña hamu nakukeña. Chakutalilahu, kambanji Yakoba wafumbili amanakwindi muloña akeñeli nankashi antu aheta kubadika atuzweñi. Washimwini nindi yilwilu yamuchidiwu yafumpaña lushimbi lwakwila nawu: “Keñaku mukwenu neyi chiwadikeña eyi aweni.” Wabombelelihu nindi: “Neyi mutwalekahu kumwekesha chaambu, munakuvulumuna.” (Yak. 2:8, 9) Kwambukaku, kukeña kukutukwasha kubula kwikala nachaambu chenzaña muloña wakutaña mashikola nichaambu chekowa. Mwamweni, bayi twikala nachaambuku. Wejima wetu twatela kumwekesha ichi chilwilu chachiwahi chakubula chaambu.

19. Muloñadi chitwatela kuvwala kukeña?

¹⁹ Kukeña “kwadiwunjikaña nawa kwatiyilaña luwi” cheñi “hikwadinkaña wantaku.” (1 Kor. 13:4) Twatela kudiwunjika, kwikala naluwi, kudizoza hakwila nawu tutwalekihu kushimwina nsañu yaWanta kudi antu. (Mat. 28:19) Iyi yilwilu yatukwashaña kudikunda chikupu nawamanakwetu niahela ejima muchipompelu. Yumanyi yafumañamu neyi tumwekesha iku kukeña? Yakwashaña cheñi yipompelu kwikala yanuñañana nawa chumichi chamulemeshaña Yehova nawa chakokolaña antu. Bayibolu yalumbulula hakuvwala wuntu wawuha nawu: “Chabadika hayuma yejimiyi, vwalenu kukeña, muloña dikwanuñañeshaña chikupu antu mumpaanda yimu.”—Kol. 3:14.

20. (a) Malwihwinyi itwatela kudihula, nawa muloñadi? (b) Tunakutalila mpinjinyi?

²⁰ Wejima wetu hamuntu-hamuntu twatela kudihula netu, ‘Yumanyi yikwawu yinatela kwila hakwila nawu nivuuli nikuleka wuntu wawukulu?’ Twatela kutwalekahu kulomba wukwashu waNzambi nikuzata nañovu kuleka yilwilu yinateli kutukañesha kuswana Wanta waNzambi. (Ñal. 5:19-21) Twatela kudihula netu, ‘Komana natwalekihu kubalumuka nakwikala wamuha muyitoñojoka nimuyilwilu?’ (Efwes. 4:23, 24) AkwaKristu ejima atela kutwalekahu kuvwala wuntu wawuha nikwikala nawu mpinji yejima. Fwikijenu chihandilu chichakekala hampinji yakela antu ejima anekali dehi awanina nawa anavwali wuntu wawuha.