1, 2. Yumanyi yamwekeni muFwilipi yaletesheli aPawulu naSilasi ayishi mukaleya? (Talenu mwevulu wakutachikilahu)

AMISHONALI ayedi, aPawulu naSilasi adi mukaleya, mukachi kakeni kakaleya. Nawa himpinji yawufuku mumusumba waFwilipi. Nyendu yawu anayikasili mumpompa, nawa nyima yinakukata nayikoti yinayetiwu. (Yil. 16 :23, 24) Yuma yejimiyi yamwekeni hohu mukulabula kwadisu. Ayikwatili chakubula kwiluka kudi antu amavulu nakuyifumisha kuchisankanu nakuyitwala kuchota. Ayitabwilili yakuvwala yawu nawa ayeteli chikupu natubama. (Yilw. 16:16-22) Ayilili chatama. Pawulu mwenimbu wamuRoma, ateleleli kumwila muniyi njila wanyi. *

² Hampinji yinashakamiyi mumwidima, Pawulu nakutoñojoka yuma yamwekana namwaana. Nakutoñojoka hadi antu amuFwilipi. Muniwu musumba, mwosi sinagogi yawaYudeya neyi chidi nyisumba yikwawu yinendeliyi Pawulu. Nawa akwakudifukula aYudeya anakukeña kudifukula hanji yayiisu yamusumba kwakwihi nakaloña. (Yil. 16:13, 14) Komana muniwu musumba mwosi aYudeya awamayala 10 anateli kulombola sinagogi?  Antu amuFwilipi alemesha nankashi wenimbu wawu wamuRoma hela chakwila muntu dimwasemukilayi wanyi. (Yil. 16:21) Tahindi dichuma chinayileteshi abuli kutoñojoka nawu aPawulu naSilasi hiyenimbu amuRoma? Tuneluki wanyi, ilaña anayili chatama hakuyisha mukaleya.

3. Chumanyi chatela chamuhayamishili Pawulu hampinji yadiñayi mukaleya; ilaña welilidi?

³ Hadaha Pawulu nakutoñojoka cheñi hayuma yikwawu yamumwekeneni tukweji tunafumihu. Wadiña kwishinadi daKaluñalwiji kaAegean muAsia Minor. Hampinji yadiñayi Pawulu kweniku, spiritu yajila yamukaanishileña kushimwina kumaluña amakwawu. Chidi neyi spiritu yajila yamulejeleña kuya kwacheñi. (Yil. 16:6, 7) Yamulejeli kuya kudihi? Ñakwilu yidi muchimwenu chamweniyi hadiñayi kuTirowasi. Pawulu amulejeli nawu: “Zambukilaku kunu kuMasidoniya.” Pawulu wetejeli iwu mutambi kwesekeja nachakeñeliyi Yehova. (Tañenu Yilwilu 16:8-10.) Hanu dinu yumanyi yamwekeni? Chashikiliyi tuhu muMasidoniya, amushili mukaleya. Muloñadi Yehova chetejeleliyi kukala kwamuchidiwu kumumwekeni Pawulu? Mafuku añahi akushakamayi mukaleya? Hela chakwila Pawulu watoñojokeleña hanawa malwihu, watwalekelihu kwikala nachikuhwelelu chakola ninamuzañalu. Yena niSilasi atachikili ‘kulomba nikumulemesha Nzambi natumina.’ (Yil. 16:25) Kuwunda kwaNzambi kwawundishili nyichima niyitoñojoka yawu.

4, 5. (a) Yuma yitwamonaña yinateli kwesekana ñahi nayamweniyi Pawulu? (b) Chihandilu chaPawulu chahimpikili ñahi chakadi kwiluka?

⁴ Kufwana Pawulu, hadaha ninenu mwatiyahu dehi nenu munakulondela chinakuyilombolawu kudi spiritu yajila yaNzambi, ilaña yuma kuzatika kwesekeja nachimwakuhweleleli nehi. Mwadiña mukukala hela yuma yahimpikili chakwila chakeñekeleña kuhimpa chihandilu chenu. (Mukwa. 9:11) Chimwanuka yuma yamwekeni, hadaha mwatoñojokaña nenu muloñadi Yehova chetejeleliyi yina yuma kumwekana? Neyi dichi mwatoñojokaña, yumanyi yinateli kuyikwasha kuumika nakukuhwelela chikupu mudi Yehova? Hakwila nawu tuwani ñakwilu, tuhanjekenu cheñi hansañu yaPawulu naSilasi.

⁵ Hampinji yinakwimbawu aPawulu naSilasi tumina twakushimeka, kunamwekani yuma yinabuli kukuhwelelawu. Kunaholoki mutentanshi weneni. Yenzelu yakukaleya yinenzunuki. Maleñi ejima akasawu atuyili anakasunuki. Pawulu hakumukanisha mukwakuhemba kaleya wunakukeña kudijaha. Mukwakuhemba kaleya niamwitala dindi apapatisheweli. Chikunachi anyuuli hiyakutemesha atupasu kulonda ayifumishi aPawulu naSilasi mukaleya. Anyuuli hiyakuyilembelela nawu afumi musumba mukuwunda. Dichi, anyuuli chinelukiwu nawu aPawulu naSilasi hiyenimbu amuRoma nawa nawu anayikabishi nankashi, enjili nakuyidisha awenawu awa amayala ayedi mumusumba. Ilaña Pawulu naSilasi anakaani anakufwila kushalisha muhelawu Lidiya wapapatishewa katataka. Kubombelahu anazatishi iyi mpinji kulonda akoleshi amanakwawu. (Yil. 16:26-40) Yuma yahimpikili chikupu mukulabula kwadisu.

6. Yumanyi yitukuhanjeka?

⁶ Yumanyi yitwadizilaña kuniyi nsañu? Yehova nateli kwila yuma yitunateli kubula kukuhwelela. Dichi neyi tudi mukukala, bayi twaakamaku. Pawulu watela watoñojokeleña chikupu chamupulwishiliwu. Dihafumini yayisonekeli amanakwindi muFwilipi nindi abuleña kwaakama nawa ekali nakuwunda kwaNzambi. Tuhanjekenu  hamazu aPawulu ekala haAfwilipi 4:6, 7. (Tañenu.) Nawa tukuhanjeka hayakutalilahu yamuNsona yinakumwekesha Yehova cheliliyi yuma yabuliliwu kukuhwelela antu nawu wukuyila. Nkumininaku, tukuhanjeka “kuwunda kwaNzambi” chikunateli kutukwasha kuumika nakumukuhwelela chikupu Yehova.

7. Muloñadi Pawulu chayisonekeleliyi amanakwetu muFwilipi, nawa yumanyi yitunateli kudizilaku?

⁷ Chakadi nikujina amanakwetu muFwilipi chatañiliwu mukanda wayisonekeleliyi Pawulu anukili yuma yamumwekeneni. Nawa kwosi wumu hakachi kawu wakuhweleleli nindi Yehova wukumupulwisha muyina njila. Muloñadi Pawulu chayisonekeleliyi? Wayilejeleña kubula kwaakama. Lombenu kulonda mwikali nakuwunda kwaNzambi. Ilaña ilukenu nenu “kuwunda kwaNzambi kwabadika kwiluka kwejima.” Chumichi chinatalishi mudihi? Akwakubalumuna amakwawu abalumuna awa mazu nawu “kwabadika yafwilañayi muntu” hela “kwabadika yuma yejima yafuukulañayi muntu.” Dichi Pawulu watalishili mukwila nindi “kuwunda kwaNzambi” kwasweja kubadika yuma yidi yejima yitunateli kufwikija. Etu antu tukutwesha wanyi kumona njila yakumanishilamu kukala. Ilaña Yehova yena weluka nawa nateli kwila yuma yitunabuli kukuhwelela.—Tañenu 2 Petulu 2:9.

8, 9. (a) Hela chakwila Pawulu wakabakeni muFwilipi, yumanyi yayiwahi yafuminimu? (b) Muloñadi amanakwetu muFwilipi chiyashililiku maana kumazu aPawulu?

⁸ Amanakwetu muFwilipi atela akoleleliku chiyatoñojokeliwu yuma yamwekeni yaaka 10 yahitilihu. Nsañu yasonekeliyi Pawulu yadiña yalala. Hela chakwila Yehova wetejeli yuma yatama kumwekana, yuma yafuminimu ‘yahakwililiku nikukolesha nsañu yayiwahi kwesekeja nanshimbi.’ (Fwil. 1:7) Awa nyuuli amumusumba ateleleli kutoñojokahu henohu kanda alukuki chipompelu chachiha chawakwaKristu chatuñiliwu mumusumba wawu. Hadaha Pawulu chahosheliyi nindi wadiña mwenimbu wamuRoma dichaletesheli ibwambu dindi Luka, ndotolu yashali muFwilipi chelili aPawulu naSilasi afumimu. Luka wakwashili chikupu akwaKristu amaha amuwuna musumba.

⁹ Mwamweni, amanakwetu amuFwilipi chiyatañileñawu mukanda waPawulu, elukili nawu awa mazu ayisonekeli kudi muntu wudi mukaleya. Pawulu wamweni kukala kwasweja, ilaña wamwekesheli nindi wadiña ‘nakuwunda kwaNzambi.’ Pawulu wadiña mukaleya muRoma hampinji yayisonekeleleñayi amanakwetu. Ilaña watwalekelihu kumwekesha nindi wudi ‘nakuwunda kwaNzambi.’—Fwi. 1:12-14; 4:7, 11, 22.

10, 11. Yumanyi yitwatela kwila neyi tunakwakamena hakukala, nawa yumanyi yitwatela kukuhwelela?

¹⁰ Chumanyi chinateli kutukwasha kubula kusweja kwaakama nikwikala ‘nakuwunda kwaNzambi’? Mumazu ayisonekeleliyi Pawulu akwaFwilipi anakumwekesha nawu kulomba dikunateli kuyikwasha kubula kwaakama. Dichi neyi tunakwakama, twatela kulomba. (Tañenu 1 Petulu 5:6, 7.) Mulombenu Yehova nachikuhwelelu nawa ilukenu nenu wayakamenaña. Lombenu kudi yena “nakusakilila” hayuma yayiwahi yinakuyililayi. Tukusweja kumukuhwelela neyi twiluka netu “nateli kukoña yuma yabadika chikupu yuma yitwamulombaña hela yitwatoñojokaña.”—Efwes. 3:20.

¹¹ Neyi chayikwashiliwu aPawulu naSilasi muFwilipi, ninetu tunateli kuhayama hayuma yatwililañayi Yehova hamuntu-hamuntu. Hanateli kwila yuma muchihayamishaku, ilaña nateli kutukwasha nachitunakukeña.  (1 Kor. 10:13) Ilaña hichinayi mukwila nawu tushakami hohu chakubula kwila yuma yidi yejima nakuhembelela netu Yehova wukumanisha kukala kutunakumonaku. Twatela kwila yuma kwesekeja nachitunakulomba. (Rom. 12:11) Yilwilu yetu yamwekeshaña nawu twashinshika nawa tunakumwilila Yehova yuma yayiwahi. Twatela kwiluka cheñi netu Yehova nateli kutwinka yuma yejima yitunakumulomba, yitunakufuukula niyitunakukeña. Mpinji yikwawu watwililaña yuma yitwabulaña kukuhwelela. Tushinshikenu yakutalilahu yikwawu yamuBayibolu yatukwashaña chikupu kukuhwelela Yehova chelañayi yuma yitunabuli kukuhwelela netu wukwila.

12. (a) Mwanta Hezekiya welilidi chelili amuchinishi kudi Mwanta Senakeribi wawaAshuri? (b) Chumanyi chitwadizilaña kuchamanishiliyi Yehova kukala?

¹² Neyi tusandujolaña muNsona mpinji yejima, tukuwana Yehova cheliliyi yuma yabulili kukuhwelelawu antu. Mwanta Hezekiya wadiñaku hampinji yelili Mwanta Senakeribi wawaAshuri yalukuki Yuda nikutambula nyisumba yejima yampwembu, kushiyahu hohu Yerusalema. (2 Anya. 18:1-3, 13) Nkumininaku Senakeribi wabalumukilili Yerusalema. Hezekiya welilidi chatiyiliyi iyi nsañu? Walombeli kudi Yehova nikulomba wukwashu kudi Isaya kaprofwetu kaYehova. (2 Anya. 19:5, 15-20) Hezekiya wamwekesheli cheñi maana kuhitila mukumufweta Senakeribi yuma yakeñeleñayi. (2 Anya. 18:14, 15) Chimwahitili mpinji, Hezekiya wadiloñesheli.(2 Kushi. 32:2-4) Hanu dinu iku kukala akumanishili ñahi? Yehova watemesheli kañelu kindi nakujaha mashidika aSenakeribi 185,000 muwufuku wumu. Hezekiya yomweni welukili wanyi nindi chuma chamuchidiwu chikumwekana!—2 Anya. 19:35.

13. (a) Yumanyi yitwadizilaña kuyuma yamumwekeneni Yosefu? (b) Chumanyi chamumwekeneni Sara ñoda Abarahama chabulili kukuhwelelayi?

¹³ Toñojokenu hayuma yamumwekeneni Yosefu, mwana kaYakoba. Hampinji yadiñayi mukaleya muEjipitu, komana Yosefu welukili nindi akamutonda kwikala wamuchiyedi kudi mwanta mwituña dejima hela akamuzatisha kudi Yehova kupulwisha chisaka chindi kunzala? (Kutach. 40:15; 41:39-43; 50:20) Yosefu watela welukili wanyi nindi Yehova wukumwilila yuma yamuchidiwu. Toñojokenu cheñi hadi Sara nkaka yatata yindi. Komana Sara wakuhweleleli nindi Yehova wukumwinka mwana iku nashinakaji dehi, chatela amuvwaliliyi kudi ñamba yindi wamumbanda? Yuma yejima yatoñojokeleñayi Sara kutalisha hakuvwalika kwaIsaka yamwekeni wanyi.—Kutach. 21:1-3, 6, 7.

14. Yumanyi yitwatela kukuhwelela hadi Yehova?

¹⁴ Hitwatela kukuhwelela netu Yehova wukumanisha makabi etu muchihayamisha  henohu ituña dadiha kanda dishikiku. Nawa hitwatela kukuhwelela yuma kumwekana muchihayamishaku. Ilaña tweluka netu Nzambi wayikwashili ambuñindi muchihayamisha diyi Nzambi yetu Yehova. (Tañenu Isaya 43:10-13.) Neyi twiluka netu diyi Nzambi yetu, tukumukuhwelela nankashi. Tuneluki netu wukutwinka ñovu yakushikija nkeñelu yindi. (2 Kor. 4:7-9) Yumanyi yitwadizilaña kuniyi nsañu yamuBayibolu? Chayikwashiliyi aHezekiya, Yosefu niSara, chinakumwekesha nawu neyi tutwalekahu kwikala ashinshika kudi Yehova, nateli kutukwasha kushinda yuma yitunakumona netu tukukañanya.

15. Chumanyi chinateli kutukwasha kwikala ‘nakuwunda kwaNzambi’ nawa tunateli kwikala ñahi naku?

¹⁵ Tunateli kwikala ñahi ‘nakuwunda kwaNzambi’ hampinji yitunakumona kukala? Hikutwalekahu kwikala nawubwambu wawuwahi naNzambi yetu Yehova. Tunateli kwikala naniwu wubwambu wamuchidiwu “kuhitila mudi Kristu Yesu” wahanini wumi windi kwikala ifutu danyiloña. Idi ifutu danyiloña damwekeshaña yuma yakuhayamisha yelañayi tata yetu. Yehova wazatishaña ifutu danyiloña kubuta nshidi yetu, kutukwasha kwikala nachinleji chitooka nikuswina kwakwihi nayena.—Yow. 14:6; Yak. 4:8; 1 Pet. 3:21.

16. Yumanyi yikufumamu neyi twikala ‘nakuwunda kwaNzambi’? Lumbululenu.

¹⁶ Yumanyi yafumañamu neyi twikala ‘nakuwunda kwaNzambi kwabadika kwiluka kwejima’? Nsona yakula chiyahosha nawu ‘kwakahemba nyichima yetu niyitoñojoka yetu kuhitila mudi Kristu Yesu.’ (Fwi. 4:7) Izu dadeni dachiGiriki dabalumunawu nawu “kuhemba,” adizatishileña muwushidika. Adizatishileña kutalisha kudi mashidika enkeliwu kuhemba mpwembu yamusumba kushankulu. Musumba waFwilipi wadiña hakachi kanyisumba yahembeleñawu. Antu ashakamineña mumusumba waFwilipi akaamineña chiwahi, muloña elukili nawu mashidika anakuhemba yiisu yamusumba. Munjila yoyimu, neyi tukweti “kuwunda kwaNzambi,” nyichima niyitoñojoka yetu yikwikala mukuwunda. Tuneluki netu Yehova watwakamenaña nawa nakukeña nindi tushakameña chiwahi. (1 Pet. 5:10) Chitweluka netu watwakamenaña, chikutukwasha kukubula kwakama hela kuneña.

17. Yumanyi yikatukwasha kupuluka halukadi lunakwinza?

¹⁷ Katataka antu amoni lukadi lwasweja lwabulahu dehi kumwekana hamaseki. (Mat. 24:21, 22) Tuneluki wanyi yuma yejima yikatumwekena hamuntu-hamuntu. Hela chochu, bayi twaakamaku. Hela chakwila tweluka wanyi yuma yejima yakelayi Yehova, twamwiluka chekalayi Nzambi yetu. Tunamoni chayikwashiliyi antu jindi. Nawa Yehova washikijaña nkeñelu yindi, mpinji yikwawu wayishikijaña munjila yitunabuli kukuhwelela. Mpinji yejima yatwililañayi yuma yitunabuli kukuhwelela kutwilila, twamonaña “kuwunda kwaNzambi kwabadika kwiluka kwejima.”