1. Isaya waprofweteli nindidi kutalisha hadi Yesu, nawa chumichi chinakutukolesha ñahi?

KUHITILA muwuprofwetu windi kutalisha hadi Mwanta wetu Yesu Kristu, Isaya watukolesheli nikutukwasha kuchiñeja. Isaya washimwineñahu dehi nindi Yesu “hakasompesha chakumona kwanamesu hohuku; hakahoshela chakutiya kwanamatu hohuku” ilaña “wakasompesha atuzweñi mwaloña.” (Isa. 11:3, 4) Chumichi chinatukoleshi chikupu muloña tunakushakama mukaayi munenzali chaambu nawa mudi antu asompaña mwaheña. Wejima wetu tunakuhembelela nsompeshi waloña wakabula kusompesha muntu kwesekeja nachinakumwekanayi.

2. Yesu watulejeli nindi twileñadi, nawa tukuhanjekadi muchinu chibaaba?

² Ifuku nifuku twasompeshaña akwetu. Ilaña, chineli hitwawaninaku, hitunateli kusompesha antu mwaloña neyi chatela kusompeshayi Yesuku. Twasompeshaña kwesekeja nachinakumwekanayi muntu. Hela chochu, hampinji yadiñayi Yesu hamaseki, watulejeli nindi: “Lekenu kusompesha kwesekeja nachinakumwekanayi muntu, ilaña sompeshenuña mwaloña.” (Yow. 7:24) Yesu nakukeña nindi twikali neyi yena kulonda tubuleña  kusompesha akwetu kwesekeja nachinakumwekanawu. Muchinu chibaaba, tukuhanjeka yuma yisatu yaleteshaña antu kusompesha kwesekeja nachinakumonawu: chaambu chekowa hela muchidi, maheta niyaaka yikwetiyi muntu. Chitukuhanjekaña haniyi yuma, tukushinshika jinjila mutwatela kwovwahila lushimbi lwaYesu.

3, 4. (a) Yumanyi yamwekeni yaletesheli kapostolu Petulu yaleki kuyimona aJentili neyi chayimweneñayi hakusambila? (Talenu mwevulu wakutachikilahu.) (b) Chumanyi chamudizishiliwu Petulu kudi Yehova?

³ Fwikijenu yuma yadiña nakutoñojokayi kapostolu Petulu hampinji yamulejeliwu kuya kuKesareya kwitala dakaJentili Konelisu. (Yil. 10:17-29) Petulu niakwawu aYudeya adiñaku mumpinji yindi, akuhweleleli nawu aJentili adiña amajilu. Hela chochu, kudi yuma yamuletesheli Petulu yahimpi yitoñojoka yindi. Chakutalilahu, Petulu wamweni chimwenu muchihayamisha. (Yil. 10:9-16) Chumanyi chamweniyi Petulu? Wamweni ihina dazenzumukileña kufuma mwiwulu dadiña nawanyama amajilu. Dichi watiyili izu kufuma mwiwulu nadu: “Petulu, nyamukaku, jahaku wudi!” Petulu wakaanini chikupu kapampa kasatu. Kapampa kejima kakaanineñayi, izu dafumineña mwiwulu nakumuleja nadu: “Lekaku kutena yuma yinatookeshiyi Nzambi neyi yatama.” Chamanini ichi chimwenu, Petulu wakañenyi kwiluka mwatalishili izu datiyiliyi. Hohenohu amayala atemesheliyi Konelisu ashikili. Hanyima yakumulombola kudi spiritu yajila, Petulu wayili hamu nanawa amayala kwitala daKonelisu.

⁴ Neyi Petulu wasompeli kwesekeja nachamweniyi yuma, chiña wayili wanyi kwitala daKonelisu. A Yudeya hiyeñilileña mumatala awaJentiliku. Muloñadi Petulu chayililiyi hela chakwila wadiña nachaambu? Chimwenu chamweniyi nimazu amulejeliwu kudi spiritu yajila dijamuletesheli kuhimpa yitoñojoka yindi. Hanyima yakwila Konelisu namulumbulwili dehi yuma yejima, Petulu wahosheli nindi: “Ichi dinu neluki chikupu nami Nzambi hakweti chaambuku.” (Yil. 10:34, 35) Petulu watiyili kuwaha hakwiluka chuma chabulili kwilukayi, chikakwasha akwaKristu ejima. Indi ichi chimwenu chakubula kwikala nachaambu, chinayikundami ñahi akwaKristu ejima?

5. (a) Yehova wakeñaña nindi akwaKristu ejima eluki chumanyi? (b) Chilwilwinyi chinateli kwikala mudetu hela chakwila tuneluki chalala?

⁵ Kuhitila mudi Petulu, Yehova wakwashileña akwaKristu ejima kwiluka nawu hekala nachaambuku. Weluka nindi kwosi chuma chabadika, hela ikowa, hela muchidi, hela ituña hela chisemwa hela idimiku. Muntu wejima wamutiyaña Nzambi woma nawa welaña mwaloña hela hiyala hela mumbanda yena wamutambwilaña. (Ñal. 3:26-28; Chim. 7:9, 10) Chakubula nikujina, munateli kwiteja nenu dimu. Indi neyi mwakulila mwituña hela muchisaka mwekala chaambu? Munateli kumona neyi mudana chaambu, ilaña mumuchima wenu munateli kwikala chaambu. Petulu wakwashili akwawu kwiluka nawu Yehova wekala nachaambu wanyi, ilaña mukuhita kwampinji wamwekesheli chaambu. (Ñal. 2:11-14) Tunateli kumutiyilila ñahi Yesu nikuleka kusompesha kwesekeja nachinakumwekanayi muntu?

6. (a) Chumanyi chinateli kutukwasha kumanisha chaambu mumuchima wetu? (b) Nsañu yashimwiniyi manakwetu wumu yinakumwekeshadi?

⁶ Twatela kudishinshikaña etu aweni kuhitila mukutaña Izu daNzambi kulonda twiluki neyi tukweti chaambu hela nehi. (Mas. 119:105) Twatela cheñi kutambwilaña wukwashu kudi akwetu anamoni yilwilu yachaambu mudetu  hela chakwila etu aweni tuneluki wanyi netu tudi nachaambu. (Ñal. 2:11, 14) Iyi yilwilu yinateli kwikala mudi etu ilaña tunateli kwiluka wanyi. Shinshikenu chakutalilahu chaeluda wumu watwalili wunsahu wawuwahi kukasanji kamutayi kutalisha hadi adisumbula adiña mumudimu wampinji yejima. Iyala wadiña wakumuchidi wadiwiliwu kudi antu amakwawu. Ilaña iwu manakwetu welukili wanyi nindi niyena wadiña nachaambu kutalisha kuniwu muchidi. Muniyi nsañu, washimwinimu yuma yayiwahi kutalisha hadi iwu manakwetu. Dichi wakunkulwili nindi: “Hela chakwila wafuma [kuniwu muchidi], yilwilu nichihandilu chindi yinakwashi antu kwiluka nawu, [kufuma kuniwu muchidi] hichatalisha mukwila nawu wudi namajilu, wekala nachihandilu chabula kutelela neyi chayimonañawu kudi antu amakwawuku.” Yumanyi yitunadiziliku? Hela chakwila tudi nanyidimu yayivulu mukuloñesha kwaYehova, twatela kudishinshikaña nikwiteja neyi anatukwashi hakwila nawu tumoni yilwilu yitukweti yinateli kuleta chaambu. Chumanyi chikwawu chitwatela kwila?

7. Tunateli kumwekesha ñahi netu tudi nakukeña?

⁷ Neyi twikala nakukeña, hitukwikala nachaambuku. (2 Kor. 6:11-13) Komana mwekala nachaaku chakudikunda hohu nawantu ekowa denu, chisemwa, ituña hela ahoshaña idimi denu? Neyi dimu, tachikenu kudikunda nawantu ejima. Kwila mutambikaku antu afuma kuyitachi yacheñi kuzata nenu mumudimu wakushimwina hela kuyitambika kwitala denu kulonda mudiili hamu nawu yakuda nehi? (Yil. 16:14, 15) Neyi mwila mwenimu, mukudikeña chikupu wumu namukwawu chakwila himukwikalaña nachaambuku. Ilaña kudi cheñi chuma chikwawu chaleteshaña tusompesheña antu kwesekeja nachinakumwekanawu. Tushinshikenu hamaheta.

8. Kwesekeja na ALevi 19:15, maheta hela wuzweñi jinateli kuluwañesha ñahi chitwamonaña antu?

⁸ Maheta hichuma chikwawu chinateli kutuletesha tuyimoneña antu munjila yambukaku. Alevi 19:15 yahosha nawu: “Kumwakama kazweñi, nanochu chadiyi kazweñi hela muneni, kumulemesha nanochu chadiyi muneni chinjila; chiña wakasompeshaña mukwenu mwaloña hohu.” Hanu dinu, maheta hela wuzweñi jinateli kutuletesha ñahi kumumona muntu munjila yambukaku?

9. Nsañwinyi yasonekeliyi Solomoni, nawa yinakutudizishadi?

⁹ Spiritu yajila yamukwashili Solomoni kusoneka yuma yelañawu antu abula kuwanina. Wahosheli haYishimu 14:20 nindi: “Kazweñi amuhelaña nikudi mukwawu atuñayi nindi; ilaña mukwakuheta wukweti amabwambu amavulu.” Ichi chishimu chinakutudizishadi? Neyi kubabala nehi, tunateli kutachika kudikunda hohu nawamanakwetu aheta nakutondolwela atuzweñi. Muloñadi chichatamina kulemesha antu kwesekeja namaheta akwetiwu?

10. Kukalanyi kwamweniyi Yakoba kwadiña muyipompelu yamumafuku awapostolu?

¹⁰ Neyi tusompeshaña antu kwesekeja nayuma yikwetiwu, tukuleta chaambu muchipompelu. Kambanji Yakoba wasoñamishili nindi iku kukala kwambwileña yipompelu yamumafuku awapostolu. (Tañenu Yakoba 2:1-4) Bayi twiteja chaambu chiluwañeshi yipompelu yetuku. Tunateli kutondolwela ñahi kusompesha kwesekeja nachinakumwekanayi muntu?

11. Neyi muntu hikazweñi hela wukweti maheta, komana chinayi mukwila nawu hakeñila wanyi muWanta waNzambi? Lumbululenu.

¹¹ Twatela kuyimonaña amanakwetu neyi chayimonañayi Yehova. Muntu halema kumesu aYehova muloña wamaheta hela  wuzweñiku. Bayi neyi wubwambu wetu naYehova washindamena hakuvula kwamaheta itukweti hela hawuzweñi wetuku. Hela chakwila Yesu wahosheli nindi “chakamukalila samaheta kwiñila muWanta wamwiwulu,” ilaña wahosheli wanyi nindi wakakañanya kwiñila. (Mat. 19:23) Yesu wahosheli cheñi nindi: “Enu atuzweñi mudi namuzañalu, muloña Wanta waNzambi wenu.” (Luka 6:20) Ilaña ichi hichatalisha mukwila nawu atuzweñi ejima ayikiswililiku. Nawa hiyalondeleleña yuma yatañishileñayi Yesuku. Atuzweñi amavulu atiyilili wanyi kunsañu yindi. Ilaña chikuma chidi chakwila nawu, hitwatela kusompeshaña wubwambu wukwetiyi muntu naYehova muloña wamaheta akwetiyiku.

12. Nsona yayisoñamishaña nawudi antu aheta niatuzweñi?

¹² Tukweti amanakwetu niahela aheta niatuzweñi amukalakelaña Yehova namuchima wawu wejima. Nsona yalejaña antu aheta nawu bayi “[akuhwelelaña] mumaheta anoñañaku, ilaña akuhweleleña mudi Nzambi.” (Tañenu 1 Timotewu 6:17-19) Cheñi, Izu daNzambi dasoñamishaña antu jaNzambi ejima, aheta niatuzweñi kubula kusweja kukeña mali. (1 Tim. 6:9, 10) Dichi, neyi tuyimonaña amanakwetu neyi chayimonañayi Yehova, hitukuyisompeshaña kushindamena hamaheta akwetiwu hela hawuzweñi wawuku. Indi kwesekeja nayaaka yikwetiyi muntu? Komana twatela kuyisompeshelahu? Tushinshikenu.

13. Nsona yatudizishaña nawudi kutalisha hakulemesha akulumpi?

¹³ Nsona yatulejaña nawu tulemesheña akulumpi. Alevi 19:32 yahosha nawu: “Neyi kukwinza muntu wukweti mutu wanvu wakanyamukaña wakalemeshaña ipala kumesu indi, wakamwakamaña Nzambi.” Yishimu 16:31 niyena yatufumbaña nawu “mutu wanvu hichibañula chalubanji neyi akuwuwana munjila yakuloña.” Pawulu niyena wamulejeli Timotewu kubula kuzuwila mukulumpi weyala, ilaña watela kumumona manakwindi wamukulumpi neyi tata yindi. (1 Tim. 5:1, 2) Hela chakwila Timotewu wadiña nawuswa hadi awa amanakwindi, wateleleli kuyitiyila wushona nikuyilemesha.

14. Mpinjinyi yatelela yitunateli kufumba hela kuzuwila muntu wunatubadiki yaaka?

¹⁴ Hanu dinu, tunateli kuzatisha ñahi ichi chishina? Chakutalilahu, komana twatela kumutiya mukulumpi woma neyi nakukoña nshidi hela nakwila yuma yamuneñeshaña Yehova? Yehova hakasompesha kwesekeja nachinakumwekanayi muntuku nawa hakaleka muntu wunakukoña nshidi muloña wakukulaku. HaIsaya 65:20 hekala chishina chakwila nawu: ‘Mukwanshidi wakashiñewa hela chakwila nashiki dehi munyaka nkulakaji.’ Chishina chamuchidiwu achilumbulula cheñi muchimwenu chaEzekeli. (Ezek. 9:5-7) Chikuma chidi chakwila nawu mpinji yejima twatela kulemesha Muntu Wakunyaka nanyaka, Yehova Nzambi. (Dan. 7:9, 10, 13, 14) Neyi twila mwenimu, tukutiyaña woma wanyi kufumba muntu wunaluwañeshi hichikweti muloña nayaaka yikwetiyiku.—Ñal. 6:1.

15. Chumanyi chitunadizili kudi kapostolu Pawulu kutalisha hakulemesha amanakwetu atwansi?

¹⁵ Indi amanakwetu atwansi adi muchipompelu, mwayimonaña ñahi? Kapostolu Pawulu wamusonekeleli kansi Timotewu nindi: “Bayi witeja muntu hela wumu yadiwuli wukwenzi weyiku. Ilaña, ikalaku wakutalilahu munhoshelu, muyilwilu, mukukeña, muchikuhwelelu nimukudihemba kudi antu ashinshika.” (1 Tim. 4:12) Hampinji yasonekeliyi Pawulu awa mazu, hadaha Timotewu  wadiña hohu nayaaka yamuma 30. Haniyi mpinji, Pawulu wamwinkeli nyidimu yalema. Chikuma chidi chakwila nawu, bayi tusompeshaña amanakwetu atwansi kushindamena hayaaka yikwetiwuku. Twatela kwanuka netu niMwanta wetu Yesu wazatili mudimu windi wakushimwina hamaseki hampinji yadiñayi nayaaka yamuma 30.

16, 17. (a) Aeluda anateli kwiluka ñahi neyi manakwetu nashikihu kwikala nkoñi wakuzatila hela eluda? (b) Chisemwa hela chimwamonaña muntu jinateli kwambuka ñahi naNsona?

¹⁶ Hadaha twafuma kuchisemwa chabulaña kulemesha atwansi awamayala. Neyi dimu, aeluda muchipompelu anateli kushintajala kuhameka manakwetu wakansi wunashikihu kwikala nkoñi wakuzatila hela eluda. Aeluda atela kwanukaña nawu Nsona hiyashimunahu yaaka yinateli kumutondelahu muntu kwikala nkoñi wakuzatila hela eludaku. (1 Tim. 3:1-10, 12, 13; Tit. 1:5-9) Neyi eluda yaleta nshimbi yinashindameni hachisemwa, dikwila nawu nakulondela chahosha Nsona wanyi. Atwansi awamayala atela kuyishinshika bayi kwesekeja nachinakumwekanawu hela kulondela chisemwaku, ilaña atela kuyishinshika kuzatisha Izu daNzambi.—2 Tim. 3:16, 17.

¹⁷ Shinshikenu nshimbi yachisemwa chiyinateli kukañesha amanakwetu anashikihu kuyitonda. Mwituña dimu, manakwetu nkoñi wakuzatila washikahu amwinkeli nyidimu yalema. Hela chakwila aeluda amuchipompelu mwadiñayi etejeli nawu nashikiji yuma yamuNsona yakeñekaña kwikala eluda, ilaña amuhamekeli wanyi kulonda amutondi. Aeluda amakwawu awakulumpi akaanini nawu manakwetu wuchidi kwila yekala eluda nehi. Chawushona, iwu manakwetu amutondeli wanyi muloña wayaaka yadiñayi nayu. Ichi hichakutalilahu chimu hohu, ilaña chileji chinakumwekesha nawu iyi yitoñojoka yinaluwañeshi antu amavulu muyipompelu mukaayi kejima. Mpinji yejima twatela kushindamenaña haNsona chatela tushindameneña hachisemwa hela hamaana awuntu. Diyi njila mutunateli kumwovwahila Yesu nikuleka kusompesha kwesekeja nachinakumwekanayi muntu.

18, 19. Yumanyi yakeñekaña hakwila nawu tuyimoneña antu neyi chayimonañayi Yehova?

¹⁸ Hela chakwila twawanina wanyi, tunateli kumona antu neyi chayimonañayi Yehova. (Yil. 10:34, 35) Ilaña chakeñekaña kuzata nañovu nikuzatisha yuma yitwadizaña Mwizu daNzambi. Neyi tuzatishaña iku kufumba, tukwovwahilaña lushimbi lwaYesu lwakuleka kusompesha kwesekeja nachinakumwekanayi muntu.—Yow. 7:24.

¹⁹ Katataka ichi Mwanta wetu Yesu Kristu yasompeshi antu ejima, bayi chakumona kwanamesu hela chakutiya kwanamatuku, ilaña wakasompesha mwaloña. (Isa. 11:3, 4) Twakatiya kuwaha chikupu!