“TATA,” “PAPA,” “MANDUMI.” Dichavula kuntambikawu atwansi amavulu haBeteli. Chineli nakuli nawa nidi nayaaka 89, natiyaña kuwaha chantambikañawu. Chumichi chantiyishaña kuwaha nawa natoñojokaña nami hichawaana chakufuma kudi Yehova hakumuzatila hadi yaaka 72 mumudimu wampinji yejima. Kwesekeja nayuma yinnakumona mumudimu waNzambi, nayilejaña awa atwansi chakufuma hamuchima nami: ‘Mwakatambwila wuloku hamudimu wenu, neyi makasenu abula kuzeya.’—2 Kushi. 15:7.

Anvwali jami abuukili kufuma kuUkraine nakuya kuCanada. Ashakamineña mumusumba waRossburn wekala munkambi yaManitoba. Twasemukili anyana 16, amayala 8 ambanda 8, iyami wamu 14. Atata adiña akeña Bayibolu, adiña nakututañisha hamulungu nantetemena. Ilaña amweneña nsakililu nawu hinjila mwakuwanina mali nawa mpinji yejima ahosheleña nawu: “Anyi amufweteleña Yesu hamudimu wakushimwina niwakutañisha wazatileñayi?”

Nkumininaku, anakwami 8 adizili chalala, amayala awana niambanda awana. Muhelami Rose wadiña payiniya kushika nimpinji yafwiliyi. Chelili yashiki kwakwihi nakufwa, wakolesheleña antu ejima kutiyilila Izu daNzambi nakuyileja nindi: “Inakukeña tukadimoni mwituña dadiha.” Hakusambila, yayami Ted wadiña wakuhwelela mukesi kahelu. Hamulungu-hamulungu nantetemena, wadiña nakutañisha hachisanji nakuyishinjila antu adiña nakumutiyilila nikuyileja nindi akwanshidi akayocha mukesi kahelu haya nyaaka. Nkumininaku, wekalili kambuña aYehova washinshika nawa wadikita.

Ifuku dimu muJune 1944, hinafumini kushikola, nawanini mukanda wadiña namutu nawu The Coming World Regeneration * hamesa yakudila. Chinatañili mafu ayedi aniwu mukanda, nkumininaku, nawutañili wejima. Chinawumanishili, nafuukwilihu kumukalakela Yehova neyi cheliliyi Yesu.

Nehwili nami iwu mukanda wunafumi kudihi? Yayami Steve wahosheli nindi hetala henza amayala ayedi alandishaña nyikanda. Wabombelelihu nindi “Nalanda iwu mukanda muloña  awulandishaña hohu na 5 cents.” Hamulungu wahiñilihu, ana amayala afuntili cheñi. Atulejeli nawu adiña aYinsahu jaYehova nawa akwileña malwihu ayihwileñawu kudi antu kuzatisha Bayibolu. Twatiyili kuwaha muloña anvwali jetu atudizishili kulemesha Izu daNzambi. Awa amayala ayedi atulejeli nawu aYinsahu akwikala nakupompa kweneni muWinnipeg, kumusumba kwashakamineña muhelami Elsie. Nafuukwilihu kuya nakupompa.

Nendeli nankinga lwendu lwamakilomita 320 hakwila nawu nishiki kuWinnipeg, ilaña nanookeleli mutawuni yaKelwood mwadiña nakushakama aYinsahu ayedi enjili hetala detu. Hampinji yinadiña nakunooka, nayili nakupompa nawa nelukili mwatalisha chipompelu. Cheñi, nelukili nami muntu wejima iyala, mumbanda hela kansi watela kuya nakushimwina kwitala nikwitala neyi chelileñayi Yesu.

Twadiwanini nayayami Jack muWinnipeg, wenjili nakupompa kufuma kukabeta kaluwunda kaOntario. Ifuku datachi hakupompa, manakwetu wabidikili nindi kukwikala chipapatishu. Ami niyayami Jack twapapatisheweli. Wejima wetu twafuukwilihu kutachika wupayiniya hanyima yakupapatishewa. Yayami Jack watachikili wupayiniya hanyima yakufuma kukupompa. Nadiña nayaaka 16 nawa nafuntili kushikola, ilaña chaaka chahiñilihu natachikili wupayiniya wampinji yejima.

Ami niStan Nicolson twatachikili wupayiniya muSouris musumba wekala munkambi yaManitoba. Nelukili nami mpinji yikwawu wupayiniya wakalileña. Mali itwadiña nawu amanineña chovu-chovu, hela chochu twatwalekelihu kuzata. Ifuku dimu hitwafumini nakushimwina twafwili nzala chikupu nawa hitwadiña namaliku. Ilaña chitwashikili hetala, twawanini mufuku wayakuda hachisu. Kushika nikulelu, tweluka wanyi waleteli iwu mufuku. Haniwu wufuku twadiili chiwahi. Mwafumini yuma yayiwahi muloña wakubula kuzeyesha makasa etu. Munaka kakweji, natoheli chikupu kubadika chinadiña kunyima.

Chimwahitili tukweji twantesha, atwitumini kuya nakuzatila kumusumba waGilbert Plains hekala makilomita 240 kufuma kukabeta kakuchimunswa kaSouris. Muniyi yaaka, yipompelu yadiña namachati amaneni amwekesheleña chinakwenda mudimu wakushimwina muchipompelu kakweji nikakweji. Chelili lipoti yamudimu wakushimwina yifunti mwishina kakweji kamu, nahanini mpanji yakuyikolesha amanakwetu niahela nami ateleli kuzata nañovu. Hanyima yakupompa, muhela payiniya wakula dehi wukweti nfumwindi wabula kwikala chinsahu wenjili iku nakudila, wahosheli nindi: “Nesekeli, ilaña dihakuminini ñovu jami.” Ninami nadilili nawa nadanakeneni.

Neyi chichammwekeneni, amanakwetu atwansi akweti ñovu niwena anateli kuluwañesha, kuhiñahu akutiya kutama nachiluwa chinakoñuwu. Nadizi nami, chatela nizeyeshi makasa ami, natela kudizila kuchiluwa hampinji yoyimu nikuzatilahu. Cheñi nadizi nami kuzata nakashinshi mwafumaña yuma yayiwahi.

Hinadiña nayaaka 21, nadiña nakukooleka kwakuya kuShikola yaGileyadi yanamba 14 yitwamanishili muFebruary 1950. Akwetu amavulu innadiña nawu mushikola ayitemesheli munkambi yaQuebec kuCanada, kuyahoshañawu idimi daFrench. Kunidi iluña akwansakililu adiña nakuyikabisha aYinsahu nankashi. Ami antemesheli kuVal-d’Or musumba mwekala mugoti wawuru kushika nikukabeta kakuchimunswa. Ifuku dimu, ami niakwetu mutwadiñileña twayili nakushimwina kwakwihi namukala waVal-Senneville. Kapristu wamunidi iluña watutiyishili woma nindi neyi tubuli kufuma kunidi iluña akutweta. Nayili nakushimuna kuchota chanyiloña hanyima yakutwitiyisha woma nawa iwu kapristu amwinkeli muloña. *

Iyi nsañu ninsañu yikwawu yaleteleña kukala  muQuebec. Nkambi yaQuebec ayiyuulili kudi chechi yaRoman Catholic yaaka kubadika 300. A Yinsahu jaYehova adiña nakuyikabisha kudi akulumpi jaKatolika niakwamapolitiki. Yadiña mpinji yakala chikupu nawa twadiña antesha, ilaña hitwazeyesheli makasa etuku. Antu akweti nyichima yayovu muQuebec etejeli kudiza chalala. Nadizishili antu amavulu etejeli chalala. Kadizi wami wumu wadiña nawanyana 10 nawa chisaka chindi chejima chatachikili kumukalakela Yehova. Kuhamuka kwawu kwaletesheli antu amakwawu kufuma muChechi yaKatolika. Twatwalekelihu kushimwina nawa mukuhita kwampinji twashindili kuna kukala.

Mu 1956, antumini kuya nakukalakela kuHaiti. Amishonali amavulu ayili kunidi iluña, akañenyeña kudiza French, ilaña antu adiña nakutiya. Manakwetu mishonali Stanley Boggus wahosheli nindi: “Twatiyili kuwaha hakumona chazatileñawu antu nañovu hakutukwasha kudiza French.” Hakusambila chankalili wanyi muloña nadizili French muQuebec. Ilaña amanakwetu amavulu amunidi ituña adiña hohu nakuhosha idimi daHaitian Creole. Hakwila etu amishonali tuzati chiwahi, twateleleli kudiza idimi dahosheleñawu munidi ituña. Twadizili nawa twazatili chiwahi.

Hakwila nawu tuyikwashi amanakwetu cheñi, atwitejeli kudi Izanvu Dalombolaña kubalumuna Kaposhi Kakutalila ninyikanda yikwawu mwidimi daHaitian Creole. Antu enjileña kukupompa avulilileñaku mukunyakashana mwituña dejima. Mu 1950, muHaiti mwadiña hohu akwakushimwina 99, ilaña mu 1960, namba yawakwakushimwina yabadikili ha 800. Haniyi mpinji, nazatilileña haBeteli. Mu 1961, nalombweliku muShikola yaMudimu waWanta. Twadizishili aeluda 40 niapayiniya adimena. MuJanuary 1962, hakupompa kweneni, twakolesheliku amanakwetu ashikahu amunidi iluña kudikita nankashi mumudimu wakushimwina nawa amakwawu ayitondeli kwikala apayiniya adimena. Twayikwashili hampinji yatelela muloña ikañesha daswejeli.

HaJanuary 23, 1962, hanyima yakupompa kweneni, mishonali Andrew D’Amico ninami atukasili hakasanji kamutayi nawa atutambwili maAwake  aJanuary 8, 1962, amwidimi (daFrench). MuAwake asonekelimu mazu afumini muyipapilu yansañu yaFrench nawu antu muHaiti adiña navoodoo (hela apanda.) Iyi nsañu yayitiyishili antu amavulu kutama nawa adiña nakuhosha nawu ichi chibaaba munachisonekeli hakasanji. Chimwahitili nyilungu yantesha, amishonali ayihañili mwituña. * Ilaña amanakwetu amunidi ituña itwadizishili atwalekelihu kuzata mudimu. Makonu, natiyaña kuwaha muloña wakuumika kwamwekesheliwu nichakoleli chikuhwelelu chawu. Chayinu mpinji adi naBayibolu yaNew World Translation of the Holy Scriptures mwidimi daHaitian Creole, chuma chitwadiña nakutoñojokahu chikupu.

Hanyima yakukalakela muHaiti, antemesheli kuya nakuzatila wumishonali muCentral African Republic. Nkumininaku, nekalili nkoñi wendaña nawa kuhiñahu nekalili cheñi nkoñi wamutayi.

Munana mafuku, Matala aWanta amavulu adiña alumbuluka wanyi. Haniyi mpinji nadizili kukesa matahu nikwambila. Antu ahitileña ahayamineña hakumona chinazatileña iyi nyidimu. Muloña wachumichi, amanakwetu amavulu niwena atachikili kutuña nikuwahisha Matala awu aWanta. Akulumpi jansakililu adiña nakutuseha muloña machechi awu adiña namalata ilaña etu nehi. Hela chochu, twatwalekelihu kuzatisha Matala etu aWanta akwambila namatahu. Alekeli kutuseha chelili mpepela yeneni yihiti mumusumba weneni waBangui. Mpepela yanyamwini tumalata hachechi yawu nakutunatila mumukwakwa. Ilaña matahu itwambilili Hetala daWanta ayinyamwini wanyi. Hakwila nawu tuzati chiwahi mudimu waWanta, twatuñili kasanji kamutayi nimatala awamishonali hadi tukweji tutanu hohu. *

Mu 1976, mudimu waWanta awulekesheli muCentral African Republic, dichi antumini kuya nakuzatila muN’Djamena musumba weneni muChad. Twadiwanini naHappy, payiniya wadikita wafuma kuCameroon. Twadisumbwili haApril 1, 1978. Mukakweji kokamu, munidi iluña mwavulumukili njita nawa twatemukilili kukabeta kambwela ketuña neyi chelili akwetu amavulu. Chamanini njita twafuntili, ilaña twawanini itala detu dinekali dehi kasanji keneni kawamashidika. Asendeli dilesi yaHappy yakuvwala hakudisumbula, nyikanda yetu niyawaana yatwinkeliwu hitwadisumbwileña. Ilaña twazeyesheli makasa etu wanyi. Twadikolesheleña nawa twatwalekelihu kutalila nyidimu yikwawu.

Chimwahitili yaaka kwakwihi nayiyedi, mudimu wetu muCentral African Republic awitejeli cheñi. Twafuntili nawa twatachikili cheñi kukalakala mudimu wakwenda. Twadiña nakukaama mumotaka, mwadiña kadidi kakuvuña, dilamu yeñijileña malita amenji 200, fuliji nisitovu. Chatukalilileña kwenda. Mpinji yimu yitwadiña halwendu, atwimikili kapampa kakavulu kudi atupokola.

Kakavulu kwatatileña nankashi. Mpinji yikwawu hakupompa, chatukalilileña kuwana menji akupapatishamu antu. Dichi amanakwetu adiña nakwimba mutuloña mwoma dehi kulonda awani menji akuzatisha hakupapatisha antu, kakavulu ayipapatishileña mudilamu.

Mu 1980 atwitumini kuNigeria. Dichi, hadi yaaka yiyedi nachikunku, twazatiliku mudimu wakutuña kasanji kamutayi. Amanakwetu alandili itala ditwahumwini kulonda tutuñilihu kasanji kamutayi. Ifuku dimu nantetemena, nakandamini hewulu nakuyikwashaku amanakwetu kuhumuna itala. Chashikili namwana, natachikili kusuluka. Chinasulukileña, naposomokeli nakuholoka hamaseki. Nadikatishili chikupu, ilaña champiminiwu, ndotolu wamulejeli ñodami  Happy nindi: “Kwakama nehi. Muntulu hohu dimunamukati ilaña neyi munahiti dehi mulungu wumu wukwikala hohu Chiwahi.”

Mu 1986, twayili nakukalakela mudimu wakwenda kuCôte d’Ivoire. Twayili cheñi nakuzatila kuBurkina Faso. Hinatoñojokeleñahu nami nikashakamahu muBurkina Fasoku.

Nafumini muCanada mu 1956, ilaña mu 2003, hanyima yakwila munahiti yaaka 47, nafuntili cheñi kuCanada muBeteli hamu nañodami Happy. Yipapilu yamwekesheleña nawu tudi enimbu amuCanada, ilaña twadiña akwaAfrica.

Chinashikijili yaaka 79 mu 2007, twafuntili cheña kuAfrica. Atwitumini kuBurkina Faso kunekalili membala wamuKometi yaMwituña. Kasanji kamutayi akilishili kwikala kasanji kakubalumwinahu nyikanda kadiña mumakasa aBeteli yamu Benin. MuAugust 2013, atwitumini kuya nakuzatila haBeteli yamu Benin.

Hela chakwila nakuli dehi, nakeña mudimu wakushimwina. Yaaka yisatu yinahituhu, nawukwashi wawamanakwetu niñodami, natiyili kuwaha hakumona atudizi ami ayedi Gédéon niFrégis nakupapatishewa. Anakumukalakela Yehova chikupu.

Chimwahitili mpinji, ami niñodami atwitumini kukasanji kamutayi kakuSouth Africa. Chisaka chaBeteli chañakamenaña chikupu kumujimba. Nazatili mumatuña 7 amuAfrica, nawa South Africa didu ituña damu 7 dinnazatilimu. Nkumininaku, muOctober 2017, atutambikili kuya nakushinkula kasanji keneni kakuWarwick, muNew York. Chuma chitukabula kuvulamena!

Yearbook ya 1994 hefu 255, yahosheli nawu: “Kudi ejima anomiki mudimu hadi yaaka yayivulu, tunakuyikolesha netu: ‘Makasenu bayi azeyaku, muloña mudimu wenu wakutambwila wuloku.’—2 Kushi. 15:7.” Ami niñodami Happy tukutwalekahu kulondela iku kufumba nikukolesha amakwawu kwila momumu.