1. Munjilanyi mutunateli kukalakela hamu naYehova?

NLEÑI wakeñeleña nindi antu awanina akazatileña hamu nindi hakushikija nkeñelu yindi. Hela chakwila antu makonu hiyawaninaku, antu ashinshika anateli kuzatila hamu naYehova mafuku ejima. Chakutalilahu, twekalaña “akwakukalakala hamu naNzambi” kuhitila mukushimwina nsañu yayiwahi yaWanta windi nikwilisha atumbanji. (1 Kor. 3:5-9) Tukweti kukooleka chikupu kwakukalakela hamu naNleñi wabadika ñovu mumudimu walema! Hela chochu, bayi neyi tunateli hohu kukalakela hamu naYehova kuhitila mukushimwina nikwilisha atumbanjiku. Achinu chibaaba chikushimuna njila jikwawu mutunateli kukalakela hamu naNzambi, kuhitila mukukwasha amwitala detu, akwetu akwakudifukula, kumwekesha chisambu, kudihana kukalakalaku nyidimu yaWanta yakutuña nikudikita chikupu munyidimu yaYehova yikwawu.—Kol. 3:23.

2. Muloñadi chichatamina kwesekeja chimunateli kumukalakela Yehova nachinateli kumukalakelawu amakwawu?

² Chitukudizaña achinu chibaaba, bayi mwesekejaña chimunateli kumukalakela Yehova nachinateli kumukalakelawu amakwawuku. Mwatela kwanukaña nenu antu ejima ambuka muyaaka, kukoola kumujimba, chihandilu niwuswa wukwetiwu. Kapostolu Pawulu  amwoneneni kusoneka nawu: “Muntu-himuntu, yashinshiki chekala yilwilu yindi yomweni, kuhiñahu dinu yazañaleli muyuma yindi yomweni, bayi kudesekeja namukwawuku.”—Ñal. 6:4.

3. Tukuhosheladi netu neyi muntu nakwakamena amwitala dindi nakukalakela hamu naNzambi?

³ Yehova wakeñaña ambuñindi kwakamena amwitala dawu. Chakutalilahu, mwatela kuzata kulonda mukwashi antaña jenu kumujimba. Anvwali awambanda amavulu ashakamaña hamatala kulonda ahembeña ankemba. Nawa anyana akula dehi anateli kwakamena anvwali jawu ayifwayi. Iyi nyidimu yalema. Izu daNzambi dashimuna nawu: “Neyi muntu wakañanyaña kuyinka antu ahembañayi yuma yakeñekaña, sweje-e dinu amwitala dindi yomweni, dikwila nawu muntu wamuchidiwu nakaani chikuhwelelu nawa watama kubadika muntu wabula kukuhwelela.” (1 Tim. 5:8) Neyi mukweti iyi nyidimu, mpinji yikwawu munateli kutoñojoka nenu mukutwesha wanyi kukalakala nyidimu yaWanta neyi chimunakufwila. Ilaña bayi muzeyaku. Yehova watiyaña kuwaha neyi mukeñelaña chisaka chenu yuma yakeñekaña.—1 Kor. 10:31.

4. Anvwali anateli kutwamijaku ñahi nyidimu yaWanta kubadika yuma yakeñañawu, nawa yumanyi yafumañamu?

⁴ Anvwali akwaKristu akalakelaña hamu naYehova neyi akwashaña anyanawu kuzata nyidimu yaYehova. Anvwali amavulu dichinakwilawu. Nawa anyanawu amavulu eñila mumudimu wampinji yejima nawa akalakelaña kwakulehi nanyikala yawu. Amakwawu hiyamishonali, amakwawu hiyapayiniya akalakelaña kudi kukaankila kwawakwakushimwina nawa amakwawu akalakelaña haBeteli. Muloña wakuleha kwamaluña kwakalakelañawu, hiyadikundaña nayisaka yawu neyi chadikundileñawu hakusambilaku. Hela chochu, anvwali adihana ayikoleshaña anyanawu kutwalekahu kuumika mumudimu wawu. Muloñadi? Muloña azañalalaña chikupu hakwiluka nawu anyanawu anakutwamijaku Wanta. (3 Yow. 4) Hadaha anvwali amavulu atoñojokaña neyi chatoñojokeleñayi Hana, wahosheli nindi ‘namwinki’ Yehova mwanindi Samweli. Awa anvwali eluka nawu hikukooleka chikupu kukalakela hamu naYehova. Hiyakeñaña yuma yacheñiku.—1 Sam. 1:28.

5. Munateli kukwasha ñahi antu amuchipompelu chenu? (Talenu mwevulu wakutachikilahu.)

⁵ Neyi mudana chisaka chakwakamena, kwila mukwashaku akwenu akwakudifukula akamenaña yisaka, antu akata, akula dehi hela adi mukukaankila nehi? Kwila mukwashaku antu amakwawu amuchipompelu chenu anakukeñeka wukwashu nehi? Hadaha munateli kuya nakuhanjeka nanvwali wakula dehi ahembañawu kudi muhela mukwaKristu kulonda iwu muhela yawaniku mpinji yakuzata nyidimu yikwawu. Hadaha munateli kukwashaku antu adi mukukaankila kuhitila mukuyitwala kukupompa, nakulanda yuma kuchisankanu, hela kuya nakuhempula antu akata kuchipatela. Neyi mwilaña mwenimu, mukukalakelaña hamu naYehova kulonda yakuli kulomba.—Tañenu 1 Akorinda 10:24.

6. Mukumwekesha chisambu mwabombeladi?

⁶ Antu akalakelaña hamu naNzambi ayilukilaña kuchisambu. MuNsona jawakwaKristu jachiGiriki, izu dabalumunawu nawu “chisambu” dalumbuluka nawu ‘kutiyila enyi luwi.’ (Heb. 13:2; tth.) Izu daNzambi dashimuna nsañu yatukwashaña kumwekesha kukeña. (Kutach. 18:1-5) Twatela kuwanañaku mpinji yakukwasha antu amakwawu mpinji yejima,  hela “akwetu akwakwitiya” hela abula kwitiya.—Ñal. 6:10.

7. Muloñadi chimwatelela kumwekesha chisambu kudi antu adi mumudimu wampinji yejima?

⁷ Kwila mukalakela hamu naNzambi kuhitila mukumwekesha chisambu, kuya nakuyihempula antu ashinshika adi mumudimu wampinji yejima nehi? (Tañenu 3 Yowanu 5, 8.) Mpinji yamuchidiwu yatukwashaña ‘kudikolesha muntu-himuntu.’ (Rom. 1:11, 12) Talenu chakutalilahu chaOlaf. Washimwini nindi, yaaka yinahitihu kwosi wadiña nakutambwila nkoñi wañinza mujiki muchipompelu chawu. Olaf wayihwili anvwali jindi abula kwikala aYinsahu neyi chakwila anateli kwiteja nkoñi wañinza kushikena kwitala dawu. Etejeli, ilaña ahosheli nawu Olaf wukukaamaña muchitwamu. Chawahili nankashi. Olaf wahosheli nindi: “Iwu mulungu wawahili chikupu! Ami nankoñi wañinza twahindukileña swayi nakutachika kuhanjeka nsañu yayivulu hampinji yakudawula. Wankolesheli chikupu nawa nafuukwilihu kutachika mudimu wampinji yejima.” Hadi yaaka 40 yinahitihu, manakwetu Olaf nakalakali wumishonali mumatuña ashiyashana.

8. Muloñadi wutwatelela kumwekeshela luwi hela chakwila antu anakusakilila wanyi? Lumbululenu.

⁸ Munateli kumwekesha kukeña kudi antu imwabula kwiluka munjila jashiyashana hela chakwila hakusambila asakilila wanyi. Talenu ichi chakutalilahu. Mukwakushimwina wumu wakuSpain hampinji yadiñayi nakudizisha kadizi waBayibolu wejina daYesica wakuEcuador, wamweni kadizi kindi nakudila. Iwu mukwakushimwina wamwihwili chuma chaletesheli. Yesica walumbulwili nindi henohu kanda yabuukili kuSpain, ifuku dimu hadiña nayakudaku. Mwanindi wamwinkeleña hohu menji. Yesica wesekeli kumudimbeka mwanindi nindi yakaami kulonda yalombi wukwashu kudi Yehova. Hashimbwili wanyi, aYinsahu ayedi enjili. Ilaña Yesica hayitambwilili chiwahiku, dichi watabwili magazini yamwinkeliwu kudi awa ahela. Wayihwili nindi: “Iyi diyi yakuda yinatela kwinka mwanami?” Awa ahela esekeli kumukundeja ilaña hetejeliku. Nkumininaku, amuleteleleli yakuda nakumushila hachiisu chindi. Luwi lwamumwekesheleliwu Yesica lwamukwatili hamuchima chakwila watiyili kutama hakubula kumwekesha kusakilila kudi Nzambi hakwakula kulomba kwindi. Nkumininaku, wafuukwilihu kumukalakela Yehova. Mwafumini yuma yayiwahi muchisambu chamumwekesheleliwu!—Mukwa. 11:1, 6.

9, 10. (a) Yumanyi yamwekeneña mumafuku awaIsarela neyi chakwila kudi mudimu wakeñekeleña antu jaNzambi kudihana? (b) Nyidimwinyi yakeñekaña amayala kudihana muchipompelu makonu?

⁹ Hampinji yimu kunyima, aIsarela adihanineña. (Kwid. 36:2; 1 Kushi. 29:5; Nehe. 11:2) Makonu, ninenu mukweti kukooleka kwakudihana kuzatisha mpinji yenu, yuma yenu nikuzata nyidimu yimweluka kukwasha amanakwenu niahela. Mukwikala namuzañalu chikupu nawa mukutambwila nkisu kuhitila mukukwasha akwenu.

¹⁰ Izu daNzambi dakoleshaña amayala amuchipompelu kuzatila hamu naYehova kuhitila mukudihana kuzataku nyidimu nikulombola. (1 Tim. 3:1, 8, 9; 1 Pet. 5:2, 3) Antu ejima adihanaña akeñaña kukwasha akwawu kumujimba nikuspiritu. (Yil. 6:1-4) Komana ayilejahu dehi kudi aeluda nawu muzatiku wukalama hela kuzatila kunyikanda, mumaluña akushimwina, nyidimu yakuwahisha, hela nyidimu yikwawu? Amanakwetu azataña iyi nyidimu akuyileja nawu ekalaña namuzañalu muloña wakukwasha antu amakwawu.

11. Muhela wumu amukwashili ñahi kudi amabwambu jindi adiñayi nawu mumudimu waWanta wakutuña?

¹¹ Antu adihanaña kuzataku nyidimu  yaWanta yakutuña ekalaña nawamabwambu amaha. Shinshikenu muhela Margie wunakalakali mudimu wakutuña Matala aWanta hadi yaaka 18. Hadi yaaka yayivulu nadizishi ahela atwansi mudimu. Weluka nindi hinjila yayiwahi yakudikoleshelamu wumu namukwawu kuspiritu. (Rom. 1:12) Hampinji yamweneñayi kukala, Margie amukolesheleña kudi amabwambu jindi adiñayi nawu mumudimu wakutuña. Komana mwadihanahu dehi kuzataku mumudimu wakutuña? Hela mweluka kutuña hela mweluka wanyi, kwila mudihana kuzataku nehi?

12. Munateli kukwasha ñahi antu neyi kunamwekani wubanji wadimwekenaña?

¹² Neyi kumwekana wubanji wadimwekenaña, antu jaNzambi ekalaña nakukooleka kwakukalakela hamu naNzambi kuhitila mukukwasha amanakwawu munjila jashiyashana. Chakutalilahu, ahanaña mali kudi amanakwetu adi mukukaankila. (Yow. 13:34, 35; Yil. 11:27-30) Cheñi ayikwashaña kuhitila mukuwahisha nikutuñulula matalawu anahumuki. Gabriela muhela wakuPoland, itala dindi dakisikili nadibaji. Watiyili kuwaha chelili amanakwetu amuyipompelu yadiña mukamwihi enzi nakumukwasha. Wahosheli nindi: “Nukuhosha wanyi hayuma yinajimbesheli muloña hiyuma yakumujimba hohu. Ilaña nukuhosha hayuma yayivulu yinnatambwili. Ichi chuma chinankwashi kwiluka nami kwikala muchipompelu chawakwaKristu hikukooleka chikupu nawa mwafumaña muzañalu.” Amavulu akwashañawu hanyima yakumona kukala ahoshaña nawu ekala namuzañalu chikupu. Antu akalakelaña hamu naYehova niwena ekalaña namuzañalu chikupu.—Tañenu Yilwilu 20:35; 2 Akorinda 9:6, 7.

13. Kudihana kunateli kukolesha ñahi wubwambu wetu naYehova? Shimunenu chakutalilahu.

¹³ Muhela Stephanie niakwawu akwakushimwina adiña namuzañalu wakukalakela hamu naNzambi kuhitila mukukwasha akwawu aYinsahu matunduka enjili muUnited States. Stephanie wayikeñeleli matala mwakukama nakuyifumisha kwiluña kwamwekeneni wubanji. Stephanie wahosheli nindi: “Twatiyili kuwaha hamuzañalu nikusakilila kwamwekesheliwu hamuloña wakukeña kwayimwekesheleliwu kudi amanakwawu amukaayi kejima.” Wabombelelihu nindi, “Iyi yisaka yamweni neyi iyetu  twayikwashili, ilaña wena diwu atukolesheli chikupu. Kukeña, kunuñañana, chikuhwelelu nikushindamena hadi Yehova kunatuleñeli kusweja kumukeña Yehova nawa chumichi chinatuleñeli kusakilila hayuma yejima yitwatambwilaña mukuloñesha kwindi.”

14, 15. (a) Yilwilwinyi yamwekesheliyi kaprofwetu Isaya? (b) Akwakushimwina aWanta anateli kumwimbujola ñahi Isaya?

¹⁴ Kwila mukeña kukalakela hamu naYehova chikupu nehi? Kwila muya nakumukalakela kwiluña kudi kukaankila kwawakwakushimwina mukunu kuloñesha kwindi nehi? Hela chochu, ambuña aNzambi hiyatela kuya kwiluña didi kwakulehi kulonda ayi nakumwekeshelaku chisambuku. Chihandilu chawu dichayileteshaña amanakwetu niahela kuya nakuzatila kumaluña amuchidiwu. Yilwilu yawu yidi neyi yakaprofwetu Isaya. Chelili Yehova yehuli nindi “Nukutemeshanyi? Wukutuyila hinyi?” Yena wakwili nindi “Yamonu, ntemeshami.” (Isa. 6:8) Komana mudi namuchima wakudihana nawa chihandilu chenu chikuyiteja kuya nakuzata nyidimu yaWanta yinakukeñeka? Nyidimwinyi yimunateli kuzataku?

¹⁵ Yesu wahosheli kutalisha kumudimu wakushimwina nikwilisha atumbanji nindi: “Mudimu wakwaañula weneni, ilaña akwakukalakala anakehi. Dichi, mulembelelenu Mwini mudimu wakwaañula kulonda yatemeshi akwakukalakala kumudimu windi wakwaañula.” (Mat. 9:37, 38) Kwila mukalakela kwiluña kudi kukaankila hela kuzataku wupayiniya nehi? Hela kwila mukwashaku antu amakwawu kukalakala iwu mudimu nehi? Amanakwetu niahela amavulu anamoni nawu njila yayiwahi yakumwekeshelamu kumukeña Nzambi niakwawu antu, hikuya nakukalakela kumaluña kudi kukaankila kwawakwakushimwina. Kudihu njila jimwatela kukalakelamu chikupu mudimu wakushimwina? Neyi mwila mwenimu mukwikala namuzañalu chikupu.

16, 17. Kukoolekanyi kukwawu kwekalaku neyi mudihanaña kudikita nyidimu yaYehova?

¹⁶ Kwila mudihana kuzatilaku haBeteli hela kukwasha nyidimu yakutuña yidi mukuloñesha, chidi neyi kuzataku mafuku antesha hela kumeneka nehi? Mukuloñesha kwaYehova munakukeñeka antu atela kuzataku nyidimu, antu atela kuzata mudimu wudi wejima wukuyinkawu nikuya kumaluña kunayitumiwu. Atela kuzata mudimu wudi mukukaankila hela chakwila eluka nyidimu yacheñi. Hela chochu, Yehova watiya kuwaha nawantu adihanaña kuya nakuzatila kudi kukaankila.—Mas. 110:3.

¹⁷ Komana mwakeñaña kuyidizisha kulonda mwiluki chakuzata nyidimu yaYehova? Neyi mwiteja kuyidizisha, munashikihu kuya kuShikola Yawakwakushimwina Nsañu Yayiwahi yaWanta. Iyi shikola yadizishaña amayala nawambanda adi mudimu wampinji yejima kulonda adikiteña chiwahi nyidimu yaWanta. Ejima asonekeshaña kuya kuniyi shikola, atela kwikala namuchima wakwiteja mudimu wejima wukayinkawu hanyima yakumanisha shikola. Komana kwila mudihana kulonda muzati nyidimu yayivulu nehi?—1 Kor. 9:23.

18. Chumanyi chimunakufwila hamuloña wakukalakela hamu naYehova mafuku ejima?

¹⁸ Etu antu jaYehova twatela kwikala nachisambu, luwi, kukeña nikudakamena wumu namukwawu. Neyi twila mwenimu, tukwikala namuzañalu nikuwunda. (Ñal. 5:22, 23) Hichikweti muloña nachidi chihandilu chenuku, munateli kwikala namuzañalu kuhitila mukwimbujola chisambu chaYehova nikwikala akwakukalakala hamu nindi alemeshayi.—Yish. 3:9, 10.